Read Sahu Matias 27 Bible Online

Matias 27 - Sahu bible

Matias 27

¹Da-daini i'a moju, 'imam ma sae'e re Yahudi manga bi-biri'i, ananga mo-moini 'aḏi masigaro'o re 'aḏi mafakati mangale Yesus balasu 'o sengene.

²Ananga 'aḏi piri'u Unanga 'ai giama, kara 'U sigasa re 'U sipula'a ra Pilatus, gubernur daeraha Yudea.

³Wakutu 'a Yudas ga'a sipula'a Yesus di'a 'Ai lawana, 'a waro mangale Yesus sanga hukumu sengene unanga 'o matuduba masala. Dadi unanga 'a siḏibo pipisi salaka guḏi ro'ange gena-ge toma 'imam-'imam ma sae'e re Yahudi manga bi-biri'i.

⁴Unanga 'o kanau, “Ngoi to baraḏosa sababu to sipula'a ngowa'a kama sala ua, singadolo Unanga sanga hukumu sengene!” Mada'a ananga ya sangoro, “Ngomi mi faduli ua, gena-ge ngana 'ani 'urusana!”

⁵Dadi Yudas 'a upa'a pipisi gena-ge ra Ma Jou'ongu Madutu 'ai Wala ma dara, kara tagi sisoi'i tala ananga re 'o makole.

⁶'Imam-'imam ma sae'e ya 'oro pipisi gena-ge re 'aḏi kanau, “Pipisi nena-ne pipisi ngaunu. Dadi mete'e Musa 'ai hukumu pipisi so'o nena-ne sigare yoḏu'u toma jou-jou ma ngi'i ra Ma Jou'ongu Madutu 'ai Wala.”

⁷Ḏua ananga 'aḏi mafakati pake pipisi gena-ge di'a sitibo tana'a ga'a si'aro'o ma lomanga Tana'a Tukanga 'a'a Giu'u. Tana'a gena-ge 'i si'a'a daeraha kubu di'a ngowa'a tagi-tagi ino.

⁸Sababu gena-ge, singadolo wangere nange-ne ngowa'a ya si'aro'o tana'a gena-ge, “Tana'a Ngaunu”.

⁹Nena-ne nabi Yeremia 'a sinubuata pasala ḏua ma betongo so'o ne: “Ananga 'aḏi dawongo pipisi salaka guḏi ro'ange ga'a ngowa'a Israel 'aḏi mafakati pasala ḏua di'a tibo Unanga.[65]

¹⁰Pipisi gena-ge ananga ya pake di'a sitibo tana'a toma ngowa'a ya si'a'a giu'u ma tero sa'olo Ma Jou'ongu Madutu 'ai parenta ra ngoi.”

¹¹Wakutu Yesus 'U sitalaḏi ra Pilatus, gubernur daeraha gena-ge, Pilatus 'o sano ra Yesus, “Ngana nena-ne, mode-mode'e ngowa'a Yahudi manga 'olana bolo ua?” Yesus 'a sangoro, “Tero mode'e sa'olo ngana no kanau.”

¹²Mada'a wakutu 'imam-'imam ma sae'e re Yahudi manga bi-biri'i ananga ya singadolo manga da'awa ra Yesus, Unanga kama sangoro riwara.

¹³Ḏua Pilatus 'o kanau ra Unanga, “Ngana na 'isene manga da'awa ga'a ananga 'aḏi kalaki Ngana?”

¹⁴Mada'a Yesus kama sangoro ceka'a i'a mai ua singadolo 'a Pilatus 'o heranga madutu.

¹⁵Gubernur toma Paskah ma Wangere biasa 'o sibebasa ngowa'a bui matengo, mete'e ngowa'a kawasa manga go-golo'o.

¹⁶Toma 'orasa gena-ge, 'age rema ngowa'a bui matengo, ga'a ngowa'a ya waro le'a bolo le'a, unanga 'ai lomanga Yesus Barabas.[66]

¹⁷Dadi wakutu ngowa'a kawasa raḏi malomu, Pilatus 'o sano i'a ra ananga, “Ngini mau ngoi to sibebasa 'a guna? Yesus Barabas bolo Yesus ga'a si'aro'o 'O Kristus?”

¹⁸Pilatus 'o kanau so'o gena, sababu unanga 'a waro ḏua 'imam-'imam ma sae'e re Yahudi manga bi-biri'i, ananga 'aḏi sipula'a Yesus ra unanga sababu manga 'akala re sinyingara 'i go-goḏi.

¹⁹Wakutu Pilatus 'o tegoro toma kursi juruhakimi moju, 'ai were'a mo siḏingoto bererongo ra unanga: “Awa ngana no macapuru toma parkara gena-ge mangale ngowa'a matengo gena-ge ga'a kai sala ua. Sababu mangale Unanga, ngoi to sanga nanele cira singadolo 'ari 'akala re sinyingara 'i kangela.”

²⁰Mada'a 'imam-'imam ma sae'e re Yahudi manga bi-biri'i, ananga 'aḏi babata ngowa'a kawasa tau-taunu di'a 'aḏi golo'o ra Pilatus 'o sibebasa 'a Barabas, re singe-ngeta'a hukumu sengene ra Yesus.

²¹Ḏua gubernur Pilatus dadunu 'o sano ra ananga, “Ngowa'a nga muḏiḏi gena-ge, ngini mau ngoi to sibebasa 'a guna?” Ananga ya sangoro, “Barabas!”

²²Pilatus 'o sano i'a ra ananga, “Na'o so'o gena, ngoi balasu to 'a'a 'oru ra Yesus, ga'a si'aro'o 'O Kristus?” Ananga mo-moini ya sangoro, “Sisalib Unanga!”

²³Pilatus dadunu 'o sano ra ananga, “I'a sa'olo? Unanga 'ai sala 'oru?” Mada'a ananga ganapu poa'a ya siduga-duga, “Sisalib Unanga!”

²⁴Ma ḏo-ḏogumu tala, Pilatus 'a basono tala 'ai demo-demo ma faeda ri cua toma ngowa'a kawasa, re ananga ganapu 'aḏi manyiwere singadolo sa'i 'aḏi 'a'a kaco. Dadi unanga 'o 'oro ḇanyo re 'a soso'o 'ai giama toma mandan. Re unanga 'o kanau, “Unanga 'ai se-sengene pa'i ngini masiretene ninga 'urusana ḇato! Ngoi kari sala ua!”

²⁵Ngowa'a kawasa mo-moini 'aḏi sangoro, “Ya, sieanga i'a ngomi re minga ju'uda ma sanga enanga ma hukumu, sababu ngomi mi sisengene Unanga.”

²⁶Ḏua Pilatus 'o sibebasa 'a Barabas re 'o soma'a 'ai sordado 'aḏi sipo Yesus, kara Pilatus 'U sipula'a i'a di'a 'U sisalib.

²⁷Gena ḏua, gubernur Pilatus 'ai sordado-sordado gasa Yesus osama ra gubernur 'ai kadato. Ḏua ananga 'aḏi 'aro'o sordado mo-moini malomu sigoloḏi Unanga.

²⁸Ananga ya woi'i Unanga 'ai baju re 'U sipake Unanga reo juba 'ungu.

²⁹Ḏua, ananga 'aḏi 'oro ate ma umanga rema dodowo'o ya tuhu sa'olo lastari, kara ya siteru ra Unanga 'ai sae'e. Gena ḏua, ya siteru i'a didiki ra Unanga 'ai giama ma kuwiḏa, kara 'aḏi maḏipolono Tai biono re 'aḏi je-jengere Unanga re 'aḏi kanau, “Suba, Ngana Yahudi manga 'olana!”

³⁰Ananga 'aḏi obi'i Unanga re ya 'oro 'Ai didiki, kara 'U sica'olo 'Ai sae'e tau-taunu.

³¹Wakutu ananga 'aḏi je-jengere Unanga togumu i'a, ananga ya woi'i juba 'ungu nange-ge, kara ya singali i'a 'Ai baju masiretene. Ḏua ananga 'aḏi sisupu Unanga ra Pilatus 'ai kadato re 'aḏi gasa toma ngi'i di'a 'U sisalib.

³²Toma ḏo-ḏagi ma dara, sordado-sordado ma'u sanga matengo toma limau Kirene ino 'ai lomanga Simon, re ananga 'aḏi simau-mau unanga 'a doiti Yesus 'ai salib.

³³Ḏua ananga 'aḏi ngadolo toma ngi'i ma lomanga Golgota (gena-ge ma ngale: “Ḏoḏowi ma Ngi'i”).

³⁴Toma ngi'i gena-ge ananga pula'a Yesus ka'e 'anggur ya sicapuru midingi. Mada'a wakutu Unanga 'a tai'i, Unanga 'o oḏu'u 'A ka'e.

³⁵Gena ḏua, ananga sisalib Unanga kara sordado-sordado 'a'a loterei di'a 'aḏi sibalangu 'Ai pakeanga.

³⁶Togumu i'a, ananga 'aḏi tego-tegoro di'a 'aḏi dadanu Unanga.

³⁷Tai sae'e ma re'u toma salib co-cori ma tubu, sordado ya sipaku i'a Mahkamah 'Agama manga da'awa ra Unanga ma betongo so'o ne: “UNANGA NENA-NE YESUS, NGOWA'A YAHUDI MANGA 'OLANA.”

³⁸'Age rema ngowa'a to-tori'i nga muḏiḏi ḏi'i 'aḏi sisalib simete'e ra Yesus; matengo Tai kuwiḏa re matengo Tai kuḇali.

³⁹Ngowa'a ga'a 'aḏi tola'a i'a ino toma ngi'i gena-ge, ananga ya elala manga sae'e re 'aḏi je-jengere Yesus,

⁴⁰'aḏi kanau, “Ngana nena-ne ga'a no mau siruba Ma Jou'ongu Madutu 'ai Wala re Na simomi'i moju pa'i ma di'ara wangere ro'ange, No sisalamata 'Ani diri! Na'o Ngana Ma Jou'ongu Madutu 'ai Ngowa'a Nau'u, No 'uci toma salib gena-ge!”

⁴¹So'o gena ḏi'i, 'imam-'imam ma sae'e, guru-guru 'agama re Yahudi manga bi-biri'i 'aḏi je-jengere Yesus. Ananga 'aḏi kanau,

⁴²“Unanga 'o sisalamata ngowa'a lelegu, momongolo ua 'Ai diri masiretene, Unanga 'a sisalamata yoḏu'u! Na'o Unanga Israel manga 'Olana tai'i i'a 'uci toma salib gena-ge, la ngomi mi ngaku Unanga.

⁴³Unanga 'o ngaku Ma Jou'ongu Madutu re Ro kanau, Unanga Ma Jou'ongu Madutu 'ai Ngowa'a Nau'u. Nah ino ngene wo oḏi'i wangere nange-ne na'o Ma Jou'ongu Madutu mau 'U sisalamata Unanga bolo ua.”

⁴⁴So'o gena-ge ḏi'i, ngowa'a to-tori'i ga'a sisalib simete'e ra Unanga mai 'aḏi je-jengere Unanga.

⁴⁵Ca'olo nyagi moi re romoḏiḏi wangere 'olona tala singadolo ca'olo ro'ange wangere so'o ne'o, wangere ma la'o 'i taḏusu, re daeraha gena-ge mo-moini 'i dadi hafu-hafu.

⁴⁶Ḏa toma ca'olo ro'ange wangere so'o ne'o Yesus 'o poa'a 'a siduga-duga, “Eli, Eli lama sabakhtani?” Enanga ma ngale: “ 'Ari Jou'ongu Madutu, 'Ari Jou'ongu Madutu, i'a sa'olo No sieanga i'a Ngoi?”

⁴⁷Wakutu ngowa'a nga muḏuo i'a toma ngi'i gena-ge ya 'isene Yesus 'ai iḏingi so'o gena-ge, ananga 'aḏi kanau, “Unanga 'o 'aro'o 'a Elia!”

⁴⁸'Age matengo tamanga sigolona, unanga jau-jau tagi 'o 'oro bunga karang re 'a tono toma 'anggur ko-kowi'i. Gena ḏua, 'a sitopo'o toma ḏu-ḏubo ma dere, kara 'a situbo ie ra Yesus 'ai 'uḏu ma betu'u di'a Unanga 'a cono'o.

⁴⁹Mada'a ngowa'a lelegu 'aḏi kanau, “Toma si, ino ngene wa oḏi'i wari i'a si 'a Elia 'o sapolo 'U sisalamata Unanga!”

⁵⁰Ḏua Yesus 'o poa'a 'a siduga-duga, kara 'Ai sangagara 'i togumu.

⁵¹Ngalana ma da-daku kole-kole[67] ra Ma Jou'ongu Madutu 'ai Wala ma dara, enanga 'i raca kaci ḏiḏi, da'u singadolo dau. Ḏua wusu 'i dadi re maḏi lamo'o 'i tiwa'a.

⁵²Kubu-kubu ma repe matai welanga re Ma Jou'ongu Madutu 'ai ngowa-ngowa'a manga repe ga'a raḏi sengene, ananga dadunu 'aḏi 'ahu moju.

⁵³Ananga gena-ge 'aḏi supu tamanga kubu. Mada'a ananga pa'i 'aḏi osama toma limau Yerusalem wakutu Yesus dadunu ro 'ahu moju.[68] I'a da'a, ngowa'a repe ya'u oḏi'i ananga.

⁵⁴Sordado ma sae'e remanga sordado-sordado ga'a dadanu Yesus, ananga 'aḏi matai mojongo sababu 'aḏi basono wusu re raḏi oḏi'i 'ori i'a i'a 'i dadi. Ḏua ananga 'aḏi kanau, “Unanga nena-ne mode-mode'e Ma Jou'ongu Madutu 'ai Ngowa'a Nau'u!”

⁵⁵Toma ngi'i gena-ge, 'age ḏi'i rema we-were'a manga repe 'aḏi oḏi'i toma giḏanga. Ananga gena-ge ma di'ara ḏua 'aḏi mete'e Yesus re 'aḏi riono Unanga, mulaingi da'a Galilea ino.

⁵⁶Tamanga sigolona, 'age ngo Maria Magdalena, Maria 'a Yakobus re 'a Yusuf manga ngina, re Zebedeus 'ai were'a.

⁵⁷Wakutu ma wangere sa'i ri lobi'i, 'age rema ngowa'a rema-enanga matengo ga'a 'ai 'asala toma limau Arimatea ino. Unanga 'ai lomanga Yusuf re unanga ro osama nyo-nyoimi ra Yesus 'ai me-mete'e ḏi'i. Unanga tagi ra Pilatus re 'o golo'o Yesus 'ai mayeti. Ḏua Pilatus 'o soma'a 'ai sordado 'aḏi pula'a Yesus 'ai mayeti ra Yusuf.

⁵⁸

⁵⁹Ḏua 'a Yusuf 'a 'oro Unanga 'ai mayeti re 'a sisao reo ḇa'a lenan buḏo ga'a 'ofi,[69]

⁶⁰kara 'a sigare Yesus 'ai mayeti gena-ge ra Yusuf masiretene 'ai kubu ma su-sungi ma 'aḏu'u. Kubu gena-ge ga'a ngowa'a 'aḏi tuso'o maḏi toma bawata ma gagoro. Togumu i'a, unanga lulu maḏi lamo'o rimoi di'a 'a sidaku kubu ma ngalana, kara 'o tagi sisoi'i tala ngi'i gena-ge.

⁶¹Toma 'orasa gena-ge, Maria Magdalena re ngo Maria ma lelegu, ananga nga muḏiḏi 'aḏi tegoro ya talaḏi i'a kubu gena-ge.

⁶²Ma ḇiḇini ino Sabata ma wangere re 'imam-'imam ma sae'e mamete'e reo ngowa-ngowa'a Farisi, ananga 'aḏi tagi re 'aḏi talaḏi ra Pilatus,

⁶³re 'aḏi kanau, “Tuanga, ngomi mi 'elingi Yesus, tukanga sa-sakala, wakutu Unanga 'o 'ahu-'ahu moju Ro kanau, ‘Toma wangere ro'ange Ngoi dadunu to 'ahu moju.’

⁶⁴Sababu gena-ge, no soma'a sordado 'aḏi tagi di'a dadanu kubu gena-ge singadolo wangere ro'ange, la awa 'Ai me-mete'e ya tori'i 'Ai mayeti. Ḏua ananga gena-ge 'aḏi siajele toma ngowa-ngowa'a, ‘Unanga dadunu ro 'ahu moju toma ngowa'a senge-sengene manga sigolona.’ Dadi 'Ai sa-sakala ma ḏo-ḏogumu gena-ge lebe cira reo 'Ai sa-sakala ma siḏa.”[70]

⁶⁵Pilatus 'o kanau ra ananga, “Da'a rema sordado-sordado. Ngini na'u sigasa ananga gena-ge di'a 'aḏi dadanu, la 'aḏi site'e kubu gena-ge.”

⁶⁶Ḏua ananga mamete'e reo sordado gena-ge, ananga 'aḏi tagi toma kubu. Re ananga ya segele kubu ma da-damunu maḏi re 'aḏi soma'a sordado di'a dadanu kubu ma biono gena-ge, la ngowa'a ya 'oro Yesus 'ai mayeti yoḏu'u.