Read Sahu Markus 11 Bible Online

Markus 11 - Sahu bible

Markus 11

¹Wakutu ananga 'aḏi co-cori toma limau Yerusalem, ananga 'aḏi osama toma limau Betfage re limau Betania sie toma Polono Zaitun ma gagoro. Gena ḏua, Yesus 'o soma'a 'Ai me-mete'e nga muḏiḏi 'aḏi siḏa re 'O kanau, “Ni siḏa i'a re ni osama toma gamu da'a re ni oḏi'i keledai ma ngowa rimoi gena-ge ya palene soi moi i'a mai nyangu, ngowa'a ya piri'u. Re ngini ni pasala ma gumi re na gasa ino 'ane.

³Na'o matengo i'a 'o sano ra ngini, ‘I'a sa'olo ngini na pasala keledai gena-ge?’ ni sangoro, ‘Ma Jou 'a paralu, re Unanga 'a ca-caiti siḏibo.’ ”

⁴'Ai me-mete'e nga muḏiḏi nange-ge 'aḏi tagi, re ya sanga i'a keledai ma ngowa rimoi toma ngo'omo ma 'uḏu, ma gumi ya sipiri'u toma ngalana ma ngasu'u. Ḏua ananga ya pasala keledai gena-ge.

⁵Ngowa-ngowa'a 'aḏi made-de'oso toma ngi'i gena-ge 'aḏi sano ra ananga, “Ni si'a'a 'oru? I'a sa'olo ni pasala keledai ma ngowa gena-ge?”

⁶Ananga ya sangoro ma tero sa'olo 'a Yesus 'o kanau ra ananga nange-ge. Ḏua ngowa-ngowa'a gena-ge 'aḏi sieanga i'a ananga ya tuda keledai gena-ge.

⁷Wakutu 'aḏi ngadolo ra Yesus ananga ya siwangini toma keledai ma ḏuḏunu remanga juba. Ḏua, Yesus 'o mabalene toma keledai ma ngowa gena-ge.

⁸Ngowa'a manga repe ya sisela manga juba toma ngo'omo. 'Age rema ngowa'a ma lelegu ḏi'i ananga 'aḏi siare 'o ate ma umanga rema so'a-so'a 'aḏi gasa toma guḏa ino.

⁹Ngowa-ngowa'a 'aḏi tagi siḏa-siḏa re 'aḏi tu-tuu'u, mo-moini 'aḏi kanau siduga-duga, “Puji re silamo'o Ma Jou'ongu Madutu! Sibarakati Unanga ga'a 'o sapolo rea Ma Jou'ongu Madutu 'ai lomanga!

¹⁰Sibarakati 'Ai Pareta 'i sapolo da'u ra Ma Jou'ongu Madutu tala - ma tero sa'olo 'Olana Daud, nanga ete re dotumu, 'ai pareta. Puji re silamo'o Ma Jou'ongu Madutu toma Gau'u!”

¹¹Ma ḏo-ḏogumu, Yesus 'o ngadolo toma limau Yerusalem re 'O osama ra Ma Jou'ongu Madutu 'ai Wala. Toma ngi'i gena-ge, Unanga 'o tailako sigoloḏi. Mada'a sa'i ri lobi'i, dadi Unanga re 'Ai me-mete'e nga nyagi moi re nga muḏiḏi, ananga 'aḏi ḏibo toma limau Betania.

¹²Ma ḇiḇini ino da-daini i'a moju, wakutu ananga 'aḏi tagi re 'aḏi supu toma limau Betania, Yesus basono 'o sawini.

¹³Toma giḏanga, Unanga 'o oḏi'i ate 'ara ḏu moi ma so'a lai ruana. Dadi, Unanga 'o tagi i'a toma ate gena-ge mau 'a oḏi'i rema sowo'o bolo ua. Mada'a, Unanga 'o ngadolo toma ate gena-ge, 'o oḏi'i ma sowo'o rimoi i'a mai ua, pa'i ma so'a ḇato,[20] sababu wakutu gena-ge enanga ma 'orasa sowo'o nyangu.

¹⁴Ḏua, Yesus 'o kanau i'a toma ate gena-ge, “Mulaingi nange-ne re si'a, matengo i'a mai ua 'a oromo riwara ate nena-ne ma sowo'o!” 'Ai me-mete'e ya 'isene Yesus 'o kanau gena-ge.

¹⁵Gena ḏua, ananga 'aḏi ngadolo toma limau Yerusalem, Yesus 'o tagi ḏi'i ra Ma Jou'ongu Madutu 'ai Wala. Toma wala gena-ge ma soana, Unanga 'o dusu'u ngowa'a 'aḏi mawu'unu re matibo. Unanga 'a sipagara ngowa-ngowa'a singali-ngali pipisi manga meja, re 'A siruba ngowa-ngowa'a mawu'unu namo dara manga bako-bako.

¹⁶Re matengo ua Unanga ya'u sieanga i'a 'aḏi gasa 'oru ḇato re 'aḏi i'a ino supu re 'o osama ra Ma Jou'ongu Madutu 'ai Wala ma soana.

¹⁷Gena ḏua, Yesus 'o doto'o ngowa-ngowa'a toma ngi'i gena-ge re 'o kanau, “Ra Ma Jou'ongu Madutu 'ai Boku ma dara, 'i silefo ḏua Ma iḏingi so'o ne: ‘ 'Ari Wala gena-ge, bangsa mo-moini ya silomanga manga manyiata ma wala.’ Mada'a ngini ni si'a'a ngowa'a to-tori'i manga ngi'i!”

¹⁸Wakutu 'imam-'imam ma sae'e re guru-guru 'agama ya 'isene Yesus 'o kanau so'o gena, ananga mulaingi 'aḏi disa ngo'omo mau sisengene Unanga. Ananga manga 'akala re sinyingara 'i go-goḏi, sababu ngowa'a mo-moini 'aḏi nyanyaḏi masala ya 'isene 'Ai do-doto'o.

¹⁹Sa'i ri lobi'i, Yesus re 'Ai me-mete'e, ananga ya sisoi'i tala limau gena-ge.

²⁰Ma ḇiḇini ino da-daini i'a, wakutu ananga 'aḏi tola'a i'a toma ate 'ara gena-ge, ananga ya oḏi'i ate gena-ge ri sengene; da'u ma tubu singadolo dau ma cimi.

²¹Ḏua Petrus 'a si'elingi 'au nyigo Yesus 'a sisasi ate 'ara gena-ge re 'o kanau i'a ra Yesus, “Rabi,[21] Na oḏi'i ate 'ara ga'a Na sisasi, enanga gena-ge ri sengene!”

²²Yesus 'a sangoro, “Ni ngaku ḇato ra Ma Jou'ongu Madutu.

²³Ni ngaku mode-mode'e 'Ari demo-demo nena-ne: Ngowa'a mo-moini ga'a 'aḏi ngaku mode-mode'e Ma Jou'ongu Madutu re sitaka-taka ua 'oro ḇato 'aḏi kanau; enanga gena-ge 'i dadi. 'A guna ḇato 'o kanau, ‘Kie nga'unu 'i lage re 'i eta'a toma ngoloto!’ Togumu i'a, mode-mode'e enanga 'i lage re 'i eta'a toma ngoloto!

²⁴Sababu gena-ge, Ngoi to siajele ra ngini nena-ne: 'Oru ḇato 'o manyiata re 'o ngaku mode-mode'e Ma Jou'ongu Madutu 'o pula'a ḏua, enanga gena-ge 'i dadi ra unanga.

²⁵Re na'o ngini ni manyiata, mada'a ninga 'akala re sinyingara 'i sanangi ua ra matengo i'a, siḏa-siḏa na si'apongo ngowa'a matengo gena-ge, la ninga Ḇaḇa da'u toma soroga 'A singi-ngiranga ḏi'i ninga ḏosa-ḏosa. [

²⁶Na'o ngini ni si'apongo ua ngowa'a lelegu, ninga Ḇaḇa da'u toma soroga 'A singi-ngiranga ua ḏi'i ninga ḏosa-ḏosa.]”

²⁷Ananga dadunu 'aḏi maḏibo toma limau Yerusalem. Wakutu Yesus 'o tagi sigoloḏi ra Ma Jou'ongu Madutu 'ai Wala, 'imam-'imam ma sae'e, guru-guru 'agama re Yahudi-Yahudi manga sae'e 'aḏi sapolo ra Yesus.

²⁸Ananga 'aḏi sano, “No sanga kuasa le'a ino, re 'a guna 'o pula'a kuasa ra ngana singadolo nga'unu no 'a'a mo-moini so'o nena-ne?”

²⁹Yesus 'a sangoro, “Ngoi ḏi'i mau to sano ra ngini. Na'o ni sangoro 'ari so-sano, kara ta siajele 'a guna 'o pula'a kuasa singadolo ta si'a'a so'o nena-ne.

³⁰'A Yohanes tukanga baptis, unanga gena-ge 'o sanga 'ai kuasa ra guna ino? Ra Ma Jou'ongu Madutu bolo toma manusia ino?”

³¹Ḏua 'imam-'imam ma sae'e re Yahudi manga sae'e 'aḏi ma'u kanau tamanga sigolona. Ananga 'aḏi kanau, “Na'o ngene wo sangoro, ‘ 'A Yohanes gena-ge 'o sanga kuasa ra Ma Jou'ongu Madutu ino,’ ḏua Unanga 'o sano ‘I'a sa'olo ngini ni ngaku 'a Yohanes ua?’

³²Re na'o wo kanau, ‘Unanga 'o sanga kuasa toma manusia ino,’ 'i kangela ḏi'i.” Sababu ananga 'aḏi mojongo ngowa'a repe sababu ngowa'a mo-moini 'aḏi ngaku Yohanes gena-ge 'o dadi nabi.

³³Dadi ananga 'aḏi sangoro, “Ngomi ma waro ua.” Ḏua Yesus 'o kanau ra ananga, “Na'o so'o gena, Ngoi mai ta siajele ua ra ngini mangale Ngoi to sanga kuasa ra guna ino, singadolo nga'unu ta si'a'a mo-moini gena-ge.”