Read Sabu WAHYU 18 Bible Online

WAHYU 18 - Sabu bible

WAHYU 18

¹Ta alla pemina harre ta ngadde ke ri ya heddau naju Deo do wala do puru ngati era do mmau do megala. Do nga kuaha do mone-ae no, jhe ne weo nga kana no do peteleo hari hewue raiwawa.

² Nga lipeka do maddu ta peka ke no, ”Alla ke pekeloli! Babel do worena ne, alla ke pekeloli! Pa awe nadhe jadhi ke no ta era manga wango nga henga-henga kerabba he. Pa dhara no do muri ke heworawwu-heworawwu do rue do taru jhe do bhege dhara ddau.

³ Rowi hari-hari ddau-rai alla ke penginu ne ago lua matta dhara nga lua bute nga dhawu no. Duae-duae raiwawa do tao bute nga dhawu ke nga no, jhe ne ana-ana dhaga pa raiwawa jadhi ke ta kaja-ta kete'e ri lua ddhei nge nga ade do rihi ngati rupehakku ne do dho nara ke ta bhate wari ne.”

⁴ Moko ta rangnge ke ri ya ne lipedai do wala ngati era do mmau do megala ne, do pali, ”Mahhu-anni we, woo annu-niki Ya! Mahhu-anni we ngati dhara no! Bhole pedute we ri mu ne lubhu harro nga menyilu no, jhe dutu le ta dhui-ta hape ne lua wolo no!

⁵ Rowi ne lubhu harro nga menyilu no do heudu-huu-bhodo-lede ke hape la ihi liru, jhe do henge ri Deo ne lua apa nga kerewe do tao ri no he.

⁶ Tao we pa no do mina mii ne do alla no petao pa mu; bhale we pa no wari lipa ne ae tu hari-hari ne do tao no pa mu. Ihe we ne mago no ri bhara nginu dhue wari lipa ri ne pana ngati bhara nginu do pemoke ri no tu mu.

⁷ Wie we pa no ne bhara dhui nga hape nga lua hedui-herui, do hela'u ne ae nga lua dhida nga ketutu nga lua keruka-kerakki do alle pewie ri no ta ngino pa ngi'u no miha. Rowi do loro-loro ke no ne lii pa ngi'u no, ’Ya ke dhe ne banni-ae do parru pereda! Ya adho do mobanni wue; adho ya dhe do medae ta peabu nga lua hedui-herui!’

⁸Taga tari lai do naanne ke, hakku pa dhara helodho we do ta nappe ke no ri apa nga kerewe — banyaki, lua hedui-herui, nga lua menganga dhallu. Jhe no do medae ke ta tune pe kappu ladu-ladu ri ai, rowi do kuaha ke Muri Deo do pehappo hala no ne.”

⁹ Ne duae-duae raiwawa do pedutu nga wui ai-wui tao lua bute nga dhawu do tao ri no nga do dute ne lua ddhei mobanni do naanne do rihi ngati rupehakku ne do medae ta tangi-pali tu rae do naanne, kinga ngadde ke ri ro ne habbhu do poro koki ngati ai do pekappo ladu-ladu ne rae do naanne.

¹⁰Do medae ro ta titu ngati jjhau, rowi do meda'u ro nge ta lakka le ri lua hedui-herui no. Ne ane ro, ”Bhote eh, dhai tarra ke ne apa nga kedha rae do keto ngara do nadhe — rae Babel do dhai rui ne! Pa dhara heja we ne lua wolo au, moko dhangnge ke ne pepekako!”

¹¹ Ne ana-ana dhaga raiwawa lema do tangi-lajhu-anni taga mobanni do naanne, rowi bhule dho ke heddau he ne do walli ne bhara dhaga ro.

¹² Bhule dho ke ne do walli mela-lara, mela pudi, wowadu-wowadu nnau do gaa do merake nga mutiara unu ro; mina harre lama bhalla lenan, bhalla kelere mea, hutarra nga bhalla do mea-adu, hari-hari ajhu do hedui jhe peabu, bhara-bhara ngati gadhi nga ajhu do dhida kebhue, bhara ngati mara, bbhahhi nga wowadu pudi do meluti;

¹³kuri kajumanu, wwau mangngi — wwau mangngi pa dapu, lawoboo, hetagi, keminya; ago nga eimanynyi, terigu nga gandum; hapi nga ki'i jhawa, jara nga doka, annu-niki annu-niki, rihi ri ko ti na harre henga muri mada ddau raiwawa lema.

¹⁴Ta lii ke ne ana-ana dhaga he pa mobanni do naanne, ”Hari-hari ne nga we ne do ddhei ta unu ri au pi'a dho ke, nga hari-hari lua keruka-kerakki nga lua heree-hereba au alla ke peila. Adho ke do medae ri au ta peabu ri nga na harre!”

¹⁵ Ana-ana dhaga do kaja nga kete'e ke ri pedhaga pa dhara rae do naanne, do ta titu ke ngati jjhau, rowi do meda'u ke ro ta lakka ri lua hedui-herui no ne. Do medae ke ro ta tangi-lalu jhe wutu kattu kattu,

¹⁶jhe lii ro, ”Bhote eh, do dhai tarra ke ne apa nga kedhaha ne rae do keto ngara do nadhe! Do pa tima ro do pake bhalla lenan, bhalla do kelere mea nga do mea adu, pa tima no do tobo bhara nnau nga tenge ngati mela-lara, wowadu-wowadu nnau do gaa nga merake nga mutiara!

¹⁷ Tapulara pa dhara hejawe, mmau ke hari-hari ne lua kaja nga kete'e do na harre!” Hari-hari nakodha, ddau menupa nga ana-ana kapa, mina harre lema ddau do ne muri mada ro ti dhara dahi, do ta titu ke ngati jjhau.

¹⁸ Jhe peka ro, ta ngadde ri ro ne habbhu do porokoki ne ngati ai do pekappo ladu-ladu ne rae do naanne. Ta peko ke ro, ”Ngaddi de dho ta era rae do hewala do mii rae do worena do nadhe!”

¹⁹ Moko ta hibha awu ke ro la wokolo mii hahhi tada lua lalu ro, jhe tangi ro peka-ka, ”Bhote eh, dhai tarra ke ne apa nga kedhaha ne rae do mina hedhe ne worena! Ti lua kaja nga kete'e no alla ke pepejadhi ddau ta era nga kapa-kapa pa dhara dahi jhe jadhi ke ta kaja! Tapulara pa dhara he ja we, mmau ke hari-hari ne nga we ngati no!”

²⁰ Woo era do mmau do megala, hodho we nga mengallu nge kehaka dhara we, ri do mae tebho ttei ke ne rae do naanne! Woo annu-niki Deo, rasul-rasul, nga nabi-nabi, mengallu nge nga kehaka dhara we! Rowi alle ke no pewole ri Deo mii lua pebhale penaja nga ne nga ne do alla petao ri no penaja nga mu!

²¹ Ta alla pemina harre, heddau naju Deo do dhai kedi'i ta dhede ke hewue ne wowadu — mii worena wowadu geho do worena he — ta nabhe ke la dhara dahi jhe lii, ”Mina hedhe ke ne loro jhara rae Babel do keto ngara ne, ne medae ta nabhe nga kewuu hakku adho ke do medae ta ngadde wari ri.

²² Lialu ketadu nga ti mone ggai ketadu ngati do jhuka lodho, ngati do tiu kehidho nga do tiu wotabbe, hari-hari ne na harre adho ke do medae ta rangngi ti dhara au! Adho ke do medae ta era ri ie ta heddau he mone jhagga do dhai i'a ri paanne, jhe likedarru wowadu geho le adho ke do medae ta rangngi ri pa dhara au.

²³Ddau adho do medae ta ngaddi ri weo lapu pa dhara au; jhe adho ke do medae ta era lielo nga bhaba lai-ala peloko nga'a paanne. Ana-ana dhaga au, ro ke ne ddau-ddau do ketoo ngara pa danni raiwawa, jhe ri lipna-lipana au ne pelu ri au hari-hari ddau pa raiwawa!”

²⁴ Hakku wole Babel ri do pa dhara rae do naanne do ngaddi ke raa nabi-nabi raa annu-niki Deo, ki peheatte, raa hari-hari ddau do alla ke pepemade pa danni raiwawa.