Read Sabu WAHYU 11 Bible Online

WAHYU 11 - Sabu bible

WAHYU 11

¹ Ta alla pemina harre, ta wie ke pa ya hekedalli ne ajhu do miga ta mii ajhu luji he, moko ta pereda ke, ”Kako we la luje ne Ammu Deo nga dhea era tunu-menahu ne. Kire we henga ne ae ddau do wie hu nga mejura pa dhara Ammu Deo ne.

² Tapulara bhole luje ne kebhalla do pa tele Ammu Deo ne, rowi ne era do naanne do alle ke pejhole pa ddau-ddau do dho tade Muri he. Do medae ri ro ta jhalle ta kerupe ne rae do mmau do megala ne pa dhara appa nguru dhue warru.

³Do ta pepu ri ya do dhue ddau hakahi Ya do nga pake bhara lua lalu, jhe do ta pepeke ri ro ne lii do ngati Deo ne pa dhara 1260 lodho.”

⁴ Ne do dhue hakahi do na harre wala dho ke ngati dhue kepue ziatun nga dhue bhue kae lapu do era pa hedhapa Muri liru nga raiwawa.

⁵Kinga ddei ddau ta hakku ta tao lai do woapa penaja nga ro, moko ngati dhara ubha ro ta hhau ke ai do ta pekappu ladu-ladu ihi muhu-ihi lawa ro. Nga loro jhara do mina harre ke, ne pemade ri ro hari-hari ddau do ddhei ta pepaddha ro.

⁶ Do nga kuaha ro tu ta henabbhe liru mita do dho puru ajjhi pa dhara nga pepeke ri ro ne lii do ngati Deo ne. Jhe ro lema do nga kuaha pa hari-hari mada ei-wattu, tu ta pebhari ei-loko ta jadhi ta raa. Do nga kuaha lema ro ta wabbe raiwawa ri hari-hari worawwu lua apa, parri we e'e ne ddhei ro we ta tao.

⁷ Kinga moko ke ri ro ne pepeke ne lii do ngati Deo ne, ne bhada do mahhu-anni ngati ro'a made mada ne do ta pelawa ke nga ro.

⁸ Jhe ne ngi'u ro do made he, do ta pebhari-gore ke pa rujhara-ae pa dhara rae-ae, do pa mii Muri ne ketoe-peabbha-rappa. Mii lii pepahhi ngati ngara rae do naanne Sodom kiadho Mesir.

⁹Ddau-ddau ngati hari-hari rai-pereda, huhu, lipedai nga ddau-rai do ta heleo ne ngi'u ro do made pa dhara tallu lodho nga heatta, jhe adho do wie lua pa ro ta pedana ne do made do na harre.

¹⁰Ddau pa raiwawa do ta mengallu nge nga kehaka dhara ke ri lua made do dhue hakahi do na harre. Do ta tao lua rame ro ta pehewene ne lua made do naanne, jhe mira ro ta pemoa bhara parahe heddau nga heddau, taga rowi ri do dhue ddau nabi do na harre do dhai ae ke ne wie lua hedui-herui pa hari-hari ddau raiwawa.

¹¹ Ta ludu le tallu lodho nga heaata, ta dakka ke ne henga muri mada ngati Deo, jhe maho la dhara do dhue ddau nabi do na harre. Moko ta kaddhi ke ro ta titu, hakku hari hari ddau do ngaddi ro ta meda'u ke do dho ie ta nga-nga.

¹² Ta alla pemina harre, ta rangngi ke ri do dhue ddau nabi do na harre ne lipedai do maddu do pedoa ro ngati era do mmau do megala, ”Mai we, ha'e we ma dhe!” Moko pa hedhapa ihi muhu-ihi lawa ro, ta ha'e ke ro la era do mmau do megala, jhe herimu ro ri merammu.

¹³ Moko pa dhara awe do naanne ta jadhi ke dhai-ie do dhai meliri dhara. Bhagi henguru ngati rae do naanne mae tebho-ttei, jhe do pidu tabbha ddau made ri dhai ie do naanne. Ne ddau-ddau do hewala he, dhai tarra ne meda'u, moko ta wue-waje ke ri ro ne lua dhida nga kelodo Deo do pa era do mmau do megala ne.

¹⁴Ludu ke ne lua apa nga kerewe do kedhue ne. Tapulara heleo we! Ne lua apa nga kerewe do ketallu ne, pa dhara la'a bhalle ri hudi do ta dakka ke.

¹⁵ Moko ta tio ke ri naju Deo do kepidu ne, ne wotabbe no ne, moko ta rangngi ke ne lipedai-lipedai do maddu pa era do mmau do megala, do pali, ”Lua higa nga kuaha ta pereda raiwawa do nadhe do pa dhara wolaabba Muri di ke nga pa Duae Mone ma'i-Mone golo di ke ne, do jaje ri no ne. Do medae ke No ta pereda lohe la lodho do nami mii ne!”

¹⁶Moko ne kattu do dhue nguru do appa ddau do mejaddhi pa hedhapa Deo he, ta lakku rutu ke jhe peheguru-anni la worai ta wie hu nga mejura pa Deo.

¹⁷Ane ro, ”Muri, Deo Do Mone Rihi Wiki Higa nga Pereda ne, do era, nga do lore ke peera! Peha'e ri jhi ne kolo lii ie-ae pa Au rowi do alle ke ri Au pepake ne kuaha Au do mone-ae ne, jhe do nee ke do jhari ta pereda!

¹⁸ Ne ddau-ddau do dho tade Muri, peluru-penyami ke, rowi do dhai ke ne awe pa Au ta hegabbhe ne lua kete nga bubu dhara Au, jhe do dhai lema ke ne awe pa Au ta pehappo ne hala ddau-ddau do made. Nadhe ke ne awe ne tu ta wie ne pai-pala pa annu-niki Au, nabi-nabi, nga pa hari-hari annu-niki Au, ro hari-hari do wie hu nga mejura pa Au, do kepai nga do naiki. Nadhe ke ne awe tu ta pemae-tebho-ttei ne ddau-ddau do peape raiwawa!”

¹⁹ Moko ta boka-anni ke Ammu Deo pa era do mmau do megala jhe ngadde ne Patti Lipejaji ne pa dhara no. Moko ta peki'e ke ne bhela nga likedarru dhoro do kedu-kedarru nga kepuka-kerajji, mina harre lema dhai-ie nga ajjhi-es do mita tude he ke.