Read Sabu WAHYU 4 Bible Online

WAHYU 4 - Sabu bible

WAHYU 4

¹Ta alla pemina harre, ta pengadde ri ke pa ya ri. Ta ngadde ke ri ya he wue kelae do boke pa era do mmau do megala. Ta alla pemina harre ta rangnge ri ke ne lipedai, do pa uru jhara ne do alla ke peli pa ya, do mii lii wotabbe he. Ne lipedai do naanne do pali mina hedhe: ”Mai ha'e ma dhe. Do ta pengadde ri Ya pa au ne nga ne do medae ta jadhi hine.”

² Pa dhara awe naanne dhangnge ta helibho ke ya ri Henga Deo. Moko ta ngadde ke ri ya pa era do mmau do megala, do era hewue kedera, jhe do era heddau do mejaddhi pa kedera do naanne.

³Ne tanga-mada ddau do naanne do kelala mii wowadu baiduri pandan, nga wowadu delima. Hahhi heroo do weo dalu mengarru do lale pekehero kedera do naanne.

⁴Era dhue nguru appa bhue kedera do pejhara pekehero kedera do naanne. Pa kedera do na harre do mejaddhi do dhue nguru do appa ddau kattu do nga pake bhara do wopudi, jhe nga pake labba mela lara.

⁵ Ngati kedera do naanne kehabbha weo bhela jhe hhau ne lii kedu-kedarru dhoro. Jhe pa hedhapa kedera do naanne, era pidu bhue obo do weo, napoharre ke hari pidu Henga Deo.

⁶ Do era lema pa hedhapa kedera do na harre, era hahhi do mii dhara dahi-ae ngati gela he, do mmau tarre lohe la hebhakka. Pekehero kedera do naanne, pa hekebhihu-hekebhihu era appa ngi'u bhada do pa hedhapa nga pa kejhunga he tobo ri namada.

⁷Ne bhada do petari ne hala dho mii hinga he. Do kedhue ne mii hapi mone he. Do ketallu ne do nga tanga-mada do mii tanga-mada ddau raiwawa he. Do keappa ne do mii luji-ae do pa dhara nga lila he.

⁸ Hari appa ngi'u ne bhada do na harre, hengi'u-hengi'u do nga rualla anna bhakka, jhe pekehero nga pa hebhakka jhara dhara he do kerape ri namada. Anni lodho nga anni maddha ne bhada-bhada do na harre pee loro nga jhuka lilodho do dho bhule nga pengaha, ”Mmau-megala, mmau-megala, mmau-megala we Muri, Deo do Mone Rihi Wiki Higa do era ke, do loro ke peera, nga do era loro.”

⁹Hari appa ngi'u ne bhada do na harre jhuka alu liwue-waje, mejura, nga peha'e kolo lii ie-ae, pa No do mejaddhi pa kedera do naanne, No do muri lohe la lodho do nami mii ne. Jhe pa dhara nga jhuka lodho he ne bhada-bhada do na harre,

¹⁰hari do dhue nguru do appa ddau ne kattu-kattu do na harre do peheguru-anni ke pa hedhapa ddao do mejaddi pa kedera do naanne, jhe wie hu nga mejura pa No do muri lohe la lodho do nami mii ne. Ta alla pemina harre ta ligu ke ri ro ne labba-labba ro he la hedhapa kedera do naanne, jhe lii,

¹¹”Wo Muri, wo Deo jhi! wata Au he ke ne do jhamma ta hammi ne liwue-waje, lua mejura nga kuaha. Rowi Au ke ne Mone Peera hari-hari ne nga we, jhe pa dhara lua ddhei Au lema ne alla ke hari-hari ne nga we ne pejadhi, jhe muri mada.”