Read Sabu WAHYU 10 Bible Online

WAHYU 10 - Sabu bible

WAHYU 10

¹Moko ta ngadde ke ri ya, heddau naju Deo do dhai tarra ne kedi'i nga keharru, do hewala ri do puru ngati era do mmau do megala. Ne naju Deo do naanne do herimo ri merammu, jhe pa kattu ne do lale ri heroo. Ne tanga-mada no do weo mii weo mada lodho he, jhe ne ru bhebho no do mii geri-ai he.

²Pa dhara wolaabba no do era helulu buku do lulu iki do alle ke peboke. Ne rubhebho kedhanga no do jhalli pa dhara dahi, jhe ne hebhakka keriu ne ri do jhalli pa kolo lede.

³Moko ta peka ke no nga lipeka do maddu do mii likeau hinga-hinga he. Ta alla pepeka ne naju Deo do naanne ta bhale ke ri likedu-kedarru pidu bhue dhoro.

⁴Nga mina harre pa dhara nga kedarru ko hari pidu bhue ne dhoro he, do dhai ke ri ya ta bhuki, tapulara ta rangnge ke ri ya ne lipedai ngati era do mmau do megala, ”Bhole peteleo dae ne ne nga ne do pale ri dhoro do pidu bhue he, bhole bhuki dae!”

⁵ Moko ne naju Deo do ngadde ri ya do titu pa dhara dahi nga pa kolo lede ne, ta dhede ke ne ruai kedhanga no ju la liru.

⁶Ta pehupa ke no nga ngara Deo do muri loro ne, do Mone peera liru nga raiwawa nga dhara dahi mina harre lema nga hari-hari ne nga we ne do era pa dhara no. Ta lii ke ne naju Deo do naanne, ”Adho ke do ta pelajho ri ne awe ne!

⁷Tapulara kinga dhai ke ta tio ri naju Deo do kepidu ne, ne wotabbe No, do ta pekako ke ri Deo ne lua pedabbho No do pewune ne, mii do alle ke pepeke ri No pa annu-annu No he, nabi-nabi he.”

⁸ Ta alla pemina harre, ta lii ri ke ne lipedai do ngati era do mmau do megala ne pa ya. Ne ane No, ”Kako we la aggo ne lulu buku do lulu iki do nnai do boke pa dhara wolaabba naju Deo do jhalli pa dhara dahi nga pa kolo lede do na nidhe.”

⁹Moko ta kako ke ya la nga naju Deo do naanne, jhe ame ri ya pa no mita wie ri no pa ya ne lulu buku do lulu iki do naanne. Ta lii ke no, ”Aggo we jhe nga'e we ne nadhe. Pa dhallu au do ta jadhi ta do paddhu no, tapulara pa dhara ubha au do natta no mii ei-oni he.”

¹⁰Ta aggo ke ri ya ne lulu buku do lulu iki do naanne ti ruai no, jhe nga'e ri ya. Pa dhara ubha ya do natta no mii ei-oni he, tapulara ta alle pedalle ri ya, pa dhallu ya ta jadhi ta do paddhu ke no.

¹¹Ta alla pemina harre, ta pereda ke pa ya, ”Pelebe we hewari ri ne lii do ngati Deo ne, jhara lua ddau-rai-ddau rai, rai pereda-rai pereda, lipedai-lipedai nga duae-duae.”