Read Sahidic Coptic Ⲡⲣⲟⲥ Ϩⲉⲃⲣⲉⲟⲥ 5 Bible Online

Ⲡⲣⲟⲥ Ϩⲉⲃⲣⲉⲟⲥ 5 - Sahidic Coptic bible

Ⲡⲣⲟⲥ Ϩⲉⲃⲣⲉⲟⲥ 5

¹ⲀⲢⲬⲒⲈⲢⲈⲨⲤ ⲄⲀⲢ ⲚⲒⲘ ⲈⲦⲞⲨϪⲒ ⲘⲘⲞϤ ⲈⲂⲞⲖ ϨⲚ ⲚⲢⲰⲘⲈ ⲈϢⲀⲨⲔⲀⲐⲒⲤⲦⲀ ⲘⲘⲞϤ ⲈϪⲚ ⲚⲢⲰⲘⲈⲂⲚⲚⲀϨⲢⲘ ⲠⲚⲞⲨⲦⲈ. ϪⲈ ⲈϤⲈⲦⲀⲖⲈ ⲆⲰⲢⲞⲚ ⲈϨⲢⲀⲒ ϨⲒ ⲐⲨⲤⲒⲀ ϨⲀ ⲚⲞⲂⲈ.

²ⲈⲨⲚϬⲞⲘ ⲘⲘⲞϤ ⲈϢⲠϨⲒⲤⲈ ⲘⲚ ⲚⲈⲦⲞ ⲚⲀⲦⲤⲞⲞⲨⲚ. ⲘⲚ ⲚⲈⲦⲠⲖⲀⲚⲀ. ⲈⲂⲞⲖ ϨⲰⲰϤ ϪⲈ ϤϢⲞⲞⲠ ϨⲚ ⲞⲨⲘⲚⲦϬⲰⲂ.

³ⲀⲨⲰ ⲈⲦⲂⲎⲎⲦⲤ ϢϢⲈ ⲈⲢⲞϤ ⲔⲀⲦⲀ ⲐⲈ ⲈϢⲀϤⲦⲀⲖⲞ ⲈϨⲢⲀⲒ ϨⲀ ⲠⲖⲀⲞⲤ. ⲚϤⲦⲀⲖⲞ ϨⲰⲰϤ ϨⲀⲢⲞϤ ⲚⲦⲈⲈⲒϨⲈ ϨⲀ ⲚⲈϤⲚⲞⲂⲈ.

⁴ⲚⲈⲢⲈ ⲠⲞⲨⲀ ⲆⲈ ⲠⲞⲨⲀ ϪⲒ ⲚⲀϤ ⲀⲚ ⲘⲠⲦⲀⲈⲒⲞ. ⲀⲖⲖⲀ ⲈⲨⲈⲒⲚⲈ ⲘⲘⲞϤ ⲈⲂⲞⲖ ϨⲒⲦⲘ ⲠⲚⲞⲨⲦⲈ. ⲔⲀⲦⲀ ⲐⲈ ⲚⲀⲀⲢⲰⲚ.

⁵ⲦⲀⲒ ⲦⲈ ⲐⲈ ⲘⲠⲈⲬⲢⲒⲤⲦⲞⲤ ⲚⲦⲀϤϮⲈⲞⲞⲨ ⲚⲀϤ ⲞⲨⲀⲀϤ ⲀⲚ ⲈⲦⲢⲈϤϢⲰⲠⲈ ⲚⲀⲢⲬⲒⲈⲢⲈⲨⲤ ⲀⲖⲖⲀ ⲠⲈⲚⲦⲀϤϢⲀϪⲈ ⲚⲘⲘⲀϤ ⲠⲈ ϪⲈ ⲚⲦⲞⲔ ⲠⲈ ⲠⲀϢⲎⲢⲈ ⲀⲚⲞⲔ ⲀⲒϪⲠⲞⲔ ⲘⲠⲞⲞⲨ.

⁶ⲔⲀⲦⲀ ⲐⲈ ⲞⲚ ⲈϢⲀϤϪⲞⲞⲤ ϨⲚ ⲔⲈⲘⲀ ϪⲈ ⲚⲦⲞⲔ ⲠⲈ ⲠⲞⲨⲎⲎⲂ ϢⲀ ⲈⲚⲈϨ ⲔⲀⲦⲀ ⲦⲦⲀⲜⲒⲤ ⲘⲘⲈⲖⲬⲒⲤⲈⲆⲈⲔ.

⁷ⲠⲀⲒ ϨⲚ ⲚⲈϨⲞⲞⲨ ⲚⲦⲈϤⲤⲀⲢⲜ ⲀϤϪⲒⲤⲈ ϨⲢⲀⲒ ϨⲚ ϨⲈⲚⲤⲞⲠⲤ ⲘⲚ ϨⲈⲚⲔⲰⲢϢ ⲚⲚⲀϨⲢⲚ ⲠⲈⲦⲈⲞⲨⲚϬⲞⲘ ⲘⲘⲞϤ ⲈⲦⲞⲨϪⲞϤ ⲈⲂⲞⲖ ϨⲘ ⲠⲘⲞⲨ. ϨⲚ ⲞⲨⲚⲞϬ ⲚⲀϢⲔⲀⲔ ⲘⲚ ϨⲈⲚⲢⲘⲈⲒⲎ. ⲀⲨⲰ ⲈⲀⲨⲤⲰⲦⲘ ⲈⲢⲞϤ ⲈⲂⲞⲖ ϨⲚ ⲦϨⲞⲦⲈ.

⁸ⲔⲀⲒⲠⲈⲢ ⲈⲠϢⲎⲢⲈ ⲠⲈ ⲀϤⲤⲂⲰ ⲈⲠⲤⲰⲦⲘ ⲈⲂⲞⲖ ϨⲚ ⲚⲈⲚⲦⲀϤϢⲞⲠⲞⲨ.

⁹ⲀⲨⲰ ⲈⲀϤϪⲰⲔ ⲈⲂⲞⲖ ⲀϤϢⲰⲠⲈ ⲚⲞⲨⲞⲚ ⲚⲒⲘ ⲈⲦⲤⲰⲦⲘ ⲚⲤⲰϤ ⲚⲀⲒⲦⲒⲞⲤ ⲘⲠⲈⲨϪⲀⲒ ⲚϢⲀ ⲈⲚⲈϨ.

¹⁰ⲈⲀⲨⲘⲞⲨⲦⲈ ⲈⲢⲞϤ ⲈⲂⲞⲖ ϨⲒⲦⲘ ⲠⲚⲞⲨⲦⲈ ⲚⲀⲢⲬⲒⲈⲢⲈⲨⲤ ⲔⲀⲦⲀ ⲦⲦⲀⲜⲒⲤ ⲘⲘⲈⲖⲬⲒⲤⲈⲆⲈⲔ.

¹¹ⲠⲀⲒ ⲈⲦⲈⲢⲈ ⲠϢⲀϪⲈ ⲞϢ ⲚⲀⲚ ⲈϢⲀϪⲈ ⲈⲢⲞϤ. ⲀⲨⲰ ⲈϤⲘⲞⲔϨ ⲈⲂⲞⲖϤ. ⲈⲦⲂⲈ ϪⲈ ⲀⲦⲈⲦⲚϢⲰⲠⲈ ⲈⲦⲈⲦⲚϢⲞⲞⲚⲈ ϨⲚ ⲚⲈⲦⲚⲘⲀⲀϪⲈ.

¹²ⲔⲀⲒⲄⲀⲢ ⲈϢϢⲈ ⲈⲢⲰⲦⲚ ⲈⲢⲤⲀϨ ⲈⲦⲂⲈ ⲠⲈⲨⲞⲈⲒϢ ⲦⲈⲦⲚⲢⲬⲢⲒⲀ ⲞⲚ ⲚϮⲤⲂⲰ ⲚⲎⲦⲚ ϪⲈ ⲞⲨ ⲚⲈ ⲚⲈⲤⲦⲞⲒⲬⲒⲞⲚ ⲚⲦⲀⲢⲬⲎ ⲚⲚϢⲀϪⲈ ⲘⲠⲚⲞⲨⲦⲈ ⲀⲨⲰ ⲀⲦⲈⲦⲚϢⲰⲠⲈ ⲈⲦⲈⲦⲚⲢⲬⲢⲒⲀ ⲚⲞⲨⲈⲢⲰⲦⲈ ⲚⲞⲨϨⲢⲈ ⲀⲚ ⲈⲤϪⲞⲞⲢ.

¹³ⲞⲨⲞⲚ ⲄⲀⲢ ⲚⲒⲘ ⲈⲦϪⲒ ⲈⲂⲞⲖ ϨⲘ ⲠⲈⲢⲰⲦⲈ. ⲞⲨⲀⲦⲤⲞⲞⲨⲚ ⲠⲈ ⲘⲠϢⲀϪⲈ ⲚⲦⲆⲒⲔⲀⲒⲞⲤⲨⲚⲎ. ⲞⲨⲔⲞⲨⲒ ⲄⲀⲢ ⲠⲈ.

¹⁴ⲦⲀ ⲚⲒⲦⲈⲖⲒⲞⲤ ⲆⲈ ⲦⲈϨⲢⲈ ⲈⲦϪⲞⲞⲢ. ⲚⲀⲒ ⲈⲦⲂⲈ ⲐⲈⲜⲒⲤ ⲈⲨⲚⲦⲀⲨ ⲘⲘⲀⲨ ⲚⲚⲈⲨⲀⲒⲤⲐⲎⲦⲎⲢⲒⲞⲚ ⲈⲨⲄⲨⲘⲚⲀⲌⲈ ⲈⲆⲒⲀⲔⲢⲒⲚⲈ ⲚⲦⲘⲎ ⲦⲈ ⲘⲠⲠⲈⲦⲚⲀⲚⲞⲨϤ ⲘⲚ ⲠⲠⲈⲐⲞⲞⲨ.