Read Sahu Markus 6 Bible Online

Markus 6 - Sahu bible

Markus 6

¹Toma ngi'i gena-ge, Yesus re 'Ai me-mete'e ananga 'aḏi maḏibo Tai limau Nazaret.

²Sabata ma wangere, Unanga 'o mulaingi 'O doto'o toma wala puji re toma ngi'i gena-ge ngowa'a manga repe. Wakutu ananga gena-ge ya 'isene Unanga 'ai do-doto'o, 'aḏi matai heranga. Re 'aḏi kanau je-jengere, “Unanga ne le'a ino singadolo 'O doto'o so'o gena-ge mai nyengara?! Unanga 'Ai 'akala soro'unu gena-ge sanga le'a ino?! Re Unanga 'Ai kuasa sanga le'a ino singadolo nga'unu 'O 'a'a ga'a hera-heranga?!

³Unanga gena-ge wala ma tukanga ḇato! 'Ai ngina ngo Maria re 'Ai no-nongoḏu 'a Yakobus, Yoses, Yudas re 'a Simon re 'Ai biḏa-biḏanga nongoḏu 'aḏi tegoro 'ane-ne ḏi'i.” Sababu gena-ge, ngowa'a Nazaret 'aḏi dawongo Unanga ua.

⁴Ḏua Yesus 'o kanau i'a ra ananga, “Nabi matengo, na'o ngowa'a lelegu toma ngi'i le'a ḇato, ananga 'u silamo'o. Mada'a na'o tai gamu masiretene, tai ioro re nongoḏu manga sigolona; ananga 'u silamo'o ua.”

⁵Toma ngi'i gena-ge, Yesus 'o heranga sababu ananga 'aḏi ngaku ua Unanga 'ai kuasa ra Ma Jou'ongu Madutu ino. Dadi, Unanga 'o 'a'a ga'a hera-heranga repe ua, ḏuga-ḏuga 'a siteru 'ai giama toma ngowa-ngowa'a siḏi manga sae'e dadi 'aḏi la. Togumu i'a, Yesus 'o tagi 'o doto'o toma gamu-gamu ma sebanga.

⁶

⁷Unanga 'o 'aro'o 'Ai me-mete'e nga nyagi moi re nga muḏiḏi re 'O sibalangu nga muḏiḏi-nga muḏiḏi re 'O pula'a kuasa ra ananga, la 'aḏi dusu'u roh-roh ma jira.

⁸Yesus 'o soma'a ananga, “Wakutu ni tagi gasa didiki ḇato; na gasa awa 'ori i'a ma lelegu sa'olo ngo-ngoromo, pipisi re 'o tohe.

⁹Pake ninga tarupa nyengara mada'a na gasa baju pai'i awa, ḏuga-ḏuga rimoi ḇato.”

¹⁰Re Unanga 'o kanau moju, “Na'o ngowa'a toma wala ḏu moi 'aḏi dawongo ngini, tegoro ḇato 'age singadolo ni tagi sisoi'i tala limau gena-ge.

¹¹Wakutu ngini ni ngadolo toma ngi'i rimoi na'o ananga 'aḏi dawongo ngini ua re 'aḏi 'isene ninga do-doto'o ua; na sisoi'i tala re na sesara ninga rou ma korou'u. Enanga gena-ge 'i dadi nana'o rimoi ananga 'aḏi dawongo ua Habari Roanga re na'o 'aḏi maḏibo ua toma ngo'omo boloto, ḏuanga i'a ananga sanga hukumu ra Ma Jou'ongu Madutu!”

¹²Pasala i'a, Yesus 'o soma'a 'Ai me-mete'e 'aḏi tagi re singadolo ngowa-ngowa'a balasu maḏibo toma ngo'omo boloto.

¹³Yesus 'ai me-mete'e 'aḏi dusu'u roh-roh ma jira ma repe re 'aḏi siḇianga Zaitun ma goroho re ngowa-ngowa'a siḏi manga sae'e singadolo 'aḏi la.

¹⁴'Olana Herodes 'a 'isene ḏua mo-moini mangale habari-habari gena-ge sababu 'a Yesus 'ai lomanga ngowa'a ya waro le'a bolo le'a. 'Age rema ngowa'a 'aḏi kanau, “Yesus ne 'a Yohanes tukanga baptis, unanga gena-ge dadunu 'o 'ahu moju. Sababu gena-ge, Yesus rai kuasa 'o 'a'a ga'a hera-heranga.”

¹⁵Mada'a ngowa'a lelegu ḏi'i 'aḏi kanau, “Unanga gena-ge nabi Elia.” 'Age ḏi'i 'aḏi kanau, “Unanga ma tero sa'olo nabi 'ua re 'au wali.”

¹⁶Wakutu 'Olana Herodes 'a 'isene 'o kanau, “Mode-mode'e nena-ne 'a Yohanes tukanga baptis. 'Au wali ngoi to soma'a ngowa'a ya tola'a 'ai camala ḏua. Mada'a 'orasa nange-ne unanga gena-ge dadunu 'o 'ahu.”

¹⁷'Au nga'ene, Yohanes 'o sengene nyangu, 'a Herodes 'o molo'ara ngo Herodias. 'A ngo Herodias 'a Filipus 'ai were'a, re 'a Filipus re 'a Herodes ananga gena-ge gia nongoḏu. Yohanes 'o ḇangata tau-taunu 'a Herodes, “Ngana na mete'e ua Musa 'ai hukumu sababu ngana na molo'ara 'ani ioro 'ai were'a.”[9] Sababu gena-ge, Herodes 'o soma'a sordado-sordado 'aḏi cako'o 'a Yohanes re 'u singosama bui re Herodias 'ami 'akala re sinyingara 'i go-goḏi re mau sisengene 'a Yohanes. Mada'a 'i yoḏu'u sababu Herodes 'o soma'a ngowa'a balasu jaga la-la ino 'a Yohanes toma bui, la Yohanes sengene awa. Herodes si'a'a so'o gena, sababu unanga silamo'o 'a Yohanes re unanga 'a waro Yohanes ge ngowa'a loasa re banari re 'o 'ofi-'ofi. Unanga 'a nyanyaḏi 'o 'isene Yohanes 'ai demo-demo, mada'a tai 'akala re sinyingara ma dara 'i kangela masala.

¹⁸

¹⁹

²⁰

²¹Ma ḏo-ḏogumu, ngo Herodias mo sanga ngo'omo wakutu Herodes 'ai musungu 'i tero. Herodes 'o 'a'a laya lamo'o re 'aro'o mo-moini ngowa'a la-lamo'o re sordado ma sae'e re gamu Galilea ma bi-biri'i.

²²Toma laya lamo'o gena-ge, ngo Herodias 'ami ngowa'a mosolese mo roje; 'ami roje 'i daene Herodes re 'ai ioro nongoḏu manga 'akala re sinyingara. Ḏua Herodes 'o kanau i'a ra munanga, “Ngana no mau 'oru, golo'o ḇato. Ngoi to pula'a ngana.”

²³Ḏua Herodes 'o sijaji re 'o masisasi ra munanga. Herodes 'o kanau, “ 'Oru ḇato ngana no golo'o, ngoi ta pula'a! Kalaha 'ari 'ori i'a rana na palangu tero-tero!”

²⁴Ḏua munanga gena-ge mo supu re mo sano tami ngina, “Meme, ngoi to golo'o 'oru ra Herodes?” Ma ngina mo sangoro, “No golo'o 'a Yohanes 'ai sae'e.”

²⁵Munanga gena-ge jau-jau mo maḏibo re mo kanau ra Herodes, “Ngoi to golo'o 'a Yohanes tukanga baptis, unanga gena-ge 'ai sae'e, na sigare toma bokolo kara na gasa ino.”

²⁶Wakutu Herodes 'a 'isene 'ami go-golo'o so'o gena, unanga 'ai 'akala re sinyingara 'i kangela masala. Mada'a unanga 'a itomo yoḏu'u sababu unanga 'o sijaji re 'o masisasi ḏua tai ioronongoḏu gena-ge.

²⁷Dadi unanga 'o soma'a 'ai sordado 'o tola'a 'a Yohanes 'ai camala. Ḏua 'ai sordado gena-ge 'aḏi tagi toma bui, kara 'u tola'a 'a Yohanes 'ai camala.

²⁸Gena ḏua, unanga 'a sigare Yohanes 'ai sae'e toma bokolo re 'a gasa re 'o pula'a toma mosolese gena-ge, kara munanga mo pula'a ḏi'i tami ngina.

²⁹Wakutu 'a Yohanes 'ai me-mete'e ya 'isene, ananga 'aḏi tagi ya 'oro 'ai maiyeti re ya sigare toma kubu ma aḏu'u.

³⁰So'o 'au nange, Yesus 'o cumutu 'Ai so-soma'a 'aḏi tagi singadolo Habari Roanga. Pasala i'a, ananga 'aḏi maḏibo moju re 'aḏi malomu ra Yesus. Ananga ya siajele mangale ananga ya si'a'a re 'aḏi doto'o ngowa-ngowa'a mangale Habari Roanga.

³¹Yesus re 'Ai me-mete'e 'aḏi de-de'oso ngowa'a repe 'aḏi tagi ḏibo ra ananga singadolo 'aḏi oromo mai sa'i yoḏu'u sababu 'aḏi sanga donga ua. Sababu gena-ge, Yesus 'o kanau i'a tai me-mete'e, “Ino, ngene wo masai'i toma ngi'i ga-garura, la ngini nga'unu ni mangomasa ceka'a ua.”

³²Ḏua Yesus re 'Ai me-mete'e 'aḏi mabalene toma oti re 'aḏi sidete toma ngi'i ga-garura.

³³Mada'a ngowa'a repe 'aḏi oḏi'i re ya'u waro Yesus re 'Ai me-mete'e ya'u sisoi'i tala ananga. Dadi ngowa-ngowa'a toma limau mo-moini toma daeraha gena-ge 'aḏi la-lalara ya sitola'a ma ji'o tagi mete'e tana'a dudungu re ananga 'aḏi ngadolo siḏa.

³⁴Wakutu Yesus re 'Ai me-mete'e 'aḏi 'uci toma oti, Unanga 'o oḏi'i ngowa'a repe. Re Tai 'akala re sinyingara 'i baolo dadalara ra ananga gena-ge, sababu 'o oḏi'i i'a ananga sa'olo doba kama sowohi ua. Ḏua Yesus 'o pula'a do-doto'o ma repe ra ananga.

³⁵Ma wangere so'o ne'o, 'ai me-mete'e 'aḏi kanau i'a ra Unanga, “Sa'i ri lobi'i re ngi'i ne 'i tiwongo i'a.

³⁶Jobilaha Jou no soma'a ngowa'a repe 'aḏi tagi toma gamu-gamu bolo toma do'usu-do'usu ma sebanga, la 'aḏi tibo manga ngo-ngoromo.”

³⁷Mada'a Yesus 'o sangoro, “Ngini ni pula'a oromo ananga.” 'Ai me-mete'e dadunu 'aḏi kanau, “Wah, ngowa'a manga repe nena-ne. Na'o ngomi pula'a roti ra ananga, balasu tibo roti ma ijana pipisi salaka latu ḏiḏi!”[10]

³⁸Ḏua Yesus 'o sano, “Ninga roti ngai muḏuo? Tagi ni disa si.” Ananga tagi ya disa toma ngowa'a repe manga sigolona kara 'aḏi ḏibo 'aḏi kanau, “Ngomi mi sanga roti ngai romotoa re nyao'o ngai ḏiḏi.”

³⁹Ḏua Yesus 'o soma'a ngowa'a repe 'aḏi tegoro toropo moi-toropo moi toma rurubu ma re'u.

⁴⁰Ngowa'a repe gena-ge 'aḏi tegoro re 'aḏi masifato toropo moi-toropo moi; 'age toropo moi nga latu moi, 'age ḏi'i nga nyagi romotoa.

⁴¹Ḏua Yesus 'o 'oro roti re nyao'o nange-ge re Unanga 'o talaḏi ie da'u diwanga re 'O sibere ie murasa ma la ra Ma Jou'ongu Madutu. Togumu i'a, Unanga 'A poti-poti ma roti re 'A pula'a i'a Tai me-mete'e, ḏua ananga ya sibalangu di'a ngowa'a repe. So'o gena ḏi'i, Unanga 'a sibalangu nyao'o gena-ge toma ngowa'a mo-moini.

⁴²Ananga mo-moini 'aḏi oromo singadolo 'aḏi wunusu.

⁴³Togumu i'a, Yesus 'ai me-mete'e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga.

⁴⁴'O na-nau'u ḇato ḏa nga cala romotoa.

⁴⁵Togumu i'a, Yesus 'o soma'a 'Ai me-mete'e 'aḏi mabalene toma oti re 'aḏi sidete siḏa i'a da'a talaga kaci moi toma limau Betsaida, kara 'O soma'a ngowa'a repe gena-ge 'aḏi maḏibo.

⁴⁶Wakutu ngowa'a repe gena-ge 'aḏi palisi'i i'a, Yesus 'o pere ie toma sau re 'o manyiata.

⁴⁷Wakutu 'Ai me-mete'e 'aḏi sidete, waro ya ngadolo toma talaga ma golona, lobi'i ya'u siḏuḏono; mada'a Yesus toma tana'a dudungu moju.

⁴⁸Unanga 'o oḏi'i ananga 'aḏi 'amono kangela masala sababu 'aḏi tomo karawiana. Sababu gena-ge, cori wangere i'a Yesus 'o tagi mete'e toma ḇanyo ma re'u re 'o masebanga i'a ra ananga manga oti.[11]

⁴⁹Wakutu ananga 'aḏi oḏi'i Unanga 'o tagi toma ḇanyo ma re'u, ananga 'aḏi ta'ajiri 'O ca'ata, 'i matuhu sa'olo ngowa'a, singadolo mo-moini 'aḏi mojongo re 'aḏi sawana. Mada'a Yesus jau-jau 'o kanau ra ananga, “Masiogoro! Ngoi ne Yesus. Dadi mojongo awa!”

⁵⁰

⁵¹Ḏua Unanga 'o mabalene tamanga oti re karawiana gena-ge ri taraha. Yesus 'ai me-mete'e 'aḏi matai heranga woḏi, singadolo ya waro manga gogare riwara;

⁵²sababu ya sahe ua ga'a hera-heranga mangale oromo roti ngowa'a nga cala romotoa gena-ge ma maksudu. Ananga 'aḏi ngaku ua Yesus 'ai kuasa ma lamo'o sababu manga 'akala re sinyingara lai te'e.

⁵³Wakutu ananga 'aḏi ngadolo da'a talaga kaci moi toma limau Genesaret, ananga 'aḏi masabi i'a toma talaga ma 'uḏu.

⁵⁴Ananga jau-jau 'uci toma oti, ngowa-ngowa'a 'aḏi oḏi'i 'age Yesus 'o sapolo da'a ino.

⁵⁵Gena ḏua, ngowa-ngowa'a repe 'aḏi matai lalara tamanga daeraha, kara 'aḏi 'aro'o re 'aḏi sidola'a ngowa'a siḏi mo-moini. Ananga siga'e toma usungana, kara gasa i'a ra Yesus.

⁵⁶Toma ngi'i le'a ḇato Yesus 'o sapolo, bae toma limau, bae toma gamu-gamu bae toma do'usu, ananga matai gasa manga ngowa-ngowa'a siḏi re ya siga'e toma ngi'i-ngi'i rame. Wakutu Unanga 'o tola'a ino, ngowa-ngowa'a siḏi gena-ge 'aḏi madigaro'o re 'aḏi masingano-nganono na'o nyengara gari'a tiaro ya cigi 'ai juba ma dere ḇato. Ḏua ngowa-ngowa'a siḏi mo-moini ga'a 'aḏi cigi 'ai juba ma dere 'aḏi la.