Read Sabu WAHYU 3 Bible Online

WAHYU 3 - Sabu bible

WAHYU 3

¹”Tu naju Deo pa jemaat Sardis, bhuke we mina hedhe: Nadhe ke ne litakka ngati No do mone unu hari pidu henga do ngati Deo he nga hari pidu bhue moto he. Do toi ri ya ne nga ne do tao ri mu. Ne pali he, do muri mada mu, tapulara pa petu ne do made ke mu.

²Rowi do mina harre ke, kaddhi we jhe perui we ne nga ne do era ko pa mu, nga do dho dhai dae ne na harre ta made tu-tu. Rowi do abu ke ri Ya ta do ne nga we ne do tao ri mu, bhule de dho ie ta hahhi he do keteme pa hedhapa Deo.

³ Hakku, henge we bhale wari, ne nga ne do alla peajha pa mu do uru he, jhe ne nga ke ne do alla pedhanno ri mu. Tao we ne na harre jhe jharra we ngati lubhu harro nga menyilu mu. Ki do dho kaddhi ke mu, do medae ke Ya ta dakka la nga mu mii do mena'o he, jhe adho do medae ta toi ri mu ta parri ne awe dakka Ya ne.

⁴Tapulara pa telora mu pa Sardis do harre ko ne ddau do pee nga jaga ne bhara pake ro mita pee ma nga mmau. Ro ke do na harre do medae ta penau hela'u-hela'u nga Ya jhe do nga ahe bhara do wopudi, rowi ro ke ne jhamma tu lai do naanne.

⁵ Tu ro do nara he do medae ta pepake juba do wopudi. Ne ngara ro adho ke do ta roho wari ri Ya ngati Buku Ddau do Muri. Jhe pa hedhapa Ama Ya nga naju-naju No do medae ta mengaku Ya ta ro ke ne ddau do unu do oha ri Ya.

⁶Nadu do nara ta dhanno do jhamma ke ri no ta dhanno ta tenae ne nga ne do pale ri Henga Deo pa jemaat-jemaat!”

⁷ ”Tu naju Deo pa jemaat Filadelfia, bhuke we mina hedhe: Nadhe ke ne litakka ngati No do mmau do megala ne nga do petu-petarra ne. No ke ne do parro kuhi do unu Daud ne; do kinga boke ke ri No, bhule dho ke heddau he do ta henabbhe ri, jhe kinga henabbhe ke ri No bhule dho ke heddau he do nara ta boke wari.

⁸Do toi ri Ya ne nga ne do tao ri mu. Do toi ri Ya ta do adho mu do rihi ne rui; do pedute ke ri mu ne liajha Ya jhe do titu halla-anni pa Ya. Tu mu, alle ke ri Ya peboke hewue ne kelae, jhe do adho ke do nara ri ta henabbhe ie tari nadu we.

⁹ Henge we ne nadhe: Ddau-ddau do jadhi ta annu-niki Wango ne, do pote do appi do mengaku ne ngi'u ro ta do Yahudi, tapulara do ne pa petu ne adho, do ta tao ro ri Ya mita tade dakka ro la wei hu nga mejura pa hedhapa mu. Jhe ri ro do medae ta toi ta do Ya do hajha do ddhei nga mu.

¹⁰Taga tari do alla ke pepedutu ri mu ne lipereda Ya mita pee ta halla-anni, Ya lema do medae ta herimu-herumu ngati awe hedui-herui do medae ta nappe ta kebie raiwawa hari ta hewue. Lai naanne ne jadhi tu ta hakku hari-hari ddau pa danni raiwawa.

¹¹Do ta dakka ya nga henginga! Jaga we pewoie-ie ne nga ne unu-oha mu mita do dho bhule heddau he do la rabe ne pai pala lua nara mu ne.

¹² Ddau do nara, do ta pejadhi ri Ya mii geri pa dhara Ammu Deo Ya do mmau do megala ne, jhe do medae no ta pee pa era do naanne lohe la lodho do nami mii ne. Ne ngara Deo Ya ne, nga ngara rae Deo Ya ne — Yerusalem do wowiu ne do ta puru ngati era do mmau do megala ne, ngati Deo Ya — do medae ta bhuke ri Ya pa ngi'u ddau do naanne. Mina harre lema ngara do ta bhuke ri Ya pa ngi'u no.

¹³Nadu do nara ta dhanno, do jhamma ke ta dhanno ta tenae ne nga ne do pa le ri Henga Deo pa jemaat-jemaat!”

¹⁴ ”Tu naju Deo pa jemaat Laodikia, bhuke we mina hedhe: Nadhe ke ne litakka ngati Do Mone Amin ne, Hakahi do henarru nga do mola do mira ne, kepue wattu hari-hari ne nga we do peera ri Deo.

¹⁵Ri Ya do toi ne nga ne do tao ri mu; do toi ri Ya ta do adho mu meringi, jhe do adho lema mu do pana. Do ne pa petu ne do jhamma mu ta pana kiadho ta meringi.

¹⁶Tapulara ta pana mara-mabo he we mu, pana dho, jhe meringi le dho ma. Ri do mina harre ke do medae ke mu ta maddu pemahhu ri Ya ngati dhara ubha Ya.

¹⁷Ane mu, ’Jhi do kaja jhe do waji we pa hari-hari ne nga we, pengaddi dho jhi nga kehakku ie ta pa ne nga we.’ Tapulara toi dho ri mu ta do mina mii ne kehia nga gahara jhe do dhai tarra ke ne meliri dhara jhara lua mu he. Mu do kehia do dho bhule nga bhara pa ihi ke, jhe do bhaddu ke mu.

¹⁸Rowi do mina harre ke ta takka lii ke Ya pa mu mita ie ke ta walli ne mela lara ihi wue ngati Ya, mita ie mu ta kaja. Walli lema we ngati Ya ne bhara pake do wopudi mita era mu nga bhara pa ihi tu ta herimo ne ngi'u do dho bhule nga bhara ne nga do pemekae dahara ddau ne. Jhe walli lema we ne ruajhu tu ta pelobo pa namada mu he mita nara mu ta ngaddi.

¹⁹ Ddau-ddau do hajha do ddhei Ya he, pa ro ke ne do ta bhani nga ta wabba ri Ya. Rowi do mina harre ke do jhamma ke mu ta keharru kelidu, jhe jhara we ngati lubhu harro nga menyilu mu.

²⁰Heleo! Nee ke Ya do titu pa ubha kelae jhe kedakku. Kinga era ne ddau do dhanno ne likedakKu Ya jhe bhoka no kelae, do ta maho ke Ya la peabu nga no, do ta nga'a Ya hela'u-la'u nga no, jhe no nga'a hela'u nga Ya.

²¹Ro ne do nara he do ta wie lua ri Ya ta mejaddhi pa kedera era mejaddhi Ya, hela'u-la'u nga Ya, hela'u lema mii Ya do alla penara jhe pa awe nadhe nee ke Ya do mejaddhi hela'u nga Ama Ya pa kedera era mejaddhi No.

²²Nadu do ta dhanno do jhamma ke ta dhanno ne nga ne do pale ri Henga Deo pa jemaat-jemaat!”