Read Sahidic Coptic Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 3 Bible Online

Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 3 - Sahidic Coptic bible

Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 3

¹ⲞⲨⲠⲒⲤⲦⲞⲤ ⲠⲈ ⲠϢⲀϪⲈ. ⲠⲈⲦⲞⲨⲰϢ ⲈⲢⲈⲠⲒⲤⲔⲞⲠⲞⲤ ⲈϤⲈⲠⲒⲐⲨⲘⲒ ⲈⲨϨⲰⲂ ⲈⲚⲀⲚⲞⲨϤ.

²ϢϢⲈ ϬⲈ ⲈⲠⲈⲠⲒⲤⲔⲞⲠⲞⲤ ⲈⲘⲠⲞⲨⲦⲀϨⲞϤ ϨⲚ ⲖⲀⲀⲨ ⲚϨⲰⲂ ⲈⲀϤϪⲒ ⲚⲞⲨⲤϨⲒⲘⲈ ⲚⲞⲨⲰⲦ ⲈϤⲦⲞⲢϨ ⲚⲢⲘⲚϨⲎⲦ ⲈϤⲔⲞⲤⲘⲒ ⲘⲘⲀⲒϢⲘⲘⲞ ⲚⲢⲈϤϮⲤⲂⲰ.

³ⲈⲚⲞⲨⲢⲈϤϮϨⲈ ⲀⲚ ⲠⲈ ⲈⲚⲞⲨⲚⲞϢⲤϤ ⲀⲚ ⲠⲈ ⲀⲖⲖⲀ ⲈⲨϨⲀⲔ ⲠⲈ ⲈⲚⲞⲨⲢⲈϤⲘⲒϢⲈ ⲀⲚ ⲠⲈ ⲈⲚⲞⲨⲘⲀⲒϨⲞⲘⲚⲦ ⲀⲚ ⲠⲈ.

⁴ⲈϤⲠⲢⲞϨⲒⲤⲦⲀ ⲈϨⲢⲀⲒ ⲈϪⲘ ⲠⲈϤⲎⲒ ⲔⲀⲖⲰⲤ. ⲈⲨⲚⲦⲀϤ ⲚⲈϤϢⲎⲢⲈ ϨⲚ ⲞⲨϨⲨⲠⲞⲦⲀⲄⲎ. ⲀⲨⲰ ϨⲚ ⲘⲚⲦⲤⲈⲘⲚⲞⲤ ⲚⲒⲘ.

⁵ⲈϢϪⲈ ⲞⲨⲚ ⲞⲨⲀ ⲆⲈ ⲈⲚϤⲤⲞⲞⲨⲚ ⲀⲚ ⲘⲠⲢⲞϨⲒⲤⲦⲀ ⲈϨⲢⲀⲒ ⲈϪⲘ ⲠⲈϤⲎⲈⲒ ⲚⲀϢ ⲚϨⲈ ϤⲚⲀϤⲒⲠⲢⲞⲞⲨϢ ⲚⲦⲈⲔⲔⲖⲎⲤⲒⲀ ⲘⲠⲚⲞⲨⲦⲈ.

⁶ⲚⲞⲨⲦⲰϬⲈ ⲚⲂⲢⲢⲈ ⲀⲚ. ϪⲈⲔⲀⲀⲤ ⲈⲚⲚⲈϤϪⲒⲤⲈ ⲚϨⲎⲦ ⲚϤϨⲈ ⲈϨⲢⲀⲒ ⲈⲨⲔⲢⲒⲘⲀ ⲚⲦⲈ ⲠⲆⲒⲀⲂⲞⲖⲞⲤ.

⁷ϢϢⲈ ⲆⲈ ⲈⲦⲢⲈϤϢⲰⲠⲈ ⲈⲨⲚⲦⲀϤ ⲘⲘⲀⲨ ⲚⲞⲨⲘⲚⲦⲘⲚⲦⲢⲈ ⲈⲚⲀⲚⲞⲨⲤ ⲚⲦⲈⲚⲈⲦϨⲒⲂⲞⲖ ϪⲈⲔⲀⲀⲤ ⲈⲚⲚⲈϤⲈⲒ ⲈϨⲢⲀⲒ ⲈⲨⲚⲞϬⲚⲈϬ ⲘⲚ ⲞⲨϬⲞⲢϬⲤ ⲚⲦⲈ ⲠⲆⲒⲀⲂⲞⲖⲞⲤ.

⁸ⲚⲆⲒⲀⲔⲞⲚⲞⲤ ⲞⲚ ⲚⲦⲈⲒϨⲈ ⲚⲤⲈⲘⲚⲞⲤ ⲈⲘⲈⲨϪⲈ ϢⲀϪⲈ ⲤⲚⲀⲨ. ⲚⲤⲈⲞ ⲀⲚ ⲚⲢⲈϤⲤⲈ ϨⲀϨ ⲚⲎⲢⲠ. ⲈⲚϨⲈⲚⲘⲀⲒϨⲎⲨ ⲚϢⲖⲞϤ ⲀⲚ ⲚⲈ.

⁹ⲈⲨⲚⲦⲀⲨ ⲘⲘⲀⲨ ⲘⲠⲘⲨⲤⲦⲎⲢⲒⲞⲚ ⲚⲦⲠⲒⲤⲦⲒⲤ ϨⲚ ⲞⲨⲤⲨⲚⲒⲆⲎⲤⲒⲤ ⲈⲤⲦⲂⲂⲎⲨ.

¹⁰ⲀⲨⲰ ⲚⲀⲒ ⲘⲀⲢⲞⲨⲆⲞⲔⲒⲘⲀⲌⲈ ⲘⲘⲞⲞⲨ ⲚϢⲞⲢⲠ. ⲘⲚⲚⲤⲰⲤ ⲘⲀⲢⲞⲨⲆⲒⲀⲔⲞⲚⲈⲒ ⲈⲘⲚⲚⲞⲂⲈ ϪⲒ ⲈϨⲞⲨⲚ ⲈⲢⲞⲞⲨ.

¹¹ⲚⲈϨⲒⲞⲘⲈ ⲞⲚ ⲚⲦⲈⲒϨⲈ ⲚⲤⲈⲘⲚⲎ ⲈϨⲈⲚⲢⲈϤϮ ϢⲦⲞⲨⲎⲦ ⲀⲚ ⲚⲈ. ⲈⲨⲚⲎⲪⲈ. ⲈⲨⲞ ⲘⲠⲒⲤⲦⲞⲤ ϨⲚ ϨⲰⲂ ⲚⲒⲘ.

¹²ⲚⲆⲒⲀⲔⲰⲚ ⲘⲀⲢⲞⲨϢⲰⲠⲈ ⲈⲀⲨϨⲘⲞⲞⲤ ⲘⲚ ⲞⲨⲤϨⲒⲘⲈ ⲚⲞⲨⲰⲦ. ⲈⲨⲠⲢⲞϨⲒⲤⲦⲀ ⲈϨⲢⲀⲒ ⲈϪⲚ ⲚⲈⲨϢⲎⲢⲈ ⲔⲀⲖⲰⲤ. ⲘⲚ ⲚⲈⲨⲎⲈⲒ.

¹³ⲚⲈⲚⲦⲀⲨⲆⲒⲀⲔⲞⲚⲒ ⲄⲀⲢ ⲔⲀⲖⲰⲤ ⲈⲨϪⲠⲞ ⲚⲀⲨ ⲚⲞⲨϢⲒ ⲈⲚⲀⲚⲞⲨϤ. ⲘⲚ ⲞⲨⲠⲀⲢϨⲎⲤⲒⲀ ⲈⲚⲀϢⲰⲤ ϨⲚ ⲦⲠⲒⲤⲦⲒⲤ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ.

¹⁴ⲚⲀⲒ ϮⲤϨⲀⲒ ⲘⲘⲞⲞⲨ ⲚⲀⲔ ⲈⲒϨⲈⲖⲠⲒⲌⲈ ⲈⲈⲒ ϨⲚ ⲞⲨϬⲈⲠⲎ.

¹⁵ⲈϢⲰⲠⲈ ⲆⲈ ⲈⲈⲒϢⲀⲚⲰⲤⲔ ϪⲈⲔⲀⲀⲤ ⲈⲔⲈⲈⲒⲘⲈ ⲈⲐⲈ ⲈⲦⲈϢϢⲈ ⲈⲘⲞⲞϢⲈ ϨⲘ ⲠⲎⲈⲒ ⲘⲠⲚⲞⲨⲦⲈ ⲈⲦⲈ ⲦⲀⲒ ⲦⲈ ⲦⲈⲔⲎⲖⲎⲤⲒⲀ ⲘⲠⲚⲞⲨⲦⲈ ⲈⲦⲞⲚϨ ⲠⲈⲤⲦⲨⲖⲞⲤ ⲀⲨⲰ ⲠⲦⲀϪⲢⲞ ⲚⲦⲘⲈ.

¹⁶ⲀⲨⲰ ϨⲞⲘⲞⲖⲞⲄⲞⲨⲘⲈⲚⲰⲤ ⲞⲨⲚⲞϬ ⲠⲈ ⲠⲘⲨⲤⲦⲎⲢⲒⲞⲚ ⲚⲦⲘⲚⲦⲚⲞⲨⲦⲈ ⲠⲀⲒ ⲈⲚⲦⲀϤⲞⲨⲰⲚϨ ⲈⲂⲞⲖ ϨⲚ ⲦⲤⲀⲢⲜ ⲀϤⲦⲘⲀⲒⲞ ϨⲘ ⲠⲈⲠⲚⲈⲨⲘⲀ ⲀϤⲞⲨⲰⲚϨ ⲈⲂⲞⲖ ⲚⲚⲀⲄⲄⲈⲖⲞⲤ ⲀⲨⲦⲀϢⲈⲞⲈⲒϢ ⲘⲘⲞϤ ϨⲚ ⲚϨⲈⲐⲚⲞⲤ ⲀⲨⲦⲀⲚϨⲞⲨⲦϤ ϨⲘ ⲠⲔⲞⲤⲘⲞⲤ ⲀⲨϤⲒⲦϤ ⲈϨⲢⲀⲒ ϨⲚ ⲞⲨⲈⲞⲞⲨ.