Read Sahu Matias 18 Bible Online

Matias 18 - Sahu bible

Matias 18

¹Toma 'orasa gena-ge Yesus 'ai me-mete'e 'aḏi sapolo sano ra Unanga, “ 'A guna lebe la-lamo'o toma Soroga ma Pareta?”[42]

²Yesus 'o 'aro'o ngowa 'olo matengo re 'O side-de'oso tamanga biono.

³Ḏua Unanga 'o kanau, “Ni ngaku mode-mode'e 'Ari demo-demo nena-ne: Na'o ngini ni dadi ua ma tero sa'olo ngowa 'olo nena-ne, ngini ni osama nyo-nyoimi yoḏu'u toma Soroga ma Pareta.

⁴Sababu gena-ge, 'a guna ḇato 'o maholo 'ai diri ma tero sa'olo ngowa 'olo nena-ne, unanga gena-ge lebe la-lamo'o i'a toma Soroga ma Pareta.

⁵Re 'a guna ḇato 'o dawongo ngowa 'olo ma tero sa'olo ngowa 'olo nena-ne sababu unanga 'o mete'e Ngoi, gena-ge ma tero sa'olo unanga 'o dawongo Ngoi ḏi'i.

⁶Mada'a na'o 'a guna ḇato 'o sigasa ngowa-ngowa'a ma pake ua ma tero sa'olo ngowa 'olo nena-ne, singadolo ananga 'aḏi ngaku Ngoi riwara, Ma Jou'ongu Madutu 'o sihukumu unanga gena-ge lebe tubuso i'a. Jobilaha maḏi la-lamo'o 'i siḏobe tai camala, kara sijala unanga toma ngoloto.

⁷Ngowa'a toma dungia nena-ne ḏuanga i'a sanga bahala sababu rema 'ori i'a ga'a si'a'a ananga 'aḏi baraḏosa. Tantu ḏua gena-ge 'i dadi, mada'a 'a guna ḇato 'o sigasa ngowa'a 'aḏi madaga'a ḏosa, unanga gena-ge 'o sanga bahala lamo'o!

⁸Na'o ngini ninga giama kaci moi bolo ninga rou kaci moi 'i sigasa ngini ni madaga'a ḏosa; ni tola'a kara na upa'a. Jobilaha, ngini ni 'ahu ra Ma Jou'ongu Madutu pa'i reninga giama kaci moi ḇato bolo rou kaci moi ḇato reo reninga giama bolo rou kaci ḏiḏi sanga upa'a toma u'u malejanga kama sora riwara.

⁹Re na'o ngini ninga la'o kaci moi 'i sigasa ngini ni madaga'a ḏosa, ni cuḇulenge kara na upa'a. Jobilaha ngini ni 'ahu ra Ma Jou'ongu Madutu pa'i reninga la'o kaci moi ḇato, reo reninga la'o kaci ḏiḏi sanga upa'a toma u'u malejanga kama sora riwara.”

¹⁰“Awa si'u'ua ngowa'a ma pake ua ga'a raḏi ngaku Ngoi, ananga gena-ge ma tero sa'olo ngowa 'olo nena-ne. Sababu Ngoi to siajele ra ngini nena-ne: Mala'ekata-mala'ekata ga'a 'aḏi jaga ngowa 'olo gena-ge, 'age tau-taunu toma soroga ra Ma Jou'ongu Madutu 'ai momina. [

¹¹Sababu Ngoi, Manusia ma Ngowa'a Nau'u, to sapolo, di'a sisalamata ngowa-ngowa'a ga'a kiḏanga ra Ma Jou'ongu Madutu ma tero sa'olo doba-doba ga'a 'i iranga.][43]

¹²Ngini ninga 'akala ma sanga sa'olo? Na'o 'age rema ngowa'a matengo i'a rai doba latu moi, mada'a 'i iranga rimoi, unanga 'o 'a'a 'oru?! Tantu ḏua, unanga 'a sisoi'i tala ma nyagi siworo re siworo gena-ge toma polono re 'o tagi 'a disa ma rimoi ga'a 'i iranga.

¹³Re na'o unanga ra sanga doba ga'a 'i iranga gena-ge — ni ngaku mode-mode'e 'Ari demo-demo nena-ne — unanga lebe maroanga mangale doba rimoi gena-ge reo ma nyagi siworo re siworo ga'a 'i iranga ua.

¹⁴So'o gena ḏi'i, ninga Ḇaḇa toma soroga 'O oḏu'u ngowa'a ma pake ua ga'a ro ngaku Ngoi 'o iranga kasingado-ngadolo i'a.”

¹⁵“Na'o 'ani ioronongoḏu matengo 'o madaga'a ḏosa ra ngana,[44] ngana no tagi ra unanga re no siajele mangale 'ai sala 'oru, pa'i la'o ngai rata ḇato. Na'o unanga 'a mete'e 'ani demo-demo, ngini nga muḏiḏi dadunu ni marimoi moju.

¹⁶Mada'a na'o unanga 'o dawongo 'ani demo-demo ua, ngana dadunu no tagi ra unanga re no gasa ngowa'a matengo bolo nga muḏiḏi ḏi'i. Sababu toma Boku 'Ofi-'Ofi ri silefo so'o ne: ‘Ma kuranga ḏua nga muḏiḏi bolo nga ḏu'ange 'aḏi dadi sakisi di'a sibanari ngowa'a gena-ge 'ai sala.’

¹⁷Na'o unanga mai 'o dawongo ua ananga manga demo-demo, ngana no siajele hali gena-ge toma jama'ata. Ma ḏo-ḏogumu na'o unanga mai 'o dawongo jama'ata manga demo-demo ua, awa ngini ni ma'u supu re osama ra unanga gena-ge, ma tero sa'olo unanga ngowa'a golo-golo'o balastengi, bolo ngowa'a ga'a nana'o ua Ma Jou'ongu Madutu.”

¹⁸“Ni ngaku mode-mode'e 'Ari demo-demo nena-ne: 'Oru ga'a ngini ni simaha ua toma dungia nena-ne, Ma Jou'ongu Madutu toma soroga mai Ra mete'e ḏi'i. Re 'oru ga'a ngini ni simaha toma dungia nena-ne, Ma Jou'ongu Madutu toma soroga mai Ra mete'e ḏi'i.

¹⁹Ngoi to siajele ra ngini nena-ne ḏi'i: Na'o toma dungia 'age nga muḏiḏi taninga sigolona ga'a marimoi mangale 'oru ḇato ngini ni manyiata Tari Ḇaḇa toma soroga, Unanga ḏuanga i'a 'a sitotomo ninga go-golo'o.

²⁰Sababu toma ngi'i le'a ḇato 'age nga muḏiḏi bolo nga ḏu'ange 'aḏi malomu sababu Ngoi, Ngoi 'age tamanga sigolona.”

²¹Gena ḏua, Petrus 'o sapolo ra Yesus re 'o sano, “Ma Jou, na'o 'ari ioronongoḏu 'a'a ḏosa ra ngoi, singadolo soi muḏuo ngoi balasu to si'apongo unanga? Singadolo soi tumudingi?”

²²Yesus 'a sangoro, “Ngoi to kanau ra ngana, pa'i soi tumudingi ḇato ua, mada'a balasu si'apongo unanga soi nyagi tumudingi sidu'o soi tumudingi![45] [46]

²³Sababu Soroga ma Pareta ma tero sa'olo 'ade-'ade so'o ne: 'Olana matengo mau 'ai budaka-budaka 'aḏi fangu manga banyatoro.

²⁴Siḏa-siḏa budaka matengo ga'a 'ai banyatoro rema juta-juta, ananga 'u sitalaḏi ra 'olana gena-ge.

²⁵Mada'a unanga 'a fangu 'a simoini 'a nga'unu ua. Dadi 'olana 'o parenta ngowa'a 'aḏi wu'unu budaka gena-ge, re 'ai ngowa'a re were'a, re 'ori i'a rana mo-moini, la sifangu 'ai banyatoro.

²⁶Budaka gena-ge 'o maḏipolono ra 'olana 'ai biono re madigaro'o, ‘Tuanga no sijumu 'ani 'akala ḇanyo ra ngoi, re maha ḏuanga i'a ngoi ta fangu ta simoini.’

²⁷Dadi 'olana 'ai 'akala re sinyingara 'i baolo dadalara tai budaka gena-ge, singadolo budaka gena-ge 'ai banyatoro ma 'olana 'a singi-ngiranga re sibebasa unanga di'a 'o tagi maḏibo.

²⁸Mada'a wakutu budaka gena-ge 'o supu, unanga ma'u sanga 'ai ḏagilomu budaka matengo ga'a 'ai banyatoro cala muḏuo i'a ra unanga. Ḏua unanga 'u cako'o re 'u colokoko re 'o kanau, ‘Na fangu simoini 'ani banyatoro!’

²⁹Ḏua 'ai ḏagilomu gena-ge 'o mapagara 'ai biono tala re maḏigaro'o ra unanga, ‘Wolo, no sijumu 'ani 'akala ḇanyo ra ngoi, re maha ḏuanga i'a ngoi ta fangu ta simoini!’

³⁰Mada'a unanga 'a itomo. Siḏibo ḏi'i, unanga 'u singosama 'ai ḏagilomu budaka toma bui, singadolo 'ai banyatoro 'a fangu simoini.

³¹Wakutu budaka-budaka ma lelegu ananga ya oḏi'i i'a gena-ge, ananga manga 'akala re sinyingara 'i kangela. Dadi ananga 'aḏi siajele mangale gena-ge ra 'olana.

³²Ḏua 'olana gena-ge 'o 'aro'o budaka ga'a 'ai 'akala re sinyingara ma jira re 'o kanau i'a ra unanga, ‘Budaka ma jira! Ngana 'ani banyatoro ngoi ta singi-ngiranga mo-moini, pa'i sababu no maḏigaro'o ḇato ra ngoi.

³³I'a sa'olo, ngana no sijumu ua 'ani 'akala re sinyingara ma la-la tani ḏagilomu budaka, ma tero sa'olo ngoi reto sijumu 'ari 'akala re sinyingara ma la-la ra ngana?’

³⁴Dadi 'olana 'o ruta masala toma budaka gena-ge ga'a 'ai 'akala re sinyingara 'i cira re 'u singosama unanga toma bui, singadolo 'a fangu 'ai banyatoro simoini.”

³⁵Yesus 'a siḏo-ḏogumu 'ai 'aḏe-'aḏe gena-ge so'o ne: “So'o gena ḏi'i, 'Ari Ḇaḇa da'u toma soroga ḏuanga i'a nu 'a'a ngini matengo re matengo, na'o ngini ni si'apongo ua taninga 'akala re sinyingara ninga ioronongoḏu ga'a 'a'a ḏosa ra ngini.”