Read Sahu Matias 28 Bible Online

Matias 28 - Sahu bible

Matias 28

¹Sabata ma wangere palisi i'a migu ma wangere da-daini i'a moju, ngo Maria Magdalena re ngo Maria ma lelegu 'aḏi tagi ya oḏi'i kubu gena-ge.

²Kage-kage 'i dadi wusu lai siḏi madutu re Ma Jou'ongu Madutu 'ai mala'ekata 'o 'uci da'u soroga tala. Ḏua unanga 'o tagi 'a lulu maḏi 'o kubu ma da-damunu, re 'o tegoro toma re'u.

³Mala'ekata gena-ge 'ai jamani sa'olo ḇeḇelanga, re 'ai pakeanga 'i buḏo madutu.

⁴Sordado ga'a dadanu kubu gena-ge, ananga 'aḏi dadi mojongo madutu singadolo 'aḏi terewete, re maeta'a toma tana'a re dadi sa'olo ngowa'a sengene.

⁵Mala'ekata gena-ge 'o kanau toma we-were'a—we-were'a, “Ni mojongo awa! Ngoi to waro ngini disa Yesus, ga'a ngowa'a 'U sisalib.

⁶Unanga 'o cua 'ane. Unanga dadunu ro 'ahu moju sa'olo 'au nga'ene Ro kanau ḏua ra ngini. Ino ni oḏi'i ga'a ngowa'a ya sigare 'Ai mayeti,

⁷kara ni tagi ca-cautu ni siajele ra Unanga 'ai me-mete'e: ‘Unanga dadunu ro 'ahu moju re nange-ne Unanga ro tagi siḏa i'a da'a toma Galilea. I'a da'a kara ngini ni oḏi'i Unanga!’ 'Elingi 'ari habari gena-ge 'oru ga'a ngoi to kanau ra ngini nange-ne.”

⁸Dadi macautu i'a, we-were'a gena-ge ya sisoi'i tala kubu. Ananga gena-ge 'aḏi mojongo mada'a 'aḏi roanga masala, re ananga 'aḏi lalara di'a 'aḏi singadolo habari gena-ge ra Yesus 'ai me-mete'e.

⁹Kage-kage, Yesus 'o sapolo ma'u sanga we-were'a gena-ge, re 'O kanau, “Tabea!” Ḏua ananga 'aḏi macori i'a ra Unanga re 'aḏi sibo'olo 'ai rou kara 'aḏi silamo'o re siḏubuso Unanga.

¹⁰Yesus 'o kanau ra ananga, “Ni mojongo awa! Ni tagi re siajele ra Ngoi 'ari ioronongoḏu, la 'aḏi tagi da'a Galilea. I'a da'a ananga 'aḏi ma'u sanga ra Ngoi.”

¹¹Wakutu we-were'a 'aḏi tagi moju di'a siajele ra Yesus 'ai me-mete'e, sordado nga muḏuo i'a ga'a dadanu kubu 'aḏi maḏibo i'a da'a limau, re 'aḏi siajele toma 'imam-'imam ma sae'e 'oru ga'a 'i dadi ḏua.

¹²'Imam-'imam ma sae'e re Yahudi manga bi-biri'i, ananga 'aḏi malomu re 'aḏi mafakati di'a pula'a pipisi ma lamo'o toma sordado ga'a 'aḏi dadanu kubu,

¹³'aḏi kanau, “Ngini balasu ni siajele, ‘ 'A Yesus 'ai me-mete'e ya tori'i 'Ai mayeti 'orasa utu i'a, wakutu ngomi matai otu.’

¹⁴Re na'o ma gubernur 'a 'isene, ngomi ḏuanga i'a mi makanau ra unanga, la ngini sanga susa awa.”

¹⁵Ḏua sordado ga'a 'aḏi dadanu kubu, ya dawongo pipisi gena-ge, re ya si'a'a ma tero sa'olo 'aḏi sanga bererongo ra ananga. Re jarita gena-ge singadolo wangere nange-ne, ngowa'a Yahudi ya sija-jarita.

¹⁶Yesus 'ai me-mete'e nga nyagi moi re matengo, ananga 'aḏi tagi toma Galilea ma polono rimoi, mete'e Yesus ro siajele ra ananga.

¹⁷Wakutu ananga 'aḏi oḏi'i 'a Yesus, ananga 'aḏi silamo'o re siḏubuso Unanga. Mada'a mamuni'a 'aḏi wa-waḏunu.

¹⁸Yesus 'o macori i'a ra ananga re 'o kanau, “Kuasa mo-moini bae toma soroga, bae toma dungia gena-ge Ri sipula'a ra Ngoi.

¹⁹Sababu gena-ge, ni tagi toma bangsa mo-moini toma dungia sitabi donga, ni singadolo Habari mangale Ngoi, la ngowa'a 'aḏi dadi 'Ari me-mete'e. Ni baptis ananga gena-ge re siterongo Ḇaḇa 'ai lomanga, Ma Ngowa'a Nau'u 'ai lomanga, re Ma Ngagara 'Ofi-'Ofi ma lomanga.

²⁰Re ni doto'o 'Ari me-mete'e gena-ge di'a 'aḏi 'ahu mete'e 'Ari parenta mo-moini ga'a Ngoi reta siajele pasala ḏua ra ngini. Re 'elingi nena-ne: Ngoi ḏuanga i'a tini sieanga i'a ua ngini, singadolo dungia nena-ne ma ḏo-ḏogumu.”