Read Sabu WAHYU 12 Bible Online

WAHYU 12 - Sabu bible

WAHYU 12

¹Moko ta ngadde ke pa ihi liru hahhi do madalae do rihi ngati ihi. Heddau mobanni do nga pake mada-lodho mii bhara pake no, do pa dhara nga titu pa dhida warru. Pa kattu no era hewue labba do ngati henguru dhue bhue moto.

²Ne mobanni do naanne do pa dhara nga mejanni-ihi jhe do dhai ke pa rai-pa warru ta kehoo-dhara, moko ta peka ke no ri leru ri jhala lala paddha.

³ Moko ta ngadde ke pa ihi liru hahhi ri do madalae. Era hengi'u debho mone-ae do mea do dhai tarra ne mone-ae do nga kattu pidu bhue jhe nga tadu he nguru bhue tadu. Pa hewue-hewue ne kattu no do nga pake hewue labba.

⁴ Ri ru lai no ne ta kewaru ke ri no bhagi tallu ngati moto-moto pa liru jhe nabha ma raiwawa. Ne debhoho do naanne do titu ke pa hedhapa mobanni do ta kehoo dhara do naanne, do nga lua pedabbho ta mate ta dalle ne ana ri mobanni do naanne.

⁵ Moko ta metana ke ri mobanni do naanne heddau ana momone do ta pereda pa hari-hari ddau-rai ri dabbho kajji bbhahhi. Tapulara ta rabe ke ana do naanne ngati mobanni do naanne, jhe aggo la nga Deo, nga la hedhapa kedera era mejaddhi No ne.

⁶Moko ta perai ke ne mobanni do naanne la padha-ae, la era do alle ke pepemoke ri Deo tu no. Pa era do naanne ke do ta piare-peloje no 1260 lodho ne tui.

⁷ Moko ta jadhi ke ne lua pedhutu-pemuhu pa era do mmau do megala. Mikhael hela'u-la'u nga naju-naju no pemuhu penaja nga debhoho do naanne. Jhe ne debhoho do naanne lema do rabhe ri naju-naju no ta pelawa nga Mikhael.

⁸Tapulara jharra ne debhoho do naanne. Pa debhoho do naanne nga pa naju-naju no he adho ke do wie lua ri ta pee pa era do mmau do megala.

⁹ Ne debhoho do naanne ta nabhe ke la tele. No ke nedebhoho weka ne, do ne ngara no Wango kiadho Henga Kerabba, do pelu hari hewue raiwawa dhe. Ta nabhe ke no ma raiwawa nga hari-hari naju no he.

¹⁰ Moko ta rangnge ke ri ya ne lipedai do maddu pa era do mmau do megala, do pali, ”Awe nadhe ke, ne awe tu Deo ta ma'i ta golo ne annu-niki No. Pa dhara awe nadhe ke ne pedhelo ri Deo ne kuaha No mii heddau Duae. Pa dhara awe nadhe ke ne Duae Mone ma'i-Mone golo do jaje ne do ta pedhelo lema ke ne kuaha No. Rowi ne do peanynyi tuahhu-tuahhu di he pa hedhapa Deo, anni lodho nga anni maddha do alla ke pemahhu ngati era do mmau do megala.

¹¹Do alle ke no pepejharre ri tuahhu-tuahhu di he ri raa Ana Ki'i Jhawa ne, nga ri lii do mola do mira do ngati Deo ne do pepeke ri ro he. Do bhani jhula-anni ro ta jhole ne ngi'u ro tade made.

¹²Rowi do mina harre ke, do jhamma ke, era do mmau do megala nga hari-hari do era pa dhara no ta mengallu nge nga kehaka dhara. Tapulara apa nga kerewe ke raiwawa nga dhara dahi, rowi naanne ke Wango do puru la nga mu, do puru nga bubu dhara do dhai kete tu-tu, rowi do toi ke ri no ta do nee hudi he ke ne awe unu no ri.”

¹³Ta dhai ta toi ri debhoho do naanne ta do alle ke no pehore ma raiwawa, ta jhari ke ta hudhe ri no ne mobanni do alla pemetana ana do naanne.

¹⁴ Tapulara pa mobanni do naanne do wie ke hemawo rualla luji-ae do balla, mita ie no ta lila la era no pa padha-ae ne, do pa ni ke no do ta piare-peloje pa dhara tallu bhue ttau hebhakka, ta ludu ke no ngati lua hudhe nga perage ri debhoho ne.

¹⁵Moko ta hebue ke ri debhoho do naanne ne ei do dhai ae ngati ubha no ju la nga mobanni do naanne mita piro no ri ei ne.

¹⁶Tapulara ta ruba dhara ke raiwawa nga mobanni do naanne, ta henganga ke ne ro'a rairo ngati raiwawa jhe dalle ne ei do ngati ubha debhoho ne.

¹⁷Ta bubu dhara ke ne debhoho ne nga mobanni do naanne, hakku ta hudhi la peraga ke ne kolo loro do wala he ngati mobanni do naanne, hari-hari ddau do pedutu ne lipedara-lipedara Deo, nga do pelebe ne lipeliba jhara lua Yesus nga kuaha No.

¹⁸Moko ne debhoho do naanne ta kako ke la titu pa tabbi dahi.