Read Sahu Matias 22 Bible Online

Matias 22 - Sahu bible

Matias 22

¹Yesus 'o kanau ḏi'i toma ngowa'a kawasa re 'O pake 'ade-'ade,

²“Soroga ma Pareta ma tero sa'olo toma 'ade-'ade nena-ne: 'Age 'olana matengo ga'a 'o 'a'a molo'ara ma laya di'a 'ai ngowa'a nau'u.

³'Olana gena-ge 'o soma'a 'ai budaka-budaka 'aḏi tagi re 'aḏi 'aro'o ngowa-ngowa'a ga'a 'aḏi sanga saele di'a sapolo. Mada'a ananga gena-ge ga'a raḏi sanga saele 'aḏi oḏu'u sapolo.

⁴Ḏua 'olana gena-ge 'o soma'a 'ai budaka-budaka ma lelegu 'aḏi tagi toma ngowa'a ga'a raḏi sanga saele. Unanga 'o kanau tai budaka gena-ge, ‘Ni siajele toma ngowa-ngowa'a ga'a reta'u saele mangale ngo-ngoromo toma laya, 'i ḏu-ḏuanga ḏua: Sapi ma la-lamo'o re sapi ma ngowa reta tola'a, mo-moini ri ḏuanga. Ino sapolo toma molo'ara ma laya.’

⁵Mada'a ngowa-ngowa'a gena-ge ga'a Unanga ya'u saele ḏua, ananga 'aḏi sikalesanga i'a ua. Ananga 'aḏi tagi tamanga munara: Mamuni'a 'aḏi tagi tamanga guḏa, mamuni'a ḏi'i 'aḏi tagi tamanga toko.

⁶Re ngowa'a ma lelegu 'aḏi cako'o ma 'olana 'ai budaka, ya'u ca'olo singadolo ya'u sisengene.

⁷Wakutu 'olana 'a 'isene 'oru ga'a 'i dadi, unanga 'o ruta madutu. Dadi unanga 'o siḏingoto 'ai sordado-sordado di'a tagi re 'aḏi sisengene ngowa-ngowa'a gena-ge ga'a 'aḏi sisengene 'ai budaka-budaka, kara ya tau'u ananga manga limau.

⁸Togumu i'a, unanga 'o 'aro'o 'ai budaka-budaka re 'o kanau, ‘Molo'ara ma laya 'i ḏu-ḏuanga ḏua, mada'a ngowa'a ga'a ngoi ta'u saele, ananga 'aḏi patasa ua di'a mete'e toma laya gena-ge.

⁹Sababu gena-ge ni tagi re 'a guna ḇato ga'a ma'u sanga toma tapaka-tapaka ni saele ananga, la 'aḏi sapolo ino toma molo'ara ma laya nena-ne.’

¹⁰Ḏua 'ai budaka-budaka gena-ge 'aḏi tagi. Ananga 'aḏi tagi toma tapaka-tapaka re 'aḏi lomu ngowa-ngowa'a mo-moini ga'a 'aḏi ma'u sanga, bae ngowa'a la-la, bolo ngowa'a ma jira, singadolo molo'ara ma laya ma ngi'i 'i masituḏu-tuḏu i'a reo ioronongoḏu.

¹¹Gena ḏua, 'olana gena-ge 'o osama di'a oḏi'i ioronongoḏu-ioronongoḏu toma laya ma dara. Unanga 'o oḏi'i ngowa'a matengo 'o mapake 'ai pakeanga 'i patasa ua di'a molo'ara ma laya.

¹²Dadi 'olana 'o sano toma ngowa'a gena-ge, ‘Wolo, i'a sa'olo ngana no osama toma laya ma dara, mada'a no mapake pakeanga 'i patasa ua di'a molo'ara ma laya?’ Ngowa'a gena-ge pa'i 'o masiogoro.

¹³Ḏua 'olana gena-ge 'o kanau tai falalomu-falalomu, ‘Ngowa'a nena-ne nu piri'u 'ai rou re 'ai giama kara upa'a unanga toma hafu-hafu. Toma ngi'i gena-ge, 'age rema ngowa'a ya rerese ma gaḏi re ya doiti ma sangisara.’ ”

¹⁴Ḏua Yesus 'a siḏo-ḏogumu 'ai 'ade-'ade so'o ne: “Repe ga'a sanga saele di'a osama nyo-nyoimi toma Soroga ma Pareta, mada'a sanga cumutu repe ua di'a 'aḏi dadi 'Ai ngowa-ngowa'a.”

¹⁵Togumu i'a, ngowa-ngowa'a Farisi 'aḏi malomu. Ananga 'aḏi disa ma ngo'omo di'a disa Yesus 'ai sala remanga so-sano—so-sano.

¹⁶Dadi ananga 'aḏi soma'a manga me-mete'e nga muḏuo i'a, re 'Olana Herodes 'ai ngowa-ngowa'a nga muḏuo i'a, 'aḏi sapolo ra Yesus. Ananga 'aḏi kanau, “Guru, ngomi waro Jou ngowa'a loasa re banari, No doto'o sitaḇela'a i'a mangale Ma Jou'ongu Madutu 'ai 'akala ma mau toma manusia. Re Jou no mete'e ua 'a guna ḇato 'ai mau sababu No siwola-wola ngowa'a ua, mete'e manga rupa re jamani.

¹⁷Sababu gena-ge, Jou no siajele ra ngomi, 'oru 'ani 'akala ma sanga mangale nena-ne: Mete'e nanga 'agama ma 'atoranga, nyengara bolo ua, ngene wo fangu balastengi ra Kaisar?”

¹⁸Mada'a Yesus 'a waro ananga manga 'ulungu ma jira dadi 'O kanau, “Hei ngini ngowa'a munafiki. I'a sa'olo ni mau disa Ngoi 'ari sala?

¹⁹Sijumu ino ra Ngoi, 'o pipisi ga'a ngini ni sifangu balastengi!” Ḏua ananga 'aḏi pula'a ra Unanga, pipisi salaka ngai moi.

²⁰Yesus 'o sano i'a ra ananga, “Ne 'a guna 'ai biono, re 'a guna 'ai lomanga?”

²¹Ananga ya sangoro, “Kaisar”. Ḏua Yesus 'o kanau ra ananga, “Na'o so'o gena-ge, ta Kaisar pula'a di'a Kaisar, re ta Ma Jou'ongu Madutu, pula'a di'a Ma Jou'ongu Madutu.”

²²Ananga gena-ge 'aḏi dadi heranga wakutu 'aḏi 'isene Yesus 'o kanau so'o gena. Dadi ananga 'aḏi tagi sisoi'i tala Yesus.

²³Toma wangere gena-ge ḏi'i, ngowa'a Saduki nga muḏuo i'a 'aḏi sapolo ra Yesus. (Ananga gena-ge 'aḏi ngaku ua ngowa'a dadunu 'aḏi 'ahu moju toma ngowa'a senge-sengene manga sigolona.)

²⁴Ananga 'aḏi sano ra Unanga, “Guru, 'a Musa 'o doto'o so'o ne: Na'o nau'u matengo 'o sengene kai ngowa'a ua, 'ai ioro bolo 'ai nongoḏu balasu 'a molo'ara 'ai balo gena-ge, la ngowa'a sengene nange-ge 'ai ju'uda 'i iranga awa.

²⁵'I dadi ḏua, toma ngowa'a nau'u gia nongoḏu nga tumudingi ga'a tegoro 'ane. Ma ioro ro molo'ara re 'o sengene, kai ngowa'a ua. Dadi ma nongoḏu 'a molo'ara ma ioro 'ai balo.

²⁶Mada'a 'ai nongoḏu gena-ge 'o sengene kai ngowa'a ua ḏi'i. Gena-ge 'i dadi ḏi'i tai nongoḏu nga ḏu'ange, singadolo nga tumudingi.

²⁷Ma ḏo-ḏogumu tala, were'a gena-ge mo sengene ḏi'i.

²⁸Sababu gena-ge toma 'orasa ngowa'a senge-sengene dadunu 'aḏi 'ahu moju, we-were'a gena-ge 'a guna 'ai were'a? Sababu munanga ma'u molo'ara mo-moini ananga nga tumudingi!”

²⁹Yesus 'a sangoro, “Ngini ni rapu masala, sababu ni sahe ua do-doto'o toma Boku 'Ofi-'Ofi ma dara. Re so'o gena-ge ḏi'i, ni sahe ua Ma Jou'ongu Madutu 'ai kuasa.

³⁰Sababu wakutu ngowa'a senge-sengene dadunu 'aḏi 'ahu moju, ananga manga 'ahu ma tero sa'olo mala'ekata toma soroga: bae na-nau'u bolo we-were'a, ananga 'aḏi molo'ara riwara.

³¹Tantu ḏua, ngini reni baca 'oru ga'a Ma Jou'ongu Madutu 'o kanau ra ngini mangale ngowa'a senge-sengene dadunu 'aḏi 'ahu moju! Ma Jou'ongu Madutu 'o kanau so'o ne:

³²‘Ngoi nena-ne Ma Jou'ongu Madutu ga'a Abraham, Ishak re Yakub 'aḏi silamo'o re siḏubuso.’ Ngowa'a sengene 'aḏi silamo'o re siḏubuso yoḏu'u Ma Jou'ongu Madutu, pa'i ngowa'a 'ahu-'ahu ḇato nyengara 'aḏi silamo'o re siḏubuso Unanga!”[56]

³³Wakutu ngowa'a kawasa ya 'isene Yesus 'o kanau so'o gena, ananga 'aḏi dadi heranga madutu sababu Unanga 'ai do-doto'o.

³⁴Ngowa'a Farisi dadunu 'aḏi malomu sababu 'aḏi 'isene mangale Yesus 'o 'a'a ngowa-ngowa'a Saduki 'aḏi kanau bale moi i'a mai yoḏu'u.

³⁵Guru 'agama matengo tamanga sigolona, 'U tai'i mau sisala 'a Yesus, unanga 'U sano:

³⁶“Guru, parenta le'a lebe la-lamo'o ma re'u i'a reo parenta mo-moini ra Musa 'ai hukumu?”

³⁷Yesus 'o sangoro, “ ‘Dadalara Ma Jou'ongu Madutu, ninga Jou, reninga 'akala re sinyingara mo-moini, reninga nyawa mo-moini, reninga fikirana mo-moini.’

³⁸Parenta gena-ge ma mulaingi re lebe la-lamo'o ma re'u i'a.

³⁹Parenta ma soi ḏiḏi ma tero sa'olo parenta ma mulaingi: Balasu ni dadalara ngowa'a lelegu ma tero sa'olo ni dadalara ninga diri masiretene.

⁴⁰Musa 'ai hukumu re nabi-nabi manga do-doto'o, gena-ge mo-moini 'i mete'e parenta romoḏiḏi nena-ne.”

⁴¹Wakutu ngowa'a Farisi 'aḏi lomu-lomu moju toma ngi'i gena-ge, Yesus 'o sano ra ananga,

⁴²“Mete'e ngini ninga wo-waro mangale 'O Kristus, 'a guna Unanga 'ai ete re dotumu?” Ananga 'aḏi sangoro, “ 'Olana Daud 'ai ju'uda.”

⁴³Yesus 'o sano, “Na'o so'o gena, i'a sa'olo Ma Ngagara 'Ofi-'Ofi 'i sigaraki 'Olana Daud singadolo unanga 'o si'aro'o 'O Kristus, ‘ 'Ari Jou’? Sababu 'Olana Daud 'o kanau so'o nena-ne:

⁴⁴‘Ma Jou'ongu Madutu 'o kanau Tari Jou, No tegoro Tari giama ma kuwiḏa i'a, singadolo Ngoi ta 'a'a 'Ani lawa-lawana 'aḏi ta'aloko ra Jou.’

⁴⁵Dadi na'o 'O Kristus gena-ge 'Olana Daud 'ai ju'uda, i'a sa'olo 'Olana Daud 'o si'aro'o Unanga, ‘ 'Ari Jou’?”

⁴⁶Matengo i'a mai ua nga'unu 'U sangoro 'a Yesus. Mulaingi wangere gena-ge, matengo i'a mai ua 'o nau'u di'a sano 'oru ḇato ra Unanga, la sisala Unanga.