Read Sahidic Coptic Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 3 Bible Online

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 3 - Sahidic Coptic bible

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 3

¹ⲀⲚⲀⲢⲬⲒ ⲞⲚ ⲚⲤⲨⲚϨⲒⲤⲦⲀ ⲘⲘⲞⲚ ⲘⲎⲦⲒ ⲦⲚⲢⲬⲢⲒⲀ ⲚϨⲈⲚⲈⲠⲒⲤⲦⲞⲖⲎ ⲈⲨⲤⲨⲚϨⲒⲤⲦⲀ ⲘⲘⲞⲚ ⲚⲎⲦⲚ ⲚⲐⲈ ⲚϨⲈⲚⲔⲞⲞⲨⲈ ⲎⲈⲂⲞⲖ ϨⲒⲦⲚ ⲦⲎⲨⲦⲚ ⲚⲚⲀϨⲢⲚ ϨⲈⲚⲔⲞⲞⲨⲈ.

²ⲦⲈⲚⲈⲠⲒⲤⲦⲞⲖⲎ ⲚⲦⲰⲦⲚ ⲠⲈ ⲈⲤⲤⲎϨ ϨⲚ ⲚⲈⲚϨⲎⲦ ⲈⲨⲈⲒⲘⲈ ⲈⲢⲞⲤ ⲀⲨⲰ ⲈⲨⲰϢ ⲘⲘⲞⲤ ϨⲒⲦⲚ ⲢⲰⲘⲈ ⲚⲒⲘ

³ⲈⲦⲈⲦⲚⲞⲨⲞⲚϨ ⲈⲂⲞⲖ ϪⲈ ⲚⲦⲈⲦⲚⲦⲈⲠⲒⲤⲦⲞⲖⲎ ⲘⲠⲈⲬⲢⲒⲤⲦⲞⲤ ⲈⲀⲨⲆⲒⲀⲔⲞⲚⲒ ⲘⲘⲞⲤ ⲈⲂⲞⲖ ϨⲒⲦⲞⲞⲦⲚ ⲈⲤⲤⲎϨ ⲘⲘⲈⲖⲀ ⲀⲚ ⲀⲖⲖⲀ ϨⲘ ⲠⲈⲠⲚⲈⲨⲘⲀ ⲘⲠⲚⲞⲨⲦⲈ ⲈⲦⲞⲚϨ ϨⲚ ϨⲈⲚⲠⲖⲀⲜ ⲀⲚ ⲚⲰⲚⲈ ⲀⲖⲖⲀ ϨⲚ ϨⲈⲚⲠⲖⲀⲜ ⲚϨⲎⲦ ⲚⲤⲀⲢⲜ.

⁴ⲞⲨⲚⲦⲀⲚ ⲆⲈ ⲘⲘⲀⲨ ⲚⲞⲨⲚⲀϨⲦⲈ ⲚⲦⲈⲒⲘⲒⲚⲈ ⲈⲠⲚⲞⲨⲦⲈ ⲈⲂⲞⲖ ϨⲒⲦⲞⲞⲦϤ ⲘⲠⲈⲬⲢⲒⲤⲦⲞⲤ.

⁵ϪⲈ ⲈⲚⲞ ⲀⲚ ⲚϨⲒⲔⲀⲚⲞⲤ ⲘⲘⲒⲚ ⲘⲘⲞⲚ ⲈⲦⲢⲈⲚⲘⲈⲈⲨⲈ ⲈⲨϨⲰⲂ ϨⲀⲠⲈⲚϨⲦⲞⲢ. ⲀⲖⲖⲀ ⲦⲈⲚⲘⲚⲦϨⲒⲔⲀⲚⲞⲤ ⲈⲤϢⲞⲞⲠ ⲈⲂⲞⲖ ϨⲒⲦⲘ ⲠⲚⲞⲨⲦⲈ.

⁶ⲠⲀⲒ ⲈⲚⲦⲀϤⲦⲢⲈⲚⲢⲠϢⲀ ⲚⲢⲆⲒⲀⲔⲞⲚⲞⲤ ⲚⲦⲆⲒⲀⲐⲎⲔⲎ ⲚⲂⲢⲢⲈ ⲚⲦⲈⲠⲈⲤϨⲀⲒ ⲀⲚ. ⲀⲖⲖⲀ ⲘⲠⲈⲠⲚⲈⲨⲘⲀ. ⲠⲈⲤϨⲀⲒ ⲄⲀⲢ ⲘⲞⲨⲞⲨⲦ ⲠⲈⲠⲚⲈⲨⲘⲀ ⲆⲈ ⲦⲀⲚϨⲞ.

⁷ⲈϢϪⲈ ⲦⲆⲒⲀⲔⲞⲚⲒⲀ ⲆⲈ ⲘⲠⲘⲞⲨ ⲈⲤϢⲈⲦϢⲰⲦ ϨⲚ ϨⲈⲚⲤϨⲀⲒ ϨⲚ ϨⲈⲚⲰⲚⲈ ⲀⲤϢⲰⲠⲈ ϨⲚ ⲞⲨⲈⲞⲞⲨ. ϨⲰⲤⲦⲈ ⲚⲤⲈⲦⲘϬⲘϬⲞⲘ ⲚϬⲒ ⲚϢⲎⲢⲈ ⲘⲠⲒⲤⲢⲀⲎⲖ ⲈϬⲰϢⲦ ⲈϨⲞⲨⲚ ⲈⲠϨⲞ ⲘⲘⲰⲨⲤⲎⲤ ⲈⲦⲂⲈ ⲠⲈⲞⲞⲨ ⲘⲠⲈϤϨⲞ ⲠⲀⲒ ⲈⲦⲚⲀⲞⲨⲰⲤϤ.

⁸ⲚⲀϢ ⲚϨⲈ ⲚϨⲞⲨⲞ ⲈⲚⲦⲆⲒⲀⲔⲞⲚⲒⲀ ⲀⲚ ⲘⲠⲈⲠⲚⲈⲨⲘⲀ ⲚⲀϢⲰⲠⲈ ϨⲚ ⲞⲨⲈⲞⲞⲨ.

⁹ⲈϢϪⲈ ⲀⲨⲈⲞⲞⲨ ⲄⲀⲢ ϢⲰⲠⲈ ⲚⲦⲆⲒⲀⲔⲞⲚⲒⲀ ⲘⲠⲦϬⲀⲈⲒⲞ. ⲠⲞⲤⲰ ⲘⲀⲖⲖⲞⲚ ⲤⲚⲀⲢϨⲞⲨⲞ ⲚϬⲒ ⲦⲆⲒⲀⲔⲞⲚⲒⲀ ⲚⲦⲆⲒⲔⲀⲒⲞⲤⲨⲚⲎ ϨⲘ ⲠⲈⲞⲞⲨ.

¹⁰ⲔⲀⲒⲄⲀⲢ ⲘⲠⲞⲨϮⲈⲞⲞⲨ ⲘⲠⲈⲦⲦⲀⲒⲎⲨ ϨⲘ ⲠⲈⲈⲒⲘⲈⲢⲞⲤ ⲈⲦⲂⲈ ⲠⲈϨⲞⲨⲞ ⲘⲠⲈⲞⲞⲨ.

¹¹ⲈϢϪⲈ ⲀⲠⲈⲦⲚⲀⲞⲨⲰⲤϤ ⲄⲀⲢ ϢⲰⲠⲈ ϨⲒⲦⲚ ⲞⲨⲈⲞⲞⲨ. ⲚϨⲞⲨⲞ ϬⲈ ⲠⲈⲦⲚⲀϬⲰ ϤⲚⲀϢⲰⲠⲈ ϨⲘ ⲠⲈⲞⲞⲨ.

¹²ⲈⲨⲚⲦⲀⲚ ϬⲈ ⲘⲘⲀⲨ ⲚⲦⲈⲈⲒϨⲈⲖⲠⲒⲤ ⲚⲦⲈⲒⲘⲒⲚⲈ. ⲦⲚⲬⲢⲰ ϨⲚ ⲞⲨⲚⲞϬ ⲘⲠⲀⲢϨⲎⲤⲒⲀ.

¹³ⲈⲚⲔⲀⲦⲀ ⲐⲈ ⲀⲚ ⲘⲘⲰⲨⲤⲎⲤ ⲈϢⲀϤⲔⲰ ⲚⲞⲨⲔⲀⲖⲨⲘⲀ ⲈϨⲢⲀⲒ ⲈϪⲘ ⲠⲈϤϨⲞ ϪⲈ ⲚⲚⲈⲨϬⲰϢⲦ ⲚϬⲒ ⲚϢⲎⲢⲈ ⲘⲠⲒⲤⲢⲀⲎⲖ ⲈⲐⲀⲎ ⲘⲠⲈⲦⲚⲀⲞⲨⲰⲤϤ.

¹⁴ⲀⲖⲖⲀ ⲀⲨⲦⲰⲘ ⲚϬⲒ ⲚⲈⲨⲘⲈⲈⲨⲈ ⲚϨⲎⲦ ϢⲀ ϨⲢⲀⲒ ⲄⲀⲢ ⲈⲠⲞⲞⲨ ⲚϨⲞⲞⲨ ⲠⲒϨⲂⲤ ⲚⲞⲨⲰⲦ ϢⲞⲞⲠ ⲈϨⲢⲀⲒ ⲈϪⲘ ⲠⲰϢ ⲚⲦⲆⲒⲀⲐⲎⲔⲎ ⲚⲀⲤ. ⲈⲚⲤⲈϬⲰⲖⲠ ⲘⲘⲞϤ ⲈⲂⲞⲖ ⲀⲚ ϪⲈ ⲈϤⲚⲀⲞⲨⲰⲤϤ ϨⲘ ⲠⲈⲬⲢⲒⲤⲦⲞⲤ.

¹⁵ⲀⲖⲖⲀ ϢⲀ ⲠⲞⲞⲨ ⲈⲨⲚⲀⲰϢ ⲘⲘⲰⲨⲤⲎⲤ ⲞⲨⲚ ⲞⲨⲔⲀⲖⲨⲘⲀ ⲔⲎ ⲈϨⲢⲀⲒ ⲈϪⲘⲠⲈⲨϨⲎⲦ.

¹⁶ⲈϤⲈⲒ ⲆⲈ ⲈϤⲚⲀⲔⲞⲦϤ ⲈⲠϪⲞⲈⲒⲤ ϢⲀϤϤⲒ ⲘⲠⲔⲀⲖⲨⲘⲀ.

¹⁷ⲠϪⲞⲈⲒⲤ ⲆⲈ ⲠⲈ ⲠⲈⲠⲚⲈⲨⲘⲀ. ⲠⲘⲀ ⲆⲈ ⲈⲦⲈⲢⲈ ⲠⲈⲠⲚⲈⲨⲘⲀ ⲘⲠϪⲞⲈⲒⲤ ⲚϨⲎⲦϤ ⲈⲤⲘⲘⲀⲨ ⲚϬⲒ ⲦⲘⲚⲦⲢⲘϨⲈ.

¹⁸ⲀⲚⲞⲚ ⲆⲈ ⲦⲎⲢⲚ ϨⲚ ⲞⲨϨⲞ ⲈϤϬⲞⲖⲠ ⲈⲂⲞⲖ. ⲈⲚⲈⲒⲰⲢϨ ⲘⲠⲈⲞⲞⲨ ⲘⲠⲚⲞⲨⲦⲈ ϨⲒⲦⲚ ⲞⲨⲈⲒⲀⲖ ⲦⲚϪⲒϨⲢⲂ ⲚϮϨⲒⲔⲰⲚ ⲚⲞⲨⲰⲦ ⲈⲂⲞⲖ ϨⲚ ⲞⲨⲈⲞⲞⲨ ⲈⲨⲈⲞⲞⲨ ⲔⲀⲦⲀ ⲐⲈ ⲈⲂⲞⲖ ϨⲒⲦⲘ ⲠϪⲞⲈⲒⲤ ⲠⲈⲠⲚⲈⲨⲘⲀ.