Read Sahu Matias 4 Bible Online

Matias 4 - Sahu bible

Matias 4

¹Togumu i'a, Ma Ngagara 'Ofi-'Ofi 'u gasa Yesus toma daeraha baulaco, la Unanga nyengara sanga bo-baja toma 'Iblisi.

²Wange nyagi rata re utu nyagi rata Yesus kama oromo ua, dadi Unanga 'o basono sawini.

³'Iblisi 'i sapolo re 'i kanau ra Unanga, “Ngana nena-ne Ma Jou'ongu Madutu 'ai Ngowa'a Nau'u. Dadi no soma'a maḏi nena-ne 'i dadi roti.”

⁴Yesus 'a sangoro, “Toma Boku 'Ofi-'Ofi 'i silefo so'o ne: ‘Manusia wo 'ahu pa'i wo oromo roti ḇato ua, mada'a wo 'ahu ḏi'i, sababu wo mete'e Ma Jou'ongu Madutu 'ai demo-demo mo-moini, ga'a Unanga ro kanau.’ ”

⁵Ḏua 'Iblisi 'i gasa Yesus toma limau 'ofi-'ofi Yerusalem, re 'U side'oso Unanga ra Ma Jou'ongu Madutu 'ai Wala ma wanata.

⁶Gena ḏua, 'Iblisi gena-ge 'i kanau ra Unanga, “Ngana nena-ne Ma Jou'ongu Madutu 'ai Ngowa'a Nau'u. Dadi No masipoini tala. Sababu toma Boku 'Ofi-'Ofi 'i silefo so'o ne: ‘Ma Jou'ongu Madutu ḏuanga i'a 'o soma'a 'Ai mala'ekata-mala'ekata 'aḏi jaga Ngana la-la. Re ḏi'i ananga 'aḏi 'alo Ngana, la 'Ani rou 'i nga'unu toma maḏi awa.’ ”

⁷Yesus 'a sangoro, “Mada'a ḏi'i toma Boku 'Ofi-'Ofi ma dara 'i silefo so'o ne: ‘Awa no tai'i Ma Jou'ongu Madutu, 'ani Jou.’ ”

⁸Gena ḏua, 'Iblisi 'i gasa Yesus moju toma kie rimoi lai kau'u ma tubu re 'i sijumu ra Unanga dungia ma pareta mo-moini re pareta-pareta gena-ge ma kabasarana.

⁹Re 'i kanau ra Unanga, “Mo-moini nena-ne to pula'a di'a Ngana, na'o Ngana no maḏipolono re No silamo'o re siḏubuso ngoi.”

¹⁰Yesus 'a sangoro, “ 'Iblisi no sisoi'i tala ngoi. Toma Boku 'Ofi-'Ofi ma dara 'i silefo so'o ne: ‘Silamo'o re siḏubuso Ma Jou'ongu Madutu, 'ani Jou re de-de'oso pa'i Unanga ḇato.’ ”

¹¹Togumu i'a, 'Iblisi 'i sisoi'i tala 'a Yesus, re mala'ekata-mala'ekata 'aḏi sapolo di'a de-de'oso Unanga.

¹²Wakutu Yesus 'o 'isene 'a Yohanes sanga osama toma bui, Yesus dadunu 'o tagi toma daeraha Galilea.

¹³Gena ḏua, Unanga 'o sisoi'i tala limau Nazaret, re 'O tagi re 'O tegoro toma limau Kapernaum, toma talaga Galilea ma 'uḏu, toma daeraha Zebulon re Naftali.

¹⁴Dadi 'oru ga'a nabi Yesaya 'o kanau pasala ḏua 'i sitotomo:

¹⁵“Daeraha Zebulon re Naftali ga'a toma ngo'omo tagi talaga, daeraha ga'a toma Ḇanyo Yordan da'a kaci moi. toma daeraha Galilea ga'a ngowa'a Yahudi ua manga daeraha.

¹⁶Ngowa'a toma daeraha-daeraha gena-ge 'aḏi tegoro toma hafu-hafu sababu 'aḏi nana'o ua Ma Jou'ongu Madutu, ananga gena-ge raḏi oḏi'i tarangi ma lamo'o. Re ngowa'a gena-ge ḏi'i ga'a 'aḏi mojongo sengene sababu manga ḏosa, nange-ne tarangi 'i pilata ḏua ra ananga!”

¹⁷Mulaingi toma 'orasa gena-ge, Yesus 'o singadolo ma habari nena-ne: “Ni maḏibo toma ngo'omo boloto, sababu tiara riwara Soroga ma Pareta[9] 'i ngadolo.”

¹⁸Wakutu Yesus 'o ḏingana 'o mete'e toma talaga Galilea ma 'uḏu, Unanga 'o oḏi'i ngowa'a ngau-ngau nga muḏiḏi: 'a Simon, si'aro'o 'a Petrus, re 'a Andreas, ananga gia nongoḏu. Ananga gena-ge 'aḏi disa nyao'o reo j̱ala toma talaga gena-ge.

¹⁹Yesus 'o kanau ra ananga, “Ino mete'e Ngoi. Ngoi ḏuanga i'a to sidoto'o ngini ni lomu ngowa'a ma tero sa'olo nange-ne ngini ni lomu nyao'o, la ananga 'aḏi mete'e Ngoi.”

²⁰Ananga jau-jau ya sisoi'i tala manga j̱ala, kara 'aḏi mete'e Unanga.

²¹Yesus 'a dowanga 'Ai ḏo-ḏagi re 'O oḏi'i gia nongoḏu nga muḏiḏi ma lelegu: 'a Yakobus re 'a Yohanes, Zebedeus 'ai ngowa-ngowa'a nau'u. Ananga ya sidiai manga j̱ala toma oti ma dara, mamete'e remanga ḇaḇa. Yesus ya'u 'aro'o ananga ḏi'i di'a mete'e Unanga.

²²Ananga jau-jau ya sisoi'i tala manga ḇaḇa re manga oti, kara 'aḏi mete'e Yesus.

²³Yesus 'a sigoloḏi daeraha Galilea mo-moini re 'O doto'o toma wala-wala puji. Unanga 'o singadolo Habari Roanga mangale Soroga ma Pareta.[10] Re Unanga ḏi'i 'O si-la ngowa-ngowa'a mo-moini remanga si-siḏi ma rupa 'oru ḇato.

²⁴Habari mangale Yesus, 'i rera re walata toma nagara Siria manga gamu, singadolo ngowa'a manga repe 'aḏi sapolo ra Unanga. Ananga 'aḏi gasa ngowa-ngowa'a siḏi, remanga si-siḏi ma rupa lai repe. Ngowa-ngowa'a ga'a roh ma jira ya'u dungosama, ngowa-ngowa'a sarasone, ngowa-ngowa'a ḇolo. Ananga mo-moini Yesus ya'u si-la.

²⁵Toma 'orasa gena-ge, ngowa'a manga repe 'aḏi mete'e Yesus. Ngowa'a repe 'aḏi sapolo ino: ngowa'a toma daeraha Galilea, ngowa'a toma Limau Nyagi Moi ino, ngowa'a toma limau Yerusalem, ngowa'a toma daeraha Yudea, re ngowa'a toma gamu Ḇanyo Yordan ma kaci moi.