Read Sahidic Coptic Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲃ̄ 2 Bible Online

Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲃ̄ 2 - Sahidic Coptic bible

Ⲡⲣⲟⲥ Ⲑⲉⲥⲥⲁⲗⲟⲛⲓⲕⲏ Ⲃ̄ 2

¹ⲦⲚⲤⲞⲠⲤ ⲆⲈ ⲘⲘⲰⲦⲚ ⲚⲈⲤⲚⲎⲨ ϨⲀ ⲦⲠⲀⲢϨⲞⲨⲤⲒⲀ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ. ⲀⲨⲰ ⲠⲈⲚⲤⲰⲞⲨϨ ⲈⲢⲞϤ.

²ⲈⲦⲘⲦⲢⲈⲦⲚⲔⲒⲘ ϨⲘ ⲠⲈⲦⲚϨⲎⲦ ϨⲚ ⲞⲨϬⲈⲠⲎ ⲀⲨⲰ ⲈⲦⲘϢⲦⲞⲢⲦⲢ ⲘⲎⲦⲈ ϨⲒⲦⲚ ⲞⲨⲠⲚⲈⲨⲘⲀ ⲘⲎⲦⲈ ϨⲒⲦⲚ ⲞⲨϢⲀϪⲈ ⲘⲎⲦⲈ ϨⲒⲦⲚ ⲞⲨⲈⲠⲒⲤⲦⲞⲖⲎ ϨⲰⲤ ⲈⲂⲞⲖ ϨⲒⲦⲞⲞⲦⲚ ⲚⲐⲈ ϪⲈ ⲀⲠⲈϨⲞⲞⲨ ⲘⲠϪⲞⲈⲒⲤ ϨⲰⲚ ⲈϨⲞⲨⲚ.

³ⲘⲠⲢⲦⲢⲈ ⲖⲀⲀⲨ ϬⲈ ⲢϨⲀⲖ ⲘⲘⲰⲦⲚ ⲔⲀⲦⲀ ⲖⲀⲀⲨ ⲤⲘⲞⲦ ϪⲈ ⲈⲢϢⲀⲚⲦⲘ ⲦⲀⲠⲞⲤⲦⲀⲤⲒⲀ ⲈⲒ ⲚϢⲞⲢⲠ ⲀⲨⲰ ⲚϤϬⲰⲖⲠ ⲈⲂⲞⲖ ⲚϬⲒ ⲠⲢⲰⲘⲈ ⲚⲦⲀⲚⲞⲘⲒⲀ ⲠϢⲎⲢⲈ ⲘⲠⲦⲀⲔⲞ.

⁴ⲠⲀⲚⲦⲒⲔⲈⲒⲘⲈⲚⲞⲤ ⲈⲦϪⲒⲤⲈ ⲘⲘⲞϤ ⲈϪⲚ ⲞⲨⲞⲚ ⲚⲒⲘ ⲈⲦⲞⲨⲘⲞⲨⲦⲈ ⲈⲢⲞⲞⲨ ϪⲈ ⲚⲞⲨⲦⲈ ⲎⲞⲨⲞⲠ ϨⲰⲤⲦⲈ ⲚϤⲂⲰⲔ ⲈϨⲞⲨⲚ ⲈⲠⲢⲠⲈ ⲘⲠⲚⲞⲨⲦⲈ ⲚϤϨⲘⲞⲞⲤ ⲈϤⲞⲨⲰⲚϨ ⲘⲘⲞϤ ⲈⲂⲞⲖ ϪⲈ ⲞⲨⲚⲞⲨⲦⲈ ⲠⲈ.

⁵ⲚⲦⲈⲦⲚ ⲢⲠⲘⲈⲈⲨⲈ ⲀⲚ ϪⲈ ϪⲒ ⲚⲈⲒϨⲀⲦⲈ ⲦⲎⲨⲦⲚ ⲚⲈⲒϪⲰ ⲚⲎⲦⲚ ⲚⲚⲀⲒ ⲠⲈ.

⁶ⲦⲈⲚⲞⲨ ϬⲈ ⲦⲈⲦⲚⲤⲞⲞⲨⲚ ⲘⲠⲈⲦⲔⲀⲦⲈⲬⲈ ⲈⲦⲢⲈϤϬⲰⲖⲠ ⲈⲂⲞⲖ ϨⲘ ⲠⲈϤⲞⲨⲞⲈⲒϢ.

⁷ⲠⲘⲨⲤⲦⲎⲢⲒⲞⲚ ⲄⲀⲢ ⲚⲦⲀⲚⲞⲘⲒⲀ ⲈⲚⲈⲢⲄⲒ ϪⲒⲚ ⲦⲈⲚⲞⲨ. ⲘⲞⲚⲞⲚ ⲠⲈⲦⲔⲀⲦⲈⲬⲈ ⲦⲈⲚⲞⲨ ϢⲀⲚⲦϤⲖⲞ ⲚⲦⲘⲎⲦⲈ.

⁸ⲀⲨⲰ ⲦⲞⲦⲈ ϤⲚⲀⲞⲨⲰⲚϨ ⲈⲂⲞⲖ ⲚϬⲒ ⲠⲀⲚⲞⲘⲞⲤ. ⲠⲈⲦⲈⲢⲈ ⲠϪⲞⲈⲒⲤ ⲒⲎⲤⲞⲨⲤ ⲚⲀⲦⲀⲔⲞϤ ϨⲘ ⲠⲈⲠⲚⲈⲨⲘⲀ ⲚⲢⲰϤ. ⲀⲨⲰ ⲚϤⲔⲀⲦⲀⲢⲄⲈⲒ ⲘⲘⲞϤ ϨⲘ ⲠⲞⲨⲰⲚϨ ⲈⲂⲞⲖ ⲚⲦⲈϤⲠⲀⲢϨⲞⲨⲤⲒⲀ.

⁹ⲠⲀⲒ ⲈⲦⲈⲢⲈ ⲦⲈϤⲠⲀⲢϨⲞⲨⲤⲒⲀ ⲚⲦⲞϤ ϢⲞⲞⲠ ⲔⲀⲦⲀ ⲦⲈⲚⲈⲢⲄⲒⲀ ⲘⲠⲤⲀⲦⲀⲚⲀⲤ. ϨⲚ ϬⲞⲘ ⲚⲒⲘ. ⲘⲚⲘⲘⲀⲈⲒⲚ ⲘⲚ ⲚⲈϢⲠⲎⲢⲈ ⲚϬⲞⲖ.

¹⁰ⲀⲨⲰ ϨⲚ ⲀⲠⲀⲦⲎ ⲚⲒⲘ ⲚϪⲒ ⲚϬⲞⲚⲤ ⲚⲚⲈⲦⲚⲀⲦⲀⲔⲞ ⲈⲂⲞⲖ ϪⲈ ⲘⲠⲞⲨϢⲰⲠ ⲈⲢⲞⲞⲨ ⲚⲦⲀⲄⲀⲠⲎ ⲚⲦⲘⲈ ⲈⲦⲢⲈⲨⲞⲨϪⲀⲒ.

¹¹ⲀⲨⲰ ⲈⲦⲂⲈ ⲠⲀⲒ ⲠⲚⲞⲨⲦⲈ ⲚⲀⲦⲚⲚⲞⲞⲨ ⲚⲀⲨ ⲚⲞⲨⲈⲚⲈⲢⲄⲒⲀ ⲘⲠⲖⲀⲚⲎ ⲈⲦⲢⲈⲨⲠⲒⲤⲦⲈⲨⲈ ⲈⲠϬⲞⲖ.

¹²ϪⲈ ⲈⲨⲈⲔⲢⲒⲚⲈ ⲚⲞⲨⲞⲚ ⲚⲒⲘ ⲈⲦⲈⲘⲠⲞⲨⲠⲒⲤⲦⲈⲨⲈ ⲈⲦⲘⲈ. ⲀⲖⲖⲀ ⲈⲀⲨⲦⲰⲦ ⲚϨⲎⲦ ϨⲘ ⲠϪⲒ ⲚϬⲞⲚⲤ.

¹³ⲀⲚⲞⲚ ⲆⲈ ϢϢⲈ ⲈⲢⲞⲚ ⲈϢⲠϨⲘⲞⲦ ⲚⲦⲘ ⲠⲚⲞⲨⲦⲈ ⲚⲞⲨⲞⲈⲒϢ ⲚⲒⲘ ϨⲀⲢⲰⲦⲚ ⲚⲈⲤⲚⲎⲨ ⲘⲘⲈⲢⲒⲦ ⲚⲦⲘⲠϪⲞⲈⲒⲤ. ϪⲈ ⲀⲠⲚⲞⲨⲦⲈ ⲤⲈⲦⲠ ⲦⲎⲨⲦⲚ ϪⲒⲚ ⲚϢⲞⲢⲠ ⲈⲨⲞⲨϪⲀⲒ ϨⲚ ⲞⲨⲦⲂⲂⲞ ⲘⲠⲚⲈⲨⲘⲀ. ⲘⲚ ⲞⲨⲠⲒⲤⲦⲒⲤ ⲚⲦⲈⲦⲘⲈ.

¹⁴ⲈⲀϤⲦⲈϨⲘ ⲦⲎⲨⲦⲚ ⲈⲠⲀⲒ ϨⲒⲦⲘ ⲠⲈⲚⲈⲨⲀⲄⲄⲈⲖⲒⲞⲚ ⲈⲠⲞⲨϪⲀⲒ ⲘⲠⲈⲞⲞⲨ ⲘⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ.

¹⁵ⲀⲢⲀ ϬⲈ ⲚⲀⲤⲚⲎⲨ ⲀϨⲈⲢⲀⲦ ⲦⲎⲨⲦⲚ ⲚⲦⲈⲦⲚ ⲀⲘⲀϨⲦⲈ ⲚⲘⲠⲀⲢⲀⲆⲞⲤⲒⲤ ⲈⲚⲦⲀⲚⲦⲤⲀⲂⲈ ⲦⲎⲨⲦⲚ ⲈⲢⲞⲞⲨ. ⲈⲒⲦⲈ ϨⲒⲦⲘ ⲠϢⲀϪⲈ. ⲈⲒⲦⲈ ϨⲒⲦⲚ ⲚⲈⲚⲈⲠⲒⲤⲦⲞⲖⲎ.

¹⁶ⲚⲦⲞϤ ⲆⲈ ⲠⲈⲚϪⲞⲈⲒⲤ ⲒⲎⲤⲞⲨⲤ ⲠⲈⲬⲢⲒⲤⲦⲞⲤ ⲀⲨⲰ ⲠⲚⲞⲨⲦⲈ ⲠⲈⲚⲈⲒⲰⲦ ⲠⲀⲒ ⲈⲚⲦⲀϤⲘⲈⲢⲒⲦⲚ. ⲀⲨⲰ ⲀϤϮ ⲚⲀⲚ ⲚⲞⲨⲤⲞⲠⲤ ⲚϢⲀ ⲈⲚⲈϨ. ⲀⲨⲰ ⲞⲨϨⲈⲖⲠⲒⲤ ⲈⲚⲀⲚⲞⲨⲤ ϨⲚ ⲞⲨⲬⲀⲢⲒⲤ.

¹⁷ⲈϤⲈⲠⲀⲢⲀⲔⲀⲖⲈⲒ ⲚⲚⲈⲦⲚϨⲎⲦ. ⲀⲨⲰ ⲚϤⲦⲀϪⲢⲈ ⲦⲎⲨⲦⲚ ϨⲚ ϨⲰⲂ ⲚⲒⲘ. ⲘⲚ ⲠϢⲀϪⲈ ⲈⲦⲚⲀⲚⲞⲨϤ.