Read Sahidic Coptic Ⲡⲣⲟⲥ Ⲕⲟⲗⲁⲥⲥⲁⲓⲥ 4 Bible Online

Ⲡⲣⲟⲥ Ⲕⲟⲗⲁⲥⲥⲁⲓⲥ 4 - Sahidic Coptic bible

Ⲡⲣⲟⲥ Ⲕⲟⲗⲁⲥⲥⲁⲓⲥ 4

¹ⲚϪⲒⲤⲞⲞⲨⲈ ⲀⲢⲒⲠⲆⲒⲔⲀⲒⲞⲚ. ⲀⲨⲰ ⲠϢⲰϢ ⲚⲚⲈⲦⲚϨⲘϨⲀⲖ. ⲈⲦⲈⲦⲚⲤⲞⲞⲨⲚ ϪⲈ ⲚⲦⲰⲦⲚ ϨⲰⲦ ⲦⲎⲨⲦⲚ ⲞⲨⲚⲦⲎⲦⲚ ⲠϪⲞⲈⲒⲤ ϨⲚ ⲦⲠⲈ.

²ⲠⲢⲞⲤⲔⲀⲢⲦⲈⲢⲒ ⲈⲠⲈϢⲖⲎⲖ. ⲈⲦⲈⲦⲚⲞ ⲚⲞⲨϢⲎ ⲚⲢⲞⲈⲒⲤ ⲚϨⲎⲦϤ ϨⲚ ⲞⲨϢⲠϨⲘⲞⲦ.

³ⲈⲦⲈⲦⲚϢⲖⲎⲖ ϨⲰⲰⲚ ϨⲀⲢⲞⲚ ϪⲈⲔⲀⲀⲤ ⲈⲢⲈ ⲠⲚⲞⲨⲦⲈ ⲞⲨⲰⲚ ⲚⲀⲚ ⲘⲠⲢⲞ ⲘⲠϢⲀϪⲈ ⲈⲦⲈⲢⲈⲚϪⲰ ⲘⲠⲘⲨⲤⲦⲎⲢⲒⲞⲚ ⲘⲠⲚⲞⲨⲦⲈ. ⲠⲀⲒ ⲈϮⲘⲎⲢ ⲈⲦⲂⲎⲎⲦϤ

⁴ϪⲈ ⲈⲒⲈⲞⲨⲞⲚϨϤ ⲈⲂⲞⲖ ⲚⲐⲈ ⲈⲦϢⲈ ⲈⲢⲞⲒ ⲈϢⲀϪⲈ.

⁵ⲘⲞⲞϢⲈ ϨⲚ ⲞⲨⲤⲞⲪⲒⲀ. ⲈⲦⲈⲦⲚϢⲰⲠ ⲘⲠⲈⲨⲞⲒϢ ⲚⲚⲀϨⲢⲚ ⲚⲈⲦϨⲒⲂⲞⲖ.

⁶ⲘⲀⲢⲈ ⲠⲈⲦⲚϢⲀϪⲈ ⲚⲞⲨⲞⲈⲒϢ ⲚⲒⲘ ϢⲰⲠⲈ ϨⲚ ⲞⲨⲬⲀⲢⲒⲤ ⲈϤϪⲞⲔⲢ ⲚϨⲘⲞⲨ ⲈⲦⲢⲈⲦⲚⲈⲒⲘⲈ ⲈⲐⲈ ⲈⲦⲈϢϢⲈ ⲈϢⲀϪⲈ ⲘⲚ ⲠⲞⲨⲀ ⲠⲞⲨⲀ.

⁷ϤⲚⲀⲦⲀⲘⲰⲦⲚ ⲈⲚⲈϮ ⲚϨⲎⲦⲞⲨ ⲦⲎⲢⲞⲨ ⲚϬⲒ ⲦⲨⲬⲒⲔⲞⲤ ⲠⲘⲈⲢⲒⲦ ⲚⲤⲞⲚ. ⲀⲨⲰ ⲘⲠⲒⲤⲦⲞⲤ ⲚⲆⲒⲀⲔⲞⲚⲞⲤ. ⲠⲈⲚϢⲂⲢϨⲘϨⲀⲖ ϨⲘ ⲠϪⲞⲈⲒⲤ.

⁸ⲠⲀⲒ ⲈⲚⲦⲀⲒⲦⲚⲚⲞⲞⲨϤ ϢⲀⲢⲰⲦⲚ ⲈⲠⲈⲒϨⲰⲂ ϪⲈⲔⲀⲀⲤ ⲈⲦⲈⲦⲚⲈⲈⲒⲘⲈ ⲈⲠⲈⲚⲞⲨⲰ. ⲀⲨⲰ ⲚϤⲠⲀⲢⲀⲔⲀⲖⲈⲒ ⲚⲚⲈⲦⲚϨⲎⲦ.

⁹ⲘⲚ ⲞⲚⲎⲤⲒⲘⲞⲤ ⲠⲤⲞⲚ ⲘⲠⲒⲤⲦⲞⲤ ⲀⲨⲰ ⲘⲘⲈⲢⲒⲦ ⲠⲀⲒ ⲈⲨⲈⲂⲞⲖ ⲚϨⲎⲦ ⲦⲎⲨⲦⲚ ⲠⲈ. ⲤⲈⲚⲀⲦⲀⲘⲰⲦⲚ ⲈϨⲰⲂ ⲚⲒⲘ ⲈⲦϨⲀⲦⲎⲚ.

¹⁰ϤϢⲒⲚⲈ ⲈⲢⲰⲦⲚ ⲚϬⲒ ⲀⲢⲒⲤⲦⲀⲢⲬⲞⲤ ⲠⲀϢⲂⲢ ⲀⲒⲬⲘⲀⲖⲰⲦⲞⲤ ⲀⲨⲰ ⲘⲀⲢⲔⲞⲤ ⲠϢⲞⲨⲀ ⲚⲂⲀⲢⲚⲀⲂⲀⲤ ⲠⲀⲒ ⲈⲚⲦⲀⲦⲈⲦⲚϪⲒ ⲚϨⲈⲚⲈⲚⲦⲞⲖⲎ ⲈⲦⲂⲎⲎⲦϤ ⲈϤϢⲀⲚⲈⲒ ϢⲀⲢⲰⲦⲚ ϢⲞⲠϤ ⲈⲢⲰⲦⲚ.

¹¹ⲀⲨⲰ ⲒⲎⲤⲞⲨⲤ ⲠⲈⲦⲈϢⲀⲨⲘⲞⲨⲦⲈ ⲈⲢⲞϤ ϪⲈ ⲒⲞⲨⲤⲦⲞⲤ ⲚⲀⲒ ⲈⲦϢⲞⲞⲠ ⲈⲂⲞⲖ ϨⲘ ⲠⲤⲂⲂⲈ ⲚⲀⲒ ⲘⲀⲨⲀⲀⲨ ⲚⲈ ⲚⲀϢⲂⲢ ⲢϨⲰⲂ ⲈϨⲞⲨⲚ ⲈⲦⲘⲚⲦⲢⲢⲞ ⲘⲠⲚⲞⲨⲦⲈ ⲚⲀⲒ ⲈⲚⲦⲀⲨϢⲰⲠⲈ ⲚⲀⲒ ⲘⲠⲀⲢⲎⲄⲞⲢⲒⲀ.

¹²ϤϢⲒⲚⲈ ⲈⲢⲰⲦⲚ ⲚϬⲒ ⲈⲠⲀⲪⲢⲀⲤ ⲠϨⲘϨⲀⲖ ⲚⲒⲎⲤⲞⲨⲤ ⲠⲈⲬⲢⲒⲤⲦⲞⲤ ⲠⲀⲒ ⲈⲨⲈⲂⲞⲖ ⲚϨⲎⲦ ⲦⲎⲨⲦⲚ ⲠⲈ ⲈϤⲀⲄⲰⲚⲒⲌⲈ ⲚⲞⲨⲞⲈⲒϢ ⲚⲒⲘ ϨⲀⲢⲰⲦⲚ ϨⲚ ⲚⲈϢⲖⲎⲖ ϪⲈ ⲈⲦⲈⲦⲚⲈⲀϨⲈⲢⲀⲦ ⲦⲎⲨⲦⲚ ⲚⲦⲈⲖⲒⲞⲤ ⲀⲨⲰ ⲈⲦⲈⲦⲚϪⲎⲔ ϨⲚ ⲞⲨⲰϢ ⲚⲒⲘ ⲚⲦⲈ ⲠⲚⲞⲨⲦⲈ.

¹³ϮⲢⲘⲚⲦⲢⲈ ⲄⲀⲢ ⲚⲀϤ ϪⲈ ⲞⲨⲚⲦⲀϤ ⲘⲘⲀⲨ ⲚⲞⲨⲚⲞϬ ⲚϨⲒⲤⲈ ϨⲀⲢⲰⲦⲚ. ⲘⲚ ⲚⲈⲦϨⲚ ⲖⲀⲞⲆⲒⲔⲒⲀ. ⲘⲚ ⲚⲈⲦϨⲚ ⲐⲒⲈⲢⲀⲠⲞⲖⲒⲤ.

¹⁴ϤϢⲒⲚⲈ ⲈⲢⲰⲦⲚ ⲚϬⲒ ⲖⲞⲨⲔⲀⲤ ⲠⲤⲀⲈⲒⲚ ⲠⲘⲈⲢⲒⲦ. ⲘⲚ ⲆⲎⲘⲀⲤ.

¹⁵ϢⲒⲚⲈ ⲈⲚⲈⲤⲚⲎⲨ ⲈⲦϨⲚ ⲖⲀⲞⲆⲒⲔⲒⲀ. ⲘⲚ ⲚⲨⲘⲪⲀ. ⲀⲨⲰ ⲦⲤⲞⲞⲨϨⲤ ⲈⲦϨⲘ ⲠⲈⲤⲎⲒ.

¹⁶ⲀⲨⲰ ⲈⲨϢⲀⲚⲞⲨⲰ ⲈⲨⲰϢ ⲚⲦⲈⲈⲒⲈⲠⲒⲤⲦⲞⲖⲎ ϨⲀⲦⲈ ⲦⲎⲨⲦⲚ ⲘⲀⲢⲈⲞⲨⲞϢⲤ ϨⲰⲰϤ ϨⲚ ⲦⲈⲔⲔⲖⲎⲤⲒⲀ ⲚⲚⲖⲀⲞⲆⲒⲔⲈⲨⲤ. ⲀⲨⲰ ⲞⲚ ⲘⲚⲚⲤⲰⲤ ⲚⲦⲈⲦⲚⲞϢⲤ ϨⲰⲦ ⲦⲎⲨⲦⲚ.

¹⁷ⲀⲨⲰ ⲀϪⲒⲤ ⲚⲀⲢⲬⲒⲠⲠⲞⲤ ϪⲈ ϬⲰϢⲦ ⲈⲦⲆⲒⲀⲔⲞⲚⲒⲀ ⲈⲚⲦⲀⲔϪⲒⲦⲤ ϨⲘ ⲠϪⲞⲈⲒⲤ ϪⲈ ⲈⲔⲈϪⲞⲔⲤ ⲈⲂⲞⲖ.

¹⁸ⲠⲀⲤⲠⲀⲤⲘⲞⲤ ⲈⲚⲦⲀⲒⲤϨⲀⲈⲒϤ ⲚⲦⲀϬⲒϪ ⲠⲀⲨⲖⲞⲤ. ⲀⲢⲒⲠⲘⲈⲈⲨⲈ ⲚⲚⲀⲘⲢⲢⲈ. ⲦⲈⲬⲀⲢⲒⲤ ⲚⲘⲘⲎⲦⲚ