Read Sabu YUDAS 1 Bible Online

YUDAS 1 - Sabu bible

YUDAS 1

¹ Tuahhu-tuahhu do alla pepedoa nga do hajha do ddhei tarra ri Deo Ama nga do jaga ta tu Yesus Kristus. Mii annu ri Yesus Kristus, ya — Yudas — tuahhu ngati Yakobus,

²do nga lua henao: Ki ie mudhe he ta wie ri Deo ne lua tarro ie nga menyarro mangngi, lua ruba dhara nga lua kehaka dhara do re'a nga lale tu mu.

³Tuahhu-tuahhu ddhei ya! Do nga lua pedabbho tarra-tarra ya ne bhuke huri do nadhe tu mu jhara lua helama tona ie do narro do lake ri di hela'u-la'u. Tapulara pa dhara awe nadhe mii do ta pedide he ke ya ta takka lii pa mu ri do nadhe mita pee mu nga la'a-rui tu lua manno nga kaho mu do alle pe wie he wari we ri Deo lohe la lodho do nami-mii ne, pa annu-niki No.

⁴Rowi nga do dho nara ta toi ri di, hee ke do parri ddau, do maho dhara-dhara ma telora di. Ro he, ddau-ddau do bhodho, do pepote-peappi ne lii jhara lua ruba dhara Deo di ne, mita nara ro ne awe ta pegolo ne lua ddhei ade nga penge ro do ri hi ngati rupehakku he. Jhe do nyakke ke Yesus Kristus ri ro, do kinga tu di, wata No he ke ne Mone Pereda nga Muri di. Ne lua wolo tu ro do alle ke pedare-pekewahho rai uru-rai tare pa dhara Buku Lidara-Likewahhu Deo.

⁵ Hari-hari ne na harre do toi ke ri mu ma. Maji lema ta mina harre ddhei ri ko ya ta pehewina mu jhara lua mina mii Muri ne pehelama do Israel ngati ihi rai Mesir, tapulara pa dhai leto pemade ne ddau-ddau do dho parahajha he ti telora ro.

⁶Henge lema ne naju-naju Deo do hihu do jhajjhi ngati higa do eara pa ro, hakku tade hani ri ro ne era pee ro. Ne naju-naju Deo do na harre do ujhu do laggu ke ri Deo ri rate do dho i'a apa wari pa era do kerabba do pa dha'i rai raiwawa dhe. Pa ni ke ro ne rate lohe la awe happo hala tu ro pa Lodho do meliri dhara ne hine.

⁷ Henge lema we rae Sodom nga Gamora nga rae-rae do peumu he, do ne ana rai he do tao ne lai-lai do mii do tao ri naju-naju Deo do na harre. Ne lai-lai do tao ri ro, lua dhawu nga bute nga ngali nga bhodho, hakku ta wolo he ke ro pa dhara rao-ai do peloro ne, tu ta jadhi lai pehewina tu hari-hari ddau.

⁸Mina harre lema ne ddau-ddau do na harre do peito-perijho ne lai-lai do rihi ngati ihi we tade tao ri ro ne lubhu harro nga menyilu penaja nga ngi'u ro miha. Ta pewawe we ri ro ne higa Deo, jhe kara nga menihi ne do kemuki do dhida do kelodo do era pa era do mmau do megala ne.

⁹ Mikhael le miha do kattu ngati hari-hari naju Deo, ngaddi dho ta tao mina harre. Pa awe pehala no nga wango ta perabe ne ngi'u Musa ne mita toi ta nadu ne do nara, bhani dho Mikhael ta pehappo hala Wango ri likara nga menihi. Wata ke ne lii Mikhael, ”Muri ne do medae ta hegarre au!”

¹⁰Tapulara lii kara-li menihi, ne pemuhu ne ddau-ddau do na harre nga hari-hari ne nga we do dho tada ri ro. Do dho hala ke mi bhada-bhada do dho bhule nga penge he, do ne tada ne nga-nga wata ke ri lua tada do lore ke peera pa dhara pengero. Tapulara ri lai-lai do na harre ke ne tu ro ta nappi ta kebi ri lua apa nga kerewe he.

¹¹ Apa nga kedhaha ke ro! Alle ke ri ro penarro ne loro jhara do narro ri Kain. Mita nara doi, ta pallu-anni ke ro la dhara ro'a hulinga teballi ne, hela'u mii Beliam. Jhe pemae tebho-ttei ro taga tari lua pelawa-petaddhu ro do mii tao Korah he.

¹²Pa awe tao mu lai-tao, ne wue ddau-ddau do na harre do pemengalli dhara ddau pa telora mu. Rowi do nga'a nga lala ro, nga do dho bhule nga lua mekae dhara, jhe molo ta penge ngi'u ro we miha. Hala dho ke ro mii merammu do wi'o ri ngallu he, tapulara adho do pepuru ajjhi. Hala le dho ma ke ro mii ajhu do dho bhule nga wue he maji lema ta pa awe wue woajhu, do mii ajhu-ajhu do alla pebhita amo he ke, jhe do made tu-tu ke.

¹³Do hela'u mii kolo nawa he pa dhara pana dahi do kehabbha woro pudi, do mina harre le ke ro ne pekehabbha woro wui ai-wui tao ro do pemekae dhara ddau. Ro do dho hala ke mii bhada do we'u la hebhakka-hebhakka he, jhe ri Deo do alla ke pepemoko ne era tu ro, pa era do kerabba guru-rai do rihi meliri dhara ne, lohe la lodho do nami mii ne.

¹⁴ Henokh, pidu lapi huhu ddau ngati Adam, do uru he do ngaddi ta pedara jhara lua ddau do mina harre. Ne ane Henokh, ”Heleo, do ta dakka Muri nga do tabbha-tabbha ne naju No do mmau do megala he.

¹⁵Tu ta ma happo halla hari-hari ddau. Do ta wolo ri Muri ne ddau-ddau do apa do kerewe taga tari wui ai wui tao ro do keti-ketinga he. Jhe do ta wolo ri No ne ddau do tao lubhu harro nga menyilu he, nga do pelawa-petaddhu he taga tari hari-hari likara nga menihi do pali ri ro he.”

¹⁶Ne ddau-ddau do na harre do pee nga pegu-pegallo we jhe pelaha nga ddau do wala. Muri mada ro pedutu nga lua ddhei nge nga ade ro we do nga lubhu-harro nga menyilu he. Peha'e-ha'e ri ro ne jhara lua ngi'u ro miha, jhe jhore ddau mita nara ro lua mangngi.

¹⁷Tapulara Tuahhu-tuahhu ddhei ya, henge we ne nga ne do uru he, do pali ri rasul-rasul Muri Yesus Kristus he.

¹⁸ Do peke ke ri ma uru jhara pa mu, ta do ki hedharra ke ne awe pedakka rahi raiwawa dhe do medae ta hhau ne ddau-ddau do ta mamari-madholo mu, ddau do ddhei ta muri mada pa dhara pedutu ne lua ddhei nge nga ade ro do nga lubhu harro nga menyilu he.

¹⁹Ro do na hedhe ke ne ddau do pedubhu lua pehagghi-petala he. Adho ro do pereda ri Henga Deo, tapulara ri lua ddhei nge nga ade ro ke do ddau raiwawa ne.

²⁰Tapulara mu Tuahhu-tuahhu ya, peteme we teru ne muri mada mu do petito ri mu pa dhara parahajha pa Yesus Kristus. Lua manno nga kaho mu do dhai mmau nga megala. Pa dhara awe napoanne lema hebhajha we nga Henga Deo,

²¹jhe muri mada we loro-loro pa dhara lua herimu-herugu lua hajha nga ddhei Deo, pa dhara mate ko ri mu ne lua ruba dhara Yesus Kristus Muri di, do medae ta wie pa mu ne muri mada do petu nga do peloro ne.

²²Penaja nga ddau-ddau do keba'a-kepapi ne ade ro, do jhamma ke mu ta pedhelo ne ruba dhara mu.

²³Happi we pemahhu ne ddau he ngati dhara rao-ai tu ta pehelama ro. Penaja nga ddau-ddau do wala he, do jhamma ke mu ta pedhelo ne lua ruba dhara mu do lere ri lua meghighi-meda'u ne, tapulara paddhu we lohe la bhara ro le do alla pepera'i-pepetongo he ri lua ddhei ro do nga lubhu harro nga menyilu he.

²⁴Deo, do makka ta jaga nga meniga mita do dho era mu do bunu, jhe do nara ta aggu mu la hedhapa No do dhida do kelodo ne nga mengallu nge nga kehaka dhara jhe do adho do era nga lua kura nga terujha ne,

²⁵do titu wata No ke ne Deo, Mone ma'i-Mone golo di do pelake jhara Yesus Kristus Muri di. No ke ne Deo do dhida do kelodo, do ketutu, do higa do pereda rai tare ti petari titu ju hape ma dhara awe do nadhe, jhe loho la lodho do nami mii ne! Amin.