Read Sahu Matias 20 Bible Online

Matias 20 - Sahu bible

Matias 20

¹“Wakutu Soroga ma Pareta[49] 'i ngadolo, enanga gena-ge ma tero sa'olo 'ade-'ade nena-ne: Da-daini i'a moju guḏa 'anggur ma dutu matengo 'o tagi 'o disa ngowa'a di'a 'aḏi munara tai guḏa 'anggur.

²Unanga 'a si'aturu ananga manga ngogele wange moi pipisi salaka ngai moi. Togumu i'a 'o soma'a ananga 'aḏi munara tai guḏa 'anggur gena-ge.

³Ca'olo siworo da-daini i'a, guḏa 'anggur ma dutu gena-ge dadunu 'o tagi ḏi'i, re 'o oḏi'i ngowa'a nga muḏuo i'a pa'i 'aḏi maro-roka ḇato toma pasara.

⁴Ḏua unanga 'o kanau i'a toma ngowa-ngowa'a gena-ge, ‘Tagi ni munara ra ngoi 'ari guḏa 'anggur. Ngoi ḏuanga i'a tini fangu ninga munara ma ijana ga'a ngoi reta putusu 'i 'adili.’

⁵Gena ḏua, ananga 'aḏi tagi munara, Ca'olo nyagi moi re romoḏiḏi wange 'olona tala, re wange so'o ne'o ca'olo ro'ange, guḏa 'anggur ma dutu gena-ge dadunu 'o tagi di'a 'o sewa ngowa'a munara.

⁶Re ḏa ca'olo romotoa wangere so'o ne'o, unanga gena-ge dadunu 'o tagi, re 'o oḏi'i rema ngowa'a moju pa'i 'aḏi maro-roka ḇato. Unanga ya'u sano i'a ra ananga, ‘I'a sa'olo toma wange moi ma dara, ngini ni maga'a 'oru rimoi i'a mai ua?’

⁷Ngowa-ngowa'a gena-ge 'aḏi sangoro, ‘Ngowa'a 'aḏi sipula'a munara ngomi ua.’ Dadi guḏa 'anggur ma dutu gena-ge 'o kanau, ‘Na'o so'o gena, ngini tagi re ni munara ra ngoi 'ari guḏa 'anggur.’ Dadi ananga gena-ge tagi munara.

⁸Wakutu wangere so'o ne'o ḏa ca'olo rarama, guḏa 'anggur ma dutu 'o kanau tai ngowa'a munara ma sae'e, ‘ 'Aro'o re lomu ngowa'a munara mo-moini, la ta fangu ananga matengo re matengo manga munara ma ngogele; mulaingi toma ngowa'a munara ga'a sapolo ma siḏo-ḏogumu singadolo ngowa'a munara ga'a 'aḏi sapolo ma mulaingi.’

⁹Ngowa'a munara ga'a 'aḏi osama munara ca'olo romotoa wange so'o ne'o, ananga gena-ge matai sapolo. Ananga matengo re matengo 'aḏi sanga pipisi salaka ngai moi.

¹⁰Gena ḏua, sapolo ḏi'i ngowa'a munara ga'a 'aḏi osama munara da-daini i'a moju. Ananga 'aḏi mafikiri ananga 'aḏi sanga pipisi lai lamo'o. Momongolo ua, ananga matengo re matengo mai 'aḏi sanga pipisi salaka ngai moi.

¹¹Wakutu ananga 'aḏi sanga manga pipisi gena-ge, ananga 'aḏi kuḏubungu toma guḏa 'anggur ma dutu re 'aḏi kanau,

¹²‘Ananga ga'a osama munara ma siḏo-ḏogumu pa'i 'aḏi munara jam rimoi. Ngomi mi munara wange moi ma dara, re sidogo wangere ya 'erese ngomi singadolo wangere so'o ne'o, mada'a ngana no fangu minga munara ma tero sa'olo ananga gena-ge manga munara!’

¹³Guḏa 'anggur ma dutu gena-ge 'a sangoro ra matengo tamanga sigolona, ‘Wolo, ngoi kai ri sala ua ra ngana. Ngana re ngoi, 'oru ngene wo nyengara ḏua: No munara wange moi, no sanga pipisi salaka ngai moi?

¹⁴Dadi na 'oro 'ani pipisi kara no tagi. Ngoi mau to pula'a ngowa'a munara ga'a 'aḏi sapolo ma siḏo-ḏogumu manga pipisi ma lamo'o ma tero sa'olo ta ngana ḏi'i.

¹⁵Ngoi nyengara bolo ua to pula'a 'ari pipisi ra guna ḇato mete'e 'ari mau?! I'a sa'olo ngana 'ani 'akala re sinyingara 'i go-goḏi? 'Oru sababu 'ari 'akala re sinyingara lai mura?’ ”

¹⁶“Dadi, ngowa'a ga'a ngowa'a mapake ua, ḏuanga i'a 'aḏi dadi ngowa'a la-lamo'o. Re ngowa'a ga'a ngowa'a la-lamo'o, ḏuanga i'a 'aḏi dadi ngowa'a mapake ua.”

¹⁷Wakutu Yesus 'o tagi toma limau Yerusalem, toma ngo'omo ma golona Unanga 'o 'aro'o re ya'u lomu 'Ai me-mete'e nga nyagi moi re nga muḏiḏi re 'aḏi mawola i'a pa'i ananga re 'O kanau,

¹⁸“ 'Isene! Ngene nange-ne wo si'a toma limau Yerusalem. I'a da'a Ngoi, Manusia ma Ngowa'a Nau'u, ḏuanga i'a sipula'a toma 'imam-'imam ma sae'e re guru-guru 'agama. Re Ngoi ḏuanga i'a ananga Ri singe-ngeta'a hukumu sengene.

¹⁹Gena ḏua, Ngoi sipula'a ḏi'i toma ngowa-ngowa'a Yahudi ua. Ngoi, ananga Ri sije-jengere re Ri sipo, kara Ri sisalib. Mada'a toma wangere ma soi ro'ange, Ngoi dadunu to 'ahu moju.”

²⁰Gena ḏua, 'a Zebedeus 'ai were'a re 'ami ngowa'a nau'u nga muḏiḏi, 'a Yakobus re 'a Yohanes, ananga 'aḏi sapolo ra Yesus. Munanga mo maḏipolono ra Unanga 'ai biono re mo golo'o 'ori i'a rimoi i'a.

²¹Yesus 'o sano, “Meme no mau 'oru?” Munanga mo sangoro, “Ngoi to mau 'ari ngowa'a nga muḏiḏi nena-ne matengo 'o tegoro Tani giama ma kuwiḏa re matengo 'o tegoro Tani giama ma kuḇali, wakutu Jou ḏuanga i'a No dadi 'Olana.”

²²Yesus 'o kanau ra Yakobus re 'a Yohanes, “Ngini ni sahe ua 'oru ga'a ni golo'o. Nga'unu bolo ua ni ka'e Tari sawo'o ga'a Ngoi balasu ta ka'e? 'Ari sawo'o ma dara gena-ge 'i romanga reo susa re sangisara?” Ananga ya sangoro, “Ngomi ma nga'unu.”

²³Yesus 'o kanau ra ananga, “Mode-mode'e, ḏuanga i'a ngini ni ka'e Tari sawo'o. Mada'a mangale 'a guna 'o tegoro Tari giama ma kuwiḏa bolo Tari giama ma kuḇali, gena-ge Ngoi 'ari haku ua ta sitantukanga. 'Ari Ḇaḇa ra sitantukanga 'a guna tegoro toma ngi'i-ngi'i gena-ge.”

²⁴Wakutu Yesus 'ai me-mete'e nga nyagi moi ya 'isene so'o gena, ananga 'aḏi ruta ra Yakobus re 'a Yohanes.

²⁵Dadi Yesus ya'u 'aro'o ananga mo-moini re 'O kanau, “Ngini ni waro mangale bangsa-bangsa manga sae'e ga'a nana'o ua Ma Jou'ongu Madutu, ananga gena-ge 'aḏi sikangela manga rayata. Re ngowa'a la-lamo'o 'aḏi simau-mau manga rayata, la ya mete'e manga parenta.

²⁶Mada'a ngini ni 'a'a so'o gena awa. Siḏibo ḏi'i, 'a guna ḇato mau 'o dadi ngowa'a la-lamo'o taninga sigolona, unanga balasu 'o dadi falalomu siḏa.

²⁷Re 'a guna ḇato mau 'o dadi sae'e taninga sigolona, unanga balasu 'o dadi ninga budaka.

²⁸So'o gena-ge ḏi'i ma tero sa'olo Ngoi, Manusia ma Ngowa'a Nau'u. Ngoi to sapolo di'a ngowa-ngowa'a 'aḏi de-de'oso Ngoi ua. Mada'a Ngoi to sapolo di'a To de-de'oso ngowa-ngowa'a, re Ta sidoa'a 'Ari 'ahu di'a To tuusu ngowa'a repe tamanga ḏosa.”

²⁹Wakutu Yesus re 'Ai me-mete'e ananga 'aḏi tagi sisoi'i tala limau Yerikho, ngowa'a kawasa 'aḏi mete'e Unanga.

³⁰'Age rema ngowa'a hafu nga muḏiḏi 'aḏi tegoro toma ngo'omo ma 'uḏu. Wakutu ananga 'aḏi 'isene Yesus 'o tola'a ino toma ngo'omo gena-ge, ananga 'aḏi poa'a, “Ma Jou, 'Olana Daud 'ai ju'uda,[50] Na sijumu 'Ani 'akala re sinyingara ma la-la ra ngomi!”

³¹Ngowa'a kawasa toma ngi'i gena-ge ananga ya'u ḇangata re 'aḏi soma'a ngowa'a hafu nga muḏiḏi gena-ge masiogoro. Mada'a ananga ganapu ya siduga manga iḏingi, “Ma Jou, 'Olana Daud 'ai ju'uda,[51] Na sijumu 'Ani 'akala re sinyingara ma la-la ra ngomi!”

³²Ḏua, Yesus 'o matogumu re ya'u 'aro'o ananga sapolo ra Unanga. Unanga ya'u sano i'a, “Ngini ni mau 'oru Ngoi ta si'a'a ra ngini?”

³³Ananga ya sangoro, “Ma Jou, ngomi mau mi oḏi'i!”

³⁴Dadi Tai 'akala re sinyingara 'i baolo dadalara ra ananga re 'A cigi manga la'o. Toma 'orasa gena-ge ḏua, ananga raḏi oḏi'i kara 'aḏi mete'e Unanga.