Read Sabu WAHYU 21 Bible Online

WAHYU 21 - Sabu bible

WAHYU 21

¹ Moko ta ngaddi ke ri ya liru do wowiu nga raiwawa do wowiu. Liru nga raiwawa do petari ne do ila ke, mina harre lema dhara dahi alla ke pemarra.

² Moko ta ngadde ke ri ya ne rae do mmau do megala ne, Yerusalem do wowiu, do puru ngati era do mmau do megala ne ngati Deo. Ne rae do naanne do alle ke pepenoo mii heddau ana mobanni do peloko nga'a he, do ta la peabu nga ana momone ne.

³ Moko ta rangnge ke ri ya ne lipedai ngati kedera ne do peka nga lipeka do maddu, ”Pa dhara awe nadhe ne era pee Deo do hela'u-la'u ke nga ddau raiwawa! Do medae ke No ta muri hari nga ro, jhe ro do medae ke ta jadhi annu-niki No. Deo miha do ta era ke nga ro, jhe jadhi ta Deo ro.

⁴ Do ta hai ke ri No hari-hari ne ei-namada ngati namada ro. Lua made adho ke do ta era ri, lua hedui, litangi, kiadho lua paddha adho lema ke do ta era ri. Lai-lai do dui alla ke pemarra.”

⁵Moko No do mejaddhi pa dhida kedera ne, ta lii ke, ”Pa dhara awe nadhe do tao ke ri Ya pewowiu hari-hari!” Do lii lema no pa ya, ”Bhuke we ne nadhe, ro wi ne lipedai-lipedai do na harre do petu-petarra nga do nara ta parahajha.”

⁶ Moko ta lii ke No, ”Moko ke! Ya ke ne do petari nga do pedakka ke ne Muri rai ti Petari lohe la Pedakka rahi. Nadu we ne do hae koko, do ta wie ri Ya penginu nga parahuma-wue ngati mada ei-wattu do wie muri mada ne.

⁷ Nadu ne ddau do nara do ta hamme ke ri no ne lai do nadhe ngati Ya. Ya ke ne do ta jadhi Deo no, jhe no ke ne do ta jadhi ana Ya.

⁸Tapulara ddau-ddau do meda'u, do mone pewie ddau, ddau do dho bhule nga guna, do pemade ddau, do jhagga bute nga dhawu, ddau do pake lipana-lidha'i, do wie hu nga mejura pa ajhu nga wowadu, hari-hari do pote do appi, do ta nabha la dhara llau ai nga hedawa do weo kedu-kedaru ne, naanne ke ne lua made mada do kedhue ne.”

⁹Heddau ti telora do pidu naju Deo do alla peparru paho-paho do tobo ri pidu lua apa nga kerewe do pedakka he, ta dakka ke la nga ya jhe lii, ”Mai we! Do ta pejhujhe ke ri ya pa au ne Ana Mobanni do ta ngedhe ne, ihi-ammu ti Ana Ki'i Jhawa ne.”

¹⁰ Moko ta helibho ke ya ri Henga Deo, ta aggo ke ya ri naju Deo do naanne la kolo lede do rihi dhida. Ta pejhujhe ke pa ya ri no Yerusalem, rae do mmau do megala ne, ne rae do naanne do puru ngati era do mmau do megala, ngati Deo.

¹¹Do nga gaa nga kele'e nga dhida nga kelodo Deo. Ne rae do naanne do weo do kana mii weo wowadu do gaa do merake he, mii wowadu baiduri pandan do tarre lohe mii gela he.

¹² Ne tebo do pekehero no ne do dhida jhe do balla, nga henguru dhue bhue ne ubha-kelae-ae do jaga ri henguru do dhue naju Deo. Pa ubha kelae-ubha kelae do na harre do bhuki ri ngara-ngara ngati hari henguru do dhue huhu do Israel.

¹³Era tallu bhue kelae do hedhapa ju la hahhi era: tallu ju la bira dimu, tallu ju la bira bhollau, tallu ju la bira bhodhae jhe tallu ju la bira waa.

¹⁴Ne tebo rae do naanne do petito pa dhida henguru dhue bhue wowadu kepue. Pa wowadu do na harre do bhuke ri ngara hari henguru do dhue rasul Ana Ki'i Jhawa do naanne.

¹⁵ Ne naju Deo do pedai lii nga ya ne do nga kajji-uku ngati mela lara, tu la uke ne rae do naanne, ubha-ubha kelae-ae henga tebo rae do naanne.

¹⁶Ne rae do naanne do ubha-raka appa — ne merai ne hela'u we nga balla ne. Moko ta uke ke ri naju Deo do naanne ne rae do naanne ri kajji-uku do unu no ne: ta teleo ke ne merai ne 2400 kilo mete; ne balla ne nga dhida ne, do hela'u we nga merai ne.

¹⁷Ta dhai ta uku ke ri naju Deo do naanne ne tebo ne, ta teleo ke ne dhida ne anna nguru mete. Ne ruuku do pake ri naju Deo do naanne ruuku do tima ta pake ri ddau raiwawa ma.

¹⁸ Ne tebo do naanne do tao ngati wowadu baiduri pandan, jhe ne rae do naanne do tao ngati mela lara ihi wue, do tarra lohe mii gela he.

¹⁹Ne wowadu-wowadu kepue rae do naanne do penoo ri heworawwu-heworawwu wowadu do gaa nga merake. Ne wowadu do petari ne do tao ngati wowadu baiduri pandan, do kedhue ne ngati wowadu nilam, do ketallu ne ngati wowadu yakut, do keappa ne ngati wowadu zamrud,

²⁰do kelammi ne ngati wowadu baiduri sepah, do keanna ne ngati wowadu delima, do kepidu ne ngari wowadu ratna cempaka, do kearu ne ngati wowadu pirus, do keheo ne ngati wowadutopas, do kehenguru ne ngati wowadu krisopras, do kehengu-ahhi ne ngati wowadu lazuardi, nga do ke henguru-dhue ne ngati wowadu kole-wawi.

²¹Hari henguru dhue bhue ne ubha kelae he do tao ri henguru dhue bhue mutiara, hewue-hewue do tao ri hewue mutiara. Ne rujhara pa dhara rae do naanne do tao ngati mela lara ihi wue do tarre lohe mii gela do kebhela he.

²²Ngadde dho ri ya Ammu Deo pa dhara rae do naanne, rowi ne Ammu Deo ne, Muri ma miha, Deo Do Mone Rihi Wiki Higa nga Pereda ne, nga Ana Ki'i Jhawa ne ma.

²³ Ne rae do naanne adho ke do tenge ri ta peteleo ri mada lodho kiadho ri warru ri, rowi lua weo nga kana Deo ke ne do pekelale ne rae do naanne, jhe ne Ana Ki'i Jhawa ne ke, ne lapu rae do naanne.

²⁴ Ddau-ddau-rai pa raiwawa do medae ta narru pa dhara weo nga no ke, jhe duae-duae he lema do ta aggu ke ke ne lua kaja nga kete'e ro la dhara rae do naanne.

²⁵ Ne kelae rae do naanne do ta boke loro ke helodho rai balla-bilu, adho ke do medae ta henabbhe ri, rowi adho ke do era ri anni lodho nga anni maddha paanne.

²⁶Lua gaa nga jhamma nga lua kaja nga kete'e ddau-ddau-rai do ta aggu ke la dhara rae do naanne.

²⁷ Tapulara ddau do tao lua do rue do taru, kiadho ddau do pote do appi — ki peheatte ne nga we ne do wwau do benga, nara tu-tu dho ta maho la dhara rae do naanne, wata ke ddau do era do bhuki ne ngara he pa dha Buku Ddau Do Muri, buku ngati Ana Ki'i Jhawa ne.