Read Sahidic Coptic Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 4 Bible Online

Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 4 - Sahidic Coptic bible

Ⲡⲣⲟⲥ Ⲧⲓⲙⲟⲑⲉⲟⲥ Ⲁ̄ 4

¹ⲠⲈⲠⲚⲈⲨⲘⲀ ⲆⲈ ϪⲰ ⲘⲘⲞⲤ ϨⲢⲎⲦⲰⲤ ϪⲈ ϨⲚ ⲐⲀⲎ ⲚⲚⲈⲨⲞⲈⲒϢ ⲞⲨⲚ ϨⲞⲒⲚⲈ ⲚⲀⲤⲀϨⲰⲞⲨ ⲈⲂⲞⲖ ⲚⲦⲠⲒⲤⲦⲒⲤ ⲈⲨⲔⲰ ⲚϨⲦⲎⲨ ⲈϨⲈⲚⲠⲚⲈⲨⲘⲀ ⲘⲠⲖⲀⲚⲞⲤ ⲘⲚ ϨⲈⲚⲤⲂⲰ ⲚⲆⲀⲒⲘⲰⲚⲒⲞⲚ.

²ϨⲚ ⲞⲨϨⲨⲠⲞⲔⲢⲒⲤⲒⲤ ⲘⲘⲚⲦⲢⲈϤϪⲈ ϢⲀϪⲈ ⲚϬⲞⲖ. ⲈⲢⲈ ⲦⲈⲨⲤⲨⲚⲒⲆⲎⲤⲒⲤ ⲢⲞⲔϨ ⲈⲢⲞⲞⲨ.

³ⲈⲨⲔⲰⲖⲨ ⲘⲠϪⲒϨⲒⲘⲈ ⲀⲨⲰ ⲈⲦⲢⲈⲨⲤⲀϨⲰⲞⲨ ⲈⲂⲞⲖ ⲚⲚϬⲒ ⲚⲞⲨⲞⲞⲘ. ⲚⲀⲒ ⲈⲚⲦⲀ ⲠⲚⲞⲨⲦⲈ ⲤⲞⲚⲦⲞⲨ ⲈⲦⲢⲈ ⲚⲠⲒⲤⲦⲞⲤ ϪⲒⲦⲞⲨ ϨⲚ ⲞⲨϢⲠϨⲘⲞⲦ ⲘⲚ ⲚⲈⲚⲦⲀⲨⲤⲞⲨⲚ ⲦⲘⲈ.

⁴ⲤⲰⲚⲦ ⲄⲀⲢ ⲚⲒⲘ ⲚⲦⲈ ⲠⲚⲞⲨⲦⲈ ⲚⲀⲚⲞⲨⲞⲨ. ⲀⲨⲰ ⲘⲚ ⲖⲀⲀⲨ ⲦⲤⲦⲎⲨ ⲈⲂⲞⲖ. ⲈⲨϪⲒ ⲘⲘⲞϤ ϨⲚ ⲞⲨϢⲠϨⲘⲞⲦ.

⁵ϢⲀⲨⲦⲂⲂⲞ ⲄⲀⲢ ϨⲒⲦⲘ ⲠϢⲀϪⲈ ⲘⲠⲚⲞⲨⲦⲈ ⲈⲦⲞⲚϨ. ⲘⲚ ⲠⲈϢⲖⲎⲖ.

⁶ⲚⲀⲒ ⲈⲔϢⲀⲚⲔⲀⲀⲨ ⲈϨⲢⲀⲒ ⲚⲚⲈⲤⲚⲎⲨ ⲔⲚⲀϢⲰⲠⲈ ⲚⲞⲨⲆⲒⲀⲔⲞⲚⲞⲤ ⲈⲚⲀⲚⲞⲨϤ ⲘⲠⲈⲬⲢⲒⲤⲦⲞⲤ ⲒⲎⲤⲞⲨⲤ ⲈⲔⲤⲀⲚⲀϢⲦ ϨⲚ ⲚϢⲀϪⲈ ⲚⲦⲠⲒⲤⲦⲒⲤ. ⲘⲚ ⲦⲈⲤⲂⲰ ⲈⲦⲚⲀⲚⲞⲨⲤ ⲦⲀⲒ ⲈⲚⲦⲀⲔⲞⲨⲀϨⲔ ⲚⲤⲰⲤ.

⁷ⲚⲒϢⲂⲰ ⲆⲈ ⲚϨⲖⲖⲰ ⲈⲦⲂⲎⲦ ⲠⲀⲢⲀⲒⲦⲒ ⲘⲘⲞⲞⲨ. ⲄⲨⲘⲚⲀⲌⲈ ⲘⲘⲞⲔ ⲈⲦⲘⲚⲦⲈⲨⲤⲈⲂⲎⲤ.

⁸ⲦⲄⲨⲘⲚⲀⲤⲒⲀ ⲄⲀⲢ ⲘⲠⲤⲰⲘⲀ ⲞⲨⲚⲞϤⲢⲈ ⲦⲈ ⲠⲢⲞⲤⲞⲨⲔⲞⲨⲒ ⲚⲞⲨⲞⲈⲒϢ ⲦⲘⲚⲦⲈⲨⲤⲈⲂⲎⲤ ⲆⲈ ⲞⲨⲚⲞϤⲢⲈ ⲦⲈ ⲚⲞⲨⲞⲈⲒϢ ⲚⲒⲘ ⲈⲨⲚⲦⲀⲤ ⲘⲘⲀⲨ ⲘⲠⲈⲢⲎⲦ ⲘⲠⲰⲚϨ ⲠⲀ ⲠⲈⲒⲘⲀ ⲘⲚ ⲠⲀ ⲠⲔⲈⲞⲨⲀ.

⁹ⲞⲨⲠⲒⲤⲦⲞⲤ ⲠⲈ ⲠϢⲀϪⲈ. ⲀⲨⲰ ϤⲘⲠϢⲀ ⲚⲦⲀⲈⲒⲞ ⲚⲒⲘ.

¹⁰ⲈⲦⲂⲈ ⲠⲀⲒ ⲄⲀⲢ ⲦⲚϨⲞⲤⲈ ⲀⲨⲰ ⲤⲈⲚⲞϬ ⲚⲈϬ ⲘⲘⲞⲚ ϪⲈ ⲀⲚⲚⲀϨⲦⲈ ⲈⲠⲚⲞⲨⲦⲈ ⲈⲦⲞⲚϨ ⲈⲦⲈ ⲠⲀⲒ ⲠⲈ ⲠⲤⲰⲦⲎⲢ ⲚⲢⲰⲘⲈ ⲚⲒⲘ ⲘⲀⲖⲒⲤⲦⲀ ⲚⲘⲠⲒⲤⲦⲞⲤ.

¹¹ⲠⲀⲢⲀⲄⲄⲈⲒⲖⲈ ⲚⲚⲀⲒ ⲀⲨⲰ ⲚⲄϮⲤⲂⲰ.

¹²ⲘⲠⲢⲦⲢⲈ ⲖⲀⲀⲨ ⲔⲀⲦⲀⲪⲢⲞⲚⲒ ⲚⲦⲈⲔⲘⲚⲦϢⲎⲢⲈ ϢⲎⲘ ⲀⲖⲖⲀ ϢⲰⲠⲈ ⲚⲤⲘⲞⲦ ⲚⲘⲠⲒⲤⲦⲞⲤ ϨⲘ ⲠϢⲀϪⲈ ϨⲚ ⲚⲈϨⲂⲎⲨⲈ ϨⲚ ⲦⲠⲒⲤⲦⲒⲤ ϨⲘ ⲠⲦⲂⲂⲞ

¹³ⲠⲢⲞⲤⲈⲬⲈ ⲈⲠⲰϢ ϢⲀⲚϮⲈⲒ. ⲈⲠⲤⲞⲠⲤ. ⲈⲦⲈⲤⲂⲰ.

¹⁴ⲘⲠⲢⲀⲘⲈⲖⲈⲒ ⲈⲠⲈϨⲘⲞⲦ ⲈⲦⲚϨⲎⲦⲔ ⲠⲀⲒ ⲈⲚⲦⲀⲨⲦⲀⲀϤ ⲚⲀⲔ ϨⲒⲦⲚ ⲞⲨⲠⲢⲞⲪⲎⲦⲒⲀ. ⲀⲨⲰ ⲠⲦⲀⲖⲞ ⲚⲚϬⲒϪ ⲚⲚⲈⲠⲢⲈⲤⲂⲨⲦⲈⲢⲞⲤ.

¹⁵ⲘⲈⲖⲈⲦⲀ ⲚⲚⲀⲒ ϢⲰⲠⲈ ϨⲚ ⲚⲀⲒ. ϪⲈ ⲈⲢⲈ ⲦⲈⲔⲠⲢⲞⲔⲞⲠⲎ ⲞⲨⲰⲚϨ ⲈⲂⲞⲖ ⲚⲞⲨⲞⲚ ⲚⲒⲘ.

¹⁶ϮϨⲦⲎⲔ ⲈⲢⲞⲔ ⲀⲨⲰ ⲚⲄϬⲰ ϨⲒϪⲰⲞⲨ ϨⲚ ⲦⲈⲤⲂⲰ. ⲈⲔⲈⲒⲢⲈ ⲄⲀⲢ ⲘⲠⲀⲒ ⲔⲚⲀⲦⲞⲨϪⲞⲔ ⲘⲚ ⲚⲈⲦⲤⲰⲦⲘ ⲈⲢⲞⲔ.