Read Sahidic Coptic Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲁ̄ 13 Bible Online

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲁ̄ 13 - Sahidic Coptic bible

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲁ̄ 13

¹ⲈⲒϢⲀⲚϢⲀϪⲈ ⲚⲚⲀⲤⲠⲈ ⲚⲚⲢⲰⲘⲈ ⲘⲚⲦⲀ ⲚⲀⲄⲄⲈⲖⲞⲤ ⲈⲘⲚⲦⲀⲒ ⲀⲄⲀⲠⲎ ⲆⲈ ⲘⲘⲀⲨ ⲚⲦⲀⲒ ⲢⲐⲈ ⲚⲞⲨϨⲞⲘⲚⲦ ⲈϤϮϨⲢⲞⲞⲨ ⲎⲞⲨⲔⲨⲘⲂⲀⲖⲞⲚ ⲈϤⲰϢ ⲈⲂⲞⲖ.

²ⲀⲨⲰ ⲈϢⲰⲠⲈ ⲞⲨⲚⲦⲀⲒ ⲚⲞⲨⲠⲢⲞⲪⲎⲦⲒⲀ. ⲦⲀⲈⲒⲘⲈ ⲈⲘⲘⲨⲤⲦⲎⲢⲒⲞⲚ ⲦⲎⲢⲞⲨ ⲘⲚ ⲠⲤⲞⲞⲨⲚ ⲦⲎⲢϤ. ⲔⲀⲚ ⲈⲨⲚⲦⲀⲒ ⲦⲠⲒⲤⲦⲒⲤ ⲦⲎⲢⲤ ϨⲰⲤⲦⲈ ⲈⲠⲈⲚⲈⲦⲞⲞⲨ ⲈⲂⲞⲖ ⲈⲘⲚ ⲀⲄⲀⲠⲎ ⲆⲈ ⲚϨⲎⲦ ⲀⲚⲄ ⲞⲨⲖⲀⲀⲨ.

³ⲔⲀⲚⲈⲒϢⲀⲚⲦⲘⲘⲞ ⲚⲚⲀϨⲨⲠⲀⲢⲬⲞⲚⲦⲀ ⲦⲎⲢⲞⲨ. ⲀⲨⲰ ⲦⲀϮ ⲘⲠⲀⲤⲰⲘⲀ ϪⲈ ⲈⲒⲈϢⲞⲨϢⲞⲨ ⲘⲘⲞⲒ ⲈⲘⲚⲦⲀⲒ ⲀⲄⲀⲠⲎ ⲆⲈ ⲘⲘⲀⲨ ⲚϮⲚⲀϮϨⲎⲨ ⲀⲚ ⲚⲖⲀⲀⲨ.

⁴ⲦⲀⲄⲀⲠⲎ ϢⲀⲤϨⲢⲞϢ ⲚϨⲎⲦ ϢⲀⲤⲢⲬⲢⲎⲤⲦⲞⲤ ⲦⲀⲄⲀⲠⲎ ⲘⲈⲤⲔⲰϨ ⲘⲈⲤⲢⲠⲈⲢⲠⲈⲢⲞⲤ ⲘⲈⲤϪⲒⲤⲈ ⲚϨⲎⲦ.

⁵ⲘⲈⲤⲀⲤⲬⲨⲘⲞⲚⲒ. ⲘⲈⲤϢⲒⲚⲈ ⲚⲤⲀ ⲚⲈⲦⲈⲚⲞⲨⲤ ⲚⲈ. ⲘⲈⲤⲚⲞⲨϬⲤ ⲘⲈⲤⲘⲈⲈⲨⲈ ⲈⲠⲠⲈⲐⲞⲞⲨ.

⁶ⲘⲈⲤⲢⲀϢⲈ ⲈϪⲘ ⲠϪⲒ ⲚϬⲞⲚⲤ. ϢⲀⲤⲢⲀϢⲈ ⲚⲦⲞϤ ⲘⲚ ⲦⲘⲈ.

⁷ϢⲀⲤϤⲒ ϨⲀ ϨⲰⲂ ⲚⲒⲘ ϢⲀⲤⲠⲒⲤⲦⲈⲨⲈ ⲈⲠⲦⲎⲢϤ ϢⲀⲤϨⲈⲖⲠⲒⲌⲈ ⲈⲠⲦⲎⲢϤ ϢⲀⲤϨⲨⲠⲞⲘⲒⲚⲈ ⲈⲠⲦⲎⲢϤ.

⁸ⲦⲀⲄⲀⲠⲎ ⲘⲈⲤϨⲈ ⲈⲚⲈϨ ⲈⲒⲦⲈ ⲆⲈ ⲚⲈⲠⲢⲞⲪⲎⲦⲒⲀ ⲤⲈⲚⲀⲞⲨⲰⲤϤ ⲈⲒⲦⲈ ⲚⲀⲤⲠⲈ ⲤⲈⲚⲀⲖⲞ ⲈⲒⲦⲈ ⲚⲤⲞⲞⲨⲚ ⲤⲈⲚⲀⲞⲨⲰⲤϤ.

⁹ⲈⲚⲤⲞⲞⲨⲚ ⲄⲀⲢ ⲈⲂⲞⲖ ϨⲚ ⲞⲨⲘⲈⲢⲞⲤ. ⲀⲨⲰ ⲈⲚⲠⲢⲞⲪⲎⲦⲈⲨⲈ ⲈⲂⲞⲖ ϨⲚ ⲞⲨⲘⲈⲢⲞⲤ.

¹⁰ϨⲞⲦⲀⲚ ⲆⲈ ⲈϤϢⲀⲚⲈⲒ ⲚϬⲒ ⲠϪⲰⲔ ⲠⲈⲂⲞⲖ ϨⲘ ⲠⲘⲈⲢⲞⲤ ⲚⲀⲞⲨⲰⲤϤ.

¹¹ⲘⲠⲈⲨⲞⲈⲒϢ ⲈⲒⲞ ⲚⲔⲞⲨⲒ ⲚⲈⲈⲒϢⲀϪⲈ ⲠⲈ ϨⲰⲤ ⲔⲞⲨⲒ ⲚⲈⲒⲘⲈⲈⲨⲈ ϨⲰⲤ ⲔⲞⲨⲒ ⲚⲈⲒϢⲞϪⲚⲈ ϨⲰⲤ ⲔⲞⲨⲒ ⲚⲦⲈⲢⲒⲢⲚⲞϬ ⲆⲈ ⲀⲒⲞⲨⲰⲤϤ ⲚⲚⲀ ⲠⲔⲞⲨⲒ.

¹²ⲦⲚⲚⲀⲨ ⲄⲀⲢ ⲦⲈⲚⲞⲨ ϨⲒⲦⲚ ⲞⲨⲈⲒⲀⲖ ϨⲚ ⲞⲨϨⲢⲂ ⲘⲚⲚⲤⲰⲤ ⲆⲈ ⲚϨⲞ ϨⲒ ϨⲞ. ⲦⲈⲚⲞⲨ ⲄⲀⲢ ⲈⲒⲈⲒⲘⲈ ⲈⲂⲞⲖ ϨⲚ ⲞⲨⲘⲈⲢⲞⲤ. ⲘⲚⲚⲤⲰⲤ ⲆⲈ ϮⲚⲀⲤⲞⲞⲨⲚ ⲔⲀⲦⲀ ⲐⲈ ⲞⲚ ⲈⲚⲦⲀⲨⲤⲞⲨⲰⲚⲦ.

¹³ⲦⲈⲚⲞⲨ ϬⲈ ⲤϢⲞⲞⲠ ⲚϬⲒ ⲦⲠⲒⲤⲦⲒⲤ ⲐⲈⲖⲠⲒⲤ ⲦⲀⲄⲀⲠⲎ ⲠⲈⲈⲒϢⲞⲘⲚⲦ ⲦⲚⲞϬ ⲆⲈ ⲈⲚⲀⲒ ⲦⲈ ⲦⲀⲄⲀⲠⲎ.