Read Sabu WAHYU 8 Bible Online

WAHYU 8 - Sabu bible

WAHYU 8

¹Ta dhai ta pebhare ke ne hege do kepidu ne ri Ana Ki'i Jhawa ne, moko ta kehii-kejidho ke pa era do mmau do megala, era ma ta hetenga jaa ne tui.

²Moko ta ngaddi ke ri ya, do pidu naju Deo do titu pa hedhapa Deo he, jhe wie pa ro pidu bhue wotabbe.

³ Ta dakka ke heddau naju Deo do wala, do nga aggu era tunu dhupa ngati mela lara, jhe la titu pa hedhapa era tunu menahu ne. Ta wie ke pa ne keminya do dhai ae, tu ta la peturu pa lihebhajha-lihebhajha ngati hari-hari annu-niki Deo he nga tu ta jhole pa dhea mela lara do era pa hedhapa kedera ne.

⁴Hela'u-la'u nga lihebhajha ti annu-niki Deo he, ne habbhu dhupa do pa dhara nga weo do naanne ta kepopo ke ne ha'e la dhida ngati wolaabba naju Deo do titu pa hedhapa Deo ne.

⁵ Ta alla pemina harre, ta aggo ke ri naju Deo do naanne ne era tunu dhupa ne, jhe la ihe la dhara ne ri ai ngati dhea era tunu ne, jhe ligo ri no ma danni raiwawa. Moko ta kedu-kedaru ke dhoro, jhe ta peki'e ke ne bhele, moko ta jadhi ke dhai-ie pa raiwawa.

⁶Ta alla pemina harre, ta pemoko-moko-anni ke do pidu naju Deo do nga parru wotabbe he ta la tiu.

⁷ Moko ta tio ke ri naju Deo do petari ne wotabbe do pa ruwai no ne, ta puru ke ajjhi-es nga ai do pehiwo nga raa mii do ta tude he ma danni raiwawa. Bhagi tallu ngati raiwawa alle ne kappu ladu-ladu; mina harre lema bhagi tallu ngati hari-hari naajhu nga hari-hari jhu'u do mengarru.

⁸Moko ta tio ke ri naju Deo do kedhue ne wotabbe no ne, moko ta ngadde do dho hala mii hewue lede do dhai tarra ne worena do weo kedu-kedaru do ligo la dhara dahi. Bhagi tallu ngati dhara dahi ta jadhi ke mii raa he,

⁹ta made ke bhagi tallu ngati hari-hari do kemuki do nga henga pa dhara dahi, jhe mina harre lema bhagi tallu ngati hari-hari kapa pa dhara dahi kappu ladu-ladu.

¹⁰ Ta alla pemina harre ta tio ke ri naju Deo do ketallu ne, ne wotabbe no. Moko hewue moto do worena, do weo do kedu mii obo he, ta bunu ke ngati liru nappi nga kebii bhagi tallu ngati loko nga mada ei-wattu.

¹¹ (Ne ngara mato do naanne ”Paddhu”.) Moko bhagi tallu ngati ei-loko jadhi ta paddhu, jhe ae ne do made taga tari nginu ei-loko do paddhu he.

¹² Moko ta tio ke ri njau Deo do keappa ne, ne wotabbe no. Moko ta herimo ke bhagi tallu ngati mada lodho, bhagi tallu ngati mada warru nga bhagi tallu ngati moto-moto, hakku ta ila ke bhagi tallu ngati rui kelala ro. Mina harre lema bhagi tallu ngati anni lodho adho ke do teleo, jhe mina harre lema bhagi tallu ngati anni maddha.

¹³Moko ta ngadde ke ri ya, jhe rangnge ri ya hengi'u luji-ae do era pa dhara nga lila do dhida, do nga peka, ”Apa kerewe rai ke, apa kerewe rai ke, apa kerewe rai ke tu hari-hari ddau pa danni raiwawa kinga rangngi ke ri ro ne lii wotabbe do tiu ri do tallu naju Deo do wala he ne wotabbe ro hine!”