Read Sahu Matias 26 Bible Online

Matias 26 - Sahu bible

Matias 26

¹Wakutu Yesus 'o doto'o 'ori i'a mo-moini gena-ge togumu ḏua, Unanga 'o kanau Tai me-mete'e,

²“Ngini ni waro, wangere ḏiḏi moju Paskah ma Wangere 'i ngadolo. Re Ngoi, Manusia ma Ngowa'a Nau'u sipula'a Tari lawana di'a sisalib.”

³Toma 'orasa gena-ge 'imam-'imam ma sae'e re Yahudi manga bi-biri'i 'aḏi malomu toma 'imam 'agung Kayafas 'ai kadato.

⁴Ananga 'aḏi mafakati, la 'aḏi cako'o Yesus sigo-gogoro kara 'U sisengene Unanga.

⁵Mada'a ananga 'aḏi kanau, “Awa ngene wa si'a'a toma 'orasa Paskah ma Wangere, awa-awa toma rayata manga sigolona 'i dadi kaco.”

⁶Wakutu Yesus da'a toma gamu Betania, Unanga 'o tagi ra Simon 'ai wala, unanga gena-ge ma siḏa 'o sanga si-siḏi 'eno'o.

⁷Toma 'orasa gena-ge, we-were'a matengo mo sapolo ra Yesus, munanga mo gasa bou-bounu botol rimoi. Bou-bounu gena-ge ma ijana hali madutu. Wakutu Yesus 'o majoreke oromo moju, we-were'a gena-ge mo masiba-ba'ala bou-bounu gena-ge ra Unanga 'ai sae'e.

⁸Wakutu Yesus 'ai me-mete'e ya oḏi'i i'a so'o gena-ge, ananga 'aḏi dadi porata re 'aḏi kanau, “Ma la 'oru munanga mo sibodiga 'ami bou-bounu simoini?

⁹Na'o bo-bounu gena-ge mawu'unu ma ijana lai hali, kara ma pipisi na pula'a toma ngowa-ngowa'a ma dinga'unu ua!”

¹⁰Yesus 'a waro ananga manga fikirana. Dadi Unanga 'o kanau, “I'a sa'olo ngini nimi sikangela 'ami 'akala re sinyingara?! Munanga mo 'a'a 'ori i'a ma la-la di'a mo silamo'o Ngoi.

¹¹Ngowa'a ma dinga'unu ua 'age taninga sigolona tau-taunu, mada'a Ngoi 'age ra ngini tau-taunu ua.

¹²Wakutu munanga mo siba-ba'ala bou-bounu gena-ge ra Ngoi, munanga sidodahe 'Ari lese di'a ḏuanga i'a sipalihara Ngoi.

¹³Ni ngaku mode-mode'e Ngoi 'ari demo nena-ne: Toma ngi'i le'a ḇato ngowa'a 'aḏi singadolo Habari Roanga, we-were'a nena-ne 'ami ga'a ma la-la, ngowa'a ḏuanga i'a ya sijarita ḏi'i, la sidaioranga munanga awa.”

¹⁴Togumu i'a, ngowa'a matengo ra Yesus 'ai me-mete'e nga nyagi moi re nga muḏiḏi manga sigolona, ga'a silomanga Yudas Iskariot, unanga gena-ge 'o tagi toma 'imam-'imam ma sae'e.

¹⁵Unanga 'o sano ra ananga, “Na'o ngoi to sipula'a Yesus ra ngini, ngini ḏuanga i'a ni pula'a 'oru ra ngoi?” Dadi ananga ya roimi manga pipisi salaka guḏi ro'ange, kara ananga 'aḏi pula'a ra unanga.

¹⁶Dadi, mulaingi toma 'orasa gena-ge unanga disa donga, la sipula'a Yesus ra ananga.

¹⁷Toma wangere ma mulaingi toma Wangere Roti Kama Ragi Ua, Yesus 'ai me-mete'e 'aḏi sapolo ra Unanga. Ananga 'aḏi sano, “Jou no mau toma ngi'i le'a ngomi mi sidodahe ngo-ngoromo Paskah?”

¹⁸Yesus 'a sangoro, “Ngini ni tagi toma limau ma dara. I'a da'a, ngini ni ma'u sanga matengo re ni siajele ra unanga, ‘Minga Guru 'o kanau: 'Ai 'orasa 'i ngadolo ḏua. Unanga re ngomi 'Ai me-mete'e mau mi silamo'o Paskah ma Wangere ra ngana 'ani wala.’ ”

¹⁹Dadi 'Ai me-mete'e ya si'a'a ma tero sa'olo Yesus 'o soma'a. Ananga 'aḏi tagi ya sidodahe ngo-ngoromo Paskah gena-ge.

²⁰Wakutu lobi'i 'i ngadolo ḏua, Yesus re 'Ai me-mete'e nga nyagi moi re nga muḏiḏi ananga 'aḏi majoreke 'aḏi oromo.

²¹Re wakutu ananga 'aḏi oromo moju, Yesus 'o kanau, “Ni ngaku mode-mode'e Ngoi 'Ari demo-demo nena-ne: 'Age rema ngowa'a matengo taninga sigolona ḏuanga i'a 'o sipula'a Ngoi Tari lawana.”

²²Wakutu ananga ya 'isene i'a so'o gena, manga 'akala re sinyingara 'i kangela. Dadi matengo re matengo 'aḏi sano ra Yesus, “Ma Jou, tantu ḇato ngoi ua?!”

²³Yesus 'a sangoro, “Ngowa'a ga'a sitono 'ai roti toma sawo'o ma dara mamete'e ra Ngoi, unanga gena-ge ḏuanga i'a 'o sipula'a Ngoi Tari lawana.

²⁴Mode'e Ngoi, Manusia ma Ngowa'a Nau'u, balasu To sengene, ma tero sa'olo 'i silefo ḏua toma Boku 'Ofi-'Ofi ma dara. Mada'a ngowa'a ga'a sipula'a Ngoi, Manusia ma Ngowa'a Nau'u, unanga gena-ge 'o sanga bahala lamo'o. Jobilaha unanga gena-ge ma ngina mo sibuoro awa ḇato!”

²⁵Ḏua Yudas ga'a ḏuanga i'a 'o sipula'a Yesus 'o kanau, “Guru, tantu ḇato ngoi ua?!” Yesus 'a sangoro, “Mode'e ngana nena-ne!”

²⁶Wakutu ananga gena-ge 'aḏi 'omo moju, Yesus 'a 'oro ma roti re 'O sibere ie murasa ma la ra Ma Jou'ongu Madutu kara 'A poti-poti ma roti gena-ge 'A pula'a Tai me-mete'e re 'O kanau, “ 'Oro re na oromo, nena-ne Ngoi 'ari lese.”

²⁷Gena ḏua, Unanga 'a 'oro ḏi'i ma sawo'o ma dara rema 'anggur re 'O sibere ie murasa ma la ra Ma Jou'ongu Madutu kara 'A sipula'a Tai me-mete'e re 'O kanau, “Ngini mo-moini na ka'e.

²⁸Sababu nena-ne Ngoi 'ari ngaunu ga'a sitotomo Ma Jou'ongu Madutu 'ai jaji. 'Ari ngaunu nena-ne 'i pa'ala di'a singi-ngiranga ngowa'a repe manga ḏosa.

²⁹Ngoi to siajele ra ngini nena-ne: Ngoi ta ka'e riwara 'anggur singadolo 'Ari Ḇaḇa 'ai dungia su-sungi 'i ngadolo, kara Ngoi ta ka'e 'anggur su-sungi mamete'e ra ngini.”

³⁰Gena ḏua, ananga 'aḏi manyanyi rimoi di'a puji re silamo'o Ma Jou'ongu Madutu togumu i'a, ananga 'aḏi tagi toma Polono Zaitun.

³¹Ḏua Yesus 'o kanau i'a Tai me-mete'e, “Toma lobi'i nena-ne, ngini mo-moini ni wiḏi sisoi'i tala Ngoi. Sababu toma Boku 'Ofi-'Ofi ma dara Ma Jou'ongu Madutu 'o kanau so'o ne: ‘Ngoi ḏuanga i'a Tu sisengene sowohi gena-ge, re 'Ai doba-doba matai are.’

³²Mada'a wakutu Ngoi dadunu To 'ahu moju, Ngoi to tagi siḏa toma daeraha Galilea.”

³³Petrus 'o kanau ra Yesus, “Kalaha ananga mo-moini 'aḏi sisoi'i tala Jou, ngoi tini sisoi'i tala yoḏu'u!”

³⁴Yesus 'o sangoro, “No ngaku mode-mode'e Ngoi 'Ari demo-demo nena-ne: Toma utu nange-ne ḏua, namo 'i solene nyangu, ngana masiretene no soloto Ngoi soi ro'ange ḏua.”

³⁵Petrus 'a sangoro, “Kalaha ngoi to sengene mamete'e ra Jou, ngoi tini soloto Jou ua!” Re 'Ai me-mete'e ma lelegu 'aḏi kanau so'o gena ḏi'i.

³⁶Togumu i'a, Yesus re 'Ai me-mete'e ananga 'aḏi tagi toma ngi'i rimoi ma lomanga Getsemani. Toma ngi'i gena-ge Yesus 'o kanau ra ananga, “Ni tegoro 'ane ngomasa moi, Ngoi tagi i'a da'a, di'a to manyiata.”

³⁷Ḏua Yesus 'o sigaro'o pa'i 'a Petrus re 'a Zebedeus 'ai ngowa'a nau'u nga muḏiḏi ḇato, ananga 'aḏi tagi mamete'e ra Unanga. Re Yesus mulaingi basono 'ai 'akala re sinyingara 'i kangela masala.

³⁸Unanga 'o kanau Tai me-mete'e nga ḏu'ange gena-ge, “'Ari 'akala re sinyingara 'i kangela masala singadolo ta basono sa'i to sengene. Totoma 'ane-ne re ni ma'istiari ino.”

³⁹Gena ḏua, Yesus 'o tagi i'a da'a masai'i i'a ra ananga kiḏanga siḏi ua kara 'O ruba paga-pagara 'Ai biono tala toma tana'a, sababu 'Ai 'akala re sinyingara 'i kangela masala, re 'O manyiata ma betongo so'o ne: “ 'Ari Baba, na'o No nyengara sangisara nena-ne Na silalo'o ra Ngoi. Mada'a awa mete'e Ngoi 'ari mau, ḏuga-ḏuga mete'e Baba 'ani mau ḇato.”

⁴⁰Togumu i'a, Yesus 'o maḏibo i'a Tai me-mete'e nga ḏu'ange re 'O sanga i'a ananga 'aḏi otu. Unanga 'o kanau ra Petrus, “Pa'i jam rimoi ḇato ngini nga'unu ua ni matahana ma'istiari mamete'e ra Ngoi?!

⁴¹Ni ma'istiari re ni manyiata, la awa ngini sanga bo-baja. Mode'e ninga roh mau 'a'a 'ori i'a ma banari mada'a ngini ni nga'unu ua, sababu ngini pai'i manusia ḇato dadi ni lamahana.”

⁴²Soi moi moju, Yesus 'o tagi 'o manyiata ma betongo so'o ne: “'Ari Baba na'o sangisara nena-ne Ngoi balasu ta basono re silalo'o ra Ngoi 'i yoḏu'u, sieanga ḇato Baba 'ani mau 'i dadi.”

⁴³Togumu i'a, Yesus dadunu 'o maḏibo i'a ra ananga re 'O sanga i'a ananga 'aḏi otu moju, sababu 'aḏi kakadungu siḏi woḏi.

⁴⁴Soi moi moju, Unanga ya'u sisoi'i tala ananga re 'O tagi di'a manyiata ma soi ro'ange ma betongo ma tero sa'olo 'au nange-ge.

⁴⁵Gena ḏua, Yesus dadunu maḏibo i'a Tai me-mete'e nga ḏu'ange re 'O kanau, “Ngini ni mangomasa re ni otu moju?! Oḏi'i ma 'orasa 'i ngadolo ḏua, Ngoi, Manusia ma Ngowa'a Nau'u sipula'a toma ngowa'a baraḏosa.

⁴⁶Momi'i, ino ngene wo tagi! Oḏi'i! Unanga ga'a 'o sipula'a Ngoi toma ngowa'a baraḏosa, unanga gino!”

⁴⁷Wakutu Yesus 'o ka-kanau moju, 'a Yudas 'o sapolo, unanga gena-ge 'o osama nyo-nyoimi ra Yesus 'ai me-mete'e nga nyagi moi re nga muḏiḏi. Re ngowa'a manga repe 'aḏi sapolo mamete'e ra Yudas, 'aḏi gasa manga samaranga re bu-butulu. Ananga gena-ge 'imam-'imam ma sae'e re Yahudi manga bi-biri'i ya'u soma'a.

⁴⁸Nyangu moju, 'a Yudas 'o pula'a nana'o rimoi ra ananga re 'o kanau, “Ngowa'a ga'a ngoi tu dume, Unanga gena-ge ngini nu cako'o!”

⁴⁹Re wakutu Yudas 'o sapolo, unanga 'o jau i'a ra Yesus re 'o kanau, “Tabea, Rabi!”[62] Gena ḏua, unanga 'o dume Yesus 'ai bobongolo.

⁵⁰Yesus 'a sangoro, “Wolo, si'a'a ḇato 'oru ga'a ngana mau na si'a'a.”[63] Ḏua ngowa'a repe 'aḏi jau i'a cako'o 'a Yesus.

⁵¹'Age rema ngowa'a matengo ra Yesus 'ai me-mete'e manga sigolona, unanga gena-ge 'a tuono 'ai samaranga toma sarumu, kara 'a cafa 'imam 'agung 'ai budaka 'ai ngau'u singadolo 'i tola'a!

⁵²Yesus 'o kanau Tai me-mete'e matengo gena-ge, “Dadunu na singosama 'ani samaranga toma sarumu, sababu ngowa'a mo-moini ga'a 'aḏi pake samaranga, ananga ḏuanga i'a ngowa'a ya'u sisengene reo samaranga ḏi'i.

⁵³'Oru ngana no waro ua mangale na'o Ngoi to golo'o ri-riono tari Ḇaḇa, Unanga jau-jau 'o siḏingoto pai'i pasukana[64] mala'ekata nga nyagi moi re nga muḏiḏi di'a riono Ngoi?!

⁵⁴Mada'a na'o so'o gena, tantu ḏua 'i dadi ua 'oru ga'a ri sinubuata ḏua toma Boku 'Ofi-'Ofi ma dara mangale balasu 'i dadi ma tero so'o nena-ne!”

⁵⁵Toma 'orasa gena-ge, Yesus 'o kanau toma ngowa'a kawasa gena-ge, “I'a sa'olo ngini ni sapolo re ninga samaranga re bu-butulu di'a ni cako'o ngoi ma tero sa'olo ngowa'a ma jira?! Ma wangere ma jelele i'a, Ngoi to tegoro di'a to doto'o ra Ma Jou'ongu Madutu 'ai Wala, mada'a ngini rini cako'o Ngoi ua!

⁵⁶Mada'a balasu so'o nena-ne ḏua, la 'i mete'e 'oru ga'a nabi-nabi ya silefo pasala ḏua toma Boku 'Ofi-'Ofi ma dara.” Togumu i'a, 'Ai me-mete'e mo-moini matai wiḏi sisoi'i tala Unanga.

⁵⁷Ngowa'a ga'a 'aḏi cako'o Yesus 'aḏi gasa Unanga toma 'imam 'agung Kayafas 'ai wala. Toma ngi'i gena-ge guru-guru 'agama re Yahudi manga bi-biri'i raḏi malomu.

⁵⁸Petrus, unanga 'o tu-tuu'u toma giḏanga ra Yesus singadolo toma 'imam 'agung 'ai wala ma soana. I'a da'a, unanga 'o osama toma soana re 'o tegoro mamete'e reo ngowa'a jaga. Unanga mau disa waro mo-moini 'oru ga'a ananga 'aḏi 'a'a ra Yesus.

⁵⁹'Imam-'imam ma sae'e re Mahkamah 'Agama mo-moini 'aḏi disa sakisi sa-sakala, la 'aḏi singe-ngeta'a hukumu sengene ra Yesus.

⁶⁰Kalaha 'age rema sakisi sa-sakala manga repe, ananga 'aḏi sanga 'ai sala dola moi i'a mai ua, ga'a 'i patasa Unanga sihukumu sengene. Ma ḏo-ḏogumu ngowa'a nga muḏiḏi, i'a toma biono.

⁶¹Ananga 'aḏi kanau, “Ngowa'a nena-ne 'o kanau, ‘Ngoi nyengara Ta siruba Ma Jou'ongu Madutu 'Ai wala, re toma wangere ro'ange nyengara Ta simomi'i.’ ”

⁶²Ḏua 'imam 'agung 'o made'oso re 'o kanau ra Yesus, “I'a sa'olo Ngana no sangoro ua ananga manga gamamu gena-ge ra Ngana?”

⁶³Mada'a Yesus pa'i 'o masiogoro ḇato. Soi moi moju 'imam 'agung 'o sano ra Yesus, “Ra Ma Jou'ongu Madutu ga'a 'ahu-'ahu, sikanau ino ra ngomi mode-mode'e Ngana nena-ne 'O Kristus, Ma Jou'ongu Madutu 'ai Ngowa'a Nau'u, bolo ua?”

⁶⁴Yesus 'a sangoro, “Ma tero sa'olo ngana no kanau. Mada'a 'elingi 'Ari demo nena-ne: ngini ḏuanga i'a ni oḏi'i Ngoi, Manusia ma Ngowa'a Nau'u, To tegoro ra Ma Jou'ongu Madutu 'ai giama ma kuwiḏa i'a, Unanga gena-ge 'Ai kuasa ma pari cua. Re Ngoi to sapolo ra Ma Jou'ongu Madutu toma kakamo ma re'u da'u diwanga tala!”

⁶⁵Gena ḏua, 'imam 'agung 'a 'acingi 'ai juba masiretene sababu 'o porata re 'o kanau, “Unanga 'o je-jengere Ma Jou'ongu Madutu sababu Unanga 'o kanau ‘Unanga re Ma Jou'ongu Madutu marimoi!’ Dadi paralu riwara sakisi. Nange-ne ngini mo-moini na 'isene masiretene 'Ai demo-demo ga'a sije-jengere Ma Jou'ongu Madutu.

⁶⁶Dadi ninga 'akala ma sanga sa'olo?” Ananga 'aḏi sangoro, “Unanga balasu 'o sanga hukumu sengene.”

⁶⁷Ḏua, ananga ya obi'i 'Ai biono re 'U tutu'u. Re 'age ḏi'i rema ngowa'a ma lelegu 'U sata,

⁶⁸re 'aḏi kanau, “Na'o Ngana 'O Kristus, tai'i no disa waro re no siajele ra ngomi 'a guna ni sata Ngana!”

⁶⁹Wakutu Petrus 'o tegoro moju toma ḏuḏunu da'a soana, falalomu we-were'a matengo mo sapolo re mo kanau ra unanga, “Ngana nena-ne ḏi'i no mamete'e ra Yesus ngowa'a Galilea gena-ge!”

⁷⁰Mada'a Petrus 'o masoloto ra ananga manga biono mo-moini re 'o kanau, “Ngoi ta waro ua 'ani maksudu 'oru!”

⁷¹Gena ḏua, unanga 'o tagi toma soana ma ngalana. Ḏua falalomu we-were'a ma lelegu mo oḏi'i 'a Petrus re mo kanau toma ngowa-ngowa'a ga'a 'aḏi tegoro 'age, “Ngowa'a matengo nena-ne ḏi'i 'o mamete'e ra Yesus toma limau Nazaret.”

⁷²Ḏua Petrus 'o masoloto moju re 'o masisasi, “Mode-mode'e, ngoi to nana'o ngowa'a gena-ge ua!”

⁷³Ti'ara mai nyangu, ngowa'a ga'a 'aḏi made-de'oso toma ngi'i gena-ge 'aḏi sapolo ra Petrus re 'aḏi kanau, “Tantu ḏua, ngana ḏi'i no osama nyo-nyoimi ra ananga, sababu 'ani demo ma lug̱o ma tero sa'olo ngowa'a Galilea.”

⁷⁴Ḏua, 'a Petrus mulaingi 'o masisasi re 'o kanau, “Ngoi to nana'o ngowa'a gena-ge ua!” Gena ḏua, namo 'i solene.

⁷⁵Re 'a Petrus 'a si'elingi ie 'oru ga'a nange-ge Yesus ro kanau ra unanga, “ 'O namo 'i solene nyangu mada'a ngana reno soloto Ngoi soi ro'ange.” Petrus 'o tagi re 'o supu toma soana gena-ge, re 'o 'aḏi jomo-jomo.