Read Sahu Matias 3 Bible Online

Matias 3 - Sahu bible

Matias 3

¹Palisi'i musungu muḏuo i'a Yohanes tukanga baptis 'o sapolo toma daeraha Yudea toma daeraha baulaco re 'o mulaingi singadolo habari

²ma betongo so'o ne: “Ni maḏibo toma ngo'omo boloto sababu ti'ara riwara Soroga ma Pareta[7] 'i ngadolo.”

³Nabi Yesaya 'o kanau pasala ḏua mangale Yohanes gena-ge ma betongo so'o ne: “ 'Age rema ngowa'a matengo 'o kanau siduga-duga toma daeraha baulaco so'o ne: ‘Sidodahe ngo'omo di'a Ma Jou, siboloto ngo'omo gena-ge di'a Unanga.’ ”

⁴Yohanes 'ai baju 'i si'a'a reo 'unta ma gogo re 'ai golona ma bi-biri'u 'i si'a'a reo haiwani ma 'eno'o,[8] re 'ai ngo-ngoromo 'o cocoḇiti re 'o madu bangana.

⁵Ngowa'a toma limau Yerusalem ino, ngowa'a toma daeraha Yudea mo-moini re ngowa'a toma daeraha lelegu mo-moini ga'a ma'u se-sebanga Ḇanyo Yordan, ananga manga repe 'aḏi matai sapolo ra Yohanes.

⁶Ananga 'aḏi mangaku manga ḏosa-ḏosa, kara 'a Yohanes ya'u baptis ananga toma Ḇanyo Yordan.

⁷Ngowa'a Farisi re ngowa'a Saduki manga repe ḏi'i 'aḏi sapolo ra Yohanes di'a 'aḏi sanga baptis. Mada'a wakutu unanga oḏi'i ananga 'aḏi sapolo, unanga 'o kanau i'a ra ananga, “Ngini ngowa'a ma jira ma ju'uda ma tero sa'olo cuku'u rema bisa ma ngowa! 'A guna 'o kanau ra ngini mangale na'o 'aḏi sanga baptis ḇato ngini ḏuanga i'a sanga hukumu ua ra Ma Jou'ongu Madutu!

⁸Sijumu taninga de'oso re ḏegoro mangale ngini reni maḏibo mode-mode'e toma ngo'omo boloto!

⁹Awa ngini ni ta'ajiri taninga 'akala re sinyingara, ‘Ngomi mi sanga hukumu ua sababu Abraham ngomi minga ete re dotumu.’ Sababu Ngoi to siajele ra ngini nena-ne: Ma Jou'ongu Madutu nga'unu 'o sidadi maḏi-maḏi nena-ne 'i dadi Abraham 'ai ju'uda!

¹⁰Ma Jou'ongu Madutu ro ḏu-ḏuanga ḏua 'O sihukumu ngowa'a ga'a 'aḏi maḏibo ua toma ngo'omo boloto ma tero sa'olo tama'ono 'i ḏu-ḏuanga ḏua di'a sitawele ate re sitola'a ngadolo toma utu'u. Sababu gena-ge, na'o ate gena-ge ma sowo'o 'i rousu ua, ḏuanga i'a 'a tawele re 'a upa'a toma u'u ma dara.

¹¹Ngoi to baptis ngini reo ḇanyo sa'olo nana'o rimoi mangale ngini reni maḏibo toma ngo'omo boloto. Mada'a togumu i'a Unanga ga'a ḏuanga i'a 'O sapolo di'a baptis ngini rema Ngagara 'Ofi-'Ofi re u'u. Unanga lebe la-lamo'o ra ngoi, ta gasa 'Ai tarupa mai patasa ua.

¹²Gena-ge ma tero sa'olo Tai giama 'age rema garpu lamo'o, re Unanga ḏuanga i'a 'o sitaro'o gandum mo-moini singadolo 'i 'ofi. Gandum rema la'eme ḏuanga i'a sigare toma titila ma dara, mada'a ma 'omanga 'i siupa'a toma u'u kama sengene ua.”

¹³Toma 'orasa gena-ge Yesus toma Galilea ino 'O sapolo toma Ḇanyo Yordan. I'a da'a Unanga ma'u sanga ra Yohanes, re 'O golo'o 'a Yohanes 'o baptis Unanga.

¹⁴Mada'a Yohanes tai'i 'a itomo Yesus 'ai go-golo'o re 'o kanau, “Ngoi balasu mode-mode'e to sanga baptis ra Jou, mada'a nange-ne Jou no sapolo di'a sanga baptis ra ngoi!”

¹⁵Mada'a Yesus 'a sangoro, “Nange-ne sieanga ḇato so'o gena sababu wa si'a'a so'o nena-ne ngene wo 'a'a mete'e Ma Jou'ongu Madutu 'ai 'akala ma mau.” Dadi 'a Yohanes 'o baptis Yesus.

¹⁶Sanga baptis togumu i'a, Yesus 'o baolo toma ḇanyo, kage-kage diwanga 'i talanga re Yesus 'o oḏi'i Ma Ngagara 'Ofi-'Ofi 'i matuhu ma tero sa'olo namo dara 'i 'uci ra Unanga.

¹⁷Gena ḏua, ananga 'aḏi 'isene Ma Jou'ongu Madutu 'ai iḏingi ma betongo so'o ne: “Unanga nena-ne, 'Ari Ngowa'a Nau'u Ta dadalara, Ngoi 'ari 'akala re sinyingara ma sanangi Ta sipa'ala ra Unanga.”