Read Sabu WAHYU 16 Bible Online

WAHYU 16 - Sabu bible

WAHYU 16

¹Moko ta rangnge ke ri ya ne lipedai do maddu ngati dhara Ammu Deo ne, do lii pa do pidu ddau naju Deo do na harre, ”Kako we, la dhute we ne ihi ngati hari pidu bhue paho lua kete bubu dhara Deo la danni raiwawa!”

² Ta kako ke la dhute ri naju Deo do petari ne, ne ihi paho no ne ma raiwawa. Moko ta hhau ke ne wihu-wihu do meliri dhara jhe do dhai tarra ne noho pa hari-hari ddau do nga bhada do naanne nga pa ddau-ddau do wie hu nga mejura pa wewo worawwu bhada do naanne do alle pepetito ri ro ne.

³Ta alla pemina harre ri naju Deo do kedhue ne ta la dhute ke ne ihi paho no ne la dhara dahi. Moko ta jadhi ei dahi mii raa ddau do made he, moko ta ma de ke hari-hari bhada do muri pa dhara dahi.

⁴ Ta alla pemina harre ta la dhute ke ri naju Deo do ketallu ne, ne ihi paho no ne la dhara hari-hari loko nga hari-hari mada ei-wattu, moko hari-hari ei-loko ta jadhi ke ta raa.

⁵Ta rangnge ke ri ya ne lipedai naju Deo do pereda pa ei-loko ne, do mola do mira, ”woo Mone Rihi Wiki Mmau nga megala, Deo do era, nga do lore ke peera!

⁶Do alla ke ri ro pedhutu ne raa annu-niki Deo nga raa nabi-nabi, pa awe nadhe ta tao ke ro ri Au penginu raa. Tarra, do mina harre ke ne do pekatta tu ro!”

⁷Moko ta rangnge ke ri ya ne lipedai ngati dhea era tunu-menahu ne do pali, ”Muri, Deo do Mone Rihi Wiki Higa nga Peredane, do petu nga do mola do mira ne, ne lua wolo-lua wolo do pebunu ri Au he!”

⁸Ta alla pemina harre ta dhute ke ri naju Deo do keappa ne, ne ihi paho ne la mada lodho, moko ta wie lua ke pa mada lodho mita ie ta pekappu ddau raiwawa ri pana lodho do dhai ketii.

⁹Ta pekappu ke ddau raiwawa ri pana lodho do dhai ketii ne, moko ta kare ta wagge ke ri ro ne ngara Deo do nga higa ne pa hari-hari lua apa nga kerewe do na harre. Maji lema ta mina harre, wae dho ro ta jharra ngati lubhu harro nga menyilu jhe wae dho ro ta wue-waje ne lua dhida nga ketutu Deo.

¹⁰ Moko ta dhute ke ri naju Deo do kelammi ne, ne ihi paho no ne la kedera era mejaddhi bhada do naanne. Moko hari hewue rai-pereda bhada do naanne ta kerabba ke, jhe ddau raiwawa ta ngangngi kolo we'o ke rowi do ta noro ke ne jhala lala paddha.

¹¹Moko ta wie lua-unu kolo-taddhu ke ri ro pa Deo do era pa era do mmau do megala ne taga tari lua paddha ro he nga taga tari wihu-wihu ro he. Tapulara wae dho ma ro ta jharra ngati wui ai-wui tao ro do apa do kerewe he.

¹² Ta alla pemina harre ta la dhute ri ke ri naju Deo do keanna ne, ne ihi paho no ne la dhara loko Efrat do worena ne. Moko ta kemangu ke ne loko do naanne, hakku ta nara ke duae-duae ngati bira dimu ta narru jhara dhara no.

¹³Moko ta ngaddi ke ri ya, do tallu henga apa nga kerewe do ne wewo ro do a'i mii kedhakke he. Ne kedhakke-kedhakke do na harre do mahhu-anni ngati dhara ubha debhoho ne, ngati dhara ubha bhada, nga ti dhara ubha nabi do pote do appi he.

¹⁴Ro he, henga-henga apa nga kerewe do tao lua madalae-madalae. Hari do tallu ne henga do harre ta kako ke la nga hari-hari duae pa hari hewue raiwawa, jhe la pekupu ro tu ta pedhutu-pemuhu pa Lodho mone-ae, Lodho ngati Deo do Mone rihi Wiki Higa nga Pereda ne.

¹⁵ ”Dhanno we! Ne dakka ya do mii dakka heddau mone mena'o! Mangngi nga mengallu dhara tu ddau do pee nga moko loro, jhe do jage ne bhara pake no, hakku kako dho no nga do dho bhule bhara pa ihi, jhe i'a dho ke no mekae dhara pa hedhapa ddau lowe!”

¹⁶ Ta alla pemina harre ta pekupu ke ne ddau-ddau he ri henga-henga apa nga kerewe do na harre pa era do pa dhara lii Ibrani do pehune ta Harmagedon.

¹⁷Ta alla pemina harre ta dhute ke ri naju Deo do ke pidu ne, ne ihi paho no ne pa kolo ngallu. Moko ta rangnge ke ne lipedai do maddu ngati kedera do dhara Ammu Deo ne, do pali, ”Moko ke!”

¹⁸ Moko ta peki'e ke ne bhela nga lii kedu-kadarru dhoro do pee nga kepuka-kerajji ke jhe do lere ri dhai-ei do ri hi meliri dhara. Naddi de dho ta jadhi dae ne dhai ie do mina harre ne worawwu rai tare ti petari ti awe woro nga panynyi ddau raiwawa. Nadhe ke ne dhai ie do rihi ngati meliri dhara.

¹⁹ Ne rae do worena do naanne mehakka ta tallu tajji, jhe mae tebho-ttei hari-hari rai ngati hari-hari rai-pereda pa raiwawa. Moko ta pengino ke no ri Deo, ne ei-ago ngati kabha nginu Deo — ago lua kete bubu dhara Deo do re'a do lale ne.

²⁰ Hari-hari pulu ta ila ke, jhe hari-hari lede ta marra ke.

²¹ Ajjhi-ae wowadu-es, hewue ne mejanni ne, era ma ta lammi nguru kilo gram he, do bui ngati liru, jhe nappi-kebii ne ddau-ddau he. Moko ta wie ke ri ro ne lua unu kolo taddhu pa Deo, taga tari lua apa nga kerewe do ti ajjhi-wowadu-es do naanne do rihi meliri dhara ne.