Read Sahu Markus 7 Bible Online

Markus 7 - Sahu bible

Markus 7

¹Ngowa'a Farisi re guru 'agama nga muḏuo i'a da'a toma limau Yerusalem ino 'aḏi sapolo ra Yesus.

²Ananga 'aḏi oḏi'i Yesus 'ai me-mete'e nga muḏuo i'a 'aḏi oromo manga giama ya soso'o ua, ananga gena-ge 'aḏi mete'e ua ete re dotumu manga 'adata! [

³Ngowa'a Farisi bolo ngowa'a Yahudi, ananga mo-moini ya mete'e ete re dotumu manga 'adata re 'atoranga moju: Ananga 'aḏi oromo 'i yoḏu'u moju na'o ya soso'o manga giama nyangu.

⁴'Oru ḇato 'aḏi tibo toma pasara, ya oromo 'i yoḏu'u moju na'o 'aḏi ma'ori'i nyangu. Re ma repe moju ananga manga 'atoranga ya cako'o namo-namoto, 'i ma tero sa'olo soso'o galasi, sawo'o, re 'o pakakasa tamḇaga.]

⁵Sababu gena-ge, ngowa-ngowa'a Farisi re guru-guru 'agama ananga 'aḏi sano ra Yesus, “I'a sa'olo 'Ani me-mete'e 'aḏi oromo manga giama ya soso'o ua? Ma sababu 'oru ananga ya mete'e ua ete re dotumu manga 'adata re 'atoranga?”

⁶Yesus 'a sangoro, “Ngini ngowa'a munafiki! Tero mode'e, 'a Yesaya 'a sinubuata pasala ḏua mangale ngini: ‘Ma Jou'ongu Madutu 'o kanau so'o ne: Ngowa-ngowa'a gena-ge 'aḏi silamo'o Ngoi pa'i tamanga 'uḏu ma betu'u, mada'a tamanga 'akala re sinyingara 'i kiḏanga ra Ngoi.

⁷'I parasaja, ananga gena-ge 'aḏi silamo'o re siḏubuso Ngoi; sababu ananga manga do-doto'o pa'i manusia manga 'atoranga ḇato, ga'a 'i mete'e Ngoi 'ari do-doto'o ua!’

⁸Ngini ni cako'o namo-namoto manusia manga 'atoranga mada'a ngini ni mete'e ua Ma Jou'ongu Madutu 'ai parenta!”

⁹Ḏua Yesus dadunu 'o kanau, “Ngini ni pahe masala; ni sito-to'u Ma Jou'ongu Madutu 'ai parenta singadolo ni cako'o namo-namoto ninga do-doto'o masiretene.

¹⁰'A Musa 'o pula'a pasala ḏua parenta nena-ne: ‘Silamo'o ninga ḇaḇa re ninga ngina. 'A guna ḇato 'o sosowini 'ai ḇaḇa bolo 'ai ngina; balasu 'o sanga hukumu sengene.’

¹¹Mada'a ngini ni sidoto'o so'o ne: 'A guna ḇato nyengara 'o kanau tai ḇaḇa bolo ngina ‘Ngoi to riono ngini yoḏu'u sababu ngoi to pula'a mo-moini ma tero sa'olo jou-jou ra Ma Jou'ongu Madutu.’ Dadi ngini ni dola'aku unanga 'o riono 'ai ḇaḇa re ngina.

¹³Sababu ngini ni doto'o so'o nena-ne, ni singi-ngiranga Ma Jou'ongu Madutu 'ai parenta. 'Age Ma Jou'ongu Madutu 'ai parenta ma repe moju, ngini na singi-ngiranga ma tero sa'olo nena-ne ḏi'i.”

¹⁴Ḏua Yesus 'o 'aro'o ngowa'a repe gena-ge soi moi moju re 'O kanau ra ananga, “Ni 'isene la-la, la ni sahe!”

¹⁵'Oru ḇato ga'a 'i osama toma lese, enanga gena-ge 'i si'a'a ua ngowa'a matengo 'o dadi najis ra Ma Jou'ongu Madutu 'ai momina. Siḏibo ḏi'i, 'oru ga'a 'i supu toma lese, enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina. [

¹⁶Dadi, na'o reninga ngau'u, ni 'isene.]

¹⁷Wakutu Yesus 'o sisoi'i tala ngowa'a repe gena-ge Unanga 'o osama toma wala re 'Ai me-mete'e 'aḏi sano, “Ma maksudu 'oru 'ade-'ade gena-ge?”

¹⁸Ḏua Yesus 'o kanau i'a ra ananga, “Ngini ni sahe nyangu ḏi'i! 'Oru ḇato 'i osama ra matengo 'ai lese, enanga gena-ge 'i si'a'a yoḏu'u ngowa'a matengo 'o dadi najis ra Ma Jou'ongu Madutu 'ai momina.

¹⁹Sababu 'ori i'a osama gena-ge 'i mete'e ua toma 'akala re sinyingara mada'a 'i mete'e po'olo ḇato, kara 'i supu.” Rema demo-demo gena-ge, Yesus 'o kanau ngo-ngoromo mo-moini 'i wosono ua.

²⁰Ḏua Yesus dadunu 'o kanau, “Ga'a 'i supu toma ngowa'a, enanga gena-ge 'i si'a'a ngowa'a matengo 'o dadi najis ra Ma Jou'ongu Madutu 'ai momina.

²¹Sababu da'a toma 'akala re sinyingara ma dara ino, 'i baolo 'ulungu ma jira singadolo 'aḏi sudala, tori'i, sisengene ngowa'a.

²²tinikai, jajaha demo, madiga'a 'ori i'a ma jira, da-danata re do-dowoka, 'akala 'i romanga reo bo-bosono, 'akala si-siḏi, momole re 'isene do-doto'o ua.

²³'Ori i'a ma jira gena-ge, 'i baolo toma 'akala re sinyingara ma dara, mo-moini gena-ge 'i si'a'a ngowa'a matengo 'o dadi jira ra Ma Jou'ongu Madutu 'ai momina.”

²⁴Gena ḏua, Yesus 'a sisoi'i tala ngi'i gena-ge re 'o tagi so'o toma daeraha co-cori limau Tirus. Unanga osama toma wala ḏu moi re 'O oḏu'u ngowa'a ya waro Unanga 'age toma ngi'i gena-ge. Mada'a ngowa'a ya waro ḇato.

²⁵Ngowa 'olo were'a matengo 'o roh ma jira mi dungosama. Munanga 'ami ngina ngowa'a Yunani mo sibuoro toma daeraha Fenisia toma Siria. Ngina gena-ge mo 'isene mangale Yesus, munanga jau-jau mo sapolo re mo mapagara 'ami biono tala ra Yesus 'ai rou. Munanga mo madigaro'o Unanga 'o dusu'u roh ma jira tami ngowa 'olo were'a gena-ge.

²⁷Yesus 'o kanau ra munanga, “Ngowa 'olo-ngowa 'olo balasu oromo siḏa. Rousu ua, na'o wo 'oro ngowa 'olo manga roti, kara wa pula'a toma nunu'u.”[12]

²⁸We-were'a gena-ge mo kanau, “Tero mode'e Jou, mada'a 'o nunu'u enanga toma meja ma 'aḏu mai oromo, na'o ngowa 'olo manga so-sorono 'i eta'a tala!”

²⁹Ḏua Yesus 'o kanau ra munanga, “Sababu 'ani sa-sangoro so'o gena, roh ma jira 'i supu ḏua tani ngowa'a were'a. Dadi no maḏibo ḇato.”

³⁰Ngina gena-ge mo maḏibo toma wala. Munanga mo sanga i'a 'ami ngowa 'olo were'a gena-ge re mo otu toma dederu re mode-mode'e roh ma jira 'i supu ḏua ra munanga.

³¹Gena ḏua, Yesus 'o sisoi'i tala daeraha ma'u co-cori limau Tirus re 'o tagi sisa toma talaga Galilea. Unanga 'o mete'e limau Sidon re 'a sitola'a daeraha, ma lomanga Limau Nyagi Moi.

³²Toma ngi'i gena-ge, ananga 'aḏi gasa ino ngowa'a matengo 'o popongolo re 'o mou ra Yesus. Ananga 'aḏi madigaro'o ra Unanga, “Yesus, na siteru 'Ani giama toma ngowa'a gena-ge, la unanga 'o la.”

³³Yesus 'o gasa ngowa'a popongolo re 'o mou nange-ge re 'aḏi masai'i i'a toma ngowa'a repe. Yesus 'a singosama 'ai rarag̱a tai ngau'u kaci ḏiḏi ma dara, kara 'A obi'i 'ai rarag̱a re 'A sipiasa ngowa'a gena-ge 'ai yai'i.

³⁴Gena ḏua, Yesus 'o talaḏi ie diwanga re 'a iḏala 'ai sangagara re 'o kanau i'a toma ngowa'a gena-ge, “Efata,” ma ngale: “Welanga ḏua!”

³⁵Ngowa'a gena-ge 'ai popongolo 'i iranga re 'ai yai'i 'i wale singadolo 'o kanau mai ri nyengara.

³⁶Togumu i'a, Yesus 'o sipo-poma ananga ya sihabari awa ra guna ḇato. Kalaha Yesus 'a sipo-poma so'o gena, ananga ganapu ya sihabari! Ḏua ngowa'a mo-moini ya 'isene 'aḏi heranga masala. Ananga 'aḏi ma'u kanau, “Unanga 'o 'a'a mo-moini gena-ge lai rousu. Unanga 'o si-la ngowa'a popongolo mai nyengara 'aḏi 'isene re ngowa'a mou mai nyengara 'aḏi kanau!”