Read Sabu WAHYU 1 Bible Online

WAHYU 1 - Sabu bible

WAHYU 1

¹Ne ihi buku do nadhe jhara lua ne nga ne do peteleo ri Yesus Kristus, jhara lai-lai do medae ta jadhi. Ne lai-lai do na harre lipika ri Deo pa Kristus mita pedhelo ri No pa annu-annu Deo he, ne nga ne do ta henginga ne jadhi. Pepue ri Kristus ne naju No la nga Yohanes, naannu No, tu ta la pepeke ne lai-lai do na harre pa Yohanes.

²Moko ri Yohanes lema ta pedhiri ke hari hari ne nga ne do ngaddi ri no he, jhe nadhe ke ne pika no jhara litakka Deo do perue ri Yesus Kristus do pelake jhara likololo Yohanes.

³Mangngi nga mengallu dhara tu ddau do ajhe nga ddau do dhanno ne lii do dare do kewahho ri buku do nadhe jhe pedute ne nga ne do hure do bhuke pa dhara buku do nadhe. Rowi adho ke do rajja ri ne medae ta jadhi ne lai-lai do na hedhe.

⁴ Tuahhu-tuahhu do era pa pidu bhue jemaat do pa ihi rai Asia! Ya, Yohanes, do henao do ta hammi ri mu ngati Deo — ne lua tarro ie nga menyarro mangngi nga lua kehaka dhara — do lore ke peera, nga do pee ta era loro — jhe mina harre lema ngati pidu henga do ere pa hedhapa era mejaddhi Deo ne,

⁵ jhe nga ti Yesus Kristus, hakahi do henarru ne. No ke ne do petari-tari ne do pemure bhale wari ngati dhara made mada, jhe No ne do pereda pa hari-hari duae raiwawa. Yesus do hajha do ddhei nga di, jhe ri lua made No ke, ne golo ri No ngati lubhu harro nga menyilu di,

⁶ jhe pejadhi di ta hekejie ddau ngati mone tunu menahu-mone tunu menahu do pemoke Deo, Ama No. Yesus Kristus ke ne do ketoo kelodo nga do higa nga pereda lohe la lodho do nami mii ne. Amin!

⁷ Heleo we, ne dakka No pa dhara merammu. Hari-hari ddau do medae ta ngadde No, mina harre lema ri ro he do alle petabbho No. Hari-hari ddau-rai pa raiwawa do medae ta tangi lalu taga No. Oo, do tarra ! Amin!

⁸ ”Ya ke ne do petari nga do pedakka,” ane Muri Deo, do era, do loro peera nga do peloro ta era, Do Mone Rihi Wiki Higa nga Pereda.

⁹Ya, Yohanes, tuahhu mu do hela'u mii mu lema do nee pa dhara dhue-hape hedui-herui do narro do lake ie tari nadu we do pedute Kristus. Makka tee Makka tee nga wangnge di ta dhui-hape hedui-herui mii annu-niki do unu-do oha No. Ne hore ya ma Pulu Patmos taga tari pemenyabbhe ri ya ne litakka do ngati Deo ne, do perue ri Yesus Kristus do pelake jhara lipeliba No.

¹⁰Pa lodho Muri ne, ta helibho ke ya ri Henga Deo, jhe rangnge ri ya ne lii do maddu — mii lii wotabbe he — do pedai lii pa kejhunga ya.

¹¹Mina hedhe ne lii do naanne, ”Bhuki we ri au ne nga ne do ngaddi ri au jhe moe we ne buku napoanne la hari pidu bhue jemaat do na hedhe: Efesus, Smirna, Pergamus, Tiatira, Sardis, Filadelfia nga Laodikia.”

¹²Ta kebhibha ke ya ju la kejhunga tu ta heleo ta nadu ne do pedai lii nga ya ne. Moko ta ngaddi ke ri ya pidu bhue kae era pejaddhi do tao ngati mela lara.

¹³ Pa telora kae lapu do na harre era heddau do titu do dho hala mii ddau raiwawa. Ne ddau do naanne do nga pake juba dhedho hape la kabha jhalla. Pa kabu-uhu ne do pake henabbhi kabu ti mela lara.

¹⁴ Ne rukattu no do pudi mii rrau ki'i jhawa he, do mii pudi poro wangngu he. Ne namada no do weo kedu-kedu mii ai he;

¹⁵ ne kae no do weo mii mara do tune he. Ne lipedai No do kedu mii ei-petiri he.

¹⁶Ne ruai kedhanga No do nga parru pidu bhue moto, jhe ngati dhara ubha ubha No ta mahhu ke hebhangngu kelewa do na'a do rakka dhue. Ne tangamada No do kelala mii weo lodho pa nilodho do kejarre he.

¹⁷ Ta ngadde No ri ya, ta peheguru-anni ke ya pa hedhapa No mii ddau do made he. Tapulara ta takke ke ri No ne ruai kedhanga No pa ya, jhe lii, ”Bhole meda'u! Ya ke ne do petari nga nga do pedakka ne.

¹⁸Ya ke No ne do muri ne! Alla ke Ya pemade, tapulara heleo we, nee ke Ya do muri lohe la lodho do nami mii ne! Do nga kuaha Ya pa lua made mada, nga pa raiwawa ddau do made.

¹⁹Rowi do mina harre ke, bhuki we ne lai-lai do ngaddi ri au, lai-lai do era pa dhara awe do nadhe, nga lai-lai do medae ta jadhi hine.

²⁰Na hedhe ke ne do pedabbho ngati hari pidu bhue moto pa ruai kedhanga Ya dhe, ngati hari pidu kae lapu mela lara do na hidhe: Ne pidu bhue moto hidhe, ro ke ne naju Deo ngati jemaat do pidu bhue he, jhe ne pidu bhue kae lapu he, wala dho ke ngati do pidu bhue jemaat he.”