Read Sahu Matias 16 Bible Online

Matias 16 - Sahu bible

Matias 16

¹Ngowa'a Farisi re ngowa'a Saduki nga muḏuo i'a 'aḏi sapolo ra Yesus, mau 'aḏi disa Unanga 'ai sala. Dadi ananga 'aḏi golo'o Unanga 'o 'a'a didina'o heranga, la ananga ya waro mode-mode'e Unanga 'o sapolo da'u ra Ma Jou'ongu Madutu tala.

²Yesus 'a sangoro, “Na'o wangere sa'i soḏu re diwanga 'i ko-kolili, ngini kanau, ‘Da-daini i'a wangere ma rousu.’

³Re da-daini i'a ma wangere sa'i ri pilata na'o diwanga 'i ko-kolili re 'i hafu-hafu, ngini ni kanau, ‘Wangere nange-ne 'i besa'a.’ Ngini nga'unu ni ta'ajiri ni oḏi'i didina'o toma diwanga. Momongolo ua 'oru Ma Jou'ongu Madutu 'o 'a'a toma 'orasa nange-ne, ngini ni ta'ajiri na nga'unu ua!

⁴Ngowa-ngowa'a 'orasa nange-ne ngowa'a ma jira ga'a oḏu'u ngaku Ngoi! Ngini ni golo'o Ngoi to 'a'a didina'o heranga, mada'a rimoi i'a mai ua To pula'a ra ngini, pa'i ḏuga-ḏuga ga'a 'age ra ngini ḏua gena-ge didina'o heranga mangale nabi Yunus. Togumu i'a, Yesus 'o sisoi'i tala ananga gena-ge.”

⁵Wakutu Yesus rai me-mete'e 'aḏi ngadolo da'a talaga kaci moi, 'Ai me-mete'e aro ya waro mangale ananga 'aḏi gasa roti ua.

⁶Yesus 'o kanau ra ananga, “Ni ma'istiari ino toma ngowa-ngowa'a Farisi re Saduki manga ragi.”

⁷Wakutu ananga gena-ge 'aḏi 'isene Yesus 'o kanau so'o gena, 'Ai me-mete'e 'aḏi makanau matengo re matengo, “Unanga 'o kanau so'o gena, sababu ngene wo gasa roti ua.”

⁸Yesus 'a waro 'oru ga'a ananga 'aḏi ma'u kanau matengo re matengo. Dadi Unanga 'o kanau i'a ra ananga, “I'a sa'olo ngini ni ma'u kanau matengo re matengo mangale roti 'i cua?! Ngini ninga ngo-ngaku pa'i ceka'a ua ra Ngoi?!

⁹Ngini ni sahe nyangu moju! Ngini ni 'elingi bolo ua mangale 'o roti ngai romotoa ga'a Ngoi ta poti-poti di'a ngowa'a nga cala romotoa re ma bai'i pipigu muḏuo ga'a ngini na lomu?!

¹⁰Re sa'olo ḏi'i, roti ngai tumudingi, di'a ngowa'a nga cala rata re ma bai'i pipigu muḏuo ga'a ngini na lomu?!

¹¹I'a sa'olo ngini na sahe nyangu moju Ngoi to kanau ra ngini gena-ge mangale 'o roti ua. Ma'istiari toma ngowa-ngowa'a Farisi re Saduki manga ragi!”

¹²Togumu i'a, Yesus 'ai me-mete'e ya sahe mangale Yesus soma'a ua ananga 'aḏi ma'istiari toma ragi ga'a sipake toma roti, mada'a ananga 'aḏi ma'istiari toma ngowa-ngowa'a Farisi re Saduki manga do-doto'o.

¹³Yesus 'o tagi toma daeraha co-cori limau Kaisarea Filipi. Toma ngi'i gena-ge Unanga 'o sano Tai me-mete'e, “Ngowa'a 'aḏi kanau, Ngoi Manusia ma Ngowa'a Nau'u, ne 'a guna?”

¹⁴'Ai me-mete'e 'aḏi sangoro, “ 'Age mamuni'a 'aḏi kanau Jou 'a Yohanes tukanga baptis, 'age mamuni'a 'aḏi kanau Jou 'a Elia, 'age mamuni'a ḏi'i 'aḏi kanau Jou 'a Yeremia, bolo nabi matengo i'a.”

¹⁵Yesus dadunu 'o sano, “Mada'a na'o mete'e ngini masiretene nena-ne, Ngoi ne 'a guna?”

¹⁶Simon Petrus 'a sangoro, “Jou 'O Kristus, Ma Jou'ongu Madutu 'o 'ahu-'ahu, Unanga gena-ge 'Ai Ngowa'a Nau'u.”

¹⁷Yesus 'o kanau, “Simon 'a Yona 'ai ngowa'a nau'u, ngana no bara'utungu madutu! Sababu manusia ua 'o siajele gena-ge ra ngana, mada'a 'Ari Ḇaḇa toma soroga.

¹⁸Sababu gena-ge, Ngoi nena-ne to siajele ra ngana: Ngana nena-ne tini si'aro'o 'a Petrus: gena-ge ma ngale ‘maḏi’. Dadi ngana ma tero sa'olo maḏi di'a wala ma bangini. Re toma maḏi nena-ne ma re'u, Ngoi to simomi'i 'Ari jama'ata. Re kuasa sengene mai ya singi-ngiranga nga'unu ua.

¹⁹Soroga ma pareta[39] ma kuci, Ngoi ḏuanga i'a to pula'a ra ngana. Dadi 'oru ga'a ngana toma dungia nena-ne no simaha ua, Ma Jou'ongu Madutu toma soroga mai Ra mete'e ḏi'i. Re 'oru ga'a ngana toma dungia nena-ne na simaha, Ma Jou'ongu Madutu toma soroga mai Ra mete'e ḏi'i.”

²⁰Togumu i'a, Yesus 'a si'elingi Tai me-mete'e, awa ananga 'aḏi siajele ra guna ḇato mangale Unanga 'O Kristus.

²¹Mulaingi toma 'orasa gena-ge, Yesus 'o kanau sitarangi Tai me-mete'e, Unanga balasu 'o tagi toma limau Yerusalem, re 'O sanga sangisara ma repe toma Yahudi manga bi-biri'i, 'imam-'imam ma sae'e, re guru-guru 'agama. Ngowa'a ḏuanga i'a 'aḏi sisengene Unanga, mada'a toma wangere ma soi ro'ange Unanga dadunu 'o 'ahu moju.

²²Ḏua Petrus 'o taba'a Yesus 'ai giama re 'aḏi masai'i i'a, kara 'o ḇangata Yesus re 'o kanau, “Ma Jou, na'o nga'unu Ma Jou'ongu Madutu 'a sikiḏanga. Awa 'i dadi so'o gena ra Ma Jou!”

²³Yesus 'o magelelo i'a ra Petrus re 'o kanau, “Tagi i'a da'a, 'Iblisi! Ngana no dola'aku Ngoi. 'Ani fikirana, gena-ge manusia manga fikirana, Ma Jou'ongu Madutu 'ai fikirana ua.”

²⁴Gena ḏua, Yesus 'o kanau Tai me-mete'e, “ 'A guna ḇato mau 'o mete'e Ngoi, balasu 'a mete'e 'ai mau masiretene riwara[40] re balasu 'o doiti 'ai salib[41] kara 'o mete'e Ngoi tau-taunu.

²⁵Sababu 'a guna ḇato ga'a 'o kadiarata pa'i 'ai 'ahu toma dungia nena-ne ḇato, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato mete'e 'ai mau masiretene riwara sababu 'o mau mete'e Ngoi; unanga gena-ge ḏuanga i'a 'o sanga 'ahu kasingado-ngadolo i'a.

²⁶Sababu ma 'utungu 'i cua na'o ngowa'a matengo 'o sanga 'ori i'a rana mo-moini toma dungia nena-ne ma dara, mada'a 'o sanga ua 'ahu kasingado-ngadolo! Sababu 'ori i'a rana mo-moini toma dungia nena-ne ma dara 'i sipula'a ua 'ahu kasingado-ngadolo i'a!

²⁷Sababu rema kuasa Tari Ḇaḇa ti'ara riwara, Ngoi, Manusia ma Ngowa'a Nau'u mamete'e Rari mala'ekata-mala'ekata ḏuanga i'a 'aḏi sapolo. Toma 'orasa gena-ge, Ngoi to balasa mete'e matengo-matengo manga ga'a.

²⁸Ni ngaku mode-mode'e 'Ari demo-demo nena-ne: Taninga sigolona 'age rema ngowa'a ga'a 'aḏi 'ahu-'ahu moju re 'aḏi oḏi'i Ngoi, Manusia ma Ngowa'a Nau'u to sapolo sa'olo 'Olana.”