Read Sahidic Coptic Ⲡⲣⲟⲥ Ⲧⲓⲧⲟⲥ 1 Bible Online

Ⲡⲣⲟⲥ Ⲧⲓⲧⲟⲥ 1 - Sahidic Coptic bible

Ⲡⲣⲟⲥ Ⲧⲓⲧⲟⲥ 1

¹ⲠⲀⲨⲖⲞⲤ ⲠϨⲘϨⲀⲖ ⲘⲠⲚⲞⲨⲦⲈ ⲠⲀⲠⲞⲤⲦⲞⲖⲞⲤ ⲆⲈ ⲘⲠⲈⲬⲢⲒⲤⲦⲞⲤ ⲒⲎⲤⲞⲨⲤ. ⲔⲀⲦⲀ ⲦⲠⲒⲤⲦⲒⲤ ⲚⲚⲤⲰⲦⲠ ⲘⲠⲚⲞⲨⲦⲈ ⲀⲨⲰ ⲠⲤⲞⲞⲨⲚ ⲚⲦⲘⲈ. ⲦⲀⲒ ⲈⲦϢⲞⲞⲠ ⲔⲀⲦⲀ ⲞⲨⲘⲚⲦⲈⲨⲤⲈⲂⲎⲤ

²ϨⲚ ⲐⲈⲖⲠⲒⲤ ⲘⲠⲰⲚϨ ϢⲀ ⲈⲚⲈϨ. ⲠⲀⲒ ⲈⲚⲦⲀϤⲈⲢⲎⲦ ⲘⲘⲞϤ ⲚϬⲒ ⲠⲚⲞⲨⲦⲈ ⲘⲘⲈ ϨⲀⲐⲎ ⲚⲚⲈⲞⲨⲞⲈⲒϢ ⲚϢⲀ ⲈⲚⲈϨ.

³ⲈⲀϤⲞⲨⲰⲚϨ ⲆⲈ ⲈⲂⲞⲖ ⲘⲠⲈϤϢⲀϪⲈ ϨⲚ ⲚⲈϤⲞⲨⲞⲈⲒϢ ϨⲚ ⲞⲨⲦⲀϢⲈⲞⲈⲒϢ ⲠⲀⲒ ⲀⲚⲞⲔ ⲈⲚⲦⲀⲨⲦⲀⲚϨⲞⲨⲦ ⲈⲢⲞϤ ⲔⲀⲦⲀ ⲠⲞⲨⲈϨⲤⲀϨⲚⲈ ⲘⲠⲚⲞⲨⲦⲈ ⲠⲈⲚⲤⲰⲦⲎⲢ ⲈϤⲤϨⲀⲒ

⁴ⲚⲦⲒⲦⲞⲤ ⲠϨⲀⲔ ⲚϢⲎⲢⲈ ⲔⲀⲦⲀ ⲦⲈⲚⲠⲒⲤⲦⲒⲤ ϨⲒ ⲞⲨⲤⲞⲠ. ⲦⲈⲬⲀⲢⲒⲤ ⲚⲀⲔ ⲘⲚ ϮⲢⲎⲚⲎ ⲚⲦⲘ ⲠⲚⲞⲨⲦⲈ ⲠⲈⲒⲰⲦ ⲘⲚ ⲠⲈⲬⲢⲒⲤⲦⲞⲤ ⲒⲎⲤⲞⲨⲤ ⲠⲈⲚⲤⲰⲦⲎⲢ.

⁵ⲈⲦⲂⲈ ⲠⲀⲒ ⲀⲒⲔⲀⲀⲔ ϨⲚ ⲔⲢⲎⲦⲎ. ϪⲈⲔⲀⲀⲤ ⲈⲔⲈⲤⲘⲒⲚⲈ ⲘⲠⲔⲈⲤⲈⲈⲠⲈ. ⲀⲨⲰ ⲚⲄⲦⲀϨⲞ ⲈⲢⲀⲦⲞⲨ ⲚϨⲈⲚⲠⲢⲈⲤⲂⲨⲦⲈⲢⲞⲤ ⲔⲀⲦⲀ ⲠⲞⲖⲒⲤ ⲚⲐⲈ ⲈⲚⲦⲀⲒϨⲰⲚ ⲈⲦⲞⲞⲦⲔ ⲘⲘⲞⲤ.

⁶ⲠⲈⲦⲈⲘⲚϨⲰⲂ ϪⲒ ⲈϨⲞⲨⲚ ⲈⲢⲞϤ ⲈⲀϤⲢϨⲀⲒ ⲚⲞⲨⲤϨⲒⲘⲈ ⲚⲞⲨⲰⲦ ⲈⲨⲚⲦⲀϤ ⲘⲘⲀⲨ ⲚⲚⲈϤϢⲎⲢⲈ ⲘⲠⲒⲤⲦⲞⲤ ⲈⲚⲤⲈϨⲚ ⲞⲨⲔⲀⲦⲎⲄⲞⲢⲒⲀ ⲀⲚ ⲘⲘⲚⲦϢⲚⲀ ⲎⲚⲤⲈϨⲨⲠⲞⲦⲀⲤⲤⲈ ⲀⲚ.

⁷ϢϢⲈ ⲄⲀⲢ ⲈⲠⲈⲠⲒⲤⲔⲞⲠⲞⲤ ⲈⲦⲘⲦⲢⲈⲨϬⲚϨⲰⲂ ⲈϨⲞⲨⲚ ⲈⲢⲞϤ ϨⲰⲤ ⲞⲒⲔⲞⲚⲞⲘⲞⲤ ⲚⲦⲈ ⲠⲚⲞⲨⲦⲈ ⲈⲚⲞⲨϪⲀⲤⲒϨⲎⲦ ⲀⲚ ⲠⲈ ⲈⲚⲞⲨⲢⲈϤϬⲚⲀⲦ ⲀⲚ ⲠⲈ ⲈⲚⲞⲨⲢⲈϤϮϨⲈ ⲀⲚ ⲠⲈ ⲈⲚⲞⲨⲚⲞϢⲤϤ ⲀⲚ ⲠⲈ ⲈⲚⲞⲨⲘⲀⲒϨⲎⲨ ⲚϢⲖⲞϤ ⲀⲚ ⲠⲈ.

⁸ⲀⲖⲖⲀ ⲈϤⲞ ⲘⲘⲀⲒϢⲘⲘⲞ ⲘⲘⲀⲒ ⲠⲈⲦⲚⲀⲚⲞⲨϤ ⲚϨⲀⲔ ⲚⲆⲒⲔⲀⲒⲞⲤ ⲈϤⲞⲨⲀⲀⲂ ⲚⲈⲄⲔⲢⲀⲦⲎⲤ.

⁹ⲈϤϬⲞⲖϪ ⲘⲠϢⲀϪⲈ ⲈⲦⲚϨⲞⲦ ⲔⲀⲦⲀ ⲦⲈⲤⲂⲰ. ϪⲈⲔⲀⲀⲤ ⲈϤⲈϢϬⲘϬⲞⲘ ⲈⲤⲞⲠⲤ ϨⲚ ⲦⲈⲤⲂⲰ ⲈⲦⲞⲨⲞϪ ⲀⲨⲰ ⲈϪⲠⲒⲈ ⲚⲈⲦⲞⲨⲰϨⲘ.

¹⁰ϨⲀϨ ⲄⲀⲢ ⲚⲈⲦⲈⲚⲤⲈϨⲨⲠⲞⲦⲀⲤⲤⲈ ⲀⲚ. ⲚⲢⲈϤϪⲈϢⲀϪⲈ ⲚⲈⲠⲢⲀ. ⲀⲨⲰ ⲚⲢⲈϤⲦⲀⲔⲈ ϨⲎⲦ ⲚϨⲞⲨⲞ ⲆⲈ ⲚⲈⲂⲞⲖ ϨⲘ ⲠⲤⲂⲂⲈ.

¹¹ⲚⲀⲒ ⲈϢϢⲈ ⲈϢⲦⲘⲢⲰⲞⲨ ⲚⲀⲒ ⲈⲦϢⲞⲢϢⲢ ⲚϨⲈⲚⲎⲈⲒ ⲦⲎⲢⲞⲨ ⲈⲨϮⲤⲂⲰ ⲚⲚⲈⲦⲈⲘⲈϢϢⲈ ⲈⲦⲂⲈ ⲞⲨⲘⲚⲦⲘⲀⲒϨⲎⲨ ⲚϢⲖⲞϤ.

¹²ⲀⲨⲠⲢⲞⲪⲎⲦⲎⲤ ϪⲞⲞⲤ ⲈⲂⲞⲖ ⲚϨⲎⲦⲞⲨ ϪⲈ ⲚⲈⲔⲢⲎⲦⲎⲤ ϨⲈⲚⲢⲈϤϪⲒϬⲞⲖ ⲚⲈ ⲚⲞⲨⲞⲈⲒϢ ⲚⲒⲘ. ϨⲈⲚⲐⲎⲢⲒⲞⲚ ⲈⲨϨⲞⲞⲨ ⲚⲈ. ϨⲈⲚϨⲎ ⲈⲨⲞⲨⲞⲤϤ ⲚⲈ.

¹³ⲦⲈⲒⲘⲚⲦⲘⲚⲦⲢⲈ ⲞⲨⲘⲈ ⲦⲈ ⲈⲦⲂⲈ ⲠⲀⲒ ϪⲠⲒⲞⲞⲨ ϨⲚ ⲞⲨϢⲰⲰⲦ ⲈⲂⲞⲖ. ϪⲈⲔⲀⲀⲤ ⲈⲨⲈⲞⲨϪⲀⲒ ϨⲚ ⲦⲠⲒⲤⲦⲒⲤ.

¹⁴ⲈⲚⲤⲈⲔⲰ ⲚϨⲦⲎⲨ ⲀⲚ ⲈϨⲈⲚϢϤⲰ ⲚⲒⲞⲨⲆⲀⲒ. ⲘⲚ ϨⲈⲚⲈⲚⲦⲞⲖⲎ ⲚⲢⲰⲘⲈ. ⲈⲨⲔⲦⲞ ⲘⲘⲞⲞⲨ ⲈⲂⲞⲖ ϨⲚ ⲦⲘⲈ.

¹⁵ⲚⲔⲀ ⲚⲒⲘ ⲞⲨⲀⲀⲂ ⲚⲚⲈⲦⲞⲨⲀⲀⲂ. ⲚⲈⲦϪⲀϨⲘ ⲆⲈ ⲘⲚ ⲚⲀⲠⲒⲤⲦⲞⲤ ⲘⲚ ⲖⲀⲀⲨ ⲞⲨⲀⲀⲂ ⲚⲀⲨ. ⲀⲖⲖⲀ ⲚⲈⲨⲔⲈϨⲎⲦ ⲤⲞⲞϤ ⲘⲚ ⲦⲈⲨⲤⲨⲚⲒⲆⲎⲤⲒⲤ.

¹⁶ⲤⲈϨⲞⲘⲞⲖⲞⲄⲒ ϪⲈ ⲤⲈⲤⲞⲞⲨⲚ ⲘⲠⲚⲞⲨⲦⲈ ⲤⲈⲀⲢⲚⲀ ⲆⲈ ⲘⲘⲞϤ ϨⲚ ⲚⲈⲨϨⲂⲎⲨⲈ ⲈⲨⲂⲎⲦ ⲀⲨⲰ ⲈⲨⲞ ⲚⲀⲦⲤⲰⲦⲘ ⲚϪⲞⲞⲨⲦ ϨⲚ ϨⲰⲂ ⲚⲒⲘ ⲈⲦⲚⲀⲚⲞⲨϤ.