Read Sahu Matias 9 Bible Online

Matias 9 - Sahu bible

Matias 9

¹Dadi Yesus 'o mabalene toma oti, kara 'o masala da'a talaga kaci moi re 'o maḏibo Tai gamu Kapernaum.

²Toma gamu gena-ge ngowa'a nga muḏuo i'a 'aḏi gasa ino ngowa'a ḇolo matengo ga'a 'u sigare toma 'usungana. Wakutu Yesus 'o oḏi'i ananga manga ngo-ngaku lai te'e, Unanga 'o kanau i'a toma ngowa'a ḇolo gena-ge, “ 'Ari ngowa'a, awa 'ani 'akala re sinyingara 'i rapo'o, 'ani ḏosa-ḏosa 'i singi-ngiranga ḏua.”

³'Age rema guru-guru 'agama nga muḏuo i'a ga'a 'aḏi 'isene Yesus 'ai demo-demo gena-ge re 'aḏi makanau tamanga 'akala re sinyingara ma dara, “Ngowa'a nena-ne 'o je-jengere Ma Jou'ongu Madutu!”

⁴Yesus 'a waro ananga manga fikirana, dadi 'O kanau, “I'a sa'olo ni mafikiri 'ori i'a ma jira taninga 'akala re sinyingara ma dara?

⁵Le'a lebe gapanga si'a'a: Ngoi nyengara to kanau, ‘ 'Ani ḏosa ta singi-ngiranga ḏua’ bolo, nyengara to kanau, ‘Momi'i ie, re no tagi’?

⁶Mada'a nange-ne Ngoi ta sibukiti ra ngini mangale Ngoi, Manusia ma Ngowa'a Nau'u masiretene rari kuasa nga'unu ta singi-ngiranga ngowa-ngowa'a manga ḏosa toma dungia nena-ne.” Gena ḏua, Yesus 'o kanau i'a toma ngowa'a ḇolo gena-ge, “Momi'i ie, na tede 'ani 'usungana re no maḏibo!”

⁷Ḏua ngowa'a ḇolo gena-ge 'o te'oso re 'o maḏibo tai wala.

⁸Wakutu ngowa'a repe 'aḏi oḏi'i so'o gena, ananga 'aḏi mojongo re 'aḏi puji re silamo'o Ma Jou'ongu Madutu, sababu Unanga ro pula'a 'Ai kuasa lamo'o masala toma manusia.

⁹Gena ḏua, Yesus 'o sisoi'i tala ngi'i gena-ge. Tai ḏo-ḏagi ma dara 'o oḏi'i ngowa'a golo-golo'o balastengi matengo 'ai lomanga Matius 'o madi-dirini tai kantor. Yesus kanau i'a ra unanga, “Ino mete'e Ngoi.” Ḏua Matius ro te'oso, kara 'o mete'e Yesus.

¹⁰Wakutu Yesus 'o oromo ra Matius 'ai wala, ngowa'a golo-golo'o balastengi manga repe 'aḏi sapolo, mamete'e reo ngowa'a ga'a si'aro'o ngowa'a baraḏosa. Ananga mo-moini 'aḏi oromo mamete'e rea Yesus re 'Ai me-mete'e.

¹¹'Age rema ngowa'a Farisi ga'a 'aḏi oḏi'i i'a so'o gena, ananga 'aḏi sano ra Yesus 'ai me-mete'e, “I'a sa'olo ninga guru Unanga 'o oromo mamete'e reo ngowa-ngowa'a golo-golo'o balastengi re ngowa'a baraḏosa?”

¹²Yesus 'a 'isene so'o gena re 'O kanau, “Ngowa'a kamanga si-siḏi ua 'aḏi paralu dotere ua. Pa'i ngowa'a remanga si-siḏi ḇato, ananga 'aḏi paralu dotere.

¹³So'o gena ḏi'i, Ngoi to sapolo ua di'a 'aro'o ngowa'a loasa re banari mada'a to sapolo di'a 'aro'o ngowa'a baraḏosa. Dadi ngini ni disa waro toma Boku 'Ofi-'Ofi ma dara bu-bula'a nena-ne ma ngale: ‘Ngoi to mau ngowa'a 'aḏi sijumu manga 'akala re sinyingara ma la-la toma ngowa'a lelegu, awa pa'i 'aḏi pula'a jou-jou haiwani ra Ngoi!’ ”

¹⁴Togumu i'a, 'a Yohanes tukanga baptis, unanga gena-ge 'ai me-mete'e 'aḏi sapolo ra Yesus. Ananga 'aḏi sano, “I'a sa'olo 'Ani me-mete'e 'aḏi puasa ua, mada'a ngomi re ngowa'a Farisi, mi puasa?”

¹⁵Yesus 'a sangoro, “Sanga ua, ioro re nongoḏu toma molo'ara ma laya ananga 'aḏi garura, na'o geri molo'ara na-nau'u 'age tamanga sigolona moju. Mada'a ḏuanga i'a ma 'orasa 'i ngadolo na'o geri molo'ara gena-ge ananga 'u 'oro tamanga sigolona. Toma 'orasa gena-ge, ananga ḏuanga i'a 'aḏi puasa.”

¹⁶“Matengo ua 'o pata 'ai baju ma siḏa reo ba-bata ma su-sungi. Sababu ba-bata ma su-sungi 'i taunu singadolo baju ma siḏa gena-ge 'i 'acingi lebe lamo'o i'a.

¹⁷So'o gena ḏi'i, 'anggur ma su-sungi sidai'i ua toma 'anggur ma ngi'i ma siḏa.[18] Sababu ngi'i ma siḏa gena-ge 'i 'acingi, kara 'anggur 'i pa'ala re 'anggur ma ngi'i ri cira ḏi'i! 'Anggur ma su-sungi balasu sidai'i toma 'anggur ma ngi'i ma su-sungi, la bae 'anggur bae ma ngi'i, enanga 'i la-la mo-moini.”

¹⁸Wakutu Yesus 'o ka-kanau moju ra Yohanes 'ai me-mete'e, wala puji ma sae'e 'o sapolo ra Yesus. Unanga 'o maḏipolono ra Yesus 'ai biono re 'o kanau, “ 'Ari ngowa'a were'a aro mo sengene i'a, na'o nyengara gari'a No sapolo re Nimi cigi, la munanga dadunu mo 'ahu.”

¹⁹Yesus 'o te'oso re 'o tagi mamete'e reo wala puji ma sae'e gena-ge re 'Ai me-mete'e mamete'e ḏi'i.

²⁰Toma ngo'omo ma golona we-were'a matengo mo siḏi, 'ami ngaunu pa'ala ma di'ara ri musungu nyagi moi re romoḏiḏi ḏua sa'olo mo maoḏi'i, munanga mo sapolo re mo maco-cori'i i'a ra Yesus, kara ma cigi Yesus 'ai juba ma dere da'a ḏuḏunu ino. Tami 'ulungu ma dara, “Na'o ta cigi 'Ai juba ḇato, ngoi to la.”

²²Toma 'orasa gena-ge Yesus 'o magelelo re 'o oḏi'i we-were'a gena-ge. Ḏua Yesus 'o kanau, “ 'Ari ngowa'a na site'e tala 'ani 'akala re sinyingara, sababu ngana 'ani ngo-ngaku ra Ngoi, ngana no la.” Toma 'orasa gena-ge ḏua, we-were'a gena-ge mo la.

²³Gena ḏua, Yesus 'o ngadolo toma wala puji ma sae'e 'ai wala. I'a da'a, Unanga 'o oḏi'i ngowa-ngowa'a ga'a ḇisa serulingi di'a palihara mayeti re ngowa'a repe ya rerese ma gaḏi.

²⁴Unanga 'o kanau ra ananga, “Ngini ni supu mo-moini. Ngowa 'olo nena-ne mo sengene ua munanga pa'i mo otu ḇato.”[19] Ananga mo-moini 'aḏi nye-nyelo'o Unanga.

²⁵Dadi ananga mo-moini 'aḏi matai supu. Ḏua, Yesus 'o osama toma ngowa 'olo gena-ge 'ami kamara kara 'a gu'u 'ami giama. Toma 'orasa gena-ge ḏua, ngowa 'olo were'a gena-ge dadunu mo 'ahu moju re mo momi'i.

²⁶Habari gena-ge ananga ya sihabari toma daeraha gena-ge mo-moini.

²⁷Yesus 'o tagi sisoi'i tala ngi'i gena-ge re 'a dowanga 'ai ḏo-ḏagi. Toma ngo'omo ma golona, ngowa'a hafu nga muḏiḏi 'aḏi tutu'u ra Unanga 'ai ḏuḏunu. Ananga 'aḏi poa'a, “Jou, 'Olana Daud 'ai ju'uda,[20] no sijumu 'Ani 'akala re sinyingara ma la-la ra ngomi!”

²⁸Wakutu Yesus 'o osama toma wala, ngowa'a hafu nga muḏiḏi gena-ge 'aḏi sapolo ra Unanga. Yesus 'O sano ra ananga, “ 'Oru ngini ni ngaku mangale Ngoi nga'unu to si-la ngini?” Ananga 'aḏi sangoro, “Jou, ngomi ngaku gena-ge!”

²⁹Ḏua Yesus 'a cigi ananga manga la'o re 'O kanau, “Sababu ninga ngo-ngaku, 'oru ga'a ngini ni mau, enanga 'i dadi.”

³⁰Toma 'orasa gena-ge ḏua, ananga raḏi oḏi'i. Unanga 'o sipo-poma ananga, “Awa ni siajele hali nena-ne ra guna ḇato.”

³¹Mada'a ananga 'aḏi tagi re ya sihabari mangale Yesus toma daeraha sitabi donga.

³²Wakutu ananga nga muḏiḏi gena-ge ga'a aro raḏi la 'aḏi tagi, 'age rema ngowa'a 'aḏi gasa ino ra Yesus ngowa'a mou matengo ga'a roh ma jira 'u dungosama.

³³Yesus 'a dusu'u roh ma jira gena-ge. Re toma 'orasa gena-ge ḏua, ngowa'a mou nga'unu ro kanau. Ngowa'a repe 'aḏi matai heranga re 'aḏi kanau, “Soi moi nyangu, ngomi oḏi'i ga'a hera-heranga ma duhu so'o nena-ne toma Israel!”

³⁴Mada'a ngowa-ngowa'a Farisi 'aḏi kanau, “Roh ma Jira ma 'Olana[21] ri pula'a kuasa ra Unanga nena-ne di'a dusu'u roh-roh ma jira.”

³⁵Yesus 'o tagi 'o tuḏu limau-limau, re gamu-gamu toma daeraha sitabi donga. Unanga 'o doto'o toma wala-wala puji re singadolo Habari Roanga mangale Soroga ma Pareta.[22] Unanga 'o si-la ngowa-ngowa'a mo-moini remanga si-siḏi ma rupa 'oru ḇato.

³⁶Wakutu Yesus 'o oḏi'i ngowa'a repe Tai 'akala re sinyingara ma dara 'i baolo dadalara, sababu ananga manga susa re sangisara ma repe re ya riono manga diri nga'unu ua. Ananga gena-ge ma tero sa'olo doba kama sowohi ua.

³⁷Dadi Yesus 'o kanau Tai me-mete'e, “Ngowa-ngowa'a nena-ne ma tero sa'olo guḏa ma hasili lai lamo'o 'i 'utu'u nyangu, mada'a ngowa'a 'utu-'utu'u 'u 'aḏi repe ua.

³⁸Sababu gena-ge, ngini ni golo'o toma guḏa ma dutu, la Unanga 'o siḏingoto ngowa'a 'utu-'utu'u di'a ya lomu guḏa ma hasili.”