Read Sabu WAHYU 19 Bible Online

WAHYU 19 - Sabu bible

WAHYU 19

¹Ta alla pemina harre, ta rangnge ke ri ya mii likebiro-baro ddau lowe he ngati era do mmau do megala, do peka-pekarra, ”Wue waje we Deo! Deo di, Deo do mone ma'i-mone golo di; No ke ne Deo do dhida do kelodo nga do higa nga pereda!

² Pa dhara lua happo hala, do happo nga mola nga mira jhe do tobo ri lua uku nga mmau dhara! Alla ke No pepebunu ne lua wolo tu do kepali jhagga bute nga dhawu ne do peape raiwawa do na dhe lua dhawu nga bute no. Alle ke pewole ri Deo ne do jhagga dhawu nga bute do naanne, rowi do alla ke ri no pepemade ne annu-niki Deo.”

³ Moko ta peka ri ke ne ddau-ddau do ae he mina hedhe, ”Wue waje we Deo! Ne habbu ai do pekappo ne rae do worena do naanne, jhe do adho ke do ta i'a pengaha wari ri.”

⁴Moko hari do dhue nguru do appa ddau kattu-kattu do na harre nga bhada do appa ngi'u he do pekehero kedera do naanne ta lakku rutu ke jhe peheguru-anni la worai jhe wie hu nga mejura pa Deo do mejaddhi pa dhida kedera ne. Ta lii ke ro, ”Amin! Wue waje we Deo!”

⁵ Moko ta rangnge ke ne lipedai ngati kedera do naanne do pali, ”Wue waje we Deo, woo hari-hari annu-niki Deo, nga hari-hari ddau — do kepai nga do na iki — do wie hu nga mejura pa Deo!”

⁶ Ta alla pemina harre ta rangnge ri ke ne hahhi lii do mii lii hekewolo ddau do dhai ae he; ne lii do naanne do mii kedu-kedarru nawa do pa dhara nga bhani dahi he nga do mii lii kedu-kedarru dhoro he. Ne rangnge ri ya ne ane ro, ”Wue waje we Deo! Rowi Muri, Deo di Do Mone Rihi Wiki Higa nga Pereda ne do pa dhara awe nade do nee ke do pereda.

⁷Mai we di ma mengallu nge nga kehada dhara, nga ma kerejhe-kewajji, mai we di ma wue waje ne lua dhida nga kelodo No! Rowi dhai ke ne lodho ngedhe No do do pedoe ta Ana Ki'i Jhawa ne, jhe ne mone ngedhe ne, do moko ke ta peloko nga'a.

⁸Do alle ke pewie pa no ne bhara pake ngati lenan do meghela tu ta pake.” (Bhara pake lenan do naanne wala dho ke ngati wui ai-wui tao do woie do tao ri annu-niki Deo he.)

⁹ Moko ta lii ke ne naju Deo do naanne pa ya, ”Bhuke we ne: ’Mangngi nga mengallu dhara ke ne ddau do langu do pedoa he la dhara lai-ala peloko nga'a Ana Ki'i Jhawa ne.’ ” Ta alla pemina harre ta pebhue ri ke ri naju Deo do naanne, ”Nadhe ke ne lii do petu-petarra ne ngati Deo.”

¹⁰Ta lakku rutu ke ya jhe peheguru-anni la worai pa hedhapa naju Deo do naanne ta wie hu nga mejura ya pa no, tapulara ta lii ke no pa ya, ”Bhole mina harre! Bhole wie hu nga mejura pa ya, wie hu nga mejura pa Deo we! Rowi ya lema annu hela'u mii au lema mii hari-hari tuahhu au do titu halla-anni pa lii kelolo Yesus!” Rowi ne lii kelolo Yesus ke ne do pekewuru pa dhara ade ddau-ddau ta pedara.

¹¹ Ta alla pemina harre ta ngadde ke ri ya era do mmau do megala do boka-anni, jhe ngadde ri ya hengi'u jara do pudi. Ne ngara ddau do menya'e jara do naanne Do Henarru nga Mone Mola nga Mira. Do dho i'a bibhi hebhakka no pa dhara happo lua wolo nga pa dhara pemuhu do tao ri No.

¹² Ne namada No do mii jhe pa kattu No do nga pake labba do ae. Pa ngi'u No do bhuke ri hahhi ngara. Jhe wata ri No we miha ne do toi ne ngara do naanne.

¹³Ne juba do pake ri No alle ke pepehabbho pa dhara raa. Jhe No ke ne do pale ta ”Lidara Deo”.

¹⁴Horodhadhu-horo ngati era do mmau do megala ne do pedutu No do nga menya'e jara-jara do pudi jhe do nga pake bhara lenan do pudi bheo-bheo.

¹⁵ Ngati dhara ubha No, mahhu hebhangngu kelewa do na'a, jhe ri kelewa do naanne ke, ne pejharra ri No hari-hari ddau-rai, jhe ri No do ta pereda ke pa ro ri dabbho kajji bbahhi. Do ta hengappi ke No ne woago pa era hengappi woago lua kete bubu dhara Deo Do Mone rihi Wiki Higa nga Kuaha ne.

¹⁶Pa juba No nga pa rutu ga No do bhuke ne ngara nadhe; ”Duae ngati hari-hari duae, nga Muri ngati hari-hari muri.”

¹⁷ Moko ta ngadde ke ri ya heddau naju Deo do titu pa dhida mada-lodho. Nga lipeka do maddu ta peka ke no pa hari-hari dolila, do lila jhara dhida, ”Mai we ma peowu tu ta maho la dhara lai-ala worena do tao ri Deo ne!

¹⁸Mai we ma nga'a ne kedalli duae-duae, kedalli kattu-kattu muhu nga kedalli mone kettau-mone kettau pa dhara muhu, mai we mu ma nga'a ne kedalli ngati hari-hari ddau raiwawa, do kepai nga do naiki, naannu nga ddau do balla kattu!”

¹⁹Ta alla pemina harre ta ngadde ke ri ya ne bhada do naanne, nga duae-duae raiwawa nga horodhadhu ro he, do peada ke ta la pemuhu-pedhutu nga No do menya'e jara do pudi ne nga horodhadhu No he.

²⁰ Moko ne bhada do naanne ta abu ke ta kappa hela'u-la'u nga nabi do pote do appi ne, do alla petao lua-lua madalae he pa hedhapa bhada do naanne. (Ri lua-lua madalae do na harre ke ne bhada do naanne ne pelu ne ddau-ddau do nga tada bhada do naanne nga ddau-ddau do wie hu nga mejura pa wewo-worawwu bhada do naanne do petito ri ro he.) Moko ne bhada do naanne nga nabi do naanne ta nabha ke nga muri mada he la llau dahi-ai do kedu-kedaru nga hedawa ne.

²¹Jhe ne horodhadhu-horodhadhu ro he ta pemade ke ri kelewa do mahhu ngati dhara ubha mone menya'e jara do pudi ne. Moko ta dakka ke ne dolila he la dalla la hobha ne kedalli ro do alla pepemade do na harre.