Read Sabu WAHYU 2 Bible Online

WAHYU 2 - Sabu bible

WAHYU 2

¹”Tu naju Deo jemaat Efesus, bhuke we mina hedhe: Nadhe ke ne litakka ti No do nga parru moto do pidu bhue he pa ruai kedhanga No, do lappa pa telora pidu kae lapu mela lara he.

²Do toi ke ri ya, ne nga ne do tao ri mu. Do dhai rui tarra mu ne jhagga, jhe do dhai tarra mu ne makka tee nga wangnge. Do toi ri ya ta adho do wie ne ade mu pa ddau do apa do kerewe. Jhe ne ddau-ddau do mengaku ne ngi'u ro ta rasul jhe ne pa petu ne do adho, alla ke ri mu peuji, jhe nara ta toi ri mu ta do pote do appi ro.

³Do makka tee makka wangnge mu jhe do dhui-hape hedui-herui mu taga Ya, jhe ngaddi dho ta atta dhara.

⁴Tapulara we nee ne lai do dho maddhi pa dhara Ya penaja nga mu: Adho ke mu do hajha do ddhei nna Ya ri mii pa awe do petari ne.

⁵Rowi do mina harre ke, henge we henga ke ne jjhau mu ne alla pebunu! Jharra we ngati lubhu harro nga menyilu mu, jhe jhegge ne nga ne do tao ri mu do ti petari ne. Kiadho ke do mina harre, moko do medae ke Ya ta dakka ma nga mu, jhe ma bhete ne kae lapu mu ne ngati era no.

⁶Maji lema ta mina poharre, nee koma hahhi lai ne do ie pa mu, ne lai do napoanne, nadhe ke: Do paddhu mu nga wui ai wui tao ddau-ddau pedute Nikolaus he, jhe do paddhu lema Ya penaja nga ro.

⁷ Nadu do nara ko ta dhanno do jhamma ke ri no ta dhanno ne nga ne do pale ri Henga Deo pa jemaat-jemaat! Ro ne do nara he, do medae ke ri Ya ta wie lua ta nga'e ne wue woajhu nga ti kepue ajhu muri mada do muri pa dhara Doka Deo ne.”

⁸ ”Tu naju Deo pa jemaat Smirna, bhuke we mina hedhe: Nadhe ke ne litakka ngati No do petari nga do pedakka ne — do alla ke pemade jhe do alla ke pemuri bhale wari.

⁹Do toi ri Ya ne lua hedui-herui mu, do toi ri Ya ne lua kura nga gahara mu — tapulara ne pa petu ne do kaja do kete'e mu! Do toi ri ya ne likara nga menihi do pale penaja mu ri ddau-ddau do mengaku ne ngi'u ro ta do Yahudi, jhe ne pa petu do adho; ro do na harre annu-niki ri Wango.

¹⁰Bhole meda'u jhara lua hedui-herui do adho ke ta rajja ri ne medae ta dhue ta hape ri mu. Henge, do medae haghe ngati mu ta pemaho la dhara ammu bhaddo tu hakku mu. Do medae mu ta dhui-hape hedui-herui pa dhara henguru lodho ne tui. Do jhamma ke mu ta titu halla-anni pa Ya tade made, moko do ta wie ke ri Ya pa mu ne muri mada do petu nga do peloro ne mii parahe lua nara mu.

¹¹ Nadu do nara ta dhanno, do jhamma ke ta dhanno ta tenae ne nga ne do pa le ri Henga Deo pa jemaat-jemaat! Ro ne do nara he, adho tu-tu ke ro do medae ri ta dhui hape lua hedui-herui nga-nga ri lua made do kedhue wari ne.”

¹²”Tu naju Deo pa jemaat Pergamus, bhuke we mina hedhe: Nadhe ke ne litakka ngati No do parru kelewe do na'a do rakka dhue ne.

¹³Do toi ri ya pa mii ne era pee mu, do pa era mejaddhi Wango ne. Mu do titu halla-anni pa Ya. Rihi ri ko ta dhai pa awe Antipas, hakahi Ya do henarru ne, ta pemade pa hedha pa mu, pa nyabbu Wango ne, pehili dho mu ta do parahajha mu pa Ya.

¹⁴ Majhi lema ta mina harre era ko ma parri lai do dho pemengallo ne dahara Ya ngati mu: Do era haghe ne ddau ti telora mu do pedute ne nga ne do ajha ri Beliam. Ajhe Balak ri Beliam mina mii ne nara ta laggu do Israel ta pebunu la dhara lubhu harro nga menyilu, nga lora jhara ta ubu ro ta nga'a bhara nga'a do alla peudu-pebhaja pa ajhu nga wowadu nga tao ne lai-lai do bute nga dhawu.

¹⁵Mina harre lema pa telora mu do era ko ma ne ddau-ddau do parru pa liajha ddau-ddau do pedute Nikolaus.

¹⁶Rowi do mina harre ke, jharra we ngati lubhu harro nga menyilu mu! Kiadho, rajja dho ke Ya ne dakka ma nga mu jhe la keluru ne ddau-ddau do na harre ri kelewa do era pa ubha Ya dhe.

¹⁷ Nadu do nara ta dhanno, do jhamma ke ta dhanno ta tenae ne nga ne do pale ri Henga Deo pa jemaat-jemaat! Ro ne do nara he, do ta wie lua ke ri Ya ta nga'a manna do ngadde ne, jhe heddau-heddau do ta hamme do ta hamme hewue wowadu do wopudi ngati Ya. Pa wo wadu do naanne do bhuke ne hahhi ngara do wiu, do dho toi ie tari nadu we, wa la ngati ddau do hamme ne wowadu do naanne we.”

¹⁸”Tu naju Deo pa jemaat Tiatira, bhuku we mina hedhe: Nadhe ke ne litakka ngati Ana Deo ne, do ne na mada No do weo kedu mii weo ai he, jhe ne rubhebho No do mea mi mara do tune he.

¹⁹Do toi ri Ya hari-hari ne do tao ri mu — do toi ri Ya ta do pehajha-peddhei ma mu heddau nga he ddau, do mappe mu, do jhagga mu, jhe do makka tee nga wangnge mu pa dhara dhui-hape hedui-herui. Do toi ri Ya pa awe nadhe do rihi ae mu ngati awe do uru he.

²⁰ Tapulara, na dhe ke lua do dho maddhi ne pa Ya penaja nga mu. Ne ade mu do wie pa Izabel, mobanni do mengaku ne ngi'u no ta ddau do pepue ri Deo. Do ae ke ne annu-niki Ya do pelu ri no jhe ajha ri no ta tao ne do bute nga dhawu nga ta nga'a bhara nga'a do alla pejhula pa ajhu nga wowadu.

²¹Alle ke pewie ri Ya ne awe pa no mita jharra ngati lubhu harro nga menyilu no, tapulara wae dho no ta pengaha ngati lua bute nga dhawu no do naanne.

²²Henge we! Do medae ri Ya ta ligo tade paddha pa era bba'i no ne. Pa anne ke no nga ddau-ddau do kenyo langa huka nga no he do medae ta jaru kara jaru. Hari-hari ne harre do ta jhagge ke ri Ya pa dhara awe nadhe — titu wata ki nga pengaha ro ti tao ne lai-lai do apa do kerewe do hela'u-la'u nga no.

²³ Ne ddau-ddau do pedute no he do ta pemade lema ri Ya mita toi ri hari-hari jemaat ta do Ya ke dhe No do nara ta kanynya ne nga ne do era pa dhara ade nga penge ddau raiwawa. Do ta bhale ri Ya pa mu heddau-heddau pedutu nga wui ai-wui tao mu.

²⁴Tapulara mu ne do awala-wala he pa Tiatira do dho pedutu nga liajha do apa do kerewe do na harre, jhe do adho lema do peajha nga lipana-lipana do ngati Wango. Ne lii Ya pa mu, pebhuwu dho ke ri Ya pa mu ne bhara dhui-bhara hape do ta pemejanni ri pa mu.

²⁵Tapulara tade dhai hape la awe dakka Ya ne hine, do jhamma ke mu ta pee ma nga pedute ne nga ne do unu-do oha ri mu.

²⁶ Ro ne do nara he, jhe do tade dhai hape la pedakka rahi do pee ma jhagge loro do ddhei Ya, do ta wie ri Ya ne higa nga kuaha do hela'u mii higa nga kuaha do alla pehamme ri Ya ngati Ama Ya. Do medae ke ta hammi ri ro ne lua pereda ngati Ya, tu ta pereda pa hari-hari ddau-rai, ri dabbho kajji bhahhi, nga tu ta pemae tebho ttei ne ddau-rai do na harre, mii rajji pemae arru ngai worai he.

²⁸Do ta hamme ke ri ro ne moto mmau-rai ne ngati Ya.

²⁹Nadu do nara ta dhanno, do jhamma ke ta dhanno ta tenae ne nga ne do pale ri Henga Deo pa jemaat-jemaat!”