Read Sahu Matias 7 Bible Online

Matias 7 - Sahu bible

Matias 7

¹“Awa ngini ni sijuruhakimi ngowa'a, la Ma Jou'ongu Madutu ni sijuruhakimi ngini ua.

²Sababu ma tero sa'olo ngini ni sijuruhakimi ngowa'a, so'o gena ḏi'i Ma Jou'ongu Madutu ḏuanga i'a 'o sijuruhakimi ngini. Re ninga du-duga ga'a ngini ni pake di'a situga toma ngowa'a lelegu, du-duga gena-ge ḏi'i Ma Jou'ongu Madutu 'a pake 'a situga ra ngini!

³I'a sa'olo ngini ni oḏi'i 'o ate ma bingana taninga ioronongoḏu manga la'o, mada'a jaro jule moi taninga la'o, ni siwaro i'a ua.

⁴I'a sa'olo ngini ni kanau taninga ioronongoḏu, ‘Ino ngoi ta woi'i 'o ate ma bingana tani la'o,’ mada'a taninga la'o ma dara rema jaro jule moi?

⁵Hai ngini ngowa'a munafiki! Ni sisupu siḏa 'o jaro jule moi tani la'o, la ni oḏi'i tarangi, kara nga'unu ni sisupu 'o ate ma bingana taninga ioronongoḏu 'ai la'o ma dara.

⁶Awa no pula'a 'ori i'a 'ofi-'ofi toma nunu'u, la nunu'u gena-ge 'i macelolo re 'i goḏi ngana awa! Re awa no pula'a mutiara toma soto, la awa soto gena-ge ya jo'u la-la mutiara gena-ge.”

⁷“Ni golo'o, ḏuanga i'a ni dawongo. Ni disa, ḏuanga i'a ni sanga. Ni tolo'o ngalana, re ngalana ḏuanga i'a ya welanga.

⁸Sababu 'a guna ḇato ga'a 'o golo'o, ḏuanga i'a 'o dawongo. 'A guna ḇato ga'a 'o disa, ḏuanga i'a 'o sanga. Re 'a guna ḇato ga'a 'o tolo'o ngalana, ḏuanga i'a ya welanga.

⁹Sanga ua, 'age rema ḇaḇa matengo taninga sigolona ga'a 'o pula'a maḏi, na'o 'ai ngowa'a nau'u 'o golo'o roti!

¹⁰Bolo unanga 'o pula'a cuku'u, na'o 'ai ngowa'a nau'u 'o golo'o nyao'o!

¹¹Kalaha ngini ngowa'a baraḏosa, ngini mai ni waro ḏi'i ni pula'a 'ori i'a ma la-la taninga ngowa-ngowa'a. Ma la-lamo'o i'a ḏi'i, ninga Ḇaḇa toma soroga! Tantu ḏua, Unanga 'o pula'a 'ori i'a ma la-la ra ananga ga'a 'aḏi golo'o ra Unanga.”

¹²“Sababu gena-ge, 'a Musa 'ai hukumu ma do-doto'o re nabi-nabi manga do-doto'o ma ngale so'o ne: 'Oru ḇato ngini ni mau ngowa'a 'aḏi 'a'a ra ngini, ni 'a'a siḏa ra ananga.”

¹³Osama mete'e ngalana ga'a 'i peletoro. Sababu ngalana re ngo'omo roata ga'a 'i sigasa ngowa'a toma naraka re ngowa'a repe ya mete'e.

¹⁴Mada'a ngalana re ngo'omo ga'a 'i peletoro ga'a 'i sigasa ngowa'a toma 'ahu ma dara, ngowa'a repe ua ya sanga.

¹⁵“Ni ma'istiari toma nabi-nabi sa-sakala. Ananga 'aḏi sapolo ra ngini ma tero sa'olo doba. Mada'a ma ba-banari ananga manga maksudu 'i sijira ninga ngo-ngaku ma tero sa'olo serigala ga'a 'i oro-oromo ngowa'a.

¹⁶Ngini ḏuanga i'a ni nana'o ananga sa'olo nabi sa-sakala mete'e manga ga'a. Ngini ni sanga ua 'anggur ma sowo'o toma rurubu dodowo'o, re ni sanga ua 'ara ma sowo'o toma goroa dodowo'o.

¹⁷So'o gena-ge ḏi'i, 'o ate 'i rousu, ma sowo'o 'i la-la. Mada'a 'o ate ma rousu ua, ma sowo'o 'i cira.

¹⁸Ate 'i rousu, sanga ua enanga ma sowo'o 'i cira. So'o gena-ge ḏi'i 'o ate 'i rousu ua, sanga ua enanga ma sowo'o la-la.

¹⁹Ate 'oru ḇato ga'a ma sowo'o rousu ua, wa tawele re tau'u toma u'u.

²⁰So'o gena ḏi'i reo nabi-nabi sa-sakala. Tantu ḏua, ngini ni waro na'o ananga nabi sa-sakala sababu ananga manga de'oso re ḏegoro.”

²¹“Toma Kiamata ma Wangere, ngowa'a manga repe ḏuanga i'a 'aḏi 'aro'o Ngoi, ‘Ma Jou! Ma Jou!’ Mada'a ananga mo-moini ua 'aḏi osama nyo-nyoimi toma Soroga ma Pareta![15] Pa'i ngowa'a ga'a mete'e 'Ari Ḇaḇa 'ai mau, ananga gena-ge ḏuanga i'a 'aḏi sanga osama.

²²Toma wangere gena-ge, ngowa'a manga repe 'aḏi kanau ra Ngoi, ‘Ma Jou! Ma Jou! Wakutu ngomi mi nubuata mi pake 'Ani lomanga, re mi pake 'Ani lomanga di'a dusu'u roh ma jira, re ḏi'i mi pake 'Ani lomanga di'a 'a'a ga'a hera-heranga ma repe!’

²³Mada'a Ngoi ta sangoro, ‘Ngoi to nana'o ngini ua. Ni maḏagi ra Ngoi, sababu ngini ninga ga'a 'i cira!’ ”

²⁴“Sababu gena-ge, ngowa'a mo-moini ga'a 'aḏi 'isene Ngoi 'ari demo re ya mete'e, ananga gena-ge ma tero sa'olo ngowa'a pahe matengo 'o side'oso 'ai wala toma maḏi ma re'u.

²⁵Kalaha besa'a lai lamo'o 'i sapolo singadolo ḇanyo dogo, re karawiana lai siḏi ya nga'unu wala gena-ge, enanga 'i ruba ua, sababu 'i side'oso toma maḏi ma re'u.

²⁶Mada'a ngowa'a mo-moini ga'a ya 'isene Ngoi 'ari demo, mada'a ya mete'e ua, ananga gena-ge ma tero sa'olo ngowa'a haga matengo ga'a side'oso wala toma dongi ma re'u.

²⁷Wakutu besa'a lai lamo'o 'i sapolo singadolo ḇanyo dogo re ma karawiana lai siḏi 'i nga'unu wala gena-ge, enanga 'i ruba singadolo 'i pinya'olo lai siḏi.”

²⁸Wakutu Yesus 'o doto'o togumu i'a, ngowa-ngowa'a toma ngi'i gena-ge ga'a 'aḏi isene 'Ai do-doto'o, ananga gena-ge 'aḏi dadi heranga madutu.

²⁹Sababu Unanga 'o doto'o rai kuasa ma tero ua sa'olo ananga manga guru-guru 'agama!