Read Sahu Matias 24 Bible Online

Matias 24 - Sahu bible

Matias 24

¹Wakutu Yesus 'o sisoi'i tala Ma Jou'ongu Madutu 'ai Wala, 'Ai me-mete'e 'aḏi sapolo ra Unanga 'aḏi sijumu Ma Jou'ongu Madutu 'ai Wala re ma wala-wala mo-moini ga'a ma'u co-cori.

²Yesus 'o kanau ra ananga, “Ngini ni oḏi'i wala nena-ne mo-moini 'oru? Ni ngaku mode-mode'e 'Ari demo-demo nena-ne: Ḏuanga i'a 'aḏi rimoi i'a moi ua, 'age 'i ma'u fato re maḏi ma lelegu; mo-moini 'i perego.”

³Gena ḏua, Yesus 'o tagi toma Polono Zaitun, re 'O madi-dirini toma ngi'i gena-ge. 'Ai me-mete'e 'aḏi masebanga i'a ra Unanga re wakutu pa'i ananga ḇato ananga 'aḏi sano, “Siajele ra ngomi, ngau enanga mo-moini gena-ge 'i dadi. Rema didina'o 'oru Jou ḏuanga i'a no sapolo sa'olo 'olana re 'orasa ma ḏo-ḏogumu 'i ngadolo?”

⁴Yesus 'o sangoro, “Ma'istiari ino awa-awa ngowa'a 'aḏi sihaga ngini.

⁵Sababu ngowa'a manga repe ḏuanga i'a 'aḏi sapolo, 'aḏi pake Ngoi 'ari lomanga, 'aḏi kanau, ‘Ngoi nena-ne 'O Kristus,’ singadolo 'aḏi sihaga ngowa'a repe.

⁶Ngini ḏuanga i'a ngini ni 'isene sanapanga ma iḏingi re ni 'isene habari-habari parangi, mada'a mojongo awa. Sababu mo-moini gena-ge balasu 'i dadi, mada'a kiamata ma 'orasa 'i ngadolo nyangu.

⁷Bangsa rimoi ma'u parangi bangsa lelegu, re nagara rimoi ma'u parangi nagara lelegu. Toma ngi'i le'a ḇato 'i dadi ngowa'a repe 'aḏi matai sawini re 'i dadi wusu.

⁸Mo-moini gena-ge aro ma mulaingi ma tero sa'olo were'a mi 'orasa ma ḏe-ḏegoro i'a sa'i ri ngadolo, dadi mo mabasono go-goḏi.

⁹Toma 'orasa gena-ge, ngini sanga cako'o re sipula'a toma ngowa'a ma jira di'a sisikisa ngini re nu'u sisengene. Ngowa'a mo-moini toma dungia sitabi donga, ananga 'aḏi emono ngini sababu Ngoi 'ari me-mete'e.

¹⁰Dadi ngowa'a manga repe 'aḏi masoloto re 'aḏi ma'u sipula'a matengo re matengo tamanga lawana re 'aḏi ma'u emono matengo re matengo.

¹¹Re ḏi'i 'age 'i baolo nabi sa-sakala manga repe di'a 'aḏi sihaga ngowa'a repe.

¹²Toma 'orasa gena-ge, sababu kajahatana enanga 'i rera re walata ngowa'a repe 'aḏi ma'u dadalara riwara.

¹³Mada'a ngowa'a ga'a 'aḏi ngaku Ngoi tau-taunu singadolo ma ḏo-ḏogumu, ananga gena-ge 'aḏi sanga salamata.

¹⁴Re Habari Roanga mangale Soroga ma Pareta, enanga ḏuanga i'a 'i rera re walata toma dungia sitabi donga, la ngowa'a mo-moini ya 'isene, kara Kiamata ma Wangere 'i sapolo.”

¹⁵Yesus dadunu 'o kanau moju, “Dadi wakutu ngini ni oḏi'i ‘Ngowa'a ma Jira ga'a Ma Jou'ongu Madutu 'u emono’ unanga gena-ge 'o made-de'oso toma ngi'i 'ofi-'ofi ga'a Nabi Daniel 'u sinubuata pasala ḏua ('a guna ḇato 'o baca nubuata gena-ge, 'a tailako la-la!),

¹⁶ananga ga'a 'aḏi tegoro toma daeraha Yudea balasu 'aḏi wiḏi toma kie.

¹⁷Ngowa'a ga'a toma wala ma wanata, 'uci awa di'a 'o 'oro 'oru ḇato tai wala ma dara.

¹⁸Ngowa'a ga'a tai guḏa, maḏibo awa di'a 'o 'oro 'ai juba.

¹⁹Toma 'orasa gena-ge, we-were'a—we-were'a remanga lese re ngina-ngina ga'a 'aḏi sisusu moju manga ngowa kiau, ananga gena-ge manga 'ahu kangela masala!

²⁰Manyiata ra Ma Jou'ongu Madutu, la awa-awa ngini balasu ni wiḏi na'o besa'a ma 'orasa, bolo Sabata ma wangere.

²¹Toma 'orasa gena-ge, 'i dadi susa re sangisara lamo'o masala ga'a soi moi i'a mai ua 'i dadi nyangu, wakutu ma mulaingi dungia enanga 'i dadi, singadolo toma 'orasa nange-ne, re 'i dadunu riwara.

²²Na'o Ma Jou'ongu Madutu 'a siḇoko'o ua ma 'orasa gena-ge, marai matengo i'a mai ua nga'unu wo 'ahu moju. Mada'a Unanga 'a siḇoko'o ma 'orasa gena-ge sababu Unanga 'o dadalara 'ai ngowa-ngowa'a ga'a Unanga ro cumutu.”

²³“Toma 'orasa gena-ge, na'o 'age rema ngowa'a matengo 'o kanau ra ngini, ‘Oḏi'i 'O Kristus unanga 'ane!’ bolo, 'age rema ngowa'a matengo ḏi'i 'o kanau ra ngini ‘Oḏi'i Unanga da'a!’ awa ni ngaku ngowa'a gena-ge.

²⁴Sababu kristus-kristus sa-sakala re nabi-nabi sa-sakala ḏuanga i'a 'aḏi sapolo. Ananga gena-ge 'aḏi 'a'a 'ori i'a hera-heranga re didina'o-didina'o heranga di'a sihaga ngowa'a repe re na'o nyengara ananga 'aḏi sihaga Ma Jou'ongu Madutu 'ai 'umata, mada'a gena-ge 'i yoḏu'u!

²⁵'Eli-'elingi! 'Ori i'a gena-ge 'i dadi nyangu, mada'a Ngoi ta siajele siḏa ḏua ra ngini.

²⁶Dadi na'o ngowa'a 'aḏi kanau ra ngini, ‘Oḏi'i 'O Kristus, Unanga da'a toma ngi'i baulaco,’ awa ngini si'a. Bolo na'o ananga 'aḏi kanau, ‘Oḏi'i Unanga 'o magogono 'ane toma kamara,’ awa ngini na'u ngaku.

²⁷Sababu Ngoi, Manusia ma Ngowa'a Nau'u, dadunu To sapolo moju ma tero sa'olo ḇeḇelanga pelete'e toma wangere ma la'o, mada'a enanga ma lalaki 'i lapasa ngadolo toma wangere ma soḏu.

²⁸Ngowa'a mo-moini 'aḏi waro na'o Ngoi dadunu to sapolo moju. Gena-ge ma tero sa'olo ngowa'a 'aḏi waro ngi'i le'a ḇato rema mayeti, sababu 'aḏi oḏi'i 'age rema namo-namo ga'a 'i 'omo-'omo mayeti.”

²⁹Yesus 'o kanau moju, “Ti'ara ua susa re sangisara toma 'orasa gena-ge togumu i'a, wangere ma la'o 'i dadi hafu-hafu re ngara 'i taḏusu. Re mumuḏungu toma diwanga ḏuanga i'a 'i matai turono, re kuasa-kuasa toma ngawa-ngawa ḏuanga i'a 'i matai kaco.

³⁰Gena ḏua, didina'o rimoi 'i waiti toma diwanga ga'a ma ngale: Ngoi, Manusia ma Ngowa'a Nau'u, dadunu to sapolo moju da'u diwanga tala. Toma 'orasa gena-ge bangsa-bangsa toma dungia sitabi donga, ananga 'aḏi rerese ma gaḏi, sababu ngowa'a mo-moini gena-ge 'aḏi oḏi'i Ngoi, Manusia ma Ngowa'a Nau'u, To sapolo da'u diwanga tala toma kakamo Rari kuasa lamo'o re Rari mulia lamo'o.

³¹Gena ḏua, ngowa-ngowa'a 'aḏi isene terompet ma iḏingi lai siḏi. Ḏua Ngoi, Manusia ma Ngowa'a Nau'u, To soma'a 'Ari mala'ekata-mala'ekata 'aḏi lomu 'Ari 'umata ga'a Ma Jou'ongu Madutu ya'u cumutu ḏua toma dungia ḇuḇuku rata, toma diwanga ma didiki singadolo toma diwanga ma didiki.”

³²“Totoho la-la do-doto'o mangale ate 'ara: Na'o ma umanga ma 'alusu 'i 'ijo 'i supu ju'uda, ngini ni waro gena-ge 'i dadi nana'o 'orasa ngogoro ri co-cori.

³³So'o gena ḏi'i na'o ngini ni oḏi'i mo-moini ga'a Ngoi ta siajele ḏua enanga 'i dadi, ngini na waro Ngoi 'ari ta-sapolo ma 'orasa ri co-cori madutu.

³⁴Ni ngaku mode-mode'e 'Ari demo-demo nena-ne: Wakutu enanga gena-ge 'i dadi, ngowa'a ga'a 'aḏi 'ahu toma 'orasa nena-ne, 'aḏi sengene mo-moini nyangu.

³⁵Diwanga re dungia ḏuanga i'a 'i iranga, mada'a Ngoi 'ari demo-demo 'i iranga ua kasingado-ngadolo i'a.”

³⁶“Mada'a matengo i'a mai ua 'o waro ma wangere ngau, bolo ca'olo muḏuo: Mala'ekata-mala'ekata toma soroga mai ya waro ua, re Ma Jou'ongu Madutu 'ai Ngowa'a Nau'u masiretene mai 'A waro ua; pa'i 'Ari Ḇaḇa masiretene ḇato 'A waro.

³⁷Wakutu Ngoi, Manusia ma Ngowa'a Nau'u dadunu To sapolo moju, gena-ge ma tero sa'olo 'oru 'i dadi toma 'orasa nabi Nuh 'ua re 'au wali.

³⁸Wakutu ngu'uisi 'i sapolo nyangu, wangere re lobi'i ngowa-ngowa'a 'aḏi oromo re ka'e re 'aḏi ma'u molo'ara sa'olo biasa singadolo Nuh 'o osama toma kapala ma dara.

³⁹Pa'i wakutu ananga mo-moini ya basono ḇanyo ri romanga, ananga gena-ge aro sahe 'oru ga'a 'i dadi. So'o gena ḏi'i ḏuanga i'a 'i dadi na'o Ngoi, Manusia ma Ngowa'a Nau'u dadunu to sapolo moju.

⁴⁰Toma 'orasa gena-ge, na-nau'u nga muḏiḏi 'aḏi munara toma guḏa: Matengo ga'a 'o mete'e Ngoi 'o sanga salamata mada'a matengo ḏi'i 'o mete'e Ngoi ua 'o sanga salamata ua.

⁴¹We-were'a nga muḏiḏi 'aḏi mamete'e gulinga gandum: Matengo ga'a mo mete'e Ngoi mo sanga salamata mada'a matengo ḏi'i mo mete'e Ngoi ua mo sanga salamata ua.

⁴²Sababu gena-ge, ma'istiari sababu ngini ni waro ua ngau Ma Jou ḏuanga i'a dadunu 'o sapolo moju.

⁴³'Eli-'elingi nena-ne: Na'o wala ma dutu 'o waro ca'olo muḏuo, lobi'i gena-ge ngowa'a to-tori'i 'o sapolo, wala ma dutu 'o otu ua, la ngowa'a to-tori'i osama yoḏu'u tai wala.

⁴⁴Sababu gena-ge, ngini nena-ne ḏi'i balasu ni maḏu-ḏuanga ḏua sababu Ngoi, Manusia ma Ngowa'a Nau'u, 'Ari ta-sapolo moju ma 'orasa ni masiwaro ua.”

⁴⁵Yesus dadunu 'o kanau, “ 'Age rema budaka matengo i'a ga'a 'o pahe re lao cufala sidagi 'ai munara singadolo ma tuanga 'o sitede 'u dadi sae'e tai falalomu sigolona di'a 'o pula'a ngo-ngoromo toma falalomu mo-moini wange moi-wange moi.

⁴⁶Bara'utungu masala budaka gena-ge na'o ma tuanga 'o maḏibo 'o sanga i'a unanga 'a siḏagi 'ai munara.

⁴⁷Ni ngaku mode-mode'e 'Ari demo-demo nena-ne: Tuanga gena-ge ḏuanga i'a 'o siparatada 'ai 'ori i'a rana mo-moini tai budaka gena-ge.

⁴⁸Mada'a na'o budaka gena-ge 'ai 'akala re sinyingara 'i cira re unanga 'o kanau tai 'akala re sinyingara ma dara,

⁴⁹‘ 'Ari tuanga ma di'ara moju kara unanga 'o maḏibo.’ Ḏua unanga mulaingi ca'olo 'ai ḏagilomu budaka-budaka re unanga 'o oromo re 'o ka'e marimoi reo ngowa-ngowa'a 'etolo.

⁵⁰Ḏua 'ai tuanga gena-ge 'o maḏibo toma 'orasa ca'olo muḏuo re wangere 'oru, ga'a budaka masiwaro ua.

⁵¹Re budaka gena-ge sanga ca'olo singadolo dadi cira tai tuanga re 'o sanga upa'a toma ngi'i di'a ngowa'a munafiki. Toma ngi'i gena-ge, ananga ḏuanga i'a ya rerese ma gaḏi, re ya doiti ma sangisara.”