Read Sahu Matias 11 Bible Online

Matias 11 - Sahu bible

Matias 11

¹Yesus 'o doto'o 'Ai me-mete'e nga nyagi moi re nga muḏiḏi pasala i'a, Unanga 'o tagi di'a 'O doto'o re 'O singadolo Habari Roanga toma limau-limau ma co-cori.

²Wakutu Yohanes tukanga baptis, unanga gena-ge 'o osama bui re 'o 'isene mangale 'O Kristus 'ai munara, unanga 'o 'utusu 'ai me-mete'e nga muḏuo i'a 'aḏi tagi sano ra Yesus so'o ne:

³“Mete'e Ma Jou'ongu Madutu 'ai jaji, Jou masiretene 'O Kristus, bolo ngomi mi totoma ngowa'a lelegu?”

⁴Yesus 'a sangoro, “Ni maḏibo re siajele ra Yohanes, mangale 'oru ga'a ngini ni 'isene re ni oḏi'i:

⁵Ngowa'a hafu 'aḏi oḏi'i, ngowa'a ḇolo 'aḏi tagi, ngowa'a si-siḏi 'eno'o 'aḏi la, ngowa'a popongolo 'aḏi 'isene, ngowa'a raḏi sengene, dadunu 'aḏi 'ahu moju, re Habari Roanga ra Ma Jou'ongu Madutu ino Ngoi ta singadolo toma ngowa-ngowa'a ma dinga'unu ua.

⁶Bara'utungu ngowa'a ga'a manga ngo-ngaku kama elala ua ra Ngoi!”

⁷Wakutu Yohanes tukanga baptis 'ai me-mete'e gena-ge 'aḏi tagi-tagi moju, Yesus mulaingi 'o kanau toma ngowa'a repe mangale Unanga. Unanga 'o kanau, “Ngini ni tagi toma daeraha baulaco di'a ni oḏi'i 'oru?! Sanga ua, ngini ni tagi oḏi'i matengo ga'a 'o sitaka-taka mangale 'Ai habari ma tero sa'olo rurubu ma so'a ngai moi ga'a karawiana ya wusu!

⁸Dadi ngini ni tagi di'a ni oḏi'i 'oru?! Ngowa'a matengo ga'a mapake rousu?! Sanga ua! Sababu ngowa'a ga'a mapake rousu 'aḏi tegoro toma kadato!

⁹Dadi ngini ni tagi di'a ni oḏi'i 'oru?! Nabi?! Tero mode'e. Sidogo ḏi'i, unanga gena-ge lebe la-lamo'o i'a reo nabi ma siḏa-siḏa i'a.

¹⁰Sababu toma Boku 'Ofi-'Ofi 'age rema bu-bula'a nena-ne 'i silefo mangale 'a Yohanes. Ma Jou'ongu Madutu 'o kanau so'o ne: ‘Nena-ne Ngoi 'ari so-soma'a. Ngoi ḏuanga i'a to 'utusu unanga siḏa, kara Ngana, la unanga ḏuanga i'a 'a sidodahe ngo'omo di'a Ngana.’

¹¹Ni ngaku mode-mode'e 'Ari demo-demo nena-ne: Toma dungia nena-ne matengo i'a mai ua ga'a sibuoro lebe la-lamo'o i'a rea Yohanes tukanga baptis. Mada'a mulaingi nange-ne, ngowa'a ma pake ua ga'a 'o osama nyo-nyoimi toma Soroga ma Pareta,[25] unanga gena-ge 'o dadi ngowa'a lebe la-lamo'o i'a rea Yohanes.

¹²Toma wakutu 'a Yohanes mulaingi 'o siḏagi Ma Jou'ongu Madutu 'ai munara singadolo nange-ne, Ma Jou'ongu Madutu 'ai 'umata 'aḏi sanga dola'aku toma ngowa-ngowa'a ga'a 'aḏi makutale mau 'aḏi kuasa ya siḏagi manga de'e.

¹³Singadolo Yohanes gena-ge 'o sapolo, 'a Musa 'ai hukumu mo-moini re nabi manga do-doto'o, enanga 'i siajele mangale 'oru ga'a balasu 'i dadi.

¹⁴Re na'o ngini mau ni ngaku, Yohanes unanga 'o ma tero 'a Elia, unanga 'ai ta-sapolo ri sinubuata pasala ḏua.

¹⁵Na'o reninga ngau'u ni 'isene la-la!

¹⁶Ngowa-ngowa'a toma 'orasa nange-ne, Ngoi ta site-tero reo 'oru?! Ananga ma tero sa'olo ngowa 'olo 'aḏi maḏegoro toma pasara, toropo moi-toropo moi 'aḏi ma'u sangoro i'a re ino ma'u ngali-ngali,

¹⁷‘Ngomi ḇisa serulingi ḏua mada'a ngini ni roje ua, ngomi mi nyanyi-nyanyi duka re balisa mada'a ngini ni rerese ma gaḏi ua.’

¹⁸Ngoi 'ari maksudu so'o ne: Yohanes sapolo re unanga 'o ka'e 'anggur ua re 'o puasa ḏi'i. Mada'a ngowa'a 'u dawongo ua 'aḏi kanau, ‘Unanga 'o roh ma jira 'u dungosama!’

¹⁹Ngoi, Manusia ma Ngowa'a Nau'u reto sapolo, To oromo re ka'e 'anggur. Nange-ne ḏi'i ngowa'a raḏi dawongo Ngoi ua 'aḏi kanau, ‘Oḏi'i Unanga gena-ge 'O da-danata re 'O 'etolo, re Ma'u ḏagilomu reo ngowa-ngowa'a golo-golo'o balastengi re ngowa-ngowa'a baraḏosa!’ Kalaha so'o gena, Ma Jou'ongu Madutu 'ai 'akala ma soro'unu 'i waiti banari ra Ma Jou'ongu Madutu 'ai ngowa-ngowa'a manga de'oso re ḏegoro ma rousu.”

²⁰Ḏua Yesus mulaingi 'o ḇangata ngowa'a Yahudi ga'a tegoro limau-limau ga'a Unanga ro 'a'a ga'a hera-heranga lebe repe. Sababu toma limau-limau gena-ge, ngowa'a 'aḏi maḏibo toma ngo'omo boloto ua.

²¹Unanga 'o kanau, “Bahala ra ngini ngowa'a toma limau Korasim re limau Betsaida. Ma Jou'ongu Madutu ḏuanga i'a 'o singe-ngeta'a hukumu ra ngini. Si'ade-'ade i'a Ngoi to 'a'a ga'a hera-heranga toma ngowa'a ma jira toma limau Tirus re Sidon ma tero sa'olo Ngoi ta si'a'a ḏua ra ngini ninga sigolona, tantu ḏua ananga da'a raḏi maḏibo toma ngo'omo boloto, re ananga 'aḏi mapake pakeanga si'a'a reo kaḏu re tamanga sae'e ya sidu-durono reo itomo ma korou'u.[26]

²²Mada'a, Ngoi to siajele ra ngini: toma Kiamata ma Wangere, ngini ngowa'a Yahudi toma limau Korasim re Betsaida ḏuanga i'a ni sanga hukumu lebe tubuso reo ngowa'a ma jira toma limau Tirus re Sidon!

²³Re ngini ngowa'a Yahudi toma limau Kapernaum! Awa ngini ni ta'ajiri mangale Ma Jou'ongu Madutu ḏuanga i'a 'o dawongo ngini toma soroga! So'o gena ua! Mada'a Unanga 'o siupa'a ngini toma naraka! Si'ade-'ade i'a Ngoi to 'a'a ga'a hera-heranga toma ngowa'a ma jira toma limau Sodom 'ua re 'au wali ma tero sa'olo Ngoi ta si'a'a ḏua ra ngini ninga sigolona, tantu ḏua limau Sodom gena-ge rema enanga singadolo nange-ne.

²⁴Mada'a, Ngoi to siajele ra ngini nena-ne: toma Kiamata ma Wangere, ngini ngowa'a Yahudi toma limau Kapernaum ḏuanga i'a ni sanga hukumu lebe tubuso reo ngowa'a ma jira toma limau Sodom!”

²⁵Toma 'orasa gena-ge Yesus 'o kanau, “Baba, Ma Jou'ongu Madutu 'o kuasa toma diwanga re dungia, Ngoi to puji re silamo'o 'Ani lomanga sababu mo-moini gena-ge Baba na gogono toma ngowa'a pahe re ngowa'a 'akala soro'unu, mada'a Baba na sijumu toma ngowa-ngowa'a ga'a manga de'oso re ḏegoro ma tero sa'olo ngowa 'olo.

²⁶Ya, Baba sababu enanga gena-ge 'i sisanangi 'Ani 'akala re sinyingara.”

²⁷Ḏua Yesus 'o kanau, “ 'Ori i'a mo-moini, 'Ari Ḇaḇa ra sidoa'a ra Ngoi. Matengo i'a mai ua 'o nana'o Ngoi ḏuga-ḏuga pa'i 'Ari Ḇaḇa ḇato. Matengo i'a mai ua 'o nana'o 'ari Ḇaḇa ḏuga-ḏuga pa'i Ngoi, 'Ai Ngowa'a Nau'u, re ra guna ḇato ga'a Ngoi to sinana'o 'Ari Ḇaḇa.

²⁸Ino ni sapolo ra Ngoi, ngini ga'a ni sibasono tala ni momoro re ninga gina lai tubuso; Ngoi masiretene ḏuanga i'a tini sikare ngini.

²⁹Pa'i ni mete'e ḇato 'Ari parenta re ni madoto'o ra Ngoi ḇato, sababu Ngoi 'ari 'akala re sinyingara 'i mereoso re maholo, re ngini ḏuanga i'a ni sanga ngomasa mamete'e ra Ngoi.

³⁰Re parenta 'i tubuso ua, re gina ga'a To pula'a enanga 'i kare ḇato.”