Read Sahu Markus 5 Bible Online

Markus 5 - Sahu bible

Markus 5

¹Pasala i'a, Yesus re 'Ai me-mete'e 'aḏi ngadolo da'a kaci moi toma talaga Galilea, toma daeraha Gerasa.

²Ananga aro 'uci toma oti ino, na-nau'u matengo 'o supu toma kubu ma aḏu'u ino, 'u jau i'a Yesus.

³Ngowa'a gena-ge 'o roh ma jira 'u dungosama, re 'o tegoro toma kubu ma daeraha; 'u piri'u bolo 'u rate unanga mai yoḏu'u.

⁴Ma jelele ḏua, Unanga 'o sanga lara mada'a ma rate tai giama 'a tola-tola'a re ma besi tai rou 'a rapo-rapo'o. Unanga 'o te'e madutu, matengo ua nga'unu 'u tahana.

⁵Lobi'i re wangere, unanga 'o maroka-roka toma kubu ma daeraha re toma sau-sau, 'o maboa-boa'a re 'a sinya-nyaboto 'ai lese re 'o maḏi.

⁶Toma giḏanga moju unanga 'o oḏi'i Yesus, 'o lalara 'o jau i'a 'o mapagara 'ai biono tala ra Unanga 'ai rou.

⁷Wakutu, Yesus 'o kanau i'a toma ngowa'a gena-ge, “Roh ma jira, no supu toma ngowa'a nena-ne,” roh ma jira 'i kanau ma iḏingi ya siduga-duga, “Rini 'oru ngoi, Yesus, Ma Jou'ongu Madutu toma Gau'u 'Ai Ngowa'a Nau'u? Ngoi to madigaro'o ra Ma Jou'ongu Madutu 'ai lomanga, awa no sijira ngoi.”

⁹Ḏua Yesus 'o sano unanga, “ 'Ani lomanga 'a guna?” Roh ma jira 'i sangoro, “Ngoi 'ari lomanga ‘Repe’ sababu ngomi roh ma jira lami repe.”

¹⁰Unanga 'o madigaro'o tau-taunu ra Yesus, la Unanga 'o sisupu awa roh-roh ma jira toma daeraha gena-ge.

¹¹Co-cori toma ngi'i gena-ge, 'o soto ma repe, ḏa cala ḏiḏi i'a, 'i disa ma ngo-ngoromo toma sau ma gagoro.

¹²Roh ma jira gena-ge 'i madigaro'o ra Yesus, “Soma'a ngomi mi mangosama toma soto gena-ge.”

¹³Re Unanga 'o nyengara. Dadi roh-roh ma jira gena-ge 'i supu toma ngowa'a nange-ge, re 'i mangosama toma soto. Soto mo-moini 'i wiḏi i'a toma bawata ma 'uḏu re 'i maḏupaka toma talaga ma dara singadolo ri jala.

¹⁴Soto ma sowohi-sowohi gena-ge 'aḏi lalara re sihabari toma limau re toma gamu ma sebanga. Ḏua ngowa'a 'aḏi matai supu 'aḏi oḏi'i 'oru re 'i dadi pasala ḏua.

¹⁵Ananga 'aḏi sapolo ra Yesus re 'aḏi oḏi'i 'au ngau i'a ngowa'a 'o roh ma jira 'u dungosama. Unanga 'o madi-dirini, ro mapake pakeanga re 'ai fikirana ri ḏibo la-la, singadolo ananga matai mojongo.

¹⁶Ngowa-ngowa'a 'aḏi oḏi'i masiretene mangale ngowa'a gena-ge re 'o soto gena-ge, ananga ya sijarita 'oru 'i dadi pasala ḏua.

¹⁷Dadi daeraha gena-ge ma ngowa-ngowa'a 'aḏi madigaro'o ra Yesus, “Na'o nyengara, na sisoi'i tala daeraha nena-ne.”

¹⁸Wakutu Yesus 'o mabalene toma oti, ngowa'a aro la nange-ge 'o madigaro'o ra Unanga, “Jou, na'o nyengara ngoi tini mete'e.”

¹⁹Mada'a Yesus 'o kanau, “No maḏibo re no siajele tani ioro re nongoḏu 'oru Ma Jou'ongu Madutu 'o si'a'a ḏua ra ngana singadolo ngana reno la.”

²⁰Ngowa'a gena-ge 'o tagi re 'a sihabari toma Limau Nyagi Moi ma daeraha mangale Yesus 'o si'a'a pasala ḏua ra unanga. Ngowa'a mo-moini ya 'isene, 'aḏi heranga masala.

²¹Yesus 'o maḏibo moju toma talaga ma 'uḏu da'a kaci moi. Ngowa'a manga repe 'aḏi malomu re 'U sigoloḏi Unanga.

²²Matengo ḏi'i 'o sapolo, 'ai lomanga Yairus, unanga gena-ge 'o dadi wala puji ma sae'e toma limau gena-ge. Wakutu unanga 'o oḏi'i Yesus, unanga 'o mapagara 'ai biono ra Yesus 'ai rou

²³re 'o madigaro'o mode-mode'e, “Jou, ngoi 'ari ngowa 'olo were'a, ga'a ta dadalara, mo siḏi lai siḏi, 'ami umuru musungu nyagi moi re romoḏiḏi. Nga'unu gari'a no sapolo re no siteru 'ani giama ra munanga, la mo la re mo sengene awa.”

²⁴Ḏua Yesus 'o tagi mamete'e ra Yairus. Ngowa'a repe 'aḏi malomu singadolo 'aḏi tu-tuḏu Unanga.

²⁵Toma ngowa'a repe manga sigolona, 'age rema we-were'a matengo mo siḏi mi ngaunu pa'ala, 'i ma'u dogo ḏi'i maoḏi'i 'ami siḏi, ma di'ara musungu nyagi moi re romoḏiḏi ḏua.

²⁶'Ami 'ori i'a rana mai mawu'unu rema moini ja'a mi sou'u ma bo-bangu, mada'a mo la ua; siḏibo ḏi'i 'ami si-siḏi ganapu dogo!

²⁷We-were'a gena-ge ma 'isene ḏua mangale 'a Yesus. Dadi munanga mo mafikiri i'a, “Na'o ta cigi 'Ai juba ḇato, ngoi to la.” Sababu gena-ge, munanga mo masebanga i'a ra Yesus 'ai ḏuḏunu toma ngowa'a repe manga sigolona.

²⁹Munanga macigi 'a Yesus 'ai juba, re toma 'orasa gena-ge ḏua, 'ami ngaunu pa'ala riwara. Munanga mo mabasono tala re mo la.

³⁰Toma 'orasa gena-ge ḏua, Yesus 'o mabasono 'ai de-de'e 'i si-la ngowa'a. Ḏua Unanga 'o magelelo tai ḏuḏunu toma ngowa'a repe, re 'O sano, “ 'A guna 'a cigi 'ari juba?”

³¹'Ai me-mete'e 'aḏi kanau i'a, “Jou, no oḏi'i masiretene 'age rema ngowa'a repe 'aḏi malomu singadolo 'aḏi tu-tuḏu ngana, simara i'a sa'olo no sano moju 'a guna ri cigi ngana?”

³²Mada'a, Yesus oḏi'i kuwiḏa re kuḇali, biono re ḏuḏunu 'O mau dero waro 'a guna 'U cigi Unanga.

³³We-were'a aro mo la nange-ge, mo terewete sababu mo mojongo. Ḏua munanga mo jau i'a mapagara 'ami biono tala ra Yesus, kara ma 'akoru mo-moini gena-ge.

³⁴Ḏua Unanga 'o kanau i'a ra munanga, “ 'Ari ngowa'a, sababu ngana no ngaku Ngoi, ngana no la. No tagi rani dame sababu ngana reno la.”

³⁵Yesus 'o ka-kanau moju, 'a Yairus 'ai so-soma'a nga muḏuo i'a 'aḏi sapolo da'a ra unanga 'ai wala ino. Ananga 'aḏi kanau i'a ra unanga, “Tuanga, 'ani ngowa'a were'a remo sengene. Tuanga, no sikangela Guru rawara.”

³⁶Yesus ya'u siwaro i'a ua ananga, re 'o kanau i'a ra Yairus, “Mojongo awa, ngaku ḇato.”

³⁷Ḏua Yesus re 'a Yairus ya dowanga manga ḏo-ḏagi. Mada'a Yesus 'o simaha ua ananga matengo i'a 'aḏi mete'e ḏuga-ḏuga Petrus, Yakobus re 'a Yohanes - ananga nga muḏiḏi gena-ge gia nongoḏu.

³⁸Wakutu ananga 'aḏi ngadolo ra unanga 'ai wala, Yesus 'o 'isene ngowa'a 'aḏi manyiwere re ya rerese ma gaḏi.

³⁹Ḏua Yesus 'o osama re 'O kanau i'a ra ananga, “I'a sa'olo ni manyiwere re ni 'aḏi? Ngowa 'olo gena-ge mo sengene ua; munanga mo otu ḇato!”[8]

⁴⁰Ananga 'U nye-nyelo'o Unanga 'ai demo-demo. Ḏua, Unanga 'o soma'a ananga mo-moini 'aḏi supu. Gena ḏua, Unanga 'o gasa ma ngina re ma ḇaḇa re 'ai me-mete'e nga ḏuange, ananga 'aḏi osama toma ngowa 'olo were'a 'ami kamara ma dara.

⁴¹Yesus 'a gu'u 'ami giama re 'o kanau i'a ra munanga, “Talita kum” ma ngale: “Ngowa 'olo were'a, no momi'i.”

⁴²Mosolese gena-ge jau-jau mo momi'i mo 'uci re mo tagi. Ananga ya oḏi'i munanga dadunu mo 'ahu moju, 'aḏi heranga masala.

⁴³Mada'a, Yesus sipo-poma ananga mo-moini, “Ni sihabari awa ra guna ḇato.” Ḏua Unanga 'o soma'a i'a ra ma ḇaḇa re ma ngina, “Ni pula'a 'ami ngo-ngoromo.”