Read Sahu Matias 14 Bible Online

Matias 14 - Sahu bible

Matias 14

¹Toma 'orasa gena-ge, 'Olana Herodes[37] ga'a 'o pareta toma daeraha Galilea, unanga 'a 'isene habari mangale Yesus.

²Herodes 'o kanau tai ngowa'a la-lamo'o, “Yesus gena-ge 'a Yohanes tukanga baptis, unanga gena-ge ro dadunu 'ahu moju. Ma sababu gena-ge, unanga nga'unu 'o 'a'a ga'a hera-heranga.”

³Herodes 'o kanau so'o gena, sababu 'au nga'ene wakutu Yohanes 'o sengene nyangu, 'a Herodes 'o molo'ara ngo Herodias ga'a 'a Filipus 'ai were'a, wakutu 'a Filipus 'o 'ahu moju. Sidogo ḏi'i, 'a Herodes re 'a Filipus, ananga nga muḏiḏi gia nongoḏu. Dadi Yohanes 'o ḇangata tau-taunu 'a Herodes, “Ngana na mete'e ua Musa 'ai hukumu, sababu ngana na molo'ara 'ani dau'u madutu, ngo Herodias.” Sababu gena-ge, Herodes ro soma'a sordado 'aḏi cako'o 'a Yohanes, re 'u piri'u re 'u singosama unanga toma bui.

⁵Herodes mau 'o sisengene 'a Yohanes, mada'a unanga ḏi'i 'o mojongo ngowa'a kawasa, sababu ananga 'aḏi ngaku 'a Yohanes gena-ge nabi.

⁶Wakutu Herodes 'ai musungu tero, ngo Herodias 'ami ngowa'a were'a matengo mo roje rousu masala tai ioronongoḏu singadolo Herodes 'ai 'akala re sinyingara 'i sanangi masala.

⁷Dadi unanga 'o sijaji rema sasi mangale 'oru ḇato na'o munanga mo golo'o, unanga 'a pula'a.

⁸Munanga mo sangoro, “Pula'a ra ngoi Yohanes tukanga baptis 'ai sae'e sigae toma baki.” Munanga mo golo'o gena-ge sababu 'ami ngina mi sido-doto'o munanga di'a golo'o so'o gena-ge.

⁹Wakutu Herodes 'a 'isene 'ami go-golo'o so'o gena, unanga 'ai 'akala re sinyingara 'i kangela masala. Mada'a sababu unanga ro sijaji rema sasi tai ioronongoḏu manga biono, unanga 'o soma'a 'ami go-golo'o balasu si'a'a so'o gena.

¹⁰Dadi Herodes 'o soma'a sordado 'aḏi tola'a 'a Yohanes 'ai camala.

¹¹Gena ḏua, 'a Yohanes 'ai sae'e ya sigae toma baki re ya gasa ino, sipula'a toma mosolese gena-ge kara munanga mo gasa tami ngina.

¹²Togumu i'a, 'a Yohanes 'ai me-mete'e 'aḏi sapolo di'a 'oro re 'aḏi palihara unanga 'ai mayeti, kara siajele ra Yesus.

¹³Wakutu Yesus 'a 'isene habari gena-ge, Unanga masiretene 'o mabalene toma oti di'a sisoi'i tala re 'o tagi disa ngi'i ga-garura. Mada'a wakutu ngowa'a kawasa ya 'isene Yesus ro tagi, ananga ya sisoi'i tala manga limau re 'aḏi siduu'u Unanga sitola'a ma ji'o mete'e tana'a dudungu.

¹⁴Wakutu Yesus 'o 'uci toma oti ino re 'O oḏi'i ngowa'a repe, Tai 'akala re sinyingara 'i baolo dadalara ra ananga. Dadi Unanga 'o si-la ngowa-ngowa'a siḏi toma ngowa'a repe manga sigolona.

¹⁵Ma 'orasa wangere so'o ne'o ḏua, Yesus 'ai me-mete'e 'aḏi sapolo ra Unanga re 'aḏi kanau, “Sa'i ri lobi'i re ngi'i ne 'i tiwongo i'a. Jobilaha Jou no soma'a ngowa'a repe nena-ne 'aḏi maḏibo, la 'aḏi tibo manga ngo-ngoromo toma gamu ga'a co-cori ngi'i nena-ne.”

¹⁶Yesus 'o sangoro, “Ngini nena-ne balasu pula'a ngo-ngoromo ra ananga. Awa simaha ananga 'aḏi maḏibo remanga sawini.”

¹⁷Yesus 'ai me-mete'e 'aḏi kanau, “Ngomi minga dodahe pa'i roti ngai romotoa re nyao'o ngai ḏiḏi!”

¹⁸Yesus 'o kanau, “Gasa gena-ge ino!”

¹⁹Gena ḏua, Yesus 'o soma'a ngowa'a repe gena-ge 'aḏi tegoro toma rurubu ma re'u. Re Unanga 'o 'oro roti ngai romotoa re ma nyao'o ngai ḏiḏi 'O talaḏi ie da'u diwanga re 'O sibere ie murasa ma la ra Ma Jou'ongu Madutu. Togumu gena, Unanga 'A poti-poti roti re 'A sipula'a Tai me-mete'e, kara ananga ya sibalangu toma ngowa'a repe gena-ge.

²⁰Ananga mo-moini 'aḏi oromo singadolo 'aḏi wunusu. Togumu i'a, Yesus 'ai me-mete'e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga.

²¹Toma 'orasa gena-ge, ngowa'a repe ga'a 'aḏi oromo na-nau'u ḇato ḏa nga cala romotoa, gena-ge siroimi ua we-were'a re ngowa 'olo.

²²Togumu i'a, Yesus 'o soma'a 'Ai me-mete'e 'aḏi mabalene toma oti re 'aḏi sidete siḏa i'a da'a talaga kaci moi. Re Unanga 'o soma'a ngowa'a kawasa 'aḏi maḏibo.

²³Wakutu ngowa'a kawasa raḏi maḏibo, Unanga masiretene 'o pere ie toma sau di'a 'O manyiata. Wakutu lobi'i 'i ngadolo ḏua, 'age Yesus pa'i 'o matengo moju.

²⁴Mada'a toma 'orasa gena-ge ḏua, Yesus 'ai me-mete'e ananga raḏi amono lai kiḏanga re raḏi ngadolo toma talaga ma golona. Momoku ya wa'ala manga oti, sababu ananga 'aḏi tomo karawiana.

²⁵Wakutu cori wangere i'a, Yesus 'o sapolo ra ananga tagi mete'e ḇanyo ma re'u.

²⁶Mada'a wakutu Yesus 'ai me-mete'e 'aḏi oḏi'i Unanga tagi mete'e toma ḇanyo ma re'u, ananga 'aḏi sawana masala re mojongo 'aḏi poa'a, “ 'O ca'ata!”

²⁷Mada'a Yesus jau-jau 'o kanau ra ananga, “Masiogoro! Ngoi ne Yesus. Dadi mojongo awa!”

²⁸Ḏua 'a Petrus 'o kanau, “Ma Jou, na'o so'o gena, No soma'a ḇato ngoi to sapolo i'a to tagi mete'e ḇanyo ma re'u.”

²⁹Unanga 'a sangoro, “Sapolo ino!” Ḏua 'a Petrus 'o 'uci toma oti re 'o tagi mete'e toma ḇanyo ma re'u jau i'a Yesus.

³⁰Mada'a wakutu Petrus 'a basono karawiana siḏi woḏi, unanga ro mojongo re ro mulaingi 'o jala. Dadi unanga 'o poa'a, “Ma Jou, No salamata ngoi!”

³¹Yesus jau-jau 'a toa'a 'ai giama re 'u cako'o 'a Petrus, re 'O kanau, “Petrus, ngana 'ani ngo-ngaku pa'i ceka'a ua ḇato ra Ngoi. I'a sa'olo 'ani 'akala re sinyingara 'i taka-taka?”

³²Ḏua ananga nga muḏiḏi 'aḏi palene toma oti. Toma 'orasa gena-ge ḏua karawiana re momoku ḏi'i mai ri togumu.

³³Yesus 'ai me-mete'e ananga mo-moini 'aḏi silamo'o re siḏubuso Unanga. Ananga gena-ge 'aḏi kanau, “Mode-mode'e, Jou Ma Jou'ongu Madutu 'ai Ngowa'a Nau'u!”

³⁴Wakutu Yesus rai me-mete'e raḏi ngadolo toma talaga kaci moi, ananga 'aḏi 'uci toma daeraha Genesaret.

³⁵Re wakutu ngowa-ngowa'a 'age 'aḏi oḏi'i Yesus ro sapolo, ananga ya sihabari toma daeraha mo-moini. Dadi ananga matai gasa ino ngowa-ngowa'a siḏi mo-moini ra Yesus.

³⁶Ananga 'aḏi golo'o ra Yesus mangale na'o nyengara garia ngowa-ngowa'a siḏi gena-ge taragolo'o ya cigi 'ai juba ma dere ḇato. Ḏua ananga mo-moini ga'a ya cigi Unanga 'ai juba gena-ge raḏi la.