Read Sahidic Coptic Ⲡⲣⲟⲥ Ⲧⲓⲙⲟⲑⲉⲟⲥ Ⲃ̄ 1 Bible Online

Ⲡⲣⲟⲥ Ⲧⲓⲙⲟⲑⲉⲟⲥ Ⲃ̄ 1 - Sahidic Coptic bible

Ⲡⲣⲟⲥ Ⲧⲓⲙⲟⲑⲉⲟⲥ Ⲃ̄ 1

¹ⲠⲀⲨⲖⲞⲤ ⲠⲀⲠⲞⲤⲦⲞⲖⲞⲤ ⲘⲠⲈⲬⲢⲒⲤⲦⲞⲤ ⲒⲎⲤⲞⲨⲤ ϨⲒⲦⲘ ⲠⲞⲨⲰϢ ⲘⲠⲚⲞⲨⲦⲈ ⲔⲀⲦⲀ ⲠⲈⲢⲎⲦ ⲘⲠⲰⲚϨ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ.

²ⲈϤⲤϨⲀⲒ ⲚⲦⲒⲘⲞⲐⲈⲞⲤ ⲠⲘⲈⲢⲒⲦ ⲚϢⲎⲢⲈ. ⲦⲈⲬⲀⲢⲒⲤ ⲚⲀⲔ ⲘⲚ ⲠⲚⲀ ⲀⲨⲰ ϮⲢⲎⲚⲎ ⲈⲂⲞⲖ ϨⲒⲦⲘ ⲠⲚⲞⲨⲦⲈ ⲠⲒⲰⲦ ⲘⲚ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ⲠⲈⲚϪⲞⲈⲒⲤ.

³ϮϢⲠϨⲘⲞⲦ ⲚⲦⲘ ⲠⲀⲚⲞⲨⲦⲈ ⲠⲀⲒ ⲈϮϢⲘϢⲈ ⲚⲀϤ ϪⲒⲚ ⲚⲀⲈⲒⲞⲦⲈ ϨⲚ ⲞⲨⲤⲨⲚⲒⲆⲎⲤⲒⲤ ⲈⲤⲞⲨⲀⲀⲂ. ⲚⲐⲈ ⲈϮⲈⲒⲢⲈ ⲘⲠⲈⲔⲘⲈⲈⲨⲈ ⲀϪⲚⲰϪⲚ ϨⲚ ⲚⲀⲤⲞⲠⲤ ⲚⲦⲈⲨϢⲎ. ⲀⲨⲰ ⲠⲈϨⲞⲞⲨ

⁴ⲈⲒⲞⲨⲰϢ ⲈⲚⲀⲨ ⲈⲢⲞⲔ. ⲈⲈⲒⲈⲒⲢⲈ ⲘⲠⲘⲈⲈⲨⲈ ⲚⲚⲈⲔⲢⲘⲈⲒⲎ ϪⲈ ⲈⲒⲈⲘⲞⲨϨ ⲈⲂⲞⲖ ⲚⲢⲀϢⲈ.

⁵ⲈⲒϪⲒ ⲘⲠⲢⲠⲘⲈⲈⲨⲈ ⲚⲦⲠⲒⲤⲦⲒⲤ ⲈⲦⲚϨⲎⲦⲔ ⲀϪⲚ ϨⲨⲠⲞⲔⲢⲒⲤⲒⲤ ⲦⲀⲒ ⲈⲚⲦⲀⲤⲞⲨⲰϨ ⲚϢⲞⲢⲠ ϨⲚ ⲦⲘⲀⲀⲨ ⲚⲦⲈⲔⲘⲀⲀⲨ ⲖⲰⲈⲒⲤ. ⲘⲚ ⲦⲈⲔⲘⲀⲀⲨ ⲈⲨⲚⲒⲔⲎ. ϮⲚⲀϨⲦⲈ ⲆⲈ ⲞⲚ ϪⲈ ⲤⲚϨⲎⲦⲔ.

⁶ⲈⲦⲂⲈ ⲠⲀⲒ ϮⲦⲢⲈⲔⲈⲒⲢⲈ ⲘⲠⲘⲈⲈⲨⲈ ⲈⲦⲢⲈⲔϮ ⲞⲨⲢⲞⲦ ⲘⲠⲈϨⲘⲞⲦ ⲘⲠⲚⲞⲨⲦⲈ ⲈⲦⲚϨⲎⲦⲔ ϨⲒⲦⲘ ⲠⲦⲀⲖⲞ ⲚⲚⲀϬⲒϪ.

⁷ⲚⲦⲀ ⲠⲚⲞⲨⲦⲈ ⲄⲀⲢ ϮⲚⲀⲚ ⲀⲚ ⲚⲞⲨⲠⲚⲈⲨⲘⲀ ⲘⲘⲚⲦϬⲰⲂ. ⲀⲖⲖⲀ ⲚϬⲞⲘ. ϨⲒ ⲀⲄⲀⲠⲎ ϨⲒ ⲘⲚ ⲦⲢⲘⲚϨⲎⲦ.

⁸ⲘⲠⲢϮϢⲒⲠⲈ ϬⲈ ⲚⲦⲘⲚⲦⲘⲚⲦⲢⲈ ⲘⲠⲈⲚϪⲞⲈⲒⲤ. ⲞⲨⲆⲈ ⲚⲀⲒ ⲠⲈⲦⲘⲎⲢ ⲚⲦⲀϤ. ⲀⲖⲖⲀ ϢⲠϨⲒⲤⲈ ⲘⲚ ⲠⲈⲨⲀⲄⲄⲈⲖⲒⲞⲚ ⲔⲀⲦⲀ ⲦϬⲞⲘ ⲘⲠⲚⲞⲨⲦⲈ.

⁹ⲠⲀⲒ ⲈⲚⲦⲀϤⲦⲀⲚϨⲞⲚ ⲀⲨⲰ ⲀϤⲦⲀϨⲘⲚ ϨⲚ ⲞⲨⲦⲰϨⲘ ⲈϤⲞⲨⲀⲀⲂ ⲈⲚⲔⲀⲦⲀ ⲚⲈⲚϨⲂⲎⲨⲈ ⲀⲚ ⲀⲖⲖⲀ ⲔⲀⲦⲀ ⲠⲈϤⲦⲰϢ ⲘⲘⲒⲚ ⲘⲘⲞϤ ⲘⲚ ⲦⲈϤⲬⲀⲢⲒⲤ ⲈⲚⲦⲀϤⲦⲀⲀⲤ ⲚⲀⲚ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ϨⲀⲐⲎ ⲚⲚⲈⲨⲞⲈⲒϢ ⲚϢⲀ ⲈⲚⲈϨ.

¹⁰ⲈⲀⲤⲞⲨⲰⲚϨ ⲆⲈ ⲈⲂⲞⲖ ⲦⲈⲚⲞⲨ ϨⲒⲦⲘ ⲠⲞⲨⲰⲚϨ ⲈⲂⲞⲖ ⲘⲠⲈⲚⲤⲰⲦⲎⲢ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ. ⲈⲀϤⲞⲨⲰⲤϤ ⲘⲈⲚ ⲘⲠⲘⲞⲨ. ⲀϤⲞⲨⲰⲚϨ ⲆⲈ ⲈⲂⲞⲖ ⲘⲠⲰⲚϨ ⲘⲚ ⲦⲘⲚⲦⲀⲦⲦⲀⲔⲞ ϨⲒⲦⲘ ⲠⲈⲨⲀⲄⲄⲈⲖⲒⲞⲚ.

¹¹ⲠⲀⲒ ⲈⲚⲦⲀⲨⲔⲀⲀⲦ ⲀⲚⲞⲔ ⲈⲢⲞϤ ⲚⲔⲨⲢⲎⲜ. ⲀⲨⲰ ⲚⲀⲠⲞⲤⲦⲞⲖⲞⲤ. ⲀⲨⲰ ⲚⲤⲀϨ ϨⲚ ⲚϨⲈⲐⲚⲞⲤ.

¹²ⲈⲦⲂⲈ ⲠⲀⲒ ⲈⲈⲒϢⲰⲠ ⲚⲚⲈⲈⲒϨⲒⲤⲈ ⲀⲖⲖⲀ ⲚϮϢⲒⲠⲈ ⲀⲚ ϮⲤⲞⲞⲨⲚ ⲄⲀⲢ ⲘⲠⲈⲚⲦⲀⲒⲠⲒⲤⲦⲈⲨⲈ ⲈⲢⲞϤ ⲀⲨⲰ ϮⲦⲎⲦ ⲚϨⲎⲦ ϪⲈ ⲞⲨⲚ ϬⲞⲘ ⲘⲘⲞϤ ⲈϨⲀⲢⲈϨ ⲈⲦⲀⲠⲀⲢⲀⲐⲎⲔⲎ ⲈⲠⲈϨⲞⲞⲨ ⲈⲦⲘⲘⲀⲨ.

¹³ϪⲒ ⲚⲀⲔ ⲘⲠⲈⲤⲘⲞⲦ ⲚⲚϢⲀϪⲈ ⲈⲦⲞⲨⲞϪ ⲈⲚⲦⲀⲔⲤⲞⲦⲘⲞⲨ ⲚⲦⲞⲞⲦ ϨⲚ ⲦⲠⲒⲤⲦⲒⲤ ⲘⲚ ⲦⲀⲄⲀⲠⲎ ϨⲘ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ.

¹⁴ϨⲀⲢⲈϨ ⲈⲠϬⲞⲒⲖⲈ ⲈⲦⲚⲀⲚⲞⲨϤ ϨⲒⲦⲘ ⲠⲈⲠⲚⲈⲨⲘⲀ ⲈⲦⲞⲨⲀⲀⲂ. ⲠⲀⲒ ⲈⲦⲞⲨⲎϨ ϨⲢⲀⲒ ⲚϨⲎⲦⲚ

¹⁵ⲔⲤⲞⲞⲨⲚ ⲘⲠⲀⲒ ϪⲈ ⲀⲨⲔⲀⲀⲦ ⲚⲤⲰⲞⲨ ⲚϬⲒ ⲞⲨⲞⲚ ⲚⲒⲘ ⲈⲦϨⲚ ⲦⲀⲤⲒⲀ. ⲚⲀⲒ ⲈⲨⲈⲂⲞⲖ ⲚϨⲎⲦⲞⲨ ⲠⲈ ⲪⲨⲄⲈⲖⲖⲞⲤ ⲘⲚ ϨⲈⲢⲘⲞⲄⲈⲚⲎⲤ.

¹⁶ⲈⲢⲈ ⲠϪⲞⲈⲒⲤ ϮⲚⲞⲨⲚⲀ ⲘⲠⲎⲈⲒ ⲚⲞⲚⲎⲤⲒⲪⲞⲢⲞⲤ ϪⲈ ⲀϤϮⲘⲦⲞⲚ ⲚⲀⲒ ⲚϨⲀϨ ⲚⲤⲞⲠ ⲀⲨⲰ ⲘⲠϤϮϢⲒⲠⲈ ⲚⲚⲀⲘⲢⲢⲈ.

¹⁷ⲀⲖⲖⲀ ⲚⲦⲈⲢⲈϤⲈⲒ ⲈϨⲢⲰⲘⲎ ⲀϤϬⲈⲠⲎ ⲈϢⲒⲚⲈ ⲚⲤⲰⲒ ⲀϤϨⲈ ⲈⲢⲞⲒ.

¹⁸ⲈⲢⲈ ⲠϪⲞⲈⲒⲤ ϮⲚⲀϤ ⲈϨⲈ ⲈⲨⲚⲀ ⲚⲚⲀϨⲢⲘ ⲠϪⲞⲈⲒⲤ ϨⲘ ⲠⲈϨⲞⲞⲨ ⲈⲦⲘⲘⲀⲨ. ⲀⲨⲰ ⲚⲈⲚⲦⲀϤⲀⲀⲨ ⲚⲀⲒ ⲦⲎⲢⲞⲨ ϨⲚ ⲈⲪⲈⲤⲞⲤ ⲔⲤⲞⲞⲨⲚ ⲘⲘⲞⲞⲨ ⲚϨⲞⲨⲞ.