Read Sahidic Coptic Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲁ̄ 4 Bible Online

Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲁ̄ 4 - Sahidic Coptic bible

Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲁ̄ 4

¹ⲦⲈⲚⲞⲨ ϬⲈ ⲚⲈⲤⲚⲎⲨ ⲦⲚⲤⲞⲠⲤ ⲀⲨⲰ ⲦⲚⲠⲀⲢⲀⲔⲀⲖⲈⲒ ⲘⲘⲰⲦⲚ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ϪⲈⲔⲀⲀⲤ ⲔⲀⲦⲀ ⲐⲈ ⲈⲚⲦⲀⲦⲈⲦⲚϪⲒ ⲈⲂⲞⲖ ϨⲒⲦⲞⲞⲦⲚ ⲚⲐⲈ ⲈⲦϢⲈ ⲈⲦⲢⲈⲦⲚⲘⲞⲞϢⲈ ⲀⲨⲰ ⲈⲀⲢⲈⲤⲔⲈ ⲘⲠⲚⲞⲨⲦⲈ ⲔⲀⲦⲀ ⲐⲈ ⲞⲚ ⲈⲦⲈⲦⲚⲘⲞⲞϢⲈ ⲚϨⲎⲦⲤ ϪⲈⲔⲀⲀⲤ ⲞⲚ ⲈⲦⲈⲦⲚⲈⲢϨⲞⲨⲞ.

²ⲦⲈⲦⲚⲤⲞⲞⲨⲚ ⲄⲀⲢ ϪⲈ ⲞⲨ ⲚⲈ ⲘⲠⲀⲢⲀⲄⲄⲈⲖⲒⲀ ⲈⲚⲦⲀⲚⲦⲀⲀⲨ ⲚⲎⲦⲚ ϨⲘ ⲠϪⲞⲈⲒⲤ ⲒⲎⲤⲞⲨⲤ.

³ⲠⲀⲒ ⲄⲀⲢ ⲠⲈ ⲠⲞⲨⲰϢ ⲘⲠⲚⲞⲨⲦⲈ ⲠⲈⲦⲚⲦⲂⲂⲞ. ⲈⲤⲀϨⲈ ⲦⲎⲨⲦⲚ ⲈⲂⲞⲖ ⲚⲦⲠⲞⲢⲚⲈⲒⲀ.

⁴ⲈⲦⲢⲈ ⲠⲞⲨⲀ ⲠⲞⲨⲀ ⲘⲘⲰⲦⲚ ⲤⲂⲞ ⲈⲔⲀ ⲠⲈϤⲤⲔⲈⲨⲞⲤ ⲚⲀϤ ϨⲚ ⲞⲨⲦⲂⲂⲞ ⲘⲚ ⲞⲨⲦⲒⲘⲎ.

⁵ϨⲚ ⲞⲨⲠⲀⲐⲞⲤ ⲀⲚ ⲚⲈⲠⲒⲐⲨⲘⲒⲀ. ⲔⲀⲦⲀ ⲐⲈ ⲚⲚⲔⲈϨⲈⲐⲚⲞⲤ ⲈⲦⲈⲚⲤⲈⲤⲞⲞⲨⲚ ⲀⲚ ⲘⲠⲚⲞⲨⲦⲈ.

⁶ⲈⲦⲘⲢⲠⲂⲞⲖ ⲘⲠϢⲒ ⲀⲨⲰ ⲈⲦⲘϤⲈϬ ⲠⲈϤⲤⲞⲚ ϨⲘ ⲠϨⲰⲂ ϪⲈ ⲞⲨⲢⲈϤϪⲒⲔⲂⲀ ⲠⲈ ⲠϪⲞⲈⲒⲤ ⲈⲦⲂⲈ ⲚⲀⲒ ⲦⲎⲢⲞⲨ ⲔⲀⲦⲀ ⲐⲈ ⲈⲚⲦⲀⲚϪⲞⲞⲤ ⲚⲎⲦⲚ ϪⲒⲚ ⲚϢⲞⲢⲠ ⲀⲨⲰ ⲀⲚⲢⲘⲚⲦⲢⲈ.

⁷ⲚⲦⲀ ⲠⲚⲞⲨⲦⲈ ⲄⲀⲢ ⲦⲀϨⲘⲚ ⲀⲚ ⲈⲨϪⲰϨⲘ. ⲀⲖⲖⲀ ϨⲚ ⲞⲨⲦⲂⲂⲞ.

⁸ⲦⲈⲚⲞⲨ ϬⲈ ⲠⲈⲦⲀⲐⲈⲦⲈⲒ ⲚⲚⲈϤⲀⲐⲈⲦⲈⲒ ⲚⲢⲰⲘⲈ ⲀⲚ. ⲀⲖⲖⲀ ⲘⲠⲚⲞⲨⲦⲈ. ⲠⲀⲒ ⲞⲚ ⲈⲚⲦⲀϤϮ ⲘⲠⲈϤⲠⲚⲈⲨⲘⲀ ⲈⲦⲞⲨⲀⲀⲂ ⲚⲎⲦⲚ.

⁹ⲈⲦⲂⲈ ⲦⲘⲚⲦⲘⲀⲒⲤⲞⲚ ⲆⲈ ⲚⲦⲈⲦⲚ ⲢⲬⲢⲒⲀ ⲀⲚ ⲚⲤϨⲀⲒ ⲚⲎⲦⲚ. ⲚⲦⲰⲦⲚ ⲄⲀⲢ ⲚⲦⲈⲦⲚ ϨⲈⲚⲢⲈϤϪⲒ ⲤⲂⲰ ⲚⲦⲘⲠⲚⲞⲨⲦⲈ ⲈⲘⲈⲢⲈ ⲚⲈⲦⲚⲈⲢⲎⲨ.

¹⁰ⲔⲀⲒ ⲄⲀⲢ ⲦⲈⲦⲚⲈⲒⲢⲈ ⲘⲘⲞⲤ ⲈⲚⲈⲤⲚⲎⲨ ⲦⲎⲢⲞⲨ ⲈⲦϨⲚ ⲦⲘⲀⲔⲈⲆⲞⲚⲒⲀ ⲦⲎⲢⲤ. ⲦⲚⲠⲀⲢⲀⲔⲀⲖⲈⲒ ⲆⲈ ⲘⲘⲰⲦⲚ ⲚⲈⲤⲚⲎⲨ ⲈⲢϨⲞⲨⲞ.

¹¹ⲔⲔ ⲀⲨⲰ ⲈⲞⲨⲢⲞⲦ ⲈⲤϬⲢⲀϨⲦ ⲀⲨⲰ ⲈϪⲒ ϨⲢⲎⲦⲚ ⲈⲢⲰⲦⲚ ⲈⲢϨⲰⲂ ϨⲚ ⲚⲈⲦⲚϬⲒϪ. ⲔⲀⲦⲀ ⲐⲈ ⲈⲚⲦⲀⲚⲠⲀⲢⲀⲄⲄⲈⲒⲖⲈ ⲚⲎⲦⲚ.

¹²ϪⲈⲔⲀⲀⲤ ⲈⲦⲈⲦⲚⲈⲘⲞⲞϢⲈ ⲈⲦⲈⲦⲚⲦⲤⲀⲚⲎⲨ ⲚⲚⲀϨⲢⲚ ⲚⲀⲠⲂⲞⲖ. ⲀⲨⲰ ⲚⲦⲈⲦⲚ ⲦⲘⲀϨⲈ ⲚⲖⲀⲀⲨ.

¹³ⲚⲦⲚⲞⲨⲰϢ ⲆⲈ ⲀⲚ ⲈⲦⲢⲈⲦⲚⲢⲀⲦⲤⲞⲞⲨⲚ ⲚⲈⲤⲚⲎⲨ ⲈⲦⲂⲈ ⲚⲈⲦⲚⲔⲞⲦⲔ. ϪⲈ ⲚⲚⲈⲦⲚⲖⲨⲠⲒ ⲚⲐⲈ ⲘⲠⲔⲈⲤⲈⲈⲠⲈ ⲈⲦⲈⲘⲚⲦⲞⲨ ϨⲈⲖⲠⲒⲤ ⲘⲘⲀⲨ.

¹⁴ⲈϢϪⲈ ⲦⲚⲠⲒⲤⲦⲈⲨⲈ ⲄⲀⲢ ϪⲈ ⲀⲒⲎⲤⲞⲨⲤ ⲘⲞⲨ ⲀⲨⲰ ⲀϤⲦⲰⲞⲨⲚ. ⲦⲀⲒ ⲦⲈ ⲐⲈ ⲠⲚⲞⲨⲦⲈ ⲚⲈⲚⲦⲀⲨⲚⲔⲞⲦⲔ ϨⲰⲞⲨ ϨⲒⲦⲚ ⲒⲎⲤⲞⲨⲤ ϤⲚⲀⲚⲦⲞⲨ ⲚⲘⲘⲀϤ.

¹⁵ⲈⲚϪⲰ ⲄⲀⲢ ⲘⲠⲀⲒ ⲚⲎⲦⲚ ϨⲘ ⲠϢⲀϪⲈ ⲘⲠϪⲞⲈⲒⲤ. ϪⲈ ⲀⲚⲞⲚ ⲚⲈⲦⲞⲚϨ ⲚⲈⲦⲚⲀⲤⲈⲈⲠⲈ ⲈⲦⲠⲀⲢϨⲞⲨⲤⲒⲀ ⲘⲠϪⲞⲈⲒⲤ ⲚⲚⲈⲚⲢϢⲞⲢⲠ ⲚⲚⲈⲚⲦⲀⲨⲚⲔⲞⲦⲔ.

¹⁶ϪⲈ ⲚⲦⲞϤ ⲠϪⲞⲈⲒⲤ ϨⲚ ⲞⲨⲞⲨⲈϨⲤⲀϨⲚⲈ ϨⲚ ⲞⲨϨⲢⲞⲞⲨ ⲚⲀⲢⲬⲀⲄⲄⲈⲖⲞⲤ ϨⲚ ⲞⲨⲤⲀⲖⲠⲒⲄⲜ ⲚⲦⲈ ⲠⲚⲞⲨⲦⲈ ϤⲚⲎⲨ ⲈⲠⲈⲤⲎⲦ ⲈⲂⲞⲖ ϨⲚ ⲦⲠⲈ ⲀⲨⲰ ⲚⲈⲦⲘⲞⲞⲨⲦ ϨⲘ ⲠⲈⲬⲢⲒⲤⲦⲞⲤ ⲚⲀⲦⲰⲞⲨⲚ ⲚϢⲞⲢⲠ.

¹⁷ⲘⲚⲚⲤⲰⲤ ⲀⲚⲞⲚ ⲚⲈⲦⲞⲚϨ ⲚⲈⲦⲚⲀϢⲰϪⲠ ⲤⲈⲚⲀⲦⲞⲢⲠⲚ ⲚⲘⲘⲀⲨ ϨⲚ ⲚⲈⲔⲖⲞⲞⲖⲈ ⲈⲦⲰⲘⲚⲦ ⲈⲠϪⲞⲈⲒⲤ ⲈⲠⲀⲎⲢ. ⲀⲨⲰ ⲦⲚⲚⲀϢⲰⲠⲈ ⲘⲚ ⲠϪⲞⲈⲒⲤ ⲚⲦⲈⲈⲒϨⲈ ⲚⲞⲨⲞⲈⲒϢ ⲚⲒⲘ.

¹⁸ϨⲰⲤⲦⲈ ⲠⲀⲢⲀⲔⲀⲖⲈⲒ ⲚⲚⲈⲦⲚⲈⲢⲎⲨ ϨⲚ ⲚⲈⲒϢⲀϪⲈ.