Read Sabu WAHYU 5 Bible Online

WAHYU 5 - Sabu bible

WAHYU 5

¹ Ta alla pemina harre ta ngadde ke ri ya hewue lulu buku pa wolaabba No do mejaddhi pa dhida kedera do naanne. Ne buku do naanne do tobo ke ne bhuke ti hebhakka la hebhakka jhe do hege ri pidu bhue hege.

²Moko ta ngadde ke ri ya heddau naju Deo do dhai kedi'i-kehaddi do peko-peka nga lipeka do dhai maddu, ”Nadu ke ne jhamma ta pemehakka ne hege-hege do na hedhe jhe boke ne buku do nadhe?”

³Tapulara ie ta pa era do mmau do megala, mina harre pa danni raiwawa, kiadho pa dha'i raiwawa, bhule dho ie ta heddau he do jhamma taboke ne buku do naanne jhe heleo la dhara ne.

⁴Moko ta tangi pengidhu-ngidhu ke ya rowi bhule dho ie ta heddau he do jhamma ta boke ne buku do naanne nga ta heleo la dhara ne.

⁵ Moko ta lii ke heddau ngati telora kattu-kattu do na harre pa ya, ”Bhole tangi! Heleo we! Hinga do ngati kolo-loro Yehuda ne, kolo-loro Daud do mone-ae ne, do nara ke No ke ne do nara ta pebhari ne hege do pidu bhue he, nga ta boke ne buku do naanne.”

⁶ Ta alla pemina harre ta ngadde ke ri ya hengi'u Ana Ki'i Jhawa do titu pa telora kedera do na harre, do pekehero ri hari appa ngi'u bhada he nga ri hari-hari kattu do na harre. Ne Ana Ki'i Jhawa do naanne mii do alle pekehabbhe he ke. Pa No do era pidu bhangngu tadu nga pidu bhue namada: na harre wala dho ke ngati pidu Henga Deo do alla pepepu la hari hewue raiwawa dhe.

⁷Ta alla pemina harre ta la aggo ke ri Ana Ki'i Jhawa do naanne ne lulu buku do naanne ngati ruai kedhanga ddau do mejaddhi pa dhida kedera do naanne.

⁸ Pa dhara nga tao mina harre ne Ana Ki'i Jhawa ne ta peheguru-anni ke ne bhada do appa ngi'u he nga kattu-kattu do dhue nguru do appa ddau he pa hedhapa No. Heddau-heddau ro do nga parru ketadu nga mago mela lara do ihi ri keminya na harre ado ke ta do wala ri ngati lihebhajha-lihebhajha annu-niki Deo he.

⁹ Ta jhuka ke ro hewue ne lilodho do wowiu: ”Au ke ne do jhamma ta aggo ne buku do naanne nga ta pebhari ne hege-hege do na harre, Rowi do alle ke Au pepemade, jhe ri lua made Au ne, ddau raiwawa ngati hari-hari huhu, lipedai, rai pereda nga ddau-rai do alla ke pewalli ri Au tu Deo.

¹⁰ Alla ke ri au pepejadhi ro ta hekejie ddau-rai do petone ta mone tunu-menahu mita ie ro ta pemoke Deo di, jhe pereda pa danni raiwawa.”

¹¹ Ta alla pemina harre ta ngadde ke ri ya ri. Ta rangngi ke ri ya ne lii naju Deo do tabbha-riwo-rawo ne ae. Do titu ro pekehero ne kedera ne nga bhada do appa ngi'u he, mina harre lema nga kattu-kattu do na harre.

¹²Jhe ro do nga jhuka lodho do dhai maddu, ”Ana Ki'i Jhawa do alle pekehabbhe do naanne, do jhamma ke ta hammi kuaha, kaja-kete'e, uku nga mmau dhara nga lua rui nga kedi; do jhamma ke No ta takke pa dhara kire, pedhede-pekelode nga ta wue ta waje!”

¹³Moko ta rangngi ke ri ya hari-hari ne kemuki do nga henga pa liru balla, pa raiwawa, pa dha'i raiwawa nga pa dhara dahi — nga peheatte hari-hari do kemuki do nga henga pa hari hewue liru nga raiwawa do nadhe — do jhuka lodho, ”No do mejaddhi pa dhida kedera ne, nga Ana Ki'i Jhawa do naanne, ro ke ne do ta wue-waje nga do ta pekerihi, hari lema ne do ta pedhede-pekelodo, do nga higa nga pereda lohe la lodho do nami mii ne!”

¹⁴Moko ta bhale ke ri bhada do appa ngi'u do na harre, ”Amin!” Jhe hari-hari ne kattu do na harre ta lakku rutuu ke peheguru-anni jhe wie hu nga mejura.