Read Sahu Matias 25 Bible Online

Matias 25 - Sahu bible

Matias 25

¹“Toma 'orasa gena-ge wakutu Ngoi, Manusia ma Ngowa'a Nau'u, dadunu To sapolo moju, Soroga ma Pareta[60] ma tero sa'olo 'ade-'ade nena-ne: Geri molo'ara were'a 'ami me-mete'e 'o mosolese nga nyagi moi, matengo re matengo remanga 'oboro, 'aḏi tagi totoma geri molo'ara na-nau'u.

²Ananga nga mutoara ga'a ngowa'a haga re ananga nga mutoara ḏi'i ga'a ngowa'a pahe.

³Mosolese ma haga nga mutoara, 'aḏi gasa 'oboro, mada'a ma goroho 'i pai'i ua.

⁴Mosolese ma pahe nga mutoara, 'aḏi gasa 'oboro rema ma goroho pai-pai'i.

⁵Geri molo'ara na-nau'u 'o sapolo lati, dadi mosolese mo-moini gena-ge 'aḏi kakadungu, kara 'aḏi otu.

⁶'Utu golona i'a, ananga gena-ge 'aḏi 'isene ngowa'a 'aḏi poa'a, ‘Geri molo'ara na-nau'u 'o sapolo. Ino ngene ma'u sanga unanga!’

⁷Ḏua mosolese nga nyagi moi gena-ge 'aḏi momi'i, re ya sidodahe manga 'oboro.

⁸Mosolese-mosolese haga 'aḏi kanau toma mosolese-mosolese pahe, ‘Ninga goroho pula'a ra ngomi ceka'a i'a, sababu minga 'oboro sa'i ri sengene.’

⁹Mosolese-mosolese pahe 'aḏi sangoro, ‘Gena-ge 'i yoḏu'u, sababu awa-awa ngene wo masingadolo ua mo-moini. Tagi ni tibo toma toko.’

¹⁰Ḏua mosolese ma haga gena-ge, 'aḏi tagi tibo manga goroho. Mada'a wakutu ananga 'aḏi tagi-tagi, geri molo'ara na-nau'u 'o sapolo. Mosolese-mosolese ga'a 'aḏi pahe, 'aḏi ḏu-ḏuanga ḏua, 'aḏi osama mamete'e reo geri molo'ara na-nau'u toma laya ma ngi'i, re ma ngalana ngowa'a ya kuci!

¹¹Togumu i'a mosolese-mosolese ma haga 'aḏi ngadolo. Ananga 'aḏi kanau, ‘Tuanga, tuanga, na welanga ma ngalana, la ngomi mi osama.’

¹²Mada'a geri molo'ara na-nau'u 'o sangoro, ‘Ni ngaku 'Ari demo nena-ne: Ngoi tunu nana'o ngini ua!’ ”

¹³Ḏua Yesus 'a siḏo-ḏogumu 'ai 'ade-'ade so'o ne: “Sababu gena-ge ni ma'istiari, sababu ngini ni waro ua ma wangere bolo ma 'orasa, Ngoi to sapolo.”

¹⁴“Toma 'orasa gena-ge wakutu Ngoi, Manusia ma Ngowa'a Nau'u, dadunu To sapolo moju, Soroga ma Pareta ma tero sa'olo 'ade-'ade nena-ne: Na-nau'u matengo mau tagi toma giḏanga. Dadi, unanga 'o 'aro'o 'ai budaka-budaka, re 'a siparatada 'ai 'ori i'a rana ra ananga.

¹⁵Unanga 'o pula'a tai budaka-budaka mete'e ananga manga dinga'unu. Toma ngowa'a matengo unanga 'o pula'a pipisi guraci ma ngai cala romotoa. Ra matengo ḏi'i unanga 'o pula'a pipisi guraci ma ngai cala ḏiḏi. Re matengo moju unanga 'o pula'a pipisi guraci ma ngai cala moi, kara unanga 'o tagi.

¹⁶Budaka ga'a 'o sanga pipisi guraci ma ngai cala romotoa, jau-jau unanga 'o tagi re 'a sikololo singadolo unanga 'o sanga ma 'utungu pipisi guraci ma ngai cala romotoa ḏi'i.

¹⁷So'o gena ḏi'i, budaka ga'a 'o sanga pipisi guraci ma ngai cala ḏiḏi, unanga 'o sanga ma 'utungu pipisi guraci ma ngai cala ḏiḏi ḏi'i.

¹⁸Mada'a budaka ga'a 'o sanga pipisi guraci ma ngai cala moi, unanga 'o tagi re 'o tuso'o tana'a, 'a gogono tuanga 'ai pipisi.

¹⁹Togumu i'a ma di'ara ino, tuanga gena-ge 'o ḏibo re ya'u sano mangale pipisi ga'a unanga 'o siparatada ḏua ra ananga.

²⁰Budaka ga'a ro dawongo pipisi guraci ma ngai cala romotoa 'o sapolo re 'o pula'a pipisi ma ngai cala nyagi moi tai tuanga. Unanga 'o kanau, ‘Tuanga no siparatada pipisi guraci ma ngai cala romotoa ra ngoi, oḏi'i ngoi ta sikololo re ta sanga ma 'utungu pipisi guraci ma ngai cala romotoa ḏi'i.’

²¹'Ai tuanga 'o kanau, ‘Rousu, ngana budaka ma la-la re no setia! Ngana reno dadi ngowa'a cufala rema 'ori i'a i'a pa'i ceka'a ua. Dadi Ngoi ḏuanga i'a tini siparatada 'ori i'a i'a lebe lamo'o ma repe moju. Ino osama re no tegoro marimoi ra ngoi, re no basono 'ari sa-sanangi!’

²²Ḏua budaka ga'a ro dawongo pipisi guraci ma ngai cala ḏiḏi 'o sapolo re 'o kanau, ‘Tuanga, no siparatada pipisi guraci ma ngai cala ḏiḏi ra ngoi, oḏi'i ngoi ta sikololo re ta sanga ma 'utungu pipisi guraci ma ngai cala ḏiḏi ḏi'i.’

²³'Ai tuanga 'o kanau, ‘Rousu, ngana budaka ma la-la re no setia! Ngana reno dadi ngowa'a cufala rema 'ori i'a i'a pa'i ceka'a ua. Dadi Ngoi ḏuanga i'a tini siparatada 'ori i'a i'a lebe lamo'o ma repe moju. Ino osama re no tegoro marimoi ra ngoi, re no basono 'ari sa-sanangi!’

²⁴Ḏua, budaka ga'a ro dawongo pipisi guraci ma ngai cala moi 'o sapolo, re 'o kanau, ‘Tuanga, ngoi to waro 'ani 'akala re sinyingara lai te'e. Ngana ma tero sa'olo ngowa'a 'aḏi maso'ana ua, mada'a no 'oro enanga ma hasili, re no lomu sowo'o toma guḏa ga'a tuanga na siare gisisi ua.

²⁵Ngoi to mojongo. Dadi ngoi ta gogono 'ani pipisi toma tana'a ma dara. Ne tuanga 'ani pipisi!’

²⁶'Ai tuanga 'o kanau, ‘Ngana budaka ma jira ga'a no busenge! Na'o ngana rena ta'ajiri mangale ngoi to so'ana ua mada'a to 'oro ma hasili re lomu sowo'o toma guḏa ga'a ta siare gisisi ua!

²⁷Na'o so'o gena, i'a sa'olo ngana na sigare ua ngoi 'ari pipisi toma bank, la wakutu ngoi toma ḏibo, ta sanga 'ari pipisi re enanga ma rete!

²⁸Sababu gena-ge, 'oro 'ari pipisi ra unanga re pula'a toma budaka ga'a rai pipisi guraci ma ngai cala nyagi moi.

²⁹Sababu 'a guna ḇato ro sanga repe, Ngoi ḏuanga ta sidogo ḏi'i singadolo pai-pai'i. Mada'a 'a guna ḇato 'o sanga ua; 'oru ḇato, kalaha unanga ra sanga pa'i ceka'a ua ḇato, gena-ge ḏi'i mai sanga 'oro![61]

³⁰Re budaka ga'a ma faeda 'i cua gena-ge, sanga upa'a toma ngi'i hafu-hafu toma ḏuḏunu. I'a da'a, ngowa-ngowa'a ḏuanga i'a 'aḏi rerese ma gaḏi re ya doiti ma sangisara!’ ”

³¹“Wakutu Ngoi, Manusia ma Ngowa'a Nau'u To sapolo moju sa'olo 'Olana rari kabasarana lamo'o, mala'ekata mo-moini 'aḏi mete'e Ngoi, re Ngoi ḏuanga i'a to tegoro tari ḏe-ḏegoro ga'a 'i mulia.

³²Bangsa mo-moini toma dungia ma dara 'aḏi malomu ra Ngoi 'ari biono. Ḏua Ngoi ta'u siwo-wola ngowa-ngowa'a gena-ge dadi balangu romoḏiḏi, ma tero sa'olo sowohi siwo-wola doba reo 'abingi.

³³Ngowa'a ga'a 'aḏi mete'e Ma Jou'ongu Madutu 'ai 'akala ma mau Ta'u lomu Tari giama ma kuwiḏa, re ngowa'a ga'a mete'e ua Ma Jou'ongu Madutu 'ai 'akala ma mau Ta'u lomu Tari giama ma kuḇali.

³⁴Togumu i'a, Ngoi 'Olana gena-ge, to kanau toma ngowa-ngowa'a Tari giama ma kuwiḏa, ‘Ino, ngini mo-moini ga'a 'Ari Ḇaḇa renu sibarakati. Ni osama toma Soroga ma Pareta ga'a Ngoi ta sidodahe ḏua di'a ngini wakutu dungia 'i dadi nyangu.

³⁵Sababu wakutu Ngoi to sawini, ngini rini pula'a 'omo. Ngoi 'ari camala dudungu, ngini pula'a ka'e. Kalaha ngoi ngowa'a tagi-tagi ino, ngini dawongo Ngoi taninga wala.

³⁶Ngoi 'ari pakeanga 'i cua, ngini rini pula'a pakeanga ra Ngoi. Ngoi to siḏi, ngini rini kadiarata Ngoi. Ngoi toma bui ma dara, ngini rini sapolo tutumu Ngoi.’

³⁷Ḏua ngowa'a loasa re banari gena-ge 'aḏi kanau, ‘Ngomi mi oḏi'i Ma Jou no sawini 'au ngau, ḏua ngomi mi pula'a 'omo, bolo Ma Jou 'ani camala dudungu, ḏua ngomi mi pula'a ka'e.

³⁸Ngomi oḏi'i Ma Jou sa'olo ngowa'a tagi-tagi ino tola'a taminga wala 'au ngau, kara ngomi dawongo Ma Jou taminga wala? 'Au ngau Ma Jou 'ani pakeanga 'i cua, ḏua ngomi mi pula'a pakeanga ra Ma Jou?

³⁹Ngomi oḏi'i Ma Jou no siḏi 'au ngau kara ngomi kadiarata Ma Jou; bolo Ma Jou no osama bui 'au ngau, ḏua ngomi tutumu?’

⁴⁰Re Ngoi, 'Olana gena-ge 'o sangoro, ‘Ni ngaku mode-mode'e Ngoi 'Ari demo nena-ne: 'Oru ḇato ngini reni 'a'a di'a riono 'Ari ioronongoḏu nena-ne ga'a ngowa'a mapake ua, Ngoi ta 'oro ino ma tero ḇato sa'olo ngini na riono Ngoi!’

⁴¹Gena ḏua, Ngoi 'Olana gena-ge to kanau toma ngowa-ngowa'a Tari kuḇali, ‘Ngini ngowa'a ma jira, ni tagi. Ni osama toma u'u ma lejanga ga'a kama sora-sora ua ga'a sidodahe ḏua di'a 'Iblisi re enanga ma mala'ekata-mala'ekata!

⁴²Sababu wakutu Ngoi to sawini, ngini pula'a oromo ua. Wakutu Ngoi 'ari camala dudungu, ngini pula'a ka'e ua.

⁴³Ngoi ngowa'a tagi-tagi ino, ngini dawongo Ngoi ua taninga wala. Ngoi 'ari pakeanga 'i cua, ngini pula'a pakeanga ra Ngoi ua. Ngoi to siḏi re to osama bui, ngini tutumu Ngoi ua.’

⁴⁴Ananga 'aḏi kanau ḏi'i, ‘ 'Au ngau ngomi oḏi'i Ma Jou no sawini, bolo 'Ani camala dudungu, bolo sa'olo ngowa'a tagi-tagi ino, bolo 'Ani pakeanga 'i cua, bolo No siḏi re No osama bui, ḏua ngomi riono Ma Jou ua?’

⁴⁵Re Ngoi, 'Olana gena-ge ta sangoro, ‘Ni ngaku mode-mode'e Ngoi 'ari demo nena-ne: Wakutu ngini ni oḏu'u riono ngowa-ngowa'a ma pake ua nena-ne, ma tero ḇato sa'olo ngini ni oḏu'u riono Ngoi.’

⁴⁶Ḏua ngowa'a gena-ge ga'a Tari kuḇali, ananga 'aḏi tagi toma ngi'i di'a sanga hukumu kasingado-ngadolo i'a. Mada'a ngowa'a loasa re banari ga'a Tari kuwiḏa, ananga gena-ge 'aḏi tagi toma ngi'i lelegu di'a sanga 'ahu kasingado-ngadolo i'a.”