Read Sahu Matias 15 Bible Online

Matias 15 - Sahu bible

Matias 15

¹Ngowa'a Farisi toropo moi re guru-guru 'agama nga muḏuo i'a, ananga 'aḏi sapolo da'a limau Yerusalem ino ra Yesus, re 'aḏi sano ra unanga,

²“I'a sa'olo 'Ani me-mete'e 'aḏi mete'e ua nanga ete re dotumu manga 'adata? Wakutu ananga 'aḏi oromo, ya soso'o siḏa ua manga giama, gena-ge mete'e ua nanga 'atoranga!”

³Yesus 'a sangoro, “Re i'a sa'olo ngini ḏi'i ni mete'e ua Ma Jou'ongu Madutu 'ai parenta, la pa'i ni mete'e ninga ete re dotumu manga 'adata?

⁴Sababu Ma Jou'ongu Madutu ro kanau, ‘Silamo'o ninga ḇaḇa re ninga ngina.’ Re Unanga ro kanau ḏi'i, ‘ 'A guna ḇato 'o sosowini 'ai ḇaḇa bolo 'ai ngina, balasu 'o sanga hukumu sengene.’

⁵Mada'a ngini ni sidoto'o, ‘ 'A guna ḇato nyengara 'o kanau tai ḇaḇa bolo tai ngina so'o ne: 'Oru ga'a ngoi balasu to pula'a ra ḇaḇa re ngina, gena-ge ngoi reta pula'a mo-moini sa'olo 'ari jou-jou ra Ma Jou'ongu Madutu.’

⁶Dadi unanga gena-ge 'a silamo'o riwara 'ai ḇaḇa re ngina. Dadi sababu ninga ete re dotumu manga 'adata, ngini na si'u'ua Ma Jou'ongu Madutu 'ai parenta gena-ge.

⁷Ngini ngowa'a munafiki! Tero mode'e 'a Yesaya 'a sinubuata pasala ḏua mangale ngini:

⁸Ma Jou'ongu Madutu 'o kanau so'o ne: ‘Ngowa-ngowa'a gena-ge 'aḏi silamo'o Ngoi pa'i tamanga 'uḏu ma betu'u mada'a tamanga 'akala re sinyingara 'i kiḏanga ra Ngoi.

⁹'I parasaja ananga gena-ge 'aḏi silamo'o re siḏubuso Ngoi; sababu ananga manga do-doto'o pa'i manusia manga 'atoranga ḇato, ga'a 'i mete'e Ngoi 'ari do-doto'o ua!’ ”

¹⁰Gena ḏua, Yesus 'o 'aro'o ngowa'a manga repe 'aḏi sapolo ra Unanga re 'o kanau i'a ra ananga, “Ni 'isene la-la, la ni sahe.

¹¹'Oru ḇato ga'a 'i osama toma madanga, enanga gena-ge 'i si'a'a ua ngowa'a matengo 'o dadi najis ra Ma Jou'ongu Madutu 'ai momina. Mada'a 'oru ga'a 'i supu toma madanga, enanga gena-ge 'i si'a'a ngowa'a matengo 'o dadi najis ra Unanga 'ai momina.”

¹²Ḏua 'Ai me-mete'e 'aḏi sapolo re 'aḏi kanau ra Unanga, “Jou na waro mangale ngowa-ngowa'a Farisi manga 'akala re sinyingara 'i gamamu wakutu ya 'isene Jou no kanau so'o gena-ge?”

¹³Yesus 'a sangoro, “ 'Oru ḇato ga'a 'Ari Ḇaḇa toma soroga 'A otomo ua, joro gena-ge ḏuanga i'a 'A wuru'u.

¹⁴Dadi awa ni kalesanga ngowa'a gena-ge, ananga gena-ge 'o bi-biri'i—bi-biri'i ga'a masihafu. Re na'o ngowa'a hafu matengo 'o tuda ngowa'a hafu, ma ḏo-ḏogumu tala ananga nga muḏiḏi 'aḏi masieta'a toma koti'i ma dara.”

¹⁵Petrus 'o kanau, “Jou, tai'i na sitarangi 'ade-'ade nange-ge ma ngale ra ngomi.”

¹⁶Yesus 'o sangoro, “Ngini na waro nyangu ḏi'i enanga ma ngale?!

¹⁷Ngini ni sahe nyangu moju, 'oru ga'a 'i osama toma madanga ngadolo toma po'olo ma dara. Togumu i'a, enanga 'i supu tuwaḏi!

¹⁸Mada'a, 'oru ga'a 'i supu toma madanga, enanga gena-ge ma 'asala toma 'akala re sinyingara. Enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina.

¹⁹Sababu toma 'akala re sinyingara 'i baolo 'ulungu ma jira, sisengene ngowa'a, su-sudala, tinikai, to-tori'i, sakisi sa-sakala ngowa'a, re sikanau ngowa'a.

²⁰Enanga mo-moini gena-ge si'a'a ngowa'a matengo 'o dadi najis ra Ma Jou'ongu Madutu 'ai momina. Siḏibo ḏi'i, oromo kama soso'o giama ua, enanga gena-ge si'a'a ua ngowa'a matengo 'o dadi najis ra Ma Jou'ongu Madutu 'ai momina.”

²¹Gena ḏua, Yesus 'a sisoi'i tala ngi'i gena-ge, re 'O tagi toma daeraha co-cori limau Tirus re limau Sidon.

²²We-were'a Kana'an matengo toma daeraha gena-ge mo sapolo ra Yesus re mo poa-poa'a, “Ma Jou, 'Olana Daud 'ai ju'uda,[38] No sijumu 'Ani 'akala re sinyingara ma la-la ra ngoi! 'Ari ngowa'a were'a roh ma jira mi dungosama, dadi munanga mo sangisara masala.”

²³Yesus kama kanau bale moi i'a mai ua toma we-were'a gena-ge. Dadi 'Ai me-mete'e 'aḏi sapolo ra Unanga re 'aḏi kanau, “Jou, soma'a we-were'a gena-ge mo tagi, munanga mo 'a'a nyiwere ra ngene nanga ḏuḏunu.”

²⁴Yesus 'a sangoro toma we-were'a gena-ge, “Ngoi pa'i sanga 'utusu toma ngowa-ngowa'a Israel ḇato ga'a ma tero sa'olo doba ga'a 'i iranga ngo'omo.”

²⁵We-were'a gena-ge sapolo mo maḏipolono ra Yesus 'ai biono re mo kanau, “Ma Jou no riono ngoi!”

²⁶Yesus 'a sangoro, “Enanga 'i rousu ua wo 'oro ngowa 'olo manga ngo-ngoromo, kara wa pula'a di'a nunu'u.”

²⁷We-were'a gena-ge mo kanau, “Tero mode'e Ma Jou, mada'a nunu'u mai 'i sanga oromo ngo-ngoromo ma so-sorono ga'a 'i eta'a tala ra madutu 'ai meja ma 'aḏu.”

²⁸Ḏua Yesus 'o kanau i'a ra munanga, “Meme 'ani ngo-ngaku lai lamo'o. Sababu gena-ge, 'oru ga'a ngana ni mau, enanga 'i dadi.” Toma 'orasa gena-ge ḏua, 'ami ngowa'a were'a remo la.

²⁹Ḏua Yesus 'a sisoi'i tala ngi'i gena-ge, re 'o tagi mete'e talaga Galilea ma 'uḏu. Gena ḏua, Unanga 'o materu ie toma polono rimoi kara 'o tegoro.

³⁰Ngowa'a kawasa 'aḏi sapolo gasa ngowa'a cug̱a, ngowa'a hafu, ngowa'a ḇolo, ngowa'a mou, re ngowa'a siḏi ma lelegu manga repe ḏi'i. Ngowa-ngowa'a siḏi gena-ge ananga ya'u sigare ra Yesus 'ai rou, re Unanga ya'u si-la mo-moini.

³¹Ngowa'a kawasa toma ngi'i gena-ge 'aḏi heranga madutu wakutu ananga 'aḏi oḏi'i masiretene ngowa'a mou raḏi kanau, ngowa'a ḇolo raḏi la, ngowa'a cug̱a raḏi tagi, re ngowa'a hafu raḏi oḏi'i. Ḏua ananga mo-moini 'aḏi puji re silamo'o Ma Jou'ongu Madutu ga'a ngowa'a Israel 'aḏi silamo'o re siḏubuso.

³²Gena ḏua, Yesus 'o 'aro'o 'Ai me-mete'e kara 'O kanau ra ananga, “Tari 'akala re sinyingara 'i baolo dadalara toma ngowa'a kawasa nena-ne. Sababu ma di'ara wangere ro'ange ḏua ananga raḏi mamete'e ra Ngoi dadi nange-ne ananga manga ngo-ngoromo 'i moini ḏua. Ngoi to oḏu'u ananga 'aḏi maḏibo remanga sawini, sababu na'o so'o gena-ge awa-awa 'aḏi beberete toma ngo'omo ma golona.”

³³Ḏua, 'Ai me-mete'e 'aḏi sangoro ra Unanga, “Ngi'i nena-ne 'i tiwongo i'a. Wo sanga le'a ngo-ngoromo di'a ngowa'a manga repe nena-ne?”

³⁴Yesus 'o sano, “ 'Age roti ngai muḏuo i'a ra ngini?” Ananga ya sangoro, “Ngai tumudingi re pa'i nyao'o 'alusu ngai muḏuo i'a ḇato.”

³⁵Ḏua, Unanga gena-ge 'o soma'a ananga ngowa'a kawasa 'aḏi tegoro toma tana'a.

³⁶Gena ḏua, Yesus 'a 'oro roti ngai tumudingi re ma nyao'o gena-ge re 'O sibere ie murasa ma la ra Ma Jou'ongu Madutu. Ḏua Unanga 'a poti-poti roti re nyao'o gena-ge re 'O sipula'a Tai me-mete'e di'a ya sibalangu toma ngowa'a kawasa.

³⁷Ananga mo-moini 'aḏi oromo singadolo 'aḏi wunusu. Togumu i'a, Yesus 'ai me-mete'e ya lomu ma jingianga ya sanga pipigu tumudingi roma-romanga.

³⁸Ngowa'a repe ga'a 'aḏi oromo toma 'orasa gena-ge, ananga gena-ge na-nau'u ḇato nga cala rata. We-were'a re ngowa 'olo siroimi ua.

³⁹Gena ḏua, Yesus 'o soma'a ananga 'aḏi maḏibo, kara Yesus re 'Ai me-mete'e 'aḏi mabalene toma oti re 'aḏi sidete toma daeraha Magadan.