Read Sabu WAHYU 13 Bible Online

WAHYU 13 - Sabu bible

WAHYU 13

¹ Ta alla pemina harre, ta ngadde ke ri ya hengi'u bhada do hhau ngati dhara dahi. Ne bhada do naanne do nga tadu henguru laa, jhe do nga kattu pidu bhue. Pa tadu he helaa-helaa do era labba hewue, jhe pa hewue-hewue ne kattu he era do do bhuki ri hahhi ngara lua kare nga menihe Deo.

² Ne bhada do ngadde ri ya do naanne ne worawwu no a'i do mii maha do keluru he, jhe ne kae no mii kae berua he, ne hewangnge no mii hewangnga hinga he. Moko ta wie ke ne bhada do naanne ri debhoho ne lua rui no miha, mina harre lema ne kedera era mejaddhi no ne nga lua kuaha no do mone-ae ne.

³Hahhi ngati telora kattu do pidu bhue ngati bhada do naanne, hala dho mii do ngaddi ta ta no'e do dhai bhalla he, tapulara do ie ke no'e do naanne. Hari hewue raiwawa do pedutu ke ne bhada do naanne nga dhai madalae.

⁴Ta wie hu nga mejura ke ro pa debhoho do naanne, rowi do alle ke pewie ri no ne kuaha no pa bhada do naanne. Jhe mina harre lema ta wie hu nga mejura ke ro pa bhada do naanne. Ta lii ke ro, ”Bhule dho ke do hela'u ri nga bhada do nadhe! Bhule dho ke do nara ri ta pemuhu-pelawa nga no!”

⁵ Pa bhada do naanne do wie lua ke ta pali ne lai-lai do dhai lena nga hegitu ta kare-menihe Deo. Do wie lua ke pa no ta pereda appa nguru dhue warru ne tui.

⁶Moko ta jhari ke no ta kare-menihe Deo, nga ngara Deo ne. Mina harre lema ne era pee Deo ne, nga hari-hari do era pa era do mmau do megala ne do kara do menihi le ke ri no.

⁷ Do wie lua lema pa no ta pereda pa hari-hari huhu, rai pereda, lipedai nga ddau-rai.

⁸ Hari-hari ddau do muri mada pa danni raiwawa do medae ta wie hu nga mejura pa bhada do naanne, wala ngati ddau-ddau do alla ke pe bhuki ne ngara rai ti awe nga do dho peera dae raiwawa pa dhara buku ddau do muri do unu-oha ri Ana Ki'i Jhawa do alle peke habbhe ne.

⁹Rowi do mina harre ke ki do makka ko mu ta dhanno, dhanno we ne lii do nadhe:

¹⁰ ”Ddau do jhamma ta aggu nga ujhu-ai rapi-ubha, do tatu ke do ta aggu nga ujhu-ai rapi-ubha ma. Jhe ne ddau do jhamma ta pemade ri kelewa, do tatu ke ta pemade ri kelewa ma. Rido mina harre annu-niki Deo do jhamma ke ta makka tee nga wangnge jhe pee nga titu halla-anni.”

¹¹Moko ta ngadde ke ri ya hengi'u ne bhada do wala ri do hhau ti dhara raiwawa. Ne bhada do naanne donga tadu dhue la, mii tadu ana ki'i jhawa he. Ne lii no do mii lii debhoho he.

¹²Pa hedhapa bhada do petari ne, ta pake ri no ne kuaha do mone-ae do hamme ri no ngati bhada do petari ne ma. Hari hewue raiwawa nga hari-hari ne nga we ne do pee pa danni raiwawa ta pehahhi ke ri bhada do naanne ta wie hu nga mejura pa bhada do petari ne, bhada do alla ke peie ne no'e do dhai ae ne.

¹³Moko ta tao ke ri bhada do kedhue ne lai-lai do dhai rihi madalae. Pa hedhapa hari-hari ddau ta pepure ke ri no ne ai ngati liru ma raiwawa.

¹⁴Jhe hari-hari ddau do kemuki pa raiwawa ta pelu ke ri no, ri lai-lai do madalae do ie ta tao ri no pa hedhapa bhada do petari ne, jhe lii no pa hari-hari ddau do na harre ta petitu hewue do mii wewo-worawwu bhada do alle peno'e ri kelewa, tapulara do pee ma nga muri.

¹⁵Pa bhada do kedhue ne do ie ri no ta wie henga pa bhada do tao do naanne, hakku ta nara ke no ta pedai lii nga do nara ta pemade hari-hari ddau do dho wae ta wie hu nga mejura pa no.

¹⁶Hari-hari ddau, do kepai nga do naiki, do kaja nga do kehia, naannu nga do balla kattu, ta pehahhi ke ri bhada do anne mita hammi ri ro ne tada pa ruai kedhanga kiadho pa tanga-rrei ro.

¹⁷Bhule dho heddau he do nara ta pewie pewalli ne nga-nga kidho bhule no nga tada do naanne, ngara ngati bhada do naanne miha, kiadho nomo do peteleo ne ngara do naanne.

¹⁸Pa dhe do jhamma ke ta era uku nga mmau dhara. Ddau do mmau dhara do na ra ta kire ne nga ne do pedabbho ri lete-lete nome ngati bhada do naanne, rowi ne nome do naanne, ngara heddau raiwawa. Ne nome ne 666.