Read Sahu Markus 15 Bible Online

Markus 15 - Sahu bible

Markus 15

¹Da-daini i'a moju, Mahkamah 'Agama[31] mo-moini jau-jau 'aḏi masigaro'o re mafakati. Ananga 'aḏi soma'a piri'u Yesus re 'U gasa i'a ra gubernur Pilatus.

²Pilatus 'o sano ra Yesus, “Ngana nena-ne, ngowa'a Yahudi manga 'olana, bolo ua?” Yesus 'o sangoro, “Tero mode'e sa'olo ngana no kanau.”

³'Imam-'imam ma sae'e 'aḏi singadolo manga da'awa ma repe 'aḏi kalaki 'a Yesus.

⁴Ḏua Pilatus 'o sano ra Unanga, “I'a sa'olo, Ngana no sangoro ua? No 'isene manga da'awa ma repe ya singadolo ra Ngoi, 'aḏi kalaki Ngana.”

⁵Mada'a Yesus kama sangoro ceka'a i'a mai ua, singadolo Pilatus 'o heranga masala.

⁶Wakutu 'o Paskah ma Wangere, biasa ḏua 'a Pilatus balasu 'o sibebasa ngowa'a bui matengo, mete'e ngowa'a repe manga go-golo'o.

⁷Toma 'orasa gena-ge 'age rema ngowa'a matengo toma bui 'ai lomanga Barabas. Unanga 'o osama nyo-nyoimi toma pamarenta ma lawana re 'o sengene ngowa'a toma kaco ma dara.

⁸Ngowa'a repe 'aḏi malomu re 'aḏi golo'o ra Pilatus 'o sisupu ngowa'a matengo mete'e ananga manga go-golo'o sa'olo biasa.

⁹Pilatus 'o sano ra ananga, “Ngini nyengara ngoi to sisupu ngowa'a Yahudi manga 'Olana gena-ge?”

¹⁰'A Pilatus 'o kanau so'o gena-ge, sababu 'a waro ḏua 'imam-'imam ma sae'e re Yahudi manga bi-biri'i, ananga 'aḏi sipula'a Yesus ra unanga, sababu manga 'akala re sinyingara 'i go-goḏi.

¹¹Mada'a 'imam-'imam ma sae'e 'aḏi babata ngowa'a repe 'aḏi golo'o ra Pilatus di'a 'o sibebasa 'a Barabas.

¹²Ḏua 'a Pilatus 'o kanau i'a toma ngowa'a repe, “Na'o so'o gena, ngoi balasu to 'a'a 'oru ra Yesus, ngini ni si'aro'o Unanga 'o Yahudi manga 'Olana?”

¹³Ananga 'aḏi kanau ya siduga-duga, “Sisalib Unanga.”

¹⁴Pilatus dadunu 'o sano i'a ra ananga, “Unanga 'ai ta-sala 'oru?” Mada'a ananga ganapu poa'a ya siduga-duga, “Sisalib Unanga.”

¹⁵Ḏua Pilatus 'o sibebasa 'a Barabas, la 'a sisanangi ngowa'a repe manga 'akala re sinyingara. Gena ḏua, unanga 'o soma'a 'ai sordado 'aḏi sipo Yesus re Pilatus 'U sipula'a i'a, la ananga 'U sisalib.

¹⁶Sordado-sordado 'U gasa Yesus ra gubernur Pilatus 'ai kadato[32] ma dara. Ḏua ananga 'aḏi 'aro'o sordado mo-moini 'aḏi malomu.

¹⁷Togumu i'a, ananga mulaingi 'aḏi je-jengere 'a Yesus. Ananga 'U sipake Yesus reo juba 'ungu, kara 'aḏi 'oro ate ma umanga rema dodowo'o ya tuhu sa'olo lastari kara ya siteru ra Yesus 'ai sae'e, Unanga gena-ge sa'olo 'o 'Olana.

¹⁸Gena ḏua, ananga 'aḏi je-jengere pula'a tabea ra Unanga re 'aḏi kanau, “Suba, Yahudi manga 'Olana.”

¹⁹Ananga 'aḏi ca'olo 'a Yesus 'ai sae'e re didiki re 'aḏi obi'i Unanga re 'aḏi je-jengere maḏipolono ra Unanga.

²⁰Wakutu ananga 'aḏi je-jengere 'a Yesus togumu i'a, ananga ya woi'i 'ai juba 'ungu nange-ge kara ya singali i'a 'Ai baju masiretene. Ḏua ananga 'aḏi sisupu Unanga ra Pilatus 'ai kadato re 'aḏi gasa toma ngi'i di'a 'U sisalib.

²¹Toma ḏo-ḏagi ma dara, sordado-sordado 'aḏi oḏi'i 'age rema ngowa'a matengo 'ai lomanga Simon 'o tola'a ino. Unanga gena-ge da'a gamu ino 'o si'a toma limau. Unanga 'ai 'asala toma limau Kirene[33] ino, Aleksander re Rufus manga ḇaḇa. Ananga 'aḏi simau-mau Simon 'a doiti Yesus 'ai salib.

²²Ananga 'aḏi gasa Yesus toma ngi'i rimoi, ma lomanga Golgota (gena-ge ma ngale: Ḏoḏowi ma Ngi'i).

²³Toma ngi'i gena-ge ananga 'aḏi pula'a 'o 'anggur sicapuru reo mur ra Unanga, mada'a 'O oḏu'u 'A ka'e.

²⁴Gena ḏua, ananga 'aḏi sisalib Unanga, re sordado-sordado 'aḏi sibalangu 'Ai pakeanga nyangu, ananga 'a'a loterei, la siwaro 'a guna 'a sanga 'Ai pakeanga gena-ge.

²⁵Ananga 'aḏi sisalib Yesus ca'olo siworo da-daini i'a.

²⁶Tai sae'e ma re'u toma salib co-cori ma tubu, sordado 'aḏi sipaku i'a papanga 'i silefo Mahkamah 'Agama manga da'awa ra Unanga ma betongo so'o ne: “UNANGA NENA-NE, NGOWA'A YAHUDI MANGA 'OLANA.”

²⁷Ngowa'a to-tori'i nga muḏiḏi re 'a Yesus, ananga 'aḏi salib simete'e: matengo Tai kuwiḏa re matengo Tai kuḇali. [

²⁸Enanga 'i dadi, sababu silefo pasala ḏua toma Boku 'Ofi-'Ofi so'o ne: “Ananga 'U capu Unanga ma tero ngowa'a ma jira ḏi'i.”]

²⁹Ngowa'a ga'a 'aḏi tola'a i'a toma ngi'i gena-ge, ananga ya elala manga sae'e re 'aḏi je-jengere, “Hei, Ngana nena-ne ga'a no mau siruba Ma Jou'ongu Madutu 'ai Wala re Na simomi'i moju pa'i ma di'ara wangere ro'ange,

³⁰No 'uci toma salib gena-ge re No sisalamata 'Ani diri masiretene!”

³¹So'o gena ḏi'i, 'imam-'imam ma sae'e re guru-guru 'agama 'aḏi je-jengere Yesus re 'aḏi ma'u kanau matengo re matengo, “Unanga 'o sisalamata ngowa'a lelegu; momongolo ua 'Ai diri masiretene, Unanga 'a sisalamata yoḏu'u!

³²Na'o Ngana 'O Kristus, Israel manga 'Olana, No 'uci toma salib gena-ge, la ngomi mi oḏi'i re mi ngaku Ngana.” Ngowa'a nga muḏiḏi gena-ge, sisalib simete'e ra Yesus, ananga 'aḏi je-jengere 'a Yesus ḏi'i.

³³Re wakutu ca'olo nyagi moi re romoḏiḏi wangere 'olona tala, wangere ma la'o 'i taḏusu, re daeraha gena-ge mo-moini 'i dadi hafu-hafu singadolo ca'olo ro'ange wangere so'o ne'o.

³⁴Toma ca'olo ro'ange wangere so'o ne'o, Yesus 'o poa'a 'a siduga-duga, “Eloi, Eloi lama sabakhtani” ma ngale: “ 'Ari Jou'ongu Madutu, 'Ari Jou'ongu Madutu, i'a sa'olo No sieanga Ngoi?”

³⁵Wakutu ngowa'a nga muḏuo i'a toma ngi'i gena-ge ya 'isene Yesus 'ai iḏingi so'o gena-ge, ananga 'aḏi kanau, “Isene! Unanga 'o 'aro'o 'a Elia!”

³⁶'Age matengo tamanga sigolona, jau-jau 'o lalara re 'o 'oro bunga karang[34] 'a tono toma 'anggur ko-kowi'i re 'a sitopo'o toma ḏu-ḏubo ma dere, kara 'a situbo ie ra Yesus 'ai 'uḏu ma betu'u di'a Unanga 'a cono'o re 'o kanau, “Toma si, ino ngene wa oḏi'i wari i'a si 'a Elia 'o sapolo 'U siguci Unanga toma salib nena-ne.”

³⁷Ḏua Yesus 'o poa'a 'a siduga-duga kara 'Ai sangagara 'i togumu.

³⁸Ngalana ma da-daku kole-kole[35] ra Ma Jou'ongu Madutu 'ai Wala ma dara, enanga 'i raca kaci ḏiḏi da'u ngadolo dau.

³⁹Sordado ma sae'e 'o made-de'oso toma salib ma biono, unanga 'o oḏi'i re 'o tailako Yesus 'o sengene re 'o kanau, “Unanga nena-ne, mode-mode'e Ma Jou'ongu Madutu 'ai Ngowa'a Nau'u!”

⁴⁰'Age ḏi'i rema we-were'a nga muḏuo i'a ananga ya oḏi'i i'a toma giḏanga. Tamanga sigolona gena-ge, 'age ngo Salome, Maria Magdalena re ngo Maria (tubaie matengo Yakobus re Yoses manga ngina).

⁴¹We-were'a ananga gena-ge, ga'a 'aḏi mete'e re 'aḏi de-de'oso 'a Yesus wakutu Unanga toma Galilea. Re 'age ḏi'i rema we-were'a ma lelegu manga repe 'aḏi sapolo toma ngi'i gena-ge. Nyangu moju ananga 'aḏi ma'u mete'e ra Yesus 'aḏi tagi toma Yerusalem.

⁴²Ma wangere sa'i ri lobi'i, 'a Yusuf, ngowa'a Arimatea, 'o sapolo ra gubernur Pilatus. Unanga gena-ge 'o osama ḏi'i nyo-nyoimi toma Mahkamah 'Agama re 'o sayanga ma jingi'i. Unanga ḏi'i 'o totoma Ma Jou'ongu Madutu 'ai 'orasa 'o parenta sa'olo 'Olana. Ma wangere gena-ge, wangere ma sadia (Sabata ma wangere sa'i ri ngadolo). Sababu gena-ge, Yusuf 'a sinau'u 'ai 'akala re sinyingara 'o talaḏi ra Pilatus re 'o golo'o 'a Yesus 'ai maiyeti.

⁴³

⁴⁴Pilatus 'o heranga 'o 'isene Yesus ro sengene. Ḏua 'a Pilatus 'o 'aro'o ino sordado ma sae'e re 'o sano, “Mode-mode'e, Yesus ro sengene?”

⁴⁵Sordado ma sae'e 'a sangoro, “Yesus ro sengene,” kara Pilatus 'o nyengara Yusuf 'a 'oro 'a Yesus 'ai mayeti.

⁴⁶Ḏua, Yusuf 'o tibo ḇa'a lenan kara 'u siguci Yesus 'ai maiyeti re 'U sisao rema ḇa'a gena-ge. Gena ḏua, unanga 'U singosama maiyeti gena-ge toma kubu ma aḏu'u. [Nyangu moju ananga 'aḏi tuso'o maḏi toma bawata ma gagoro.] Togumu i'a, unanga 'o lulu maḏi rimoi 'a sidaku.

⁴⁷Toma 'orasa gena-ge ngo Maria Magdalena re ngo Maria (Yoses 'ai ngina) ananga ya tailako mayeti gena-ge ya gare le'a.