Read Sahidic Coptic Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 9 Bible Online

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 9 - Sahidic Coptic bible

Ⲡⲣⲟⲥ Ⲕⲟⲣⲓⲛⲑⲓⲟⲩⲥ Ⲃ̄ 9

¹ⲈⲦⲂⲈ ⲦⲆⲒⲀⲔⲞⲚⲒⲀ ⲄⲀⲢ ⲦⲀⲒ ⲈⲦϢⲞⲞⲠ ⲈϨⲞⲨⲚ ⲈⲚⲈⲦⲞⲨⲀⲀⲂ. ⲞⲨϨⲞⲨⲞ ⲈⲢⲞⲒ ⲠⲈ ⲈⲤϨⲀⲒ ⲚⲎⲦⲚ.

²ϮⲤⲞⲞⲨⲚ ⲄⲀⲢ ⲘⲠⲈⲦⲚⲞⲨⲢⲞⲦ ⲠⲀⲒ ⲈϮϢⲞⲨϢⲞⲨ ⲘⲘⲞⲒ ⲚϨⲎⲦϤ ϨⲀⲢⲰⲦⲚ ϨⲚ ⲘⲘⲀⲔⲈⲆⲰⲚ. ϪⲈ ⲀⲦⲀⲬⲀⲒⲀ ⲤⲂⲦⲰⲦⲤ ϪⲒⲚ ⲤⲚⲞⲨϤ. ⲀⲨⲰ ⲀⲠⲈⲦⲚⲔⲰϨ ⲦⲂⲤ ⲞⲨⲘⲎⲎϢⲈ.

³ⲀⲒⲦⲚⲚⲞⲞⲨ ⲆⲈ ⲚⲚⲈⲤⲚⲎⲨ ϪⲈⲔⲀⲀⲤ ⲈⲚⲚⲈ ⲠⲈⲚϢⲞⲨϢⲞⲨ ⲰϪⲚ ⲈⲦⲚⲈⲒⲢⲈ ⲘⲘⲞϤ ϨⲀⲢⲰⲦⲚ ϨⲘ ⲠⲈⲈⲒⲤⲀ. ⲀⲖⲖⲀ ϪⲈⲔⲀⲀⲤ ⲔⲀⲦⲀ ⲐⲈ ⲈⲚⲈⲒϪⲰ ⲘⲘⲞⲤ ⲚⲦⲈⲦⲚ ϢⲰⲠⲈ ⲈⲦⲈⲦⲚⲤⲂⲦⲰⲦ.

⁴ⲘⲎⲠⲞⲦⲈ ⲚⲤⲈⲈⲒ ⲚⲘⲘⲀⲒ ⲚϬⲒ ⲘⲘⲀⲔⲈⲆⲰⲚ ⲚⲤⲈϨⲈ ⲈⲢⲰⲦⲚ ⲈⲚⲦⲈⲦⲚⲤⲂⲦⲰⲦ ⲀⲚ. ⲚⲦⲚϪⲒϢⲒⲠⲈ ⲀⲚⲞⲚ ϨⲘ ⲠⲈⲒⲦⲀϪⲢⲞ ϪⲈ ⲚⲚⲈⲚϪⲞⲞⲤ ϪⲈ ⲚⲦⲰⲦⲚ .

⁵ⲀⲒⲞⲠϤ ϬⲈ ϪⲈ ⲞⲨⲀⲚⲀⲄⲔⲀⲒⲞⲚ ⲠⲈ ⲈⲤⲈⲠⲤ ⲚⲈⲤⲚⲎⲨ ϪⲈ ⲈⲨⲈϢⲢⲠⲈⲒ ϢⲀⲢⲰⲦⲚ. ⲚⲤⲈϢⲢⲠⲤⲞⲂⲦⲈ ⲘⲠⲈⲦⲚⲤⲘⲞⲨ ⲈⲚⲦⲀⲦⲈⲦⲚⲈⲢⲎⲦ ⲘⲘⲞϤ ϪⲒⲚ ⲚϢⲞⲢⲠ. ⲈⲦⲢⲈϤϢⲰⲠⲈ ⲈϤⲤⲂⲦⲰⲦ ⲚⲦⲈⲈⲒϨⲈ ϨⲰⲤ ⲤⲘⲞⲨ ⲀⲨⲰ ϨⲰⲤ ϪⲒ ⲚϬⲞⲚⲤ ⲀⲚ.

⁶ⲠⲀⲒ ⲆⲈ ⲠⲈ ϪⲈ ⲠⲈⲦϪⲞ ϨⲚ ⲞⲨϮⲤⲞ ⲈϤⲚⲀⲰϨⲤ ⲞⲚ ϨⲚ ⲞⲨϮⲤⲞ. ⲀⲨⲰ ⲠⲈⲦϪⲞ ϨⲚ ⲞⲨⲤⲘⲞⲨ ⲈϤⲚⲀⲰϨⲤ ϨⲚ ⲞⲨⲤⲘⲞⲨ

⁷ⲠⲞⲨⲀ ⲠⲞⲨⲀ ⲠⲈⲚⲦⲀϤⲦⲞϢϤ ϨⲘ ⲠⲈϤϨⲎⲦ ϨⲚ ⲞⲨⲖⲨⲠⲎ ⲀⲚ ⲎϨⲚ ⲞⲨϨⲦⲞⲢ. ⲞⲨⲢⲈϤϮ ⲄⲀⲢ ⲈϤⲢⲞⲞⲨⲦ ⲠⲈⲦⲈⲢⲈ ⲠⲚⲞⲨⲦⲈ ⲘⲈ ⲘⲘⲞϤ.

⁸ⲞⲨⲚ ϬⲞⲘ ⲆⲈ ⲘⲠⲚⲞⲨⲦⲈ ⲈⲦⲀϢⲈ ϨⲘⲞⲦ ⲚⲒⲘ ⲈϨⲞⲨⲚ ⲈⲢⲰⲦⲚ. ϪⲈⲔⲀⲀⲤ ϨⲚ ϨⲰⲂ ⲚⲒⲘ ⲚⲞⲨⲞⲈⲒϢ ⲚⲒⲘ ⲈⲨⲚⲦⲎⲦⲚ ⲘⲘⲀⲨ ⲘⲠⲈⲦⲚⲢⲰϢⲈ ⲦⲎⲢϤ. ⲚⲦⲈⲦⲚ ⲢϨⲞⲨⲞ ⲈϨⲞⲨⲚ ⲈϨⲰⲂ ⲚⲒⲘ ⲚⲀⲄⲀⲐⲞⲚ.

⁹ⲔⲀⲦⲀ ⲐⲈ ⲈⲦⲤⲎϨ ϪⲈ ⲀϤϪⲰⲰⲢⲈ ⲈⲂⲞⲖ. ⲀϤϮ ⲚⲚϨⲎⲔⲈ. ⲦⲈϤⲆⲒⲔⲀⲒⲞⲤⲨⲚⲎ ϢⲞⲞⲠ ϢⲀ ⲈⲚⲈϨ.

¹⁰ⲠⲈⲦϮ ⲆⲈ ⲘⲠⲈϬⲢⲞϬ ⲘⲠⲈⲦϪⲞ ⲘⲚ ⲞⲨⲞⲈⲒⲔ ⲈⲞⲨⲞⲘϤ ϤⲚⲀϮ ⲀⲨⲰ ⲚϤⲦⲀϢⲞ ⲘⲠⲈⲦⲚϪⲞ ⲚϤⲀⲨⲜⲀⲚⲈ ⲚⲚⲄⲈⲚⲎⲘⲀ ⲚⲦⲈⲦⲚ ⲆⲒⲔⲀⲒⲞⲤⲨⲚⲎ.

¹¹ⲈⲦⲈⲦⲚⲞ ⲚⲢⲘⲘⲀⲞ ϨⲚ ϨⲰⲂ ⲚⲒⲘ ⲈϨⲞⲨⲚ ⲈⲘⲚⲦϨⲀⲠⲖⲞⲨⲤ ⲚⲒⲘ. ⲦⲀⲒ ⲈⲦⲢϨⲰⲂ ⲈⲂⲞⲖ ϨⲒ ⲦⲞⲞⲦⲚ ⲈⲨϢⲠϨⲘⲞⲦ ⲚⲦⲈ ⲠⲚⲞⲨⲦⲈ.

¹²ϪⲈ ⲦⲆⲒⲀⲔⲞⲚⲒⲀ ⲘⲠⲈⲒϢⲘϢⲈ ⲚⲈⲤϢⲰⲠⲈ ⲘⲘⲀⲦⲈ ⲀⲚ ⲈⲤϪⲰⲔ ⲈⲂⲞⲖ ⲚⲚⲈϬⲢⲰϨ ⲚⲚⲈⲦⲞⲨⲀⲀⲂ. ⲀⲖⲖⲀ ⲈⲤⲢⲠⲔⲈⲢϨⲞⲞⲨ ϨⲒⲦⲚ ϨⲀϨ ⲚϢⲠϨⲘⲞⲦ ⲚⲦⲈ ⲠⲚⲞⲨⲦⲈ.

¹³ⲀⲨⲰ ⲈⲂⲞⲖ ϨⲒⲦⲞⲞⲦⲤ ⲚⲦⲆⲞⲔⲒⲘⲎ ⲚⲦⲈⲈⲒⲆⲒⲀⲔⲞⲚⲒⲀ ⲈⲚϮⲈⲞⲞⲨ ⲘⲠⲚⲞⲨⲦⲈ ⲈϪⲚ ⲐⲨⲠⲞⲦⲀⲄⲎ ⲚⲦⲈⲦⲚ ϨⲞⲘⲞⲖⲞⲄⲒⲀ ⲈϨⲞⲨⲚ ⲈⲠⲈⲨⲀⲄⲄⲈⲖⲒⲞⲚ ⲘⲠⲈⲬⲢⲒⲤⲦⲞⲤ ⲘⲚ ⲦⲘⲚⲦϨⲀⲠⲖⲞⲨⲤ ⲚⲦⲔⲞⲒⲚⲰⲚⲒⲀ ⲈϨⲞⲨⲚ ⲈⲢⲞⲞⲨ. ⲘⲚ ⲞⲨⲞⲚ ⲚⲒⲘ.

¹⁴ⲘⲚ ⲠⲈⲨⲤⲞⲠⲤ ϨⲀⲢⲰⲦⲚ. ⲈⲨⲞⲨⲈ ϢⲦⲎⲨⲦⲚ ⲈⲦⲂⲈ ⲦⲈⲬⲀⲢⲒⲤ ⲘⲠⲚⲞⲨⲦⲈ ⲈⲦⲚⲀϢⲰⲤ ⲈϪⲚ ⲦⲎⲨⲦⲚ.

¹⁵ⲠⲈϨⲘⲞⲦ ⲘⲠⲚⲞⲨⲦⲈ ϢⲎⲠ ⲈϨⲢⲀⲒ ⲈϪⲚ ⲦⲈϤⲆⲰⲢⲈⲀ ⲈⲦⲈⲚⲦⲚⲚⲀϢϪⲞⲞⲤ ⲀⲚ.