Read Sahu Matias 19 Bible Online

Matias 19 - Sahu bible

Matias 19

¹Wakutu Yesus 'o doto'o togumu i'a Unanga 'a sisoi'i tala daeraha Galilea, re 'o tagi toma daeraha Yudea, toma Ḇanyo Yordan kaci moi

²Toma ngi'i gena-ge ngowa'a kawasa 'aḏi mete'e Unanga, re Unanga ya'u si-la ananga manga si-siḏi.

³Ngowa'a Farisi nga muḏuo i'a 'aḏi sapolo ra Yesus, ananga 'aḏi disa Yesus 'ai sala. Ananga 'aḏi sano, “Mete'e nanga 'agama ma hukumu, nau'u oḏu'u 'ai were'a sababu ma 'alasana 'oru ḇato, nyengara bolo ua?”

⁴Yesus 'a sangoro, “Tantu ḏua, ngini reni baca toma Boku 'Ofi-'Ofi mangale wakutu Ma Jou'ongu Madutu 'o sidadi manusia, ma mulaingi 'age 'o na-nau'u re we-were'a?!

⁵Togumu i'a, Ma Jou'ongu Madutu 'o kanau ra ananga nga muḏiḏi, ‘Sababu gena-ge, na-nau'u 'o sisoi'i tala 'ai ḇaḇa re 'ai ngina, re 'o marimoi tai were'a, kara ananga nga muḏiḏi 'aḏi dadi rimoi.’

⁶Dadi ananga 'aḏi dadi nga muḏiḏi riwara, mada'a raḏi dadi rimoi. Sababu gena-ge, 'oru ga'a Ma Jou'ongu Madutu ra sirimoi, manusia wa sito-tola'a yoḏu'u.”

⁷Ḏua ngowa'a Farisi 'aḏi sano moju, “Na'o so'o gena, i'a sa'olo 'a Musa 'o soma'a nau'u balasu pula'a surata tola'a tai were'a ga'a unanga re mi oḏu'u?”

⁸Yesus 'a sangoro, “Musa 'o pula'a loasa ni oḏu'u ninga were'a sababu ngini ninga 'akala re sinyingara lai te'e. Mada'a ma ba-banari toma mulaingi i'a so'o gena ua.

⁹Dadi, Ngoi to siajele ra ngini nena-ne: 'A guna ḇato 'a oḏu'u 'ai were'a, mada'a were'a gena-ge mo tinikai ua, kara 'o molo'ara we-were'a lelegu, unanga gena-ge 'o tinikai.”

¹⁰Ḏua Yesus 'ai me-mete'e 'aḏi kanau ra Unanga, “Na'o so'o gena, jobilaha molo'ara awa!”

¹¹Yesus 'a sangoro, “Demo gena-ge ngowa'a mo-moini ua nga'unu ya mete'e, mada'a pa'i ngowa'a ga'a Ma Jou'ongu Madutu ra sitantukanga.

¹²Sababu 'age rema ngowa'a ga'a masinge-ngeta'a da'u tala ga'a 'aḏi molo'ara 'i yoḏu'u. Re 'age rema ngowa'a ga'a 'aḏi molo'ara 'i yoḏu'u, sababu ngowa'a ya'u kabiri. Re 'age ḏi'i rema ngowa'a ga'a mau 'aḏi de-de'oso Ma Jou'ongu Madutu, dadi 'aḏi molo'ara ua. Ngowa'a ga'a nga'unu ya mete'e 'ani demo-demo gena-ge, lebe rousu ananga ya si'a'a.”

¹³'Age 'orasa rimoi, ngowa-ngowa'a 'aḏi gasa i'a manga ngowa 'olo ra Yesus, la Unanga 'a siteru 'Ai giama ra ananga di'a ya'u sibarakati. Mada'a 'Ai me-mete'e 'aḏi ḇangata ngowa'a gena-ge ga'a gasa manga ngowa 'olo.

¹⁴Ḏua Yesus 'o kanau Tai me-mete'e, “Sieanga i'a ḇato ngowa 'olo nena-ne 'aḏi sapolo ra Ngoi. Awa ni dola'aku ananga, sababu ngowa'a ga'a 'aḏi dadi ma tero sa'olo ngowa 'olo-ngowa 'olo nena-ne pa'i ananga gena-ge nyengara 'aḏi osama nyo-nyoimi toma Soroga ma Pareta.”[47]

¹⁵Gena ḏua, Yesus 'a siteru 'Ai giama toma ngowa 'olo-ngowa 'olo matengo re matengo manga sae'e ma re'u kara 'O sibarakati ananga. Gena ḏua Unanga 'o tagi sisoi'i tala ngi'i gena-ge.

¹⁶Toma wangere rimoi, 'age tubaie matengo 'o sapolo ra Yesus, re 'o sano, “Guru, ngoi balasu to 'a'a ga'a ma la-la sa'olo, la to dawongo 'ahu kasingado-ngadolo i'a?”

¹⁷Yesus 'a sangoro, “I'a sa'olo no sano ra Ngoi mangale 'ori i'a ma la-la? Pa'i Matengo ḇato ma la-la. Na'o ngana mau no sanga 'ahu kasingado-ngadolo i'a, ngana balasu no mete'e parenta-parenta ra Ma Jou'ongu Madutu.”

¹⁸Tubaie gena-ge 'o sano, “Parenta-parenta sa'olo?” Yesus 'a sangoro, “No sisengene ngowa'a awa, no tinikai awa, no tori'i awa, no dadi sakisi sa-sakala awa,

¹⁹no silamo'o 'ani ḇaḇa re 'ani ngina, re no dadalara ngowa'a lelegu ma tero sa'olo no dadalara 'ani diri masiretene.”

²⁰Tubaie gena-ge 'a sangoro, “Parenta mo-moini gena-ge ngoi reta mete'e. 'I kuranga 'oru moju?”

²¹Yesus 'o kanau, “Na'o ngana mau no dadi ti-tiai, no maḏibo re na wu'unu 'ani 'ori i'a rana mo-moini, re ma pipisi na sibalangu toma ngowa-ngowa'a ma dinga'unu ua. Dadi, ngana ḏuanga i'a no sanga 'ori i'a rana mode-mode'e toma soroga. Togumu i'a no sapolo re no mete'e Ngoi!”

²²Wakutu tubaie gena-ge 'a 'isene Yesus 'o kanau so'o gena, unanga 'o maḏibo rai 'akala re sinyingara 'i kangela, sababu unanga gena-ge ngowa'a rema-enanga madutu.

²³Ḏua Yesus 'o kanau Tai me-mete'e, “Ni ngaku mode-mode'e 'Ari demo-demo nena-ne: Kangela masala di'a ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.[48]

²⁴Re Ngoi to siajele ra ngini nena-ne ḏi'i: Lebe gapanga 'o 'unta rimoi 'i osama toma j̱aiti ma duso'o reo ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.”

²⁵Wakutu 'ai me-mete'e ya 'isene Yesus 'o kanau so'o gena, ananga 'aḏi heranga masala re 'aḏi kanau, “Na'o so'o gena, 'a guna nga'unu sanga salamata?!”

²⁶Yesus 'o tatamo ananga re 'o kanau, “Toma manusia 'i osama 'akala ua, mada'a ra Ma Jou'ongu Madutu mo-moini 'i osama 'akala.”

²⁷Ḏua Petrus 'o sangoro, “Ngomi remi sisoi'i tala mo-moini, la mi mete'e Jou! Dadi ngomi sanga 'oru?”

²⁸Yesus 'o kanau ra ananga, “Ni ngaku mode-mode'e 'Ari demo-demo nena-ne: Toma dungia su-sungi Ngoi, Manusia ma Ngowa'a Nau'u ḏuanga i'a To tegoro Tari ḏe-ḏegoro ga'a mulia. Re toma 'orasa gena-ge, ngini Ngoi 'ari me-mete'e, ni tegoro toma ḏe-ḏegoro nyagi moi re romoḏiḏi, re ni sijuruhakimi ngowa'a Israel suku nyagi moi re romoḏiḏi.

²⁹'A guna ḇato ra sisoi'i tala 'ai wala, 'ai iḏanga re biḏanga, 'ai ḇaḇa re ngina, 'ai ngowa-ngowa'a bolo 'ai guḏa sababu mete'e Ngoi, unanga gena-ge ḏuanga i'a 'o dawongo maḏibo siḏuolo latu moi re 'o sanga ḏi'i 'ahu kasingado-ngadolo i'a.

³⁰Mada'a ngowa'a repe ga'a nange-ne 'aḏi dadi ngowa'a la-lamo'o, ḏuanga i'a 'aḏi dadi ngowa'a ma pake ua. Re ngowa'a repe ga'a nange-ne 'aḏi dadi ngowa'a ma pake ua, ḏuanga i'a 'aḏi dadi ngowa'a la-lamo'o.”