Read Sahidic Coptic Ⲡⲣⲟⲥ Ⲉⲫⲉⲥⲓⲟⲩⲥ 3 Bible Online

Ⲡⲣⲟⲥ Ⲉⲫⲉⲥⲓⲟⲩⲥ 3 - Sahidic Coptic bible

Ⲡⲣⲟⲥ Ⲉⲫⲉⲥⲓⲟⲩⲥ 3

¹ⲈⲦⲂⲈ ⲠⲀⲒ ⲀⲚⲞⲔ ⲠⲀⲨⲖⲞⲤ ⲠⲈⲦⲘⲎⲢ ⲚⲦⲈ ⲠⲈⲬⲢⲒⲤⲦⲞⲤ ϨⲀⲢⲰⲦⲚ ⲚϨⲈⲐⲚⲞⲤ.

²ⲈϢϪⲈ ⲀⲦⲈⲦⲚⲤⲰⲦⲘ ⲈⲦⲞⲒⲔⲞⲚⲞⲘⲒⲀ ⲚⲦⲈⲬⲀⲢⲒⲤ ⲘⲠⲚⲞⲨⲦⲈ ⲈⲚⲦⲀⲨⲦⲀⲀⲤ ⲚⲀⲒ ⲈϨⲞⲨⲚ ⲈⲢⲰⲦⲚ.

³ϪⲈ ⲔⲀⲦⲀ ⲞⲨϬⲰⲖⲠ ⲈⲂⲞⲖ ⲀⲨⲦⲀⲘⲞⲒ ⲈⲠⲘⲨⲤⲦⲎⲢⲒⲞⲚ. ⲔⲀⲦⲀ ⲐⲈ ⲈⲚⲦⲀⲒⲤϨⲀⲒ ⲚϢⲞⲢⲠ ϨⲚ ⲞⲨⲔⲞⲨⲒ

⁴ⲠⲢⲞⲤ ⲐⲈ ⲈⲦⲈⲦⲚⲀϢϬⲘϬⲞⲘ ⲘⲘⲞⲤ ⲈⲦⲈⲦⲚⲰϢ ⲈⲚⲞⲒ ⲚⲦⲀⲘⲚⲦⲤⲀⲂⲈ ϨⲘ ⲠⲘⲨⲤⲦⲎⲢⲒⲞⲚ ⲘⲠⲈⲬⲢⲒⲤⲦⲞⲤ.

⁵ⲠⲀⲒ ⲈⲦⲘⲠⲞⲨⲞⲨⲞⲚϨϤ ⲈⲂⲞⲖ ϨⲚ ϨⲈⲚⲔⲈⲄⲈⲚⲈⲀ ⲚϢⲎⲢⲈ ⲚⲚⲢⲰⲘⲈ. ⲚⲐⲈ ⲈⲚⲦⲀⲨϬⲞⲖⲠϤ ⲈⲂⲞⲖ ⲦⲈⲚⲞⲨ ⲚⲚⲈϤⲀⲠⲞⲤⲦⲞⲖⲞⲤ ⲈⲦⲞⲨⲀⲀⲂ. ⲘⲚ ⲚⲈⲠⲢⲞⲪⲎⲦⲎⲤ ϨⲘ ⲠⲈⲠⲚⲈⲨⲘⲀ.

⁶ⲈⲦⲢⲈ ⲚϨⲈⲐⲚⲞⲤ ϢⲰⲠⲈ ⲚⲤⲨⲚⲔⲖⲎⲢⲞⲚⲞⲘⲞⲤ ⲘⲚ ⲞⲨⲤⲰⲘⲀ ⲚⲞⲨⲰⲦ. ⲀⲨⲰ ⲚⲤⲨⲘⲘⲈⲦⲞⲬⲞⲤ ⲘⲠⲈⲢⲎⲦ ⲘⲠⲈⲬⲢⲒⲤⲦⲞⲤ ⲒⲎⲤⲞⲨⲤ ϨⲒⲦⲘ ⲠⲈⲨⲀⲄⲄⲈⲖⲒⲞⲚ.

⁷ⲠⲀⲒ ⲈⲚⲦⲀⲒϢⲰⲠⲈ ⲚⲀϤ ⲚⲆⲒⲀⲔⲞⲚⲞⲤ. ⲔⲀⲦⲀ ⲦⲆⲰⲢⲈⲀ ⲚⲦⲈⲬⲀⲢⲒⲤ ⲈⲚⲦⲀⲨⲦⲀⲀⲤ ⲚⲀⲒ. ⲔⲀⲦⲀ ⲦⲈⲚⲈⲢⲄⲒⲀ ⲚⲦⲈϤϬⲞⲘ.

⁸ⲀⲨϮ ⲚⲀⲒ ⲚⲦⲈⲈⲒⲬⲀⲢⲒⲤ ⲠⲈⲖⲀⲬⲒⲤⲦⲞⲤ ⲚⲚⲈⲦⲞⲨⲀⲀⲂ ⲦⲎⲢⲞⲨ. ⲈⲦⲢⲀⲈⲨⲀⲄⲄⲈⲖⲒⲌⲈ ⲚⲚϨⲈⲐⲚⲞⲤ ⲚⲦⲘⲚⲦⲢⲘⲘⲀⲞ ⲈⲦⲚⲀϢⲰⲤ ⲘⲠⲈⲬⲢⲒⲤⲦⲞⲤ.

⁹ⲀⲨⲰ ⲈⲦⲀⲘⲈ ⲞⲨⲞⲚ ⲚⲒⲘ ϪⲈ ⲞⲨ ⲦⲈ ⲦⲞⲒⲔⲞⲚⲞⲘⲒⲀ ⲘⲠⲘⲨⲤⲦⲎⲢⲒⲞⲚ ⲈⲐⲎⲠ ϪⲒⲚ ⲈⲚⲈϨ ϨⲘ ⲠⲚⲞⲨⲦⲈ ⲠⲈⲚⲦⲀϤⲤⲚⲦ ⲚⲔⲀ ⲚⲒⲘ.

¹⁰ϪⲈ ⲈⲨⲈⲞⲨⲰⲚϨ ⲦⲈⲚⲞⲨ ⲈⲂⲞⲖ ⲚⲚⲀⲢⲬⲎ. ⲘⲚ ⲚⲈⲜⲞⲨⲤⲒⲀ ϨⲚ ⲘⲠⲎⲨⲈ. ⲈⲂⲞⲖ ϨⲒⲦⲚ ⲦⲈⲔⲔⲖⲎⲤⲒⲀ ⲦⲤⲞⲪⲒⲀ ⲚⲀⲦⲈⲤⲘⲞⲦ ⲚⲦⲈ ⲠⲚⲞⲨⲦⲈ.

¹¹ⲔⲀⲦⲀ ⲠⲦⲰϢ ⲚⲚⲀⲒⲰⲚ. ⲦⲀⲒ ⲈⲚⲦⲀϤⲦⲀⲀⲤ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ⲠⲈⲚϪⲞⲈⲒⲤ

¹²ⲠⲀⲒ ⲈⲦⲈⲨⲚⲦⲀⲚ ⲦⲠⲀⲢϨⲎⲤⲒⲀ ⲚϨⲎⲦϤ ⲘⲚ ⲠϨⲰⲚ ⲈϨⲞⲨⲚ ϨⲘ ⲠⲚⲀϨⲦⲈ ϨⲒⲦⲚ ⲦⲈϤⲠⲒⲤⲦⲒⲤ.

¹³ⲈⲦⲂⲈ ⲠⲀⲒ ϮⲀⲒⲦⲈⲒ ⲈⲦⲘⲈⲄⲔⲀϬⲈⲒ ϨⲚ ⲚⲀⲐⲖⲒⲮⲒⲤ ϨⲀⲢⲰⲦⲚ ⲈⲦⲈ ⲠⲀⲒ ⲠⲈ ⲠⲈⲦⲚⲈⲞⲞⲨ.

¹⁴ⲈⲦⲂⲈ ⲠⲀⲒ ϮⲔⲰⲖϪ ⲚⲚⲀⲠⲀⲦ ⲘⲠⲈⲒⲰⲦ

¹⁵ⲠⲀⲒ ⲈϢⲀⲨⲦⲀⲨⲈ ⲘⲚⲦⲈⲒⲰⲦ ⲚⲒⲘ ⲈⲂⲞⲖ ⲘⲘⲞϤ ϨⲚ ⲘⲠⲎⲨⲈ. ⲀⲨⲰ ϨⲒϪⲘ ⲠⲔⲀϨ.

¹⁶ϪⲈⲔⲀⲀⲤ ⲈϤⲈϮ ⲚⲎⲦⲚ ⲔⲀⲦⲀ ⲦⲘⲚⲦⲢⲘⲘⲀⲞ ⲘⲠⲈϤⲈⲞⲞⲨ. ⲈⲠⲦⲀϪⲢⲈ ⲦⲎⲨⲦⲚ ϨⲚ ⲞⲨϬⲞⲘ ϨⲒⲦⲘ ⲠⲈϤⲠⲚⲈⲨⲘⲀ.

¹⁷ⲈⲦⲢⲈ ⲠⲈⲬⲢⲒⲤⲦⲞⲤ ⲞⲨⲰϨ ϨⲘ ⲠⲢⲰⲘⲈ ⲈⲦϨⲒ ϨⲞⲨⲚ ϨⲒⲦⲚ ⲦⲠⲒⲤⲦⲒⲤ ϨⲚ ⲚⲈⲦⲚϨⲎⲦ.

¹⁸ⲈⲦⲈⲦⲚϪⲈ ⲚⲞⲨⲚⲈ ⲈⲂⲞⲖ ϨⲒ ⲤⲚⲦⲈ ϨⲚ ⲞⲨⲀⲄⲀⲠⲎ ϪⲈⲔⲀⲀⲤ ⲈⲦⲈⲦⲚⲀϢϬⲘϬⲞⲘ ⲈⲈⲒⲘⲈ ⲘⲚ ⲚⲈⲦⲞⲨⲀⲀⲂ ⲦⲎⲢⲞⲨ ϪⲈ ⲞⲨ ⲠⲈ ⲠⲞⲨⲰϢⲤ ⲘⲚ ⲠⲈϢⲒⲀⲒ ⲘⲚ ⲠϪⲒⲤⲈ ⲘⲚ ⲠϢⲒⲔⲈ.

¹⁹ⲈⲤⲞⲨⲚ ⲠⲈϨⲞⲨⲞ ⲚⲦⲀⲄⲀⲠⲎ ⲘⲠⲤⲞⲞⲨⲚ ⲘⲠⲈⲬⲢⲒⲤⲦⲞⲤ. ϪⲈⲔⲀⲀⲤ ⲈϤⲈϪⲰⲔ ⲈⲂⲞⲖ ⲚϬⲒ ⲠϪⲰⲔ ⲦⲎⲢϤ ⲘⲠⲚⲞⲨⲦⲈ.

²⁰ⲠⲈⲦⲈⲨⲚϬⲞⲘ ⲆⲈ ⲘⲘⲞϤ ⲈⲈⲒⲢⲈ ⲚϨⲞⲨⲈ ϨⲰⲂ ⲚⲒⲘ. ⲈϨⲞⲨⲈ ⲚⲈⲦⲚⲀⲒⲦⲒ ⲘⲘⲞⲞⲨ ⲎⲚⲈⲦⲚⲚⲞⲒ ⲘⲘⲞⲞⲨ. ⲔⲀⲦⲀ ⲦϬⲞⲘ ⲈⲦⲈⲚⲈⲢⲄⲈⲒ ⲚϨⲎⲦⲚ.

²¹ⲠⲈⲞⲞⲨ ⲚⲀϤ ϨⲚ ⲦⲈⲔⲔⲖⲎⲤⲒⲀ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ⲈϪⲰⲘ ⲚⲒⲘ ϢⲀ ⲈⲚⲈϨ ⲚⲈⲚⲈϨ ϨⲀⲘⲎⲚ.