Read Sabu WAHYU 6 Bible Online

WAHYU 6 - Sabu bible

WAHYU 6

¹Ta alla pemina harre ta ngadde ke ri ya ne Ana Ki'i Jhawa do naanne ta pebhare ne hege do petari ne ti telora hege do pidu bhue he. Moko ta rangnge ke ri ya hengi'u ti telora bhada do appa ngi'u he, do pali, ”Mai we!” Ne kedarru lipedai no ne, a'i dho mii likedarru dhoro he.

² Moko ta ngadde ke ri ya hengi'u jara do pudi. Ne do menya'e no ne do nga parru hebhangngu jhe pa no do wie hewue labba. Ta maju ke no mii heddau mone nara do kako ta la perabe ne lua nara ne.

³Ta alla pemina harre ta pebhare ke ne hege do kedhue ne ri Ana Ki'i Jhawa ne, ta rangnge ke ri ya ne lii bhada do kedhue ne, ”Mai we!”

⁴ Moko ta mahhu-anni ke hengi'u jara do wala ri. Ne jara do napoanne do mea. Pa ddau do menya'e jara do naanne do wie ke ne kuaha ta peila hari-hari lua pedhuri-pemira pa danni raiwawa, mita ie ddau raiwawa ta pepara-petabbhu heddau nga heddau. Moko ta wie ke pa no hebhangngu ne kelewa do mone-ae.

⁵ Moko ta pemehakke ke ne hege do ketallu ne ri Ana Ki'i Jhawa ne. Ta rangnge ke ri ya lii bhada do ketallu ne, ”Mai!” Ta ngadde ke ri ya hengi'u jara do laka. Ne do menya'e no ne do nga parru hemawo dhahi pa ruai no.

⁶Ta rangnge ke ri ya ne lipedai do mii lipetoda he ngati telora bhada do appa ngi'u do na harre. Ne lii do naanne mina hedhe, ”Helite gandum do woie hela'u ke ne kebhue no nga gaji helodho, nga tallu lite gandum do wala ri ne kebhue hela'u nga gaji helodho lema. Tapulara bhole peapa ne kepue-kepue zaitun nga dhoka ago he!”

⁷Ta alla pemina harre ta pebhare ke ne hege do keappa ne ri Ana Ki'i Jhawa ne. Ta rangnge ke ri ya lii bhada do keappa ne, ”Mai!”

⁸ Ta ngadde ke ri ya hengi'u jara do kehawa. Ne ngara do menya'e jara do naanne Made-mada. Bhagi appa ngati lua pereda ngati Raiwawa Do Nadhe, do jhula ke pa ro, mita nara ta pemade ri ro do pelake jhara pedhutu-pemuhu, jhara lua menganga-rai, ha gu nga padha nga pelake jhara bhada-bhada bhani.

⁹Ta alla pemina harre ta pebhare ke ri ke ne hege do kelammi ne ri Ana Ki'i Jhawa ne. Moko ta ngadde ke ri ya pa dha'i dea tunu-menahu ne do era ne hemanga-hemanga do made taga tari do perue ri ro ne litakka do ngati Deo pa dhara lipeliba ro he.

¹⁰Ro do peka nga lipeka do rihi maddu, ”Wo Muri do Mone Rihi Wiki Higa nga Pereda, do mmau do megala nga do mola do mira! He nga ri ko ke ne tui ri jhe itu pehappo ri Au ne hala ddau raiwawa jhe wolo ro ta ga tari do alla ke ro pepemade jhi?”

¹¹Ta wie ke pa ro hedddau-heddau hebhalla ne juba wopudi. Moko ta lii ke pa ro ta pengaha pa dhara hemelila he ri, tade tobo ne ae ihi-anga ro do hela'u lii he nga tuahhu-tuahhu ro do medae ta pemade he mii ro le.

¹² Moko ta ngadde ke ri ya ne Ana Ki'i Jhawa do naanne ta pebhare ne hege do keanne ne. Ta jadhi ke dhai-ie do dhai meliri dhara. Mada lodho ta jadhi ta maddi ke mii bhalla maddi do hekoto he, jhe mada warru jadhi ta mea mii raa he ke.

¹³ Moto-moto ta keloro ke ngati ihi liru ma danni raiwawa mii wokepallu do dho ihi dae he ne keloro ngati kolo do kenyoko ri raga nga opo he.

¹⁴ Liru ta ele ke mii karataa do ta lule he, jhe hari-hari lede nga pulu do pereho ke ngati era ro.

¹⁵ Moko ne duae-duae pa raiwawa, kattu-kattu mone-ae kattu-kattu horodhadhu, ddau-ddau do kaja nga ddau-ddau do nga kuaha, nga ddau-ddao do hewala he ri. Ie ta naannu mina harre lema ddau do balla kattu, hari-hari ro do pehuni-anni pa ro'a-ro'o lie nga pa hanga-hanga wowadu.

¹⁶ Ta peka ke ro ta ami pa lede-lede nga wowadu-wowadu, ”Mai we ma nappi ma kebii jhi! Pehuni-peniti we jhi ngati kete bubu dhara Ana Ki'i Jhawa do na nidhe.

¹⁷ Nee ke do dakka ne lodho do meliri dhara ne, pa awe nadhe ta dhute ta hegabbhe ke ne lua kete bubu dhara ro, jhe bhule dho ke ie ta heddau he do makka taha penaja nga ro!”